حاوره : محمد الطيب الأمين..عدسة : اشرف كامل إضاءة (مات) حموده بشير في حياته ثلاث مرات قبل ان يموت الموت الأخير الذى لا يعلم بمواعيده إلا الله العلى القدير ، وهذه الحلقات المتتابعة من الموت ابرزت بشكل كبير قوة الإراده عن ود بشير الذى إطلقت عليه جماهير الهلال لقب (الراجل) تقدير لقوة شخصيته وحبه للشعار ، وليس سهلا ان تشطب من المريخ ثم تشطب من الهلال بوشايه وتأتى وتلعب في اهلى شندى بكل هذا الألق والامتاع ولكنه حموده إبن سنار الفارس والرجل الذى حفر على الصخر وصعد الجبل وقدم الكثير للسودان وللهلال فصار واحدا من الاسماء المهمه في تاريخ نادى الهلال الحديث وهو الان يبني تاريخ حافل في قلعة النمور مع الارسنال ، (قوون) ذهبت لحموده بشير بمنزله العامر بمدينة بحرى وحاورته عبر باب (60 دقيقة ونسه على الريق) فكانت الحصيلة شفافية واجابات صادقة وزاخر بالجديد وسنقدمها عبر حلقتين . نعم أنا قاعد أمشي للشيوخ !! كابتن حمودة بشير دنقلا إشتهرت ب(البلح) والأبيض إشتهرت ب(التبلدى والرملة) وسنار إشتهرت ب(الشيوخ والعمال) ؟؟ نعم الناس لما تجيب سيرة سنار طوالى بيكون الكلام عن الشيوخ و(الدجل) وغيرها من الخرافات ، أنا أقول سنار هى مركز من مراكز (الصوفيه) في السودان وهى بلد شيوخ وهنالك فرق كبير بين الشيوخ الحافظين للقرآن الكريم و(الدجالين) وسنار بلد شيوخ وليس الدجالين وهى مدينة ساحرة ولها خصوصية وناس سنار بيحبو الناس والعلاقات الإجتماعية بينهم كبيرة ومميزة وانا بحمدالله إني من سنار وبصراحة لو ما كنت من سنار لتمنيت ان اكون من سنار . حموده بصراحة شديدة هل ذهبت لشيخ أو انطون تطلب منه مساعدتك في دخول التشكيلة او لاى عمل خاص مثل إعادة تسجيل او إبتعاد من الشطب ؟؟ والله بصراحة .. نعم مشيت للشيوخ ولكن لم يكن الهدف هو شطب او تسجيل او دخول تشكيلة أنا بمشى للشيوخ حسب التقاليد مع الأهل نزور أولياء الله الصالحين ونصلى معهم ونعيش اجواء روحية مميزة داخل المسيد والحمدلله ، أنا عند ثقة في الله عشان كده ما بمشي لي لأنطون وفي النهاية (الجايه من الله بتصيب) وما في زول بيشيل رزق زول . علاقتي بالمقابر جيدة وما بخاف من الموت !! حموده علاقتك كيف بالمقابر ؟؟ علاقتي بالمقابر مثل كل سودانى أزور القبور مرة مرة واترحم على الذين سبقونا ونرجو لهم المغفرة . حموده النجوم بيخافو من الموت ؟؟ الموت هو مصير كل زول وأنا لو خفت من الموت ح اموت ولو ما خفت من الموت برضو بتموت فقط نسأل الله العمل الصالح وحسن الخاتمة . أنا إشتهرت في الهلال !! *كابتن حمودة لاحظنا في (غرفتك الخاصة) الجدران مزدحم بصورك في الهلال وصورك في المنتخب الوطنى بينما البيت خالى من صورك في المريخ ترى هل فترتك في المريخ كانت (الكاميرات) غير متوفرة ؟؟ والله القصة ما قصة كاميرات ولكن أنا اعتبر ان فترتي الأكبر كانت في الهلال ولا استطيع ان انكر فترتي في المريخ وحاولت ان اجمع صوري في المريخ ولم اجد وفي نهاية الامر اقول ان تاريخي كان اكبر في الهلال الذى منحني شهرة كبيرة وامضيت سنوات نضرة جدا في الهلال وهى من اجمل سنوات حياتي والحمدلله . الأرباب إشتغل في أهلى شندى بمزاج !! *حموده الناس بيقولو أهلي شندى هو (الهلال ب) ؟؟ أهلى شندى فريق قائم بذاته وهو فريق تشكل بطريقة مختلفة عن بقية الاندية ، الأهلى في ظرف عام اصبح نادى كبير وإشتهر وهذا صعب جدا ان يحدث في السودان وإذا تتبعت مسيرة كل الاندية في السودان لن تجد فريقا إشتهر واصبح كبيرا في وقت وجيز من أهلى شندى وحاليا هو من فرق المقدمة في السودان ، أما حكاية (الهلال ب) فقد جاءت بعد إنتقال عدد كبير من لاعيبة الهلال إلى الأهلى بما فيهم حمودة بشير ، في السابق الهلال كان يسجل من اهلى شندى مثل جمعة وبوى والأن الهجرة اصبحت عكسية أهلى شندى يسجل من الهلال وربما يكون هذا سبب تسمية اهلى شندى ب(الهلال ب) هذا إلى جانب ان صلاح ادريس كان رئيس نادى الهلال واصبح فيما بعد راعى أهلى شندى . *طيب كابتن حموده العملو صلاح في أهلى شندى لم يعملو في الهلال ؟؟ لا هذا غير صحيح صلاح أدريس في الهلال عندو بصمة كبيرة وحقق إنجازات ويكفي أنه في العام (2007) جعل افريقيا كلها تتحدث عن الهلال هذا إلى جانب ان صلاح اجتهد وبذل كثيرا من المال من اجل ان يحقق الهلال كأس الابطال وقد كنا قاب قوسين أو ادنى من بلوغ ذلك لولا حدوث بعض المشاكل وايضا لصلاح بصمة فيما يتعلق باستجلاب المحترفين ، أما أهلى شندى فهو مسيرة خاصة وصلاح ادريس نجح في اهلى شندى لانه بعيد من الضغوط والمشاكل واستطيع ان اقول : صلاح اشتغل في أهلى شندى بمزاج وبفضله والاخوة في مجلس الادارة والجمهور كان هذا النجاح الكبير والحمدلله في عامين أهلى شندى بقى فريق كبير جدا . *كابتن حموده صلاح ادريس (زعله ساكت) عمل أهلى شندى ودفع اموالا طائلة في سبيل صناعته وقد كنت انت رأس الرمح في بنيان الأهلى كقائد ميداني ؟؟؟ والله شوف أنا اولا بشكر الله على هذا النجاح أقول إنتقالي لاهلى شندى لم يكن سهلا وكانت هنالك صعوبات واجهتني باعتبارى لاعب قمة ظهرت في المريخ وإشتهرت في الهلال فكان من الصعب النجاح في حتة تانية ولكن الحمدلله ربنا وفقني ونجحت وكانت إرادتي قوية وأكدت للناس إنو اللاعب ما بينتهى لو إتشطب من القمة ولقد وجدت تعاونا كبيرا من الجميع في شندى ، صلاح ادريس هو من شندى وكان مهموم بصناعة فريق يمثل وطنه الصغير خير تمثيل وأنا ما شايف في مشكلة لو صلاح عمل فريق زي الهلال او زي المريخ دى حاجة كويسه وتصب في صالح الكرة السودانية ، أنا لما سجلت في الاهلى صلاح ادريس قال لي أنا جبتك الأهلى عشان تنقل تجربتك وتقود زملاءك بطريقة مثالية والحمدلله وفقت بدرجة كبيرة في ذلك بتعاون من جميع الاطراف . إنتقل من المريخ للهلال بمكالمة واحدة فقط !! *من الملاحظات هنالك ود وحب كبير متبادل بين حموده وصلاح ادريس ؟؟ صلاح ادريس ما شاف مني حاجة كعبه وأنا ماشفت منه حاجة كعبه وصلاح وصل لقناعة إنو حمودة (زول كورة ساكت) لا بعمل مشكلة ولا بتمرد ولا بتقاعس ، ولكن أقول إنتقالي من المريخ للهلال جعلني كبيرا في نظر صلاح ادريس فأنا لما تركت المريخ صلاح إتصل علي وقال لي : دايرين نسجلك في الهلال فقلت له : طوالى واديت صلاح كلمة واحدة ولم اتراجع . *طيب الهلال سجلك بكم مليون وانت جاي من المريخ ؟؟ أنا لما الهلال طلبني ما إتفاوضت معاهم ومع الارباب صلاح ادريس قيمني التقييم المناسب وادانى قروشي . *المريخ لما سجلك اداك كم ؟؟ في تسجيلي الاول للمريخ سجلت مجان تحت السن ولعبت ثلاث سنوات ادوني (حبة قريشات) بحكم مشاركتي مع الفريق الاول . إيكانغا حقار ضربني في استاد الهلال وقلت ليهو بتجي شندى !! *حموده جوه الملعب أخلاقو (في طرف نخرتو) وقد تكون مثل علاء يوسف في العنف ؟؟ لا لا والله انا لاعب عادى جوه الملعب ولكنني ألعب بقوة وبصراحة كده في لاعبين حقارين شديد بيستاهلو إنك تقسو عليهم ، أما علاء يوسف فهو زول قلبو ابيض وحار في نفس الوقت . *في الهلال واثناء مباراتكم امام الهلال شاهد بعض إيكانغا وهو يعتدي عليك بدون كورة وتحدثت معه حديث طويل ؟؟ شوف ايكانغا حقار ضربني بكورة وبدون كورة وأنا لو ما جمهور الهلال ما كنت بخليهو والله لكن إتمالكت اعصابي من اجل جمهور الهلال الوفي وتحدثت مع إيكانغا بالعربى وبالانجليزى وقلت له : الهلال ده انا عندو فيهو تاريخ ومن الافضل إنك تلعب بأدب ولكنه أصر على الضرب فأنفعلت وقلت له : الدورى بيجيبك شندى ، وفي مباراة الاياب انتظرته في شندى ولكنه لم يحضر . *حموده بتفرح لما اهلى شندى يفوز على الهلال ؟؟ أنا لاعب بحب الإنتصار والحاجة دى زرعها فيني الهلال ولذلك دوما ابحث عن الانتصارات ولا احب الهزيمة وبما انني جندي من جنود اهلى شندى طبيعى جدا ان افرح عند كل فوز سوى كان ذلك على الهلال او المريخ او الموردة في نهاية الامر يهمني الفوز . في المريخ كنت ماشي (كداري) والهلال ركبني (اتوس) و(توسان) !! *انت عاشق للعربات ودائما تحب إستبدال الحديد وتتابع الموديل ترى ما هى اول عربه إمتلكتها وما هى آخر عربه بحوزتك الآن ؟؟ اول عربه إمتلكتها (أتوس) وكان ذلك بعد إنتقالي للهلال ، في المريخ كنت (معتمد على خ حداشر) كدارى واعتمد على الترحيل الجماعى ، وبعد الانتقال للهلال كان لابد من إمتالك عربه والحمدلله تحصلت على اتوس ومن بعد ذلك جبت (فيرنا) ثم (كليك) ثم (كوريلا) ثم (كامرى) وبعد الكامرى تانى جبت (كامرى) وبعده جبت (توسان) وبعد التوسان جبت عربيه (....) ما داير اقولها عشان الناس ما تركز معاها وتحرقني . أنا حبيت كتييير والبنات ما دايرات الراجل العدييييل !! *حموده حبيت كم مرة ؟؟ بصراحة حبيت كتييييير شديد والإنفصال مرات بيكون مني ومرات بيكون من البنات وفي النهاية القصة قسمة ونصيب ، مرة البت بتختفي من حياتي ومرة انا بختفي من حياتى . *اطول قصة حب عشتها كانت كم سنة ؟؟ والله ممكن تكون سنتين . *حموده هل ممكن (البت) تقيمك من مستواك وتقول مثلا حموده ده بتاع كورت ودق لو إتزوجتو بيطلقني ؟؟ والله البنات حسب فهمى ببحثن عن الولد المواكب أو الولد البيخليها تطلع وتجي علي كيفها ما دايره راجل يقيدها ويقعدها في البيت ، البت للأسف دايرة تكون زي بنات المسلسلات عشان كده أنا لاحظت البت بتزوغ من الولد الماشى عديل . أنا في سنار مشهور اكتر من الوالى ولو نزلت إنتخابات بفوز !! حمودة في سنار اشهر من والى سنار ؟؟ الحمد لله أنا في سنار فعلا مشهور ومعروف اكتر من الوالى لانو ناس سنار بيحبو الرياضة ولما امشى سنار بكون قاعد وسط الناس في السوق في الاندية في الشارع في كل محل هذا الإختلاط والحب المتبادل جعلني اشهر من والى سنار والحقيقة انا في سنار (لي شنة ورنه) . *لو نزلت إنتخابات في سنار ممكن تفوز ؟؟ دى ما دايره ليها كلام لو نزلت إنتخابات بفوز مع اي والى لو نزل معاي . عندى رصيد والناس البيشحدوني كتااار !! *حموده رصيدك في البنك (مليار) ؟؟ لا لا نعم عندي رصيد لكن ما بيلحق مليار . *في ناس بيشحدوك قروش ؟؟ نعم كميات كبيرة من الناس ولكن أنا اشوف المحتاج اساعده وفي النهاية لا استطيع ان اعطى كل محتاج لانو في النهاية انا عندى مسؤولية تجاه اسرتى . حموده يكشف اللاعب الذى شطبه من الهلال في الحلقة القادمة !! سنقوم غدا بأذن الله بنشر الحلقة الثانية من حوار النجم الخلوق حمودة بشير الذى تحدث عن إنتقال هيثم للمريخ واجاب على سؤال انتقال العجب وهيثم لأهلى شندى نهاية العام كما عرض بالحديث عن قصة شطبه من الهلال وعلاقتها بصلاح ادريس والوشايات وماذا دار بينه وبين البرير ومن هو اللاعب الذى تسبب في شطبه من الهلال ، هذا إلى جانب كثير من الجوانب في الحلقة الثانية من الحوار .
