* مرات الهلال ده فيهو حاجات بتبكى والله .. * حاجات تخليك تبكى بعين واحدة .. * والبكي بعين واحدة موهبه .. * ما كل زول بيقدر يبكي بعين واحدة .. * زمان في حلتنا بتذكر عندنا (بت) بتبكى بعين واحدة .. * والبت دى عندها بت خالتها بتبكى (دموع مُرة) و(دموع حلوة) .. * العين الشمال بتنزل دموع (مُره) والعين اليمين بتنزل دموع (حلوه) .. * يعنى الزولة دى دموعها زي (البرتقالة) الفيها (مرار) وفي نفس الوقت فيها (حلا) .. * دموع زي سكر الجلكوز .. * حاليا إحنا في الهلال بقينا زي بت حلتنا دى .. * نبكى بدمع حلو ودمع مُر .. * ومن الحاجات البتنزل الدمع المُر (التحالف) .. * الجماعة شغالين تحالف .. * تنظيمات الهلال واقطابه بدل ما يتحالف من اجل تحقيق البطولة الافريقية بيتحالفو على الإنتخابات .. * نعم الاستعداد للإنتخابات امر مهم جدا ولكن اين كان هؤلاء قبل اسبوعين .. * كنتو وين يا الكاردينال قبل اسبوعين ؟؟ * الهلال ده قبل اسبوعين ما قادر يسجل .. * من شدة الفلس والفشل سجلنا سيرجو .. * إنتو كنتو وين ؟؟ * هسه عليك الله لو كان إتحالفتو من اجل التسجيلات مش كان سجلنا افضل اللاعبين في افريقيا ؟؟ * كان البطولة دى بنشيلها والشمس فوق .. * لو إتحالفتو وسجلتو (جيان) كنا بنضمن الهلال في النهائى .. * هسه لما الانتخابات قربت والاضواء والشهره جيتو جارين جرى عشان تتحالفو .. * والله إحنا ذاتو تحالفكم ده ما راكب لينا في رأسنا .. * تتحالفو الليلة وبكره تشيلو حال بعض في الجرايد .. * تقضوها لينا كلها شتائم .. * عشان كده أنا شايف احسن اى زول يأكل نارو .. * شايف كده .. * وأى زول طبعا حر في (شوفو) .. * عموما الحال في الهلال افضل من الحال في المريخ بألف مرة .. * وعلى ذكر (الألف) .. * الجيل عبد الخير قال : (المريخ أكبر من ألف هيثم) .. * يا راجل ؟؟ * ألف عديل .. * ما عصرت على هيثم يا كابتن ؟؟ * ألف ما كتيره يا كابتن ؟؟ * طبعا الجيلى عبد الخير هو كان مكلف من قبل رئيس نادى المريخ عزو بالجلوس مع هيثم .. * ولما فشل في الموضوع قال المريخ اكبر من ألف هيثم .. * طيب والحضرى كيف يا كابتن ؟؟ * الصحف المصرية قالت ان الحضرى اكبر من كوكب المريخ .. * يعنى تقدر تقول الحضرى اكبر من (ألف مريخ) .. * هيثم يتعامل مع المريخ زيو وزي اي نادى في الدرجة التالتة .. * عملوا ليهو لجنة محاسبة قام رسل للجنة خطاب .. * يعنى بحسابات هيثم هو اكبر من اللجنة دى .. * خطاب بس .. * أنا عندي ليكم مقترح .. * إجتماع اللجنة ده اعملوا في بيت هيثم .. * يا اخ إنتو اسبوع ما قادرين تختاروا كابتن للفريق !! * اسبوع كامل شغالين مشاورات أ تقول دايرين تغتالوا بشار الاسد .. * بتتشاورو في اختيار الكابتن لما رمضان جاء .. * مرة يقولوا الباشا ومرة يقولوا علاء الدين ومرة بله جابر .. * ما عارفين ذاتو يختاروا منو .. * تقول لي يعاقبوا هيثم .. * والله ديل وليد علاء الدين ما يعاقبوا .. * إنتو مالكم ما تسجلوا صالح سنار ؟؟ * صالح سنار ده مالو عيبو لي ؟؟ * صالح قائد محنك ودمو حار وعلى الاقل هو اصغر من المصرى الجبتو ده .. * غايتو يا صالح سنار ويا كمان خالد جوليت .. * شوفو البتقدرو عليهو وسجلو .. * فريق ما قادر يختار كابتن وبعد ده اعلامو يتحدث عن الهلال .. * حاجة تكسف .. * طبعا اعلام المريخ يعجبك .. * الايام دى اعلام المريخ بيخدر الجمهور بحاجتين اتنين .. * الحاجة الاولى (فلان ولدنا) .. * مثلا يقول ليك (نزار حامد ولدنا) .. * تانى يقولوا ليك (بكرى ولدنا) .. * وده موضوع مسيخ ومُلل لانو الجماعة ديل ما حصل كتبو (فلان ولدنا) وطلع ولدهم .. * الموضوع التانى اعلام المريخ هذه الايام يكتب عن حفل تعارف اللاعبين الذى سيكون بفندق برج الفاتح .. * لو بحسابات الكرة المفروض حفل التعارف بتاعكم ده يكون في اية (لكوندا في السوق العربى) .. * كورتكم دى ما دايرة ليها فندق وبرج .. * ممكن تقعودو تتعارف في مطعم او حتى في قهوة .. * الموضوع عادى .. * كده كده اللاعبين ديل بتشطبوهم اخر الموسم .. * وبرج الفاتح ده خلو للناس البيشبهو .. * الزول بيختار المحلات حسب مكانتو .. * وإنتو مكانتكم اقل من برج الفاتح .. * يعنى إنتو تمشو برج الفاتح طيب هلال الابطال يمشى يعمل تعارف وين ؟؟ * خليكم منطقيين شوية .. * عندى ليكم اخر مقترح .. * حفل التعارف ده اعملوا في بيت عزو بحى الصفا .. * صفا ب(التاء) .. * و..و.. * وما تستاهل (العورة) و(خسارة العين) ..
