نحن ح نقعد ..نفكر برانا...(على كيفنا) مية مرة يقولوا ليكم الكلام دا ...ما عاوزين (جوطة) ..ما عاوزين (لخبطة). لاعبين في المجموعات. مروحة فاتحة ما عاوزنها. يمكن نفكر. ويمكن ما نفكر. احرار نحن. يمكن نمشي نعسكر في تونس ..ويمكن لا. يمكن مصر. لاعبين في (المجموعات). المجموعات دي لو بلة جابر دخلها بتمسكو (قبضة). سعيد السعودي في (الكونفدرالية) كان بطلع الكورة من القون. اتخيلوا في المجموعات كان عمل شنو؟. نحن بعد كدا بقينا ناس (مجموعات) ساكت. يعني اعتبارا من الغد ..(العمود) دا تاني بكتبوا ليكم بالفرنسي ..عشان ناس (التمهيدي) ديل ما يفهموا فيه اي حاجة. انتوا قايلين المجموعات دي لعب. عندنا واحد قريبنا ..كان بفطر بي عدس ..وبفط الغداء ..وبتعشى بي عدس. هسع زولكم من دخل المجموعات بقى يضرب ليك في السمك والفراخ والباسطة. زولكم قال لي (العدس) دا ح نخليه لي ناس (التمهيدي)..نحن ورانا (مجموعات)..وفي انتظارنا (تجشيع) داوي. عدس شنو البنأكلو ليكم ونحن اتأهلنا للمجموعات. مسكتو من اضانو ..وقلت ليه ما تقول كدا ..والله (العدس) دا ما عندو اي ذنب. نحن على كيفنا ..نأكل عدس ..وإلّا سمك..وإلّا ما ناكل اصلا. نحن في (المجموعات). انتوا هنا اقعدوا تابعوا لي الفارغة...(المحلية) قاتلة زي الفراغ. ما تقعدوا لينا كدا. اتصرفوا. شوفوا ليكم اي حاجة انشغلوا بيها. ان شاءالله تحضروا ليكم فيلم هندي. ان شاءالله ترجعوا تشغلوا (المروحة) القفلتوها قبيل. ما عندكم شغلة ..(انتوا بتلعبوا في المجموعات؟). ما تنجهونا كدا. قاعدين موسم كامل ..(لا شغلة ولا مشغلة). وراكم شنو يعني؟. الهلال لعب. الهلال عسكر. الهلال سافر. الهلال سجل. انتوا عندكم شنو غير الكلام دا؟. كمان انتوا عندكم (مجموعات)؟. نحن ما فاضيين. ولا عندنا وقت عشان نقعد نجادل فيكم. نحن ورانا (مجموعات). انتوا فاكرين (المجموعات) دي لعب. فاكرنها حاجة ساهلة. المجموعات دي الاهلي المصري فريق القرن ..وبطل النسخة الاخيرة ما قدر يتأهل ليها. اقول ليكم حاجة ...(المروحة) القفلتوها ارجعوا شغلوها. عندكم شنو؟. اقعدوا صاقروا لي (المروحة) دي للصباح. للموسم القادم. نحن ح نقعد نخطط للمجموعات. نجيب الاسماعيلي ..وإلا نجيب (كمبالا سيتي). نفكر ..ونفكر. علي كيفنا. يمكن نجيب (انبي). مالكم انتوا؟...عندكم (مجموعات) زينا. ح نعمل لينا (نجيلة) جديدة ...نجيلة امريكية كدا. النجيلة القديمة دي ما بتنفع مع (المجموعات). وح نفكر نمشي نعسكر برة..يا في تونس يا في مصر ..واحتمال الامارات. نحن لاعبين في المجموعات. انتوا حاجات زي دي اوعكم تفكروا فيها. معقولة تمشوا تعسكروا في مصر عشان تلعبوا مع الاهلي عطبرة. بضحكوا فيكم. لو مشيتوا مصر ..احضروا ليكم فيلم لي ياسمين عبدالعزيز قالوا عندها فيلم نزل دور العرض. معقولة تعسكروا في تونس عشان تلعبوا مع الرابطة كوستي. لو مشيتوا تونس امشوا احضروا ليكم حفلة لصابر الرباعي. الكورة ..ما عندكم فيها طريقة. معقولة تمشوا الامارات عشان تجوا تلعبوا مع النيل الحصاحيصا. لو مشيتوا الامارات..امشوا على حفلات (احلام). ما تخجلوا ..ما فيها شيء ..كمبالا سيتي اداكم اجازة طويلة. ديل اجزوا مع (الطلبة). ناس الاساس اجزوا ..الاجازة الصيفية. لكن ناس (الجامعات) شغالين. الكورة اقنعوا منها. نحن حاجاتنا دي بنعمل فيها بي فهم ..عندنا (مجموعات) راجيانا ..انتوا في شنو؟. يمكن نكتب شعر. يمكن نقرأ ل (عزيز نيسين) شاعر تركي من قصيدة (عشر دقائق) هذا المقطع. عندما ينبلج الصبح ... يملؤني الفرح لأنك ستجيئين.. أحلق ذقني بعناية ، وأصفّف شعري من أجلك ، ذلك هو كل ما يمكن أن أفعله سأراك لعشر دقائق، وأسألك : كيف حالك؟ وستردّين : كيف أنت؟ ونصمت »إلى اللقاء« وتنصرفين ، فاغرق في أفكاري ، ويدور مفتاح في القفل ، وتغلق الأبواب ، حتى زيارة الأسبوع القادم. وسأقول لنفسي.. في المرة القادمة.. لا تنسي أن تحملي لي معك الحرية في عينيك! رأيكم شنو في الشعر دا ...الزول دا خلط ليك (الحرية) بالشوف ..وقعد ينتظر ما سيحدث في الاسبوع القادم. انتوا شوفوا ليكم (سيجة). شوفوا ليكم (ضمنة). اقول ليكم حاجة ..ألعبوا (حريق). او اقول ليكم حاجة تانية ...(المروحة) الشغلتوها ....ارجعوا تاني اقفلوها. عندكم شنو؟. على كيفنا ..نحن في مرحلة المجموعات ..يعني ممكن نقرأ شعر ..ممكن نرسم ..نقرأ روايات. نحن ما زيكم طلعنا من دور ال (64) وقاعدين نتفاصح. نحن ما متلكم ..طلعنا من (التمهيدي)..وقاعدين نتغالط. غايتو نحن حالتكم دي لو بقت علينا ...كان من البيوت ما مرقنا ..كان شفنا لينا بلد. مروحة ساكت ما بنشغلها. وكان الواحد وقت تلفونو يضرب ..بطلع التلفون على جنب كدا ويعاين للرقم بشويش. لو بعرف (الرقم) برد..لو ما بعرف الرقم برجع التلفون تاني لي جيبو. يكون (هوا). او ما (هوا). هسع يا ناس (اتوفيستر) انتوا ما بتخجلوا. انتوا ما قاعدين تتعقدوا. جايبين ليكم جهاز فني الماني ...مدرب عمرو (77) سنة من المانيا. من المتحف الالماني. وجايبين ليكم مدرب مصري ..اسموا احمد ساري. و(7) اجانب. وطالعين لي من (التمهيدي). هسع الجماعة ديل كلهم عشان تلعبوا لي مع (النيل الحصاحيصا). يا جماعة ..دا كلام شنو؟. قالوا ليك (العالمي) لاعب يوم 17 ابريل امام النيل الحصاحيصا. عالمي يلاقى عالمي. بختكم يا ناس الحصاحيصا...(العالمي) جاكم. والله الكلام دا احسن ترجعوا تاني للمروحة القبيل ..وتشغلوها. انت يا ود الناس ..دا شنو البتعمل فيه دا. شابكنا ليك من الصباح (مروحة). افتحوا (المروحة). اقفلوا (المروحة). افتحوا المروحة ..اقفلوا المروحة. انت ليه بتعمل كدا. يعني عشان طلعنا من دور ال (64). ليه بتجيب لينا (شعر تركي)..عشان طلعنا من (التمهيدي). انت ليه بتحرجنا كدا. برضو نحن عندنا احاسيس ومشاعر. شبكتنا ليك (مراوح)..لمن فهمنا حاجة. والله الواحد في البيت كره (المروحة). بقى يعاين ليك للمروحة زي صينية الخبيز الحرقت. يا جماعة انتوا لازم تقدروا ظروفنا. لازم تستحملونا شوية. لازم ترتفعوا للمرحلة. نحن بنلعب في (المجموعات). وانتوا عاوزين تمشوا (الحصاحيصا) تلعبوا مع النيل..وفرحانين شديد للموضوع دا. بلة جابر قالوا ليك وقت قالوا ليه المريخ مسافر الحصاحيصا ..سمع ليك الحصاحيصا دي (تونس). قام قال ليهم (الفيزا) وصلت. يا بلة ..الحصاحيصا دي ما عاوزة ليها (فيزا). وعشان اختصر ليك الموضوع من هسع ..كادوقلي ذاتها ما عاوزة (فيزا). ولا الفاشر. ولا عطبرة. انتوا يا بلة جابر بقيتوا ناس (باصات) ساكت. والله انا من شفت جمال الوالي جابى ليكم للترحيل (باصات)..قلت خلاص لعنة الباصات دي ح تمسكم. اها الباصات الجابوها ليكم ...بقت ملازماكم في كل ترحيلاتكم. تاني (طيارة) قريبة ما ح تشوفوها. بقيتوا ناس (باصات) عديل كدا. الطيارات دي خلوها لي ناس بويا. ناس خليفة. ناس اتير توماس. عشان كدا انا لمن اركز ليكم على (المراوح) ما غلطان عليكم. ما خاطي عليكم. شوفوا ليكم (مروحة) تانية ..واقعدوا تحتها ..عشان تفكروا بصورة علمية. قالوا كشف (مشاطبكم) طلع. سعيد السعودي طبعا في كل تسجيلات بطلع مع (المشاطيب)..لكن وقت التسجيلات تنتهي بنلقى صاحبكم قاعد قدام مع السواق. موش مرات بتكون بتفتش ليكم في زول كدا ..تقوم تقلب الواطة كلها عنو..تجي في النهاية تلقاه قاعد قدام مع السواق. دا سعيد السعودي ذاتو. ملحوظة : انتوا يا جماعة الحقيقة ليه بتزعلكم. هوامش شفتوا يا جماعة من مزمل ابوالقاسم يقعد يدافع ليك عن (الحكام)..اعرفوا طوالي الجماعة ماشى معاهم (باسطة) في التحكيم. الحكام ديل في زول بدافع عنهم. بعد كدا يا مزمل فضل مامون ابوشيبة يعمل ليه (معلقة) غزل في الحكام. الاخ اباذر الكدرو المريخابي الراقي ..عبر عمود مزمل ابوالقاسم واحمد محمد أحمد تساءل عن الذي يمكن ان اكتبه بعد ان سجل وارغو في (الشجرة). الحمدلله اني علقت ..وقلت لي وارغو (قون في اليد ولا عشرة في الشجرة). يعني نحن ضد قون الشجرة ..سواء كان وارغو في المريخ او في الهلال. وارغو جايب لينا قون في الشجرة بعد (4) شهور من تسجيله في الهلال. انتوا يا باذر وارغو جاب قونو في الشجرة بعد تلاتة مواسم. شفتوا في فرق ..وإلا لا؟. ما عارف ليه انا منتظر مباراة العالمي في الحصاحيصا. الطريف في الامر ان ناس المريخ خلوا ليك حكاية (العالمي) دي. بقوا يتعقدوا منها. الواحد فيهم بقى وقت تجيب ليه سيرة (العالمي)..بتلفت زي كأنك انت بتكوريك على النيل الحصاحيصا. اللواء احمد عطا المنان ..قال من اعلم اللجنة المنظمة ان المشجع الذي اصاب حكم المباراة (هلالابي). قد يكون فعلا غير (هلالابي) وهذا الاحتمال الاقوأ ..لكن مع ذلك فان الهلال مسؤول عن اصابة الحكم ..طالما كانت المباراة في ملعب الهلال ..والمشجع كان في صائد جماهير الهلال. لذلك على جماهير الهلال الانتباه. يجب ان لا تعطوا فرصة لاولئك الذين يحاولوا افساد الكورة ...لأن الهلال هو المتضرر من ذلك. صلاح ادريس قال الاهلي شندي حقق فوز مستحق على الهلال. انت يا صلاح ادريس ما حولت (الطبق) وإلّا شنو؟. احتمال صلاح ادريس يكون معتبر (حكام) المباراة جزء من تشكيلة الاهلي شندي. عشان كدا شاف الاهلي مستحق للانتصار. قبل هذا تعرض الهلال لظلم كبير من خالد عبدالرحمن الذي احتسب ضربة جزاء (وهمية) للاهلي في شندي امام الهلال. كل الانتصارات التى حققها الاهلي شندي على الهلال كانت عن طريق (الحكام). والرجوع الى (الشريط) فضيلة. ...... عاجل : غايتو لو ما عندنا (6) نقاط عند المريخ (المغصة) كانت شقتنا.
