ذهبت منتصف نهار رمضان إلى منزل صديقي القديم نجم المريخ الدولي عصام جوليت بحي الصحافة وسط من غير ميعاد حتى لايهرب، وعندما طرقت الباب تفاجأ بي وقال لي صفحتك رهيبة قاعد أتابعا وطبعاً أنت جاي هسع عشان عايز تفضحني لكن قبال ما تبدأ معاي، دور عربيتك وأرح معاي مشوار عندي ليك مفاجأة. أدرت محرك السيارة واتجهنا نحو مكان غير معلوم، ووصلنا حي امتداد ناصر العريق بالخرطوم وطلب مني التوقف أمام (دكان) من الطراز القديم بأحد المنازل العريقة وترجل جوليت ودخل أمامي ثم دعاني بالدخول إلى المحل. لاحظت بداخل الدكان رؤوس وبقايا ماكينات حياكة قديمة موضوعة بعناية على رفوف الدكان وهناك (تربيزة) حجم كبير وبها مقص وهي مخصصة للتفصيل وبها أقمشة أعدت للتفصيل، وعندها اكتشفت أنني داخل دكان ترزي، وأنا أدقق في محتويات المكان طلب مني جوليت القاء التحية على الشخص الذي يجلس على ماكينة الحياكة وهو منهمك في عمله لأفاجأ أن الترزي الجالس على الماكينة وأمامه أكوام من أقمشة الجلاليب ويضع على عنقه شريط متر القياسات ويقوم بالحياكة هو نجم دفاع المريخ السابق بكري مكين أو (سكين) كما يطلق عليه زملائه من أبناء جيله وهو مدافعاً جسوراً لايشق له غبار، وقاد خط دفاع المريخ لسنوات وشارك معه في البطولات المحلية والدولية. استقبلني على كرسي موضوع بجواره وهو رجل متدين ومعروف بأخلاقه الفاضلة منذ أن كان بالمريخ، سأل عصام جوليت وقال ليهو: أنت الزين آدم وين؟. *…….. سألته: شكلك كدا متخصص جلاليب وكمان أنصارية؟. ضحك وهو منهمك في عمله حيث أن أرجله ويديه تتحركان بمهارة عالية وتناسق تام وهو يجيب على أسئلتي. قال لي: صحي متخصص جلاليب بكل أنواعها أنصارية وغير أنصارية وعراريق وكل أنواع اللبسات السودانية البلدية، وكمان عشان ماتقول ترزي بلدي برضو بخيِّط أفرنجي بناطلين وقمصان وزي مدرسي و(خلافو) وماعندي مشكلة مع الخياطة بلعب يمين وشمال. *…….. طيب أنت هسع مشغول شديد كدا قاعد تخيط في شنو؟. نظر إلى جوليت وقال له: ياعصام أنا هسع قاعد أخيِّط في كفن للموتى وطبعاً أنا أول حاجة اتعلمتها في الخياطة دي هو الكفن، لأنو والدي ترزي وكان مسؤول في الجمعية الخيرية في الحلة عن تجهيز الأكفان ودي واحدة من الحاجات الشجعتني أقعد في المكنة وأتعلم. *…….. اتعلمت الشغل دا وين ومتين؟. القصة هي أن والدي يعمل ترزي معروف في السوق الكبير بالخرطوم من السبعينيات، وأنا كنت (طفل صغير) ناس البيت بجهزو لي الغدا في العمود وبشيلو بوديهو ليهو في السوق وانتظر نهاية اليوم أرجع معاهو البيت وفي الفترة دي أنا كنت بركز شديد معاهو في كيفية التفصيل والخياطة وحركة الأرجل والأيادي في تحريك القماش أثناء الخياطة وبمرور الزمن المسألة رسخت ومرات (بلقا) فرصة وهو في الصلاة بقعد في المكنة. *……. وهسع القاعد يودي العمود منو؟. ابتسم وقال: دا كان زمان يأستاذ، هسع العمود ذاتو وينو، كدي وريني هسع في الزمن دا قاعد تدخل ليك بيت (تلقا) ليك فيهو عمود حتى في البيوت القديمة العمود اختفى مع تطور الزمن وظروف الحياة، وزمان كان أي زول عندو دكان بتاع أي حاجة في السوق بجيبو ليهو عمود الغدا من البيت، وكانت العادة دي بتساعد العمال الشغالين في السوق لأنو أي بتاع دكان علي الأقل بتكفل بوجبة الغدا للناس الشغالين معاهو من عمال شحن وتفريغ وخلافه وياحليل زمان. *…….. بعد خليت الكورة اتفرغت للترزية؟. الوالد طبعاً ترك الشغل في السوق وحول شغلو كلو للبيت في الدكان دا وبعدين العمر أتقدم بيهو وزباينو لسع معاهو ولامن تجي مواسم الشغل زي الأعياد مثلاً في أيام زي دي وشغل العيد دخل بتكون عندو زحمة شديدة فأنا وعندي أخوي الكبير بنساعدو وبنشتغل ليهو. *……. أنت ماعملت ليك زباين؟. عندي طبعاً من ناس الحلة والحمد لله ما داير أشكِّر ليك نفسي، وأنا هسع بقيت شبه خبير. *……. بتتعامل كيف مع المواقف البتلاقيك. أنا ماحصلت اشتغلت برا الحلة، قاعد اشتغل في الدكان بتاع البيت وناس الحلة عارفني لأنو دا شغل الوالد وزي مابقولو مهنة الآباء يرثها الأبناء، لكن في بعض الناس بوسوسو مع بعض بالحكاية دي أنو أنا ترزي وكدا، لكن والله ماعارفهم بقولو في شنو، وماندر تلاقيني مواقف مباشرة لأنو نادر مايجيني زول من برة الحلة. *……. (زملاك) الزمان (معاك قاعدين يجوك هنا)؟. طبعاً واحد منهم عصام جوليت دا ونجم الدين أبوحشيش وحاتم محمد أحمد وابراهومة وحسين الضو والمجموعة دي ماقاعدين نتفارق مطلقاً علاقتنا مستمرة. *……… بعد خليت الكورة اشتغلت شنو؟. بعد خليت المريخ ما اشتغلت أي حاجة لكن لامن كنت بلعب كنت تابع للشرطة الشعبية وبعد الشطب انضميت للاحتياطي المركزي وكنت مقيد في كشوفاته لكن بصراحة ماكنت قاعد أمشي لأنو في فترة سفري لأهلي مدني عملت الحاق بمدني. *……… سجلت المريخ كيف (ومتين ومعاك منو)؟. سجلت للمريخ موسم 99/200 من فريق وادي النيل العريق بملغ 16 مليون، أنا والنادي ناس النادي شالو 9 مليون وأدوني 7 مليون، وكان معاي فتحي نيالا وأباذر شريف وهيثم العشرة ومعاوية الجريف وشطبت من المريخ بإيفاء المدة وماجددو لي بسبب الإصابة. *…….. بعد شطبك من المريخ (مشيت وين)؟. لعبت لأهلي مدني 6 شهور جيت راجع وادي النيل تاني لكن (خليتا برضو). *……. خليت وادي النيل (مالك ما أنت لسع شباب)؟. أقول ليك أنا هسع مفكر أرجع لكن المشكلة العب مع منو، ولا من جيت راجع وادي النيل المرة الأخيرة دي لقيت العيال الصغار ديل دايرني أنا أجري (القطا أجيبا) ليهم، قلت معقول أنا زمان في وادي النيل صغير، المباراة كلها أجري (القطا أجيبا) للاعبين القدام هسع جيت راجع برضو أنا (القطا أجيبا) (عشان كدا خليتا). *…….. ؟ أجمل مبارياتك مع المريخ. أولى مبارياتي الدولية معه وكانت ضد فريق مابيلا اليوغندي في بطولة الأندية الأفريقية وفزنا فيها 2/1. ومحلية هم مباراتين فزنا فيهم على الهلال في أسبوع واحد باستاده فزنا في الأولى 2/صفر أحرزهما فيصل العجب في الدوري الممتاز وفي الثانية فزنا بهدف وكانت على كأس الإنقاذ وبالمناسبة الناس ماكانت منتبه للحاجة دي أنو نحن فزنا على الهلال مرتين في أسبوع واحد لأنو الإعلام في الوقت داك ما أداها حقها. *……. تشكيلة مريخية في ذاكرتك؟. كانت تضم في الدفاع أنا وعصام جوليت وهيثم شوشة في الأطراف جندي شمال وفاروق جبرة يمين وفي الوسط أبوحشيش والعجب وابراهومة في الهجوم عبدالمجيد جعفر وعثمان زكي وخضنا بها نهائي كأس السودان ضد الموردة وكنت نجم المباراة. *……. لاعبون أصدقاء من الهلال؟. في الفترة ديك ما أداخلنا مع لاعبي الهلال ولكن خالد بخيت أقرب بحكم أنو من أولاد المنطقة ولعبنا في دوري التانية (سوا ) بالإضافة لخالد جوليت وصلاح الضي وريتشارد جاستن ومن الموردة المعز محجوب وديل برضو لعبنا في الروابط (سوا). *……. مامشيت المريخ تنخرط في أي عمل معاهم؟. الناس القاعدين في النادي هسع ديل مابنقدر نسوي الحاجات البعملوها الناس عشان يلقو موطئ قدم لأنو أنا ما ممكن أكون بتاع قوالات (أودي وأجيب) و(أنقل لي دا،، واشيل من دا،، أودي لي دا). *……… مفروض يحصل شنو لقدامى اللاعبين؟. طبعاً جمال الوالي ماقصر والقروش القاعد يدفعا دي حقتو وهو صاحب القرار، كان مفروض يطوِّر العمل الإداري في النادي ويدخل نظام جديد زي المعمول (بيهو في كتير) من الدول في أنو يختار لمجلس الإدارة أعضاء من قدامى اللاعبين والمريخ مليان نجوم مؤهلين علمياً وخريجين وموظفين كبار لعبوا للمريخ وحققو انجازات وباقي اللاعبين الاستعانة بيهم في كافة وظائف النادي والأجهزة الفنية واللجان وحتى المهن العمالية وبي كدا يكون قدم خدمة للاعبين القدامى وساعدهم واستفاد من خبراتهم وكان يكون المريخ هسع جاب بطولة أفريقيا كم مرة كدا. *…….. بعد الوداع بعد أن ودعناه سألني عن الزميل المصور المخضرم والبارع محمد حسن فضل المصري، وقال لي: الزول دا وين صورنا جنس صور مع المريخ، لو لاقيتو سلم عليهو وقول لي بكري داير صورو.
