كيجاب في (سباحة) مختلفة مع (السوداني): انا ما(عوام)...وهذه قصتي مع السباحة (جوه الجزارة)..!!! حوار: يوسف دوكة/ تصوير : احمد طلب الجلوس معه ممتع..فقد تجلس معه لساعات وتحسبها دقائق معدودة..لان الرجل صاحب دعابة وسرعة بديهه..يجعلك تضحك من اعماق قلبك..لا يتكلف في الحديث..ويحدثك بكل اريحية وعفوية عن اشياء عنه قد تبدو صغيرة.. ولكن بسرده التاريخي والشيق لها، تكتشف انها بعكس ما تظن سابقاً..انه السباح العالمي السلطان (كيجاب)، والذى التقينا به داخل مباني الصحيفة و(سبحنا) في حياته لنصطاد الحروف التالية: *أول سباق شاركت فيه.؟ كان اول سباق لي في عام 1969 وكنت حينها جديد في السباحة وفي الدرجة الثانية في ترتيب السباحة وعندما شاركت في ذلك السباق صعدت الي الدرجة الاولي ومن ديك و(عيك ). *(البحر بشيل عوامو).. مقولة تتردد كثيرا.. الم تصيبك بالتوجس.؟ ايوا صاح البحر بشيل (العوام)... لكن انا (سباح). *ماهو الفرق.؟ (العوم) بيكون عشوائي.. يعني ممكن كل الناس و(تبلبط) ساااكت.. اما السباح فهو الشخص المدرب والمؤهل والحمد لله انا سباح ولكن العوامين كتار في السودان والله يستر.! *هل اختلفت السباحة بين الامس واليوم ..؟ توقف برهة وقال بحسرة : (ياحليل زمن السباحة واتحاد السباحة.. والسباحة في السودان في زمن الرئيس نميري كانت الرياضة الاولي.). *ماهو سبب ذلك التراجع في رأيك.؟ بالتأكيد حل اتحاد السباحة وتردى اوضاع تلك الرياضة بشكل عام، ومن المفروض وزي ما بقولوا (يدوا العيش لخبازو.. ولو بالنص).. والشاطر يفهم.!! *ماهو اجمل سباق لكيجاب.؟ سباق 24ساعة في بحيرة دائرية في كندا وحينها حصلت علي جائزة الجنتل مان. *ماهي قصتك مع الرئيس السابق نميري في سباق العيلفون ..؟ قبل هذا السباق بثلاثة ايام (عضاني) كلب وسبب لي الما في عضلة رجلي اليمنى، واصبت بحمى شديدة واعتذرت عن السباق.. ولكن اللجنة المنظة اصرت ان اشارك وبعد ما شاركت حضر الرئيس نميري الي مكان السباق وكان ينظر لي في المقدمة ولم يراني ولا حتي في الترتيب الخامس، وصاح بصوت عال: (انتو كيجاب غرق ولا شنو ..؟)... وجاوبته وانا في مؤخرة السباق: (ايوا يارئيس).. فقال لي بإستغراب: (كيجاب الحاصل ليك شنو).. فقلت له (عضاني) كلب ياريس.. فقال لي ضاحكا: (عضاك كلب..!!! انت عايم في جزارة وللا شنو..؟). *من المعروف انك في عام 1984 احضرت الملاكم محمد علي كلاي ماهو الهدف من تلك الدعوة .؟ لم يكن الهدف رياضيا ولكن لان محمد علي مسلم وكانت تربطني به علاقة طيبة، فهو رجل مسلم وقدمت له الدعوة لحضور المؤتمر الاسلامي في ذلك التاريخ، فلم يتردد من قبول الدعوة وزار السودان، وقعد في السودان شهر، وحينها ذهبت للرئيس نميري وقلت له ممازحا: ياريس انا جبت ليكم كلاي انت بتقدر تجيب لينا (ريغن)..؟؟ فقال لي: (امشي ريغن في عينك). *موقف طريف لازلت تستحضره..؟ مرة كنت مسافرا الي كندا.. وكنت لازم اقعد يوم في لندن لظروف الطيران.. وقدمت جوازي في مطار لندن لضابط الجوازات وكان الضابط متعجرفاً وسألني سؤالا فيه نوع من الاستهتار وقال لي: (انت عايز تقعد كم يوم في لندن ..؟).. واجبته بسرعة وقلت له: (انتو لمن دخلتو السودان للاستعمار وحكمتونا 50 سنة في زول قال ليكم عايزين تقعدو كم سنة).؟؟
