ناس المريخ طلعوا من دور ال (64) والطير في وكناتها (زمان كان عندنا احساس الغربة دا) ...ظلوا منذ ذلك التاريخ قاعدين في بيوتهم لا شغلة ولا مشغلة. الزول لمن يكون فاضي ..اتوقع منو أي حاجة. ممكن يقعدوا يتابعوا ليك (قفص الجداد)..باضت ما باضت ..باضت ما باضت. وأول ما تبيض الولد يدخل القفص يجي شايل (البيضة). فراغ مميت. المريخاب ..ناسنا ديل. قاعدين فقط يلعبوا في الدوري الممتاز ..كل شهر يلعبوا ليهم مباراة ..ويطلع ليهم عصام الحاج (بيان) يهاجم فيه مجلس إدارة المريخ الحالي. يا عصام أنت بتهاجم الليلة ..وبكره تطلع تعتذر. اتعودنا على الحاجات دي. فايقين كدا..عطالة مقنعة. لا شغل ولا مشغلة. عدم الموضوع ..بخلي ليك الواحد يفك (الموبايل) ويركبو تاني. يطلع (الشريحة) ينفخها ..ويرجعها تاني. زي حكاية (القفص). يفتح العربية ..يفكك المقاعد ..يغسلها براهو ..ويشغل الاستريو بتاعها بي أعلى صوت. الحلة كلها تسمع. عدم موضوع. عدم الموضوع أصلاً بعمل كدا ..تفتش ليك (ضفارة)...تقلب ليها البيت قلب..تقلّم ضفورك..وترجع (الضفارة) مكانها. عدم موضوع. تحوِّل الطبق ..تطلِّع التلفزيون في الحوش ..عشان تشوف (الإشارة). تكورك في الشفع. تجيب قناة النيلين ...تندم على (تحويلك) للطبق بعد ما تشوف برمجة القناة. اها يا ناس قناة النيلين الدوري الممتاز طار منكم ..بعد كدا والله الطبق (درجة) ما نحولو. رجعوا (اطباقكم) إلى مكانها. عدم موضوع. تتكركروا كلكم ..وتمشوا تخطبوا للولد ...وترجعوا وانتوا عندكم رأي في (العروس). دمها تقيل. شاي ما بتعرف تعملو. في ناس شيالة حال. عدم موضوع. اصلو عدم الموضوع بعمل اكتر من البعملوا فيه ناس المريخ ديل. قاعدين ما عندهم أي موضوع. مرة عصام الحاج يهاجم جمال الوالي. ومرة نادر مالك يقول أنا لا دفعت ولا بدفع. طيب وقت لا دفعت ولا بتدفع ..بتصرح مالك؟. الازعاج في شنو؟. خلي الناس البدفعوا هم البصرحوا. نحن (الخندقاوي) بي دفعو دا ..عندنا فيه رأي..وما عاوزنو يملأ لينا الجرايد تصريحات. انت يا نادر مالك..ما بتدفع وعاوز تصرح ..وعاوز تتكلم ...وعاوز تعلم الناس كيف يديروا المريخ. وبعترض كمان. عدم موضوع. عدم الموضوع بخلي ليك الزول يطلّع (العناقريب) من اربعة ..يشرب شاي المغرب من خمسة. في ناس شاي الصباح بشربوه الساعة تسعة مساءً. الاستعجال في شنو؟. عدم موضوع. ما عندكم أي شغلة ...سنة كاملة ...موسم كامل ...انتوا حدكم جنوباً (كوستي). حدكم شمالاً (عطبرة). ما بتمرقوا ابعد من كدا شبر. اسحبوا (الجوازات) كلها من لاعبي المريخ ...سنة كاملة ما في واحد فيكم ح يسافر بره. إلا تسافروا مع المنتخب الوطني ...غير كدا ...حدكم (عطبرة). مع حالة الفراغ التى يعاني منها المريخ ...المريخاب طلعوا لينا يحتجوا على (تأجيل) مباراة القمة ليوم 10 أبريل. قعدوا يرجفوا ..قام الاتحاد العام أجلها ليهم لي يوم 10 مايو. اداهم شهر تاني عشان يثبتوا. اقعدوا احرسونا كدا. نحن هسع ما فاضيين ليكم. ح تعانوا من فراغ ممل. شوفوا عدم الموضوع. المريخاب مع عطالتهم المقنعة دي ...نسوا أن الهلال ممثلاً للسودان في بطولة الأندية الافريقية...قام احتجوا في الأول. الوطنية دي ما صرفوا ليكم منها. العالمي دا ..عالمي في شنو بس؟. جماعتنا ديل ما درسوهم في تاريخ سنة تالتة أن الهلال هو الممثل الوحيد للكورة السودانية في البطولات الافريقية. برانا. هي البلد دي فيها كورة ...غير كورة الهلال. الجماعة ديل ما درسوا في (جغرافية) سنة رابعة ...أن الهلال أصبح على بعد خطوة من مرحلة المجموعات. أكيد حكاية زي دي بطَّارشوها لينا ..(يعملوا ليك فيها ما سامعين). ما قرأوا في كتاب المطالعة بتاع سنة خامسة ...أن المنافسات الافريقية تقدم على المنافسات المحلية وأن الاتحادات المحلية تبرمج منافساتها الداخلية بما لا يشكل ضررًا على أنديتها التى تمثلها خارجياً. اها دي عليكم الله في التربية الوطنية ما أدوكم ليها. انتوا مرحلة (الاساس) دي فطيتوها ولّا شنو؟. معقولة في ناس (وطنيين) كدا ..وعندهم حس وطني ..وسودانيون زيَّنا .. وبسمعوا أغينة (عازة في هواك) وحافظين نشيد السلام الجمهوري ..بعترضوا على أن مباراة القمة تأجلت فقط (48) ساعة بسبب مشاركة الهلال الافريقية. الجماعة ديل فاكرين الهلال غدًا ح يمثل الولاياتالمتحدةالامريكية. ناس المريخ اعترضوا على تأجيل مباراة القمة ...(قاعدين في بيوتهم وبتكلموا في مواضيع كبيرة كمان). انتوا يا جماعة مواضيع زي دي ما تناقشوها ..ما تتكلموا فيها. عندهم قوة عين ..وصلت حد الاعتراض على تأجيل مباراة القمة. تتخيلوا المريخ في الراحة من يوم 26 مارس إلى يوم 10 أبريل..يعني قاعدين (15) يوماً ساكت. عتتوا. دي اجازة سنوية عديل ..زي الاجازة الصيفية. المريخ في اجازة وراحة لمدة (15) يوماً ...وعاوزين الهلال يلعب ليهم مباراة القمة بعد (72) ساعة من مباراته مع الاهلي شندي. جماعكتم بتوع التمهيدي ديل شايفين (5) يوماً تفصل ما بين مباراة الهلال والأهلي شندي والهلال والمريخ كتيرة. يقعدوا (15) يوماً في بيوتهم ...وبتكلموا عن (5) أيام. عليكم الله في منطق معوج إلى هذا الحد...في فهم في الدنيا دي بالشكل دا. ديل اتعلموها وين؟. الاتحاد العام شاف جرسة المريخاب ..واعتراضاتهم ..قام أجَّل ليهم المباراة تاني شهر. من يوم 10 أبريل ...ورحلوها إلى يوم 10 مايو. يا مريخاب ...نحن مع مشاركاتنا الخارجية دي ما أظن تواجهونا. شوفوا مستواكم وين؟. ما نلعب معاكم ..ولا فاضيين ليكم. الهلال مع مشاركته الخارجية دي ما عندو لكم وقت ...(ما تنجهونا بي كلامكم الكتير دا). ركزوا في ورقكم. انتوا يا دوب ممكن تتكلموا عن النسور ..عن النيل الحصاحيصا ..عن المريخ الفاشر ..عن الأهلي عطبرة. لو بالغتوا كدا..تتكلموا عن الأهلي شندي. اكتر من كدا ما في. الهلال دا ما قدركم..اتكلموا حسب سنكم. تطلعوا من دور ال (64)..وبتتكلموا كمان عن تأجيل مباراة 48 ساعة. شوفوا قوة العين. عضو في مجلس المريخ ..أو في مجلس النيل الحصاحيصا ..لا أدري ..ربما عضو في رابطة مشجعين ..عضو اسمو على ما أظن (معتصم مالك)...طلع صرح واعترض على التأجيل الأول. يا معتصم أنت منو؟. وبتتكلم في شنو؟. وعارف الكلام البتقول فيه دا ..ولّا ساكت قاعد تقطع من رأسك ..كلام ما مرتب. معتصم مالك دا طلع من وين؟..الظاهر كدا جمع الاخوان (معتصم جعفر ومالك جعفر) في اسمو وأصبح (معتصم مالك)..قال أحسن يظهر ليه بي حاجة وقت ما بقدر يدفع. أصلاً هو ما عندو حاجة يقدمها ..عشان الناس يعرفوه قال يهاجم حكاية التأجيل دا. أحلف أن معظم جماهير المريخ لا تعرف هذا الاسم ..وإلى الان مازلت أشكك في انتساب هذا العضو لمجلس إدارة نادي المريخ. دا جبتوه من وين؟. دا النوع ذاتو ..الكان ما بحضر حصة التربية الوطنية. معتصم مالك ..قال سيادتو معترض على تأجيل المباراة. والله يا معتصم مالك ..عمليتك دي (سيحة) ما بعملها ..يا زول امشى شوف ليك تمرين لفريق (الرديف) احضرو وتعال. أنت تمارين المريخ - الفريق الأساسي - ذاتها كتيرة عليك. أطرف من هذا أن المريخ هدد بالانسحاب ..لو لم يستجب الاتحاد العام (ضيعتهم) لتهديداتهم تلك ..ويقوم بإعادة برمجة مباراة إلى القمة إلى تاريخها السابق. الاتحاد استجاب لتهديداتهم ..أجَّل ليهم المباراة حتى نهاية الدورة الأولى. أول المريخاب قالوا التأجيل بتنافى مع عدالة المنافسة. عدالة المنافسة انتوا بتعرفوا ليها شنو؟. آخر مباراة منحكم فيها الحكم ضربتي جزاء ...والله وديدي الفاتح دا ما فاضل ليه إلّا (يضبح) ليكم بعد كدا. مع فريق النسور بمنحوهم ضربتي جزاء. طيب ديل في مباراة القمة ح يعملوا ليهم شنو؟. على العموم نحن تعودنا على مثل هذه (الجرسة) ..عادة إعلام المريخ ومجلسه قبل أي مباراة بشوف ليه (سبوبة) عشان يعلق عليها الخسارة بعد ذلك. أو هم عاوزين يشغلوا الهلالاب في كلام فاضي ..لا بودي ولا بجيب. المريخ عشق هذا الدور الذي يعيش فيه ..دائماً يحبوا أن يظهروا ليك على انهم (ضحية). قوموا يلا ..لو دا (حنكُّم)..نوصيكم من الان تشوفوا ليكم (مقصورة) وتتقسموا الأدوار فيها. لو واجهناكم بي (جرستكم) دي ...ستة أهداف ما بتمرقكم مننا. زيكو ما بطلعكم. المسرحيات الفارغة دي شوفوا غيرها ...جددوا شوية في عروضكم دي. عشان نحن يوم 10 أبريل ..لو قابلنا ريال مدريد ما بنرحمو. ولا بنجامل. وعشان جرستكم دي يوم 10 مايو ..برضو ما بنرحمكم. اها ح تمشوا مننا وين؟. ملحوظة : اسمو منو؟..قال معتصم مالك قال؟..(دا طلع لينا من وين كمان؟). هوامش هسع ناس المريخ ح يقعدوا يتفرجوا فينا كدا. شوفوا ليكم (سلة). شوفوا ليكم (كورة طايرة). ما تنجهونا. عينكم زي صاج الزلابية. ح تتنظرونا تاني (40) يوماً. نحن نلعب بره ..وانتوا بتتفرجوا. ما في (سيكافا) حايمة كدا ..تشغلكم عننا شوية. إن شاء الله (حوض النيل). إن شاء الله حوض سباحة. انصرفوا. ما تتحلقوا فينا كدا. عينكم (صاقعة) بس. الأخ بابكر سلك في حوار صحفي في (اليوم التالي) ..قال كان بلعب في أشبال المريخ. وقال الإصابة هى التى جعلته يبتعد ويتوقف عن ممارسة الكورة. أنت عارف يا سلك لو ما الإصابة ...مع ناسكم (الروش) ديل كنت إلى الان بتكون بتلعب في المريخ. لكن بتكون بتلعب في (الأشبال). كورتك دي يا سلك كورة (رديف). لكن مع ناس بله جابر وضفر ديل ممكن تكون (كابتن). ولو اتغاتتوا عليك ..ح تكون بتلعب مع فيصل العجب في (مريخ الفاشر). شكلك بقول كدا. انصحك يا سلك ..ترجع تتمرن تاني ...بتنافس مع ناس شميلس ديل. معاوية الجاك ...زمان نحن وقت نقسمها..كنا بنوقفو (حارس مرمى). أما هيثم كابو ..فقد كان بقيف وراء معاوية الجاك. الجماعة ديل ما تسمعوا فصاحتهم دي. كورتهم في (أعمدتهم). مزمل أبو القاسم ...كان من أول (5) دقائق برفع ايدو ..ويطلب الغيار. عشان كدا فريقكم يا ناس المريخ طلعت كورتو ..زي إعلامكم. سيحة قالوا أمس ظهر في التلفزيون ..وقال ضربة ليوبارد ليست ضربة جزاء. هسه لو ضربة الجزاء جات هدف في الهلال ما كان قال كلامو دا. يا سيحة ..نحن حافظنك حفظ. بكره لا بد أن تكون الخرطوم بالأزرق الكامل. ما تخلوا ليكم ركشة بدون (علم). ما تخلوا ليكم عربية أمجاد من غير راية الهلال. انتشروا في الخرطوم كلها. ليوبارد سوف يصل اليوم ...الشغل دا شغل (قنع)..ولاّ دا كمان (فهم) تاني. والله نحن غلبنا نفهمهم. الجماعة ديل عاوزين يعملوا شنو؟. إن شاء الله (ردعكم) عندنا. ما تشيلوا هم. بس ابقوا طالعين من هسع على استاد الخرطوم يا ناس الهلال. ما عاوزين (نفس). ...... عاجل :
