عندنا زول في الحلة صعب ..كبير الحلة ..وكلامو ما بقع واطة. كورة الهلال دي بحضرها واقف ...ما بقعد...(الناس الصعبة اصلها كدا).
الزول دا عندنا في الحلة زي (الفيفا).
يقول ادفعوا ..بندفع.
يقول لا ..يعني لا.
بضرب اتنين في تلاتة بتطلع معاه ب (13) ما في زول بقدر يقول ليه حاجة.
(13)....(13)...ولا كلمة.
الحكومة ذاتها ما بتسألو.
مرات فجأة كدا ..يقول ليك...كسروا الصالون ..وابنوه هناك عشان يقبل شرق.
نكسر الصالون ..ولا في حد بقدر يعترض.
الصالون ننزلوا ليك في (5) دقائق.
يقول ليك الجنا ود اسماعيل طلعوه من المدرسة ...الولد دا ما نافع في القراية...جيبوه لي هنا في البيت عشان يخدمني.
سبعة سنين بيمتحن عشان يدخل الثانوي العالي ...الحوش الكبير ما بقدر يدخلو.
يجيب ليه مجموع ...اصحابو بجيبوه في (الانجليزي) براهو.
نطلع الجنا ود اسماعيل من المدرسة ونجيبوا ليه في البيت يخدم فيه.
والجنا ود اسماعيل ..لا ببقى ليه ..ولا قريبو.
زول معانا ساكت في الحلة.
مرة يقول ليك ..تاني البيت دا ما تجيبوا فيه (ملوخية)..يوم داك الملوخية الجبتوها ما نفعتني ..قلبت لي بطني ..الليل كلو ما نمت.
من يقول كلامو دا نقاطع (الملوخية) زي البضاعة الدنماركية ...ما في ملوخية بتدخل في البيت.
ولا بالغلط.
مرة يقول لينا ...عثمان ود الخط ..عندو بنت مؤدبة ..شفتها يوم داك في حفلة الطيب ود المكاوي ..الحفلة كلها عينها ما اترفعت من الواطة ..البنت دي تمشوا تخطبوها لي احمد ود الحاجة.
احمد ود الحاجة بقى للعرس ..وما بلقى احسن منها.
احمد ود الحاجة دي يكون ما عندنا بيه اي علاقة ..لا من قريب ولا من بعيد ..مع ذلك بنشوف احمد ود الحاجة وبنمشي في ليلنا نعقد ليه.
لا نحن بنقدر نقول حاجة ...ولا البنت (العروس) بتقدر تقول حاجة ..لا الولد (العريس) كمان بقدر يقول حاجة.
قلت ليكم الزول دا صعب ..ما صدقتوني.
عمك النوع القديم..لابس ليه ساعة من سنة 61.
الحجر بتاع الساعة دي ما غيرو.
من سنة 61 ...زمن ناس اسماعيل الازهري ساعتو (زنبلك) ما غيرو ليها.
لو قال ليك (النخل) دا السنة دي ما بجيب بلح ..اقنع من التمر.
تمراية واحدة ما تفكر فيها.
ولو قال ليك فيضان البحر السنة دي ح يكسر البيوت ...البحر بكسر البيوت بكسرها.
ما في كلام ..الزول دا في التوقعات اخطر من (الارصاد الجوي).
ناس الارصاد الجوي طبعا بنتظروا (البرد) ينزل ..يقولوا ليك بكرة ح يكون في برد.
الواطة بعد ما تسخن ..يقولوا ليك ح يكون في ارتفاع في درجة الحرارة.
المطر بعد ما تصب ..والبيوت تتكسر ...حتين ناس الارصاد الجوي يطلعوا يقول ليك ح تجي مطر.
المطرة تكون جات وانتهت.
نحن هسع ناس الارصاد الجوي ديل ما شغلتنا ..ولا عندنا معاهم قضية.
نرجع لي عمنا الزول الصعب.
الزول دا كان من يقول يا جنيات انزلوا على (الحواشة) وشوفوا زراعتكم ...(المعني من الكلام دا شغل الافندية البتعملوه في الخرطوم ما نافع).
لابسين لي قمصانكم زي رجال الخطوط.
طوالي تاني يوم ننزل الحواشات.
هسع ناس المريخ ..عملوا نفس الحاجة ..من يقولوا ليك ح نعمل طابق تاني في (المقصورة) ..او ح نعمل اضافات في استاد المريخ ..طوالي اقنع من كورة في المريخ.
المقصورة في المريخ ..مربوطة بالتراجع في الكورة.
قبل ايام استوقفني خبر نشر في موقع الزاوية ..وتداولته الكثير من الصحف عن مقصورة استاد المريخ.
الخبر جاء على هذه الصورة (الفندقية) الرائعة:
(شرع نادي المريخ في إعادة صياغة وتأهيل المقصورة الرئيسية لإستاده وتمت إزالة المدرجات القديمة وتعلية الجديدة بغرض تسويق مقاعد المقصورة لأقطاب النادي في الموسم الجديد، بفئات محددة، يتم بموجبها تخصص المقعد لصاحبه طيلة الموسم الكروي، مع توفير خدمات ضيافة (خمس نجوم) ومرافق صحية وصالة لكبار الزوار وشاشات عرض تلفزيونية ومصلى ومدخل خاص ومواقف لسيارات أصحاب البطاقات الماسية الخاصة بالمقصورة الرئيسية).
قلت في نفسي يا ربي الجماعة ديل قنعوا من الكورة ..تاني رجعوا يتحدثوا عن (المقصورة).
انا من لقيتهم سجلوا (عنكبة)..عرفتهم ليك ما ناس كورة ..ديل ناس مقصورة.
طوالي نقشتهم ..تسجيلاتهم دي تسجيلات فريق عاوز يركز في (المقصورة).
بعدين اعلام المريخ وقت يلقى (المقصورة) دي ..ما في زول بكتب ليكم فيهم عن المباراة وعن رمضان عجب والباشا.
كلهم بقبلوا على (المقصورة).
الجماعة عاوزين يقلبوها (فندق)..ياكلوا ويشربوا فيها ويطلعوا على كدا.
مقصورتكم دي نحن حفظناها حفظ ..من تتكلموا عنها ..وتعملوا ليها شوية اصلاحات (وتوم شمار)..(وتوم اند جيري) ..هذا يعني ان هناك تدهور وتراجع كبير في فريق الكورة.
قنعوا من الكورة.
خلاص الفيكم اتعرفت.
حمد السيد مضوي رئيس قطاع الجماهير بنادي المريخ قال في التصريح ذاته (إنهم قطعوا شوطاً بعيداً في إعادة تأهيل المقصورة الرئيسية، وذكر أنها ستوفر لأصحاب البطاقات الماسية خدمات في غاية التميز، وستمنحهم مواقف محمية لسياراتهم وخدمات ضيافة فاخرة قبل وأثناء المباريات ، بالإضافة إلى مميزات أخرى عديدة أبرزها أن يتم ، وأن يحمل المقعد اسم صاحبه حتى نهاية الموسم، مع إمكانية إعارة البطاقة لمن يختاره صاحبها في أي وقت، وأكد مضوي أنهم سيضعون مائتي مقعداً فخماً في المقصورة الماسية، وقال: أزلنا المدرجات القديمة في المقصورة، وأجرينا تعلية للمدرجات الجديدة ليتمكن الجالسون في المقصورة من متابعة المباريات بسهولة، وسنضع مائتي مقعداً على المقصورة الماسية لتباع لأصحاب الحظوة من أقطاب المريخ، وسنوفر لهم خدمات فندقية لنحفز الأقطاب على التمتع بمميزات المشروع الجديد، وأكد مضوي أنهم سيعيدون تأهيل المقصورتين الجانبيتين أيضاً توطئة لتسويقهما بالبطاقات الذهبية، وتوقع أن يدر المشروع الطموح مبالغ قيمة لنادي المريخ، مقدراً إياها بعشرة ملايين جنيه في الموسم الواحد (عشرة مليارات بالقديم)، وختم حمد السيد مضوي حديثه مؤكداً أن المريخ لا يستفيد شيئاً من اميز مقاعد الإستاد حالياً وقد آن الأوان لاستثمار المقصورة بالطريقة الصحيحة كي تدر دخلاً كبيراً لخزينة المريخ).
عشرة مليارات من مقصورة المريخ.
مقصورة هي وإلا مصفاة الجيلي البطلع عشرة مليارات جنيه في موسم كلو (3 شهور).
يا جماعة الكلام النظري ساهل ..وما بغلب ليه زول ..واي واحد ممكن يقوم بالدور دا.
لكن بعدين المحك في التنفيذ.
الكلام الكتير دا لي شنو؟...وعشان منو؟.
طبعا نحن في التنظير ورصرصة الكلام ما في زول بلحقنا...احسن ناس في الحتة دي.
ما بنتلحق.
قال شنو؟.
قال مقصورة المريخ حتدخل للنادي (10) مليارات جنيه ...المقصورة لوحدها.
يا ود الناس...هو الدوري كلو ما بدخل (10) مليارات جنيه عاوز تدخلها انت بي (مقصورة).
مقصورتكم دي بدخلوها بي (تذاكر طيران).
إلا كدا.
مضوي قال : (سوف تتم استضافة صاحب البطاقة في صالة كبار الشخصيات قبل المباراة وبين الشوطين).
الكلام دا في ملعب الارسنال ملعب الامارات في لندن ما قاعد يحصل ..تجي يا مضوي تعملو هنا.
غايتو الكلام ساهل بشكل.
دا كلام مخبر ذاتو (يعني عادل امام).
حمد السيد مضوي رئيس قطاع الجماهير بنادي المريخ..مسكوه ليك قطاع الجماهير قال ينظر ليهم فيها.
قام عمل شنو؟.
قلب ليهم (المقصورة) فندق.
لا عرفناها فندق ..لا عرفناها مطار ..لا عرفناها مصفاة الجيلي ..لا عرفناها (قبقبة).
انتوا مقصورتكم دي بطلّع (دهب).
(10) مليارات جنيه قال...من مقصورة فيها (200) مقعد ومباريات لا تتجاوز في مجملها في الموسم كله (25) مباراة ..ممتاز وكاس سودان وبطولة افريقية.
ليها حق مقصورتكم (تطير).
يعني الواحد تاني بدل ما يتفرج في كورة سعيد السعودي ...يمشي يطلب ليه (طلب فول)..ونص فرخة وقزازة حاجة باردة ويضربها في المقصورة ويطلع على كدا.
المباراة والفرجة اعمل بيها شنو؟.
تاني يا حمد السيد مضوي ما في زول بتابع كورتكم ...واحتمال ناس بلة جابر الذي شبه المريخ يوما بالبوفيه المفتوح ..تاني في المباراة ما يدخل الملعب ...يجي يقعد في المقصورة.
انتوا عملتوا خدمة (خمس نجوم) في المقصورة ..ناس بلة جابر الجابرهم على اللعب في الكشافات شنو؟.
ملحوظة : لو فكرتك دي نجحت يا مضوي ...كلم الحكومة تعمل ليها (10) مقصورات وتنسى موضوع الزراعة ورسوم عبور النفط...مقصورات ساكت ممكن تصرف على البلد.
هوامش
الدوري الممتاز ح يبدأ يوم 4 فبراير.
مع كورتنا الوصلت دي لو بدأ بكرة ما عندنا مشكلة.
بس خلوا الجماعة ديل يمشوا يلعبوا لينا مع بايرن ميونخ ..ويجونا ما فاهمين حاجة.
لكن اعداد الهلال يجب ان يبدأ سريعا ...لأن الدوري الممتاز اذا كان سوف يبدأ يوم 4 فبراير ..فهذا يعني ان فترة الاعداد سوف تكون شهر ..(30) يوما فقط ..والفترة قصيرة على الاعداد.
خاصة وان الهلال لم يحدد بعد مدربه الجديد ..وهذا امر يحتاج الي وقت.
مجلس الهلال مثلما نجح في ملف ديون الهلال وحقوق المحترفين ونجح في التسجيلات مطلوب منه ان يكلل هذا النجاح بمدرب كبير ومقتدر وعلى وجه السرعة.
اطمأنينا بتصريحات عضو مجلس الهلال حجير ..الذي قال ان مدرب الهلال يجب ان يكون من مدرسة الاداء الجميل ..وبعتمد على المهارات والعرض قبل النتيجة ..حتى يعود الجمهور من جديد للمدرجات ويستمتع الناس بالهلال.
هذه نظرة صائبة ومطمئنة ..اذا كانت من عضو مجلس الادارة ومن رجل مكلف بالتعاقد مع المدير الفني الجديد للهلال.
الاسماء المطروحة مبشرة ..نتمنى فقط ألا يكون مدرب الهلال عربي.
المدرسة البرازيلية او مشتقاتها مثل البرتغالية انسب للهلال.
مورينهو محمد الطيب اشاد في كثير من الصحف بتسجيلات الهلال وقال فى قوون ان لاعبي الهلال يتميزون بالمهارات العالية.
معروف محمد الطيب ما بجامل ..والكرفتة اللابسها مابطلعها.
والزول طالما ما بطلع (الكرفتة)...معناتها ما بجامل.
اهم امر في الموسم الجديد عودة الجماهير للمدرجات.
اكثر لاعب اسعدني توقيعه في الهلال في هذه التسجيلات هو صلاح الجزولي.
سعادتي باللاعب الوطني وتسجيله في الهلال دائما كبيرة ..لأن اللاعب الوطني عملة نادرة ..(المحترف بمشي ويجي) وافريقيا كلها مفتوحة.
كذلك سعدنا بوليد علاءالدين.
ومازلنا نتمنى فارس عبدالله في الهلال.
ما كان لصلاح ادريس ان يبخل على الهلال بفارس عبدالله ..خاصة وان الاهلي شندي قادر على اخراج مواهب اخرى.
واذا كان اسماعيل بابا انتقل لفريق المهدية من اجل الاحتراف في الدوري السعودي فانه كان من المفترض ان يطلق سراح فارس عبدالله للهلال.
خاصة وان اللاعب عنده رغبة كبيرة لكي يلعب في الهلال.
نرجو ألا يقف صلاح ادريس بين اللاعب والهلال.
نحن في انتظار فارس في يونيو.
يا احمد الحاج الليلة ضهري عاوز يتكسر من الكتابة.
من الصباح نكتب.
حالتها دي (كروت) بس.
طيب الجماعة ديل لمن يدوروا في الدوري السوداني ..ح نعمل شنو؟.
ومباراة بايرن ميونخ عاوزة ليها (من الغلاف للغلاف).
الله يدينا القدرة.
......
عاجل : روسي قالوا ليه كروت لاعبي الهلال وصلت ..قال ليهم والله دي في روسيا ذاتها ما حصلت.