· اتحاد كرة القدم جعل معظم اندية الممتاز تلعب اليوم (كل البيض في سلة واحدة). · كل مباريات الممتاز في قناة النيلين ..وقناة النيلين دي زي (الملاحة) ما بتشيل حاجة. · او زي الزول العندو (نضارة) واحدة ..بقرأ بيها ..وبشوف بيها ..وبشاهد بيها التلفزيون ..وبلبسها من الشمس ..ومن الهوا..الخ. · بيأكل بيها ..وبشرب بيها. · او متل (الحمل) المربوط في البيت ..اي زول يجي زيارة ..يقولوا ليه ح نضبح ليك (الحمل) دا. · والحمل (مربوط). · لمن الحمل بقى (خروف) ..وضبحوه في عيد الضحية. · اذا قبلنا ان يلعب الهلال والمريخ مع الاهلي عطبرة والهلال الفاشر في يوم واحد باعتبار انهما سوف يلعبان مباراة القمة يوم 10 مايو..ما هو السبب الذي جعل الاتحاد العام يجعل كل مباريات الممتاز عدا مباراتين فقط تلعب اليوم ..ومعلوم ان ذلك الجمع سوف يضعف المتابعة والتلفزة وسوف يضعف حتى دخل المباريات بسبب مباراة الهلال والمريخ في عطبرةوالفاشر على التوالي المنقولة على الهواء مباشرة والتى سوف تجبر جماهير القمة على البقاء في منازلهم لمتابعة مباريات القمة. · الاثنين اذن يوم مزحوم بمباريات الممتاز ..كفي ان المريخ سوف يلعب (عصرا) في الفاشر ..بينما سوف يلعب الهلال (مساء) في عطبرة. · المريخ يدخل مباراة اليوم بجدلية (نقطة واحدة لا تكفي) بعد ان جرد من نقاط مبارياته في الولايات – إلا بمعدل (نقطة) واحدة في كل مباراة. · نقطة – سطر جديد. · نحن نتمنى اليوم بحكم هلاليتنا ..وبحكم مساندتنا لهلال الفاشر ان يفشل المريخ اليوم حتى في الحصول على (نقطة). · واحتمالية ان يخسر المريخ اليوم ان شاء اللهالمباراة يبقى الاحتمال الاكبر...وهو (الارجح)..من خلال معطيات الاحداث في المريخ. · العامل النفسي عند المريخ يلعب لصالح هلال الفاشر ...فقد تعادل المريخ في كل المباريات التى لعبها في الولايات. · بكاء بلة جابر ..يمكن ان يتكرر اليوم ..بل ان مشاهدته بين الشوطين ان شاء الله (باكيا) وارد بصورة كبيرة. · لذلك نقول ان المريخ اليوم سوف يخسر باذن الله ..ولن يظفر حتى بالتعادل. · لا سيما وان ملعب (النقعة) والذي نحسبه غير صالح للعب ..خاصة في وجود استاد الفاشر ...عامل يساند هلال الفاشر بقوة. · كنا في مباراة الهلال ومريخ الفاشر ..قد كتبنا واعترضنا كثيرا على هذا الملعب. · واليوم ايضا نثبت رأينا ونقول ان اللعب في استاد (النقعة) في وجود استاد الفاشر الممتاز ..امر غير لائق وغير مقبول من اندية الفاشر واتحادها. · يجب ان يكون للاتحاد العام لكورة القدم (رأي) في هذا الامر ..فتحقيق الانتصارات او التعادلات بهذه الوسيلة امر غير لائق (اخلاقيا). · نتمنى ان يلزم الاتحاد العام اندية الفاشر واتحادها باللعب في استاد الفاشر ..اعتبارا من الدورة الاولى للممتاز. · لكن بما ان الهلال لعب امام مريخ الفاشر في (النقعة)...كان لا بد ان يشرب المريخ من نفس الكاس ويلعب في (النقعة) ايضا امام هلال الفاشر. · وكما للفاشر مريخها ..له ايضا هلالها القادر باذن الله وتوفيقه ان ينتصر على المريخ اليوم. · من عوامل خسارة المريخ ايضا ..ان المريخ يدخل لهذه المباراة بعد اثار تعادل عطبرة. · معلوم ان الصراعات والخلافات اشتعلت في المريخ بعد التعادل امام الامل عطبرة والذي عادل له الطاهر حماد في الدقيقة 98. · اتوقع اليوم ان يسجل هلال الفاشر من وقت مبكر في مباراة اليوم وان يفشل المريخ في التعديل وان منح (ضربة جزاء). · الصراعات والخلافات في عطبرة جعلت المريخ يفقد حارسه الاساسي (اكرم الهادي سليم) ..بسبب الانتقادات الحادة التى تعرض لها اكرم ...وهو لا يسلم حتى من الامين العام للمريخ الفريق طارق. · ابعاد اكرم الهادي سليم من هذه المباراة..قرار غير موقف من الجهاز الفني للمريخ ..لأن اكرم يحتاج على الاقل لأن يجهز فنيا وبدنيا ومعنويا لمباراة القمة. · هل سوف تتم الاستعانة بي اكرم الهادي سليم في مباراة القمة يوم 10 / مايو ..ام ان المريخ سوف يلعب بحارسه الحالي ايهاب زغبير؟. · خبرة زغبير لا تؤهله لحراسة مرمى المريخ امام الهلال ..خاصة وان اخطاء ايهاب زغبير اكبر واشنع من اخطاء اكرم الهادي سليم. · لذلك ابعاد اكرم الهادي سليم حتى من البعثة التى غادرت الي الفاشر سوف يدفع المريخ ثمن ذلك غاليا ..اعتبارا من مباراة اليوم. · مباراة المريخ امام الهلال الفاشر عصرا ..ايضا تمنحنا صراع اخر بين المريخ بجهازه الفني الاجنبي (اتوفيستر واحمد ساري) وبين جهاز هلال الفاشر الفني الوطني (فاروق جبرة واحمد السيد). · جبرة واحمد السيد ابناء المريخ ..مطلوب منهم اليوم ان يثبتا ان ابناء المريخ اقدر من اجانب المريخ الذين يقودن جهازه الفني الان. · خاصة وان الخبرة الوطنية في الاجهزة الفنية استطاعت ان تعرقل اجانب المريخ في الجهاز الفني. · في شندي نجح الوطني (الفاتح النقر) في الخروج بنقطة امام المريخ. · في الحصاحيصا نجح (مبارك سليمان) في الخروج بنقطة امام المريخ. · والفاتح النقر ومبارك سليمان من ابناء الهلال ..فهل ينجح انباء المريخ في الخروج بما خروجوا به ابناء الهلال في الولايات. · في عطبرة نجح ايضا الوطني محمد جمعة في عرقلة المريخ ..لذلك ليس امام فاروق جبرة واحمد السيد خيار اليوم غير الانتصار ان شاء الله على المريخ. · ونحسب ان دوافع جبرة واحمد السيد كبيرة للاقتصاص من اتوفيستر واحمد ساري. · عامل الارض والجمهور طبعا ايضا يلعب لصالح هلال الفاشر ..وقد ذكرنا ان ملعب (النقعة) يشكل هاجسا كبيرا للقمة السودانية. · ويمكن للاعبي المريخ وجهازهم الفني ان يجدوا (شماعة) جاهزة للخسارة اليوم. · اخسروا اليوم يا ناس المريخ ..وقولوا (النقعة) ما عندكم اي مشكلة. · ح نلقى ليكم (عذر). · نتمنى ونسأل الله ان نفرح اليوم عصرا بخسارة المريخ..ثم نأتي ونكمل فرحتنا في المساء بانتصار الهلال ان شاء الله على الاهلي عطبرة. · مع اعترافنا ان مباراة الهلال في عطبرة ..مباراة صعبة ..ويدخلها الهلال ايضا في ظروف معقدة. · لكن خبرة لاعبي الهلال وامكانياتهم ..وصلاحية ارض الملعب ..تجعلنا نقول ان الهلال قادر ان شاء الله على الانتصار. · الخوف بس من (القطر). · مهم ان يعرف لاعبو الهلال ان مباراة اليوم تعتبر بالنسبة لهم مباراة بطولة. · الانتصار اليوم يعني ان الهلال نجح هذا الموسم نجاحا كبيرا في مباريات الولايات. · كما ان انتصار الهلال اليوم ..يعطي الهلال دافعا قويا لمباراة القمة. · نريد من لاعبي الهلال ان يلعبوا مباراة اليوم باحساس مباريات المجموعات. · يجب ان يعلم لاعبو الهلال انهم بلغوا مرحلة المجموعات في البطولة الافريقية ..وهذا امر يجب ان يعطيهم الثقة والقدرة على الانتصار. · اللعب بتركيز ومسؤولية وحسم المباراة من وقت مبكر ..هو شيء يمكن ان يجعل الهلال يسطير على المباراة. · حسم المباراة من وقت مكبر ..وتعزيز الفارق ليصبح الفارق اكثر من هدف ..بل اكثر من هدفين هو الذي سوف يجعل الاهلي عطبرة قانعا من مجاراة الهلال. · تفريط في اي نقطة ..يعني التفريط في البطولة كلها ...والانتصار اليوم يختزل المسافات للهلال ويجعل لقب الممتاز تحت سيطرة الهلال بشكل كامل. · اذا تعرقل المريخ عصرا ان شاءالله ..لا نريد ألا يستفيد الهلال من ذلك ويوسع الفارق مساء ليصبح الفارق (4) نقاط. · واذا لم يتعرقل المريخ عصرا لا قدر الله ..يجب ان يفوز الهلال حتى يبقى متصدرا للممتاز ويحافظ على فارق النقطة. · لذا فان نتيجة مباراة الهلال اليوم في غاية الاهمية ..وربما اهميتها تأتي من ان المباراة صعبة ..والانتصار فيها يبقى امر جميل..ومفرح للهلالاب. · ملحوظة : ننتظر اخبارا سعيدة في العصر ..وفي المساء. هوامش · باسيرو بدأ تمارين الكورة. · على شنو؟. · وليه؟. · قولوا ليه ما في اي داعي ..في زول (بتمرن) للمغادرة. · يا باسيرو باقى ليك ايام في كشوفات المريخ ..المتمرن ليها شنو؟. · باسيرو دا شفناه فقط امام بايرن ميونخ. · تاني ما شفنا ليه اي حاجة. · معقولة سجلتوه فقط عشان بايرن ميونخ. · والله حكاية غريبة. · اغرب من هذا ان اتوفيستر طالب بضم عبدالحميد السعودي. · اتوفيستر دا قاصد شنو؟. · قاصد يضم السعودي للجهاز الفني ام يضمو لكشوفات المريخ. · زولكم دا يمكن يكون ملخبط. · انت السعودي العندك (سعيد) عملت بيه شنو يا اتوفيستر عشان تطالب بالسعودي الما عندك (عبدالحميد). · المريخ الليلة ان شاءالله النقعة دي نقطة ما بطلع منها. · بعد مباراة اليوم. · اعفاء اتوفيستر واحمد ساري ..وتعيين فاروق جبرة. · يا جبرة .. شد حيلك معانا. · دي فرصة اوعك تضيعها. · خايفين على الهلال بس من (القطر). · ومن الحكم. · لكن الحمدلله ... ناس عطبرة ما عندهم (نقعة). · ولا نقعة. · نقعة شنو يا زول؟. · في الاخبار ان الاتحاد العام سمح للهلال بضم لاعبين جدد لكشوفاته. · الهلال بي رواقة كدا ...ومن غير (مدافرة) من الناس العيون طايرة ديل ..مفروض يضم لكشوفاته نجوم على مستوى عالي. · ننتظر صلاح ادريس ان يقدم للهلال من الاهلي شندي مجاهد وفارس ..حتى لو كان لا يمكن الاستفادة منهما افريقيا. · الي جانب اسماعيل بابا الذي يمكن للهلال من الاستفادة منه افريقيا. · العناصر المحلية اصلا صعب الاستفادة منها افريقيا في هذه الظروف. · غير ان الهلال يمكنه الاستفادة افريقيا بضم محترفين اجانب على مستوى عالي. · لاعب هلال الفاشر محمد حسن ..سوف نشاهده اليوم ..وهو قادر على التسجيل في شباك المريخ. · محمد حسن لاعب جيد ..ويجب ضمه لكشوفات الهلال. · .... · عاجل : حضر دموعك ساي يا بلة.
