عادة قررت إعتمادها منذ هذا التاريخ، وهي أنني سأختار يوماً من كل شهر لأنظر فيه على قائمة الكبار من الشعراء في بلادي،وأقف لهم هذا العمود، شاهداً على مواقفهم الإنسانية والسودانية الشجاعة، وتوقيع منا لهم على صك الاعتراف بالجميل. كان يمكن أن نفرد مساحة في أي من صفحات هذا الملف لننشر فيها قصيدة أو مقال أو حتى مجموعة قصائد، لكنني أردت ان اعتمد مساحتي الخاصة ، ليكون الحدث أكثر خصوصية – إن سمح القراء- لأجملها بتوقيع رد الجميل لكل الكبار في السودان، الذين سنترك المساحة لأحد أعمالهم لتتحدث عنهم. والوقف الاول .. هو لشاعر الشعب أمده الله بالصحة والعافية .. محجوب شريف : قصيدة « حنبنيهو» حنبنيهو .. حنبنيهو البنحلم بيهو يوماتى وطن شامخ وطن عاتى وطن خيّر ديمقراطى وطن مالك زمام أمرو ومتوهج لهب جمرو وطن غالى .. نجومو تلالى فى العالى إراده سيادة حريّة مكان الفرد تتقدم قيادتنا الجماعيّة مكان السجنِ مستشفى مكان المنفى كليّة.. مكان الأسري ورديّة مكان الحسرة أغنيّة مكان الطلقة عصفورة تحلق حول نافورة تمازج شُفّع الروضة حنبنيهو .. البنحلم بيهو يوماتى وطن للسلم أجنحتو ضدّ الحرب أسلحتو عدد مافوق ما تحتو مدد للأرضو محتلة سند للإيدو ملويّة حنبنيهو .. البنحلم بيهو يوماتى وطن حدّادى مدّادى ما بنبنيهو فرّادى ولا بالضجة فى الرادى ولا الخطب الحماسيّة وطن بالفيهو نتساوى نحلم نقرا نتداوى مساكن كهربا وموية تحتنا الظلمه تتهاوى نختّ الفجرِ طاقيّة وتطلع شمس مقهورة بخط الشعب ممهورة تخلي الدنيا مبهورة إراده وحده شعبيّة