أبوي طلعني من الهلال وقال لي لو ما سجلت الموردة ما عافي منك كنت مع الخواجات في المنظمات والحكومة طردتم
حاوره:عصام طمل الصادق ويو نجم من نجوم الكرة السودانية الذين تركوا بصمة وتاريخ مع نادي الموردة امتدتا لسنوات طويلة كان فيها جندياً مخلصاً أفنى زهرة شبابه خدمة للهلب. لاعب وسط ماهر مشهود له بالمهارة العالية والموهبة الفذة في الاختراق والتهديف بقدمه الشمال التي هز بها شباك الهلال والمريخ في كثير من المواجهات. برز نجمه في منتصف الثمانينات وهو صغير السن انتقل من المرحلة الإبتدائية لاعباً لفريق ود نوباوي درجة ثالثة في ذلك الوقت وفرض موهبته واختير للمنتخب الوطني. طاردته القمة الهلال والمريخ ولكن إصرار والده حوله للموردة. علاقتي به قوية ومميزة منذ أن كان نجماً بارزًا في الموردة. إنسان بسيط وطيب وهادئ الطباع على عكس شخصيته داخل الملعب والتي تبدو عليها الشراسة. مثقف ومطلع ، لم التقيه سنوات، اتصلت عليه هاتفياً وتواعدنا أن نتقابل في موقع عمله بأحد المطاعم السياحية بشارع عبيد ختم بالخرطوم. استقبلني بأسلوبه المميز والطرفة الحاضرة . لم تغيره الأيام والسنوات محافظاً على شبابه ومبتسم دائماً، يقابل بدعابة تزيل عنك الحواجز من اللحظة الأولى. *…… وين أنت سنوات ما ظاهر؟ والله أنا موجود لكن ظروف الدنيا والجري ورا المعايش خلانا بعيدين شوية من الناس والوسط الرياضي وكمان برضو ظروف العمل الضاغطة مابتدي الزول فرصة يلاقي الأصحاب والزملاء بسبب الجري والسفر في أحيان كتيرة. *…… شغال شنو هسع؟ أنا شغال سواق وحالياً مع شركة السهم الذهبي وموزع للعمل في مطعم مع أجانب وسايق العربية الاستايركس دي بتاعة الشغل حايم بيها البلد دي كلها وهسع لي معاهم حوالي 7 شهور. *…… وقبال الناس ديل كنت شغال وين؟ أنا أصلاً كنت بلعب لفريق بنك النيلين وبعد خليت الكورة واصلت معاهم رسمي في وظيفة سائق وبعد داك تم تخفيضنا ومن البنك مشيت اشتغلت في منظمة سايق للخواجات خمس سنوات والساعدني معاهم أنو ما كان عندي مشكلة في اللغة الإنجليزية وبقدر اتخاطب معاهم وبعد فترة الحكومة أبعدت بعض المنظمات من ضمنها المنظمة الأنا شغال فيها. *…… عملت شنو؟ مشيت اشتغلت في شركة ليموزين سايق معاهم وبسافر بره الخرطوم والظروف هي الفرضت كدا أنو الواحد متزوج وعندو مسؤولية لازم يشتغل أي حاجة بدل يرجع يفتش الناس وأخير الزول يشتغل بضراعو وعرق جبينو، وأي محل بشتغل فيهو بعاملوني باحترام ووضع خاص. *…… قاعد تلاقيك مواقف؟ كتير جداً قاعد تلاقيني مواقف خاصة أيام كنت سايق الليموزين ومرات بشتغل مع ناس بسافروا الولايات ولمن يجو الصباح ياخدوا العربية من المكتب يتفاجأوا أنو السواق الصادق ويو لاعب الموردة ويفاجئوني ويقولوا لي معقولة زول نجم زي دا سايق ليموزين وطبعاً ما بتوقع زول يسألني سؤال زي دا في أنو يستنكر مهنتك وكنت برد أقول ليهم أن داير عمل لأنو عندي مسؤوليات تجاهي وطبعاً مهما تشرح في ناس مافاهمين الحاصل شنو. *….. لقب ويو دا شنو؟ لمن كنت في المدرسة مهاري بحاور ليك الميدان كلو من مرمانا (ويو ، ويو ،ويو ،ويو) لحدي أحاور الحارس وأجيب قوون ومن ديك ومشت الصادق ويو. *…… قصتك مع الكورة؟ بديت الكورة من الإبتدائي في مدرسة الرشاد جوار قصر الشباب والأطفال وكنت لعاب جداً ومراوغ وشاذ وبعملوا لي ألف حساب في الدورات المدرسية وكنت هداف خطير وكان عندنا أستاذ اسمو عمر كاوندا بدرسنا لغة عربية وجغرافيا وهو أبو الفصل وأحس أنو أنا مميز ومهاراتي عالية ساقني وداني فريق ود نوباوي بالدرجة التانية واتحاد الكورة رفض يسجلني لأني كنت صغيراً وما تميت السن القانونية، وكان رئيس النادي المرحوم عمر مهدي تحدث مع مسؤولي الاتحاد وكتب تعهد وسجلت لود نوباوي في عام 85 حتى عام 90. *…… تسجيلك للموردة تم كيف؟ سجلت للموردة سنة 90 وكنت في غرفة تسجيلات الهلال وفجأة اتحولت من الهلال للموردة. *…… الحصل شنو. الحصل أنو والدي موردابي ومتواجد في نادي الموردة باستمرار قاموا جوهو ناس الريح ديمباوي وصلاح مطر وقالوا ليهو أنت موردابي وقاعد في النادي كيف يعني ولدك يمش يسجل في الهلال، قام الوالد جاني في معسكر الهلال وقابل العم شبشة وطلب يقابلني وجاني شبشة وقال لي أبوك دايرك، لاقيتو قال لي أنت ليك كم يوم مافي في البيت تاريك قاعد مع الهلال وقال لي أنت حتلعب للموردة ولو مشيت أي فريق غير الموردة ماعافي منك. *….. اتصرفت كيف؟ شردت من الهلال، ناس الهلال كانوا لاعبين مع كانون ياوندي الكاميروني وقاعدين في معسكر وكان عندهم تمرين طلعت عامل فيها بتفرج وهربت مشيت البيت لقيت ناس المريخ قاعدين لأنهم عرفو خبر هروبي وكان قاعد الضو حجوج ومعه شخص آخر تحدثوا معي ورفضت وقلت ليهم والدي قال ماعافي مني لو ما لعبت في الموردة وبالفعل مشيت سجلت الموردة. *….. ناس الموردة أدوك كم؟ سجلوني ب45 جنيه أنا والنادي دفعوا منها (15 جنيه) وما كملوا باقي المبلغ وود نوباوي رفض اطلاق سراحي إلا بعد ستة شهور بعد ناس الموردة تمو القروش. *….. الموردة شطبتك ليه؟ أنا ما انشطبت أكملت الفترة وما جددوا لي لأني كنت مصاب وقررت الاعتزال. ومشيت بورتسودان عشان أمشي السعودية قعدت 6 شهور جوني ناس دبايوا طلبو مني أدرب الفريق وفي واحد من التمارين شافوني ناس الإدارة وقالوا لي يا الصادق أنت لسع ممكن تلعب وسجلوني لاعب وفي نفس الوقت مدرب، بعد دبايوا جيت راجع الخرطوم سجلوني ناس التحرير. *….. منو السجل معاك للموردة؟ كنا تلاتة أنا ومحمدو وعبدالمجيد جعفر ولقينا قدامنا في الفريق عوض دوكة ومحجوب عبدالجبار وضربة والجقر وحسن حامد ومجدي الزومة وياسر خضر وعصام عباس ونوار وحسن بلة وشلة من كبار النجوم الأفذاذ. *…... دخلت التشكيلة كيف؟ طبعاً دي كانت أصعب حاجة، أصيب ياسر خضر مع فريق سلاح الموسيقى ودخلت أنا في الجهة الشمال باعتبار أني ألعب شمال ومافي زول تاني وماطلعت من التشكيلة لحدي خليت الموردة. *…… أول مباراة ليك مع الموردة؟ أول مباراتين لي مع الموردة كانوا مع الهلال والمريخ،، الأولى مع الهلال وفزنا فيها والثانية مع المريخ وأحرزت فيها هدف ونلت نجومية المباراة وبعد المباراتين ديل اختاروني المنتخب الوطني. *….. أجمل مباراة مع الموردة؟. في جوهانسبيرج بجنوب أفريقيا ضد فريق موروكو ودي مباراة لا أنساها ومدربنا وقتها بكري عثمان وكان مفروض احترف في الفريق دا لكن ناس الموردة رفضو وقبليها برضو مفروض احترف في المقاولين العرب. *…… موقف طريف مر بيك؟ لمن سجلت الموردة ماكنت متعود على الجمهور وأول مباراة لي مع الموردة ضد الهلال، دخلنا الملعب قبل الهلال ونحن بنسخن جا طارق أحمد آدم داخل الملعب صرخت الجماهير واشتعل الملعب ودي أول مرة أشوف جمهور بالطريقة دي ووقعت في الأرض من شدت الرهبة الحصلت لي وجاني محجوب عبدالجبار قال لي قوم مالك خايف. *….. هدف في الذاكرة؟ في المريخ في كأس السودان في مرمى المرحوم عبدالعظيم الدش. *….. موقف طريف؟ كنا في الدوحة مع المنتخب الوطني مشاركين في البطولة العربية وكان المدرب شرف الدين أحمد موسى طلبوا مننا الذهاب لحوض السباحة والفندق كلو قزاز وحاول خالد برشم الإسراع قدام الناس وجاري بسرعة صدم الباب الزجاجي ووقع على الأرض. *……. متابع للموردة؟ ما متابع بس من بعيد لبعيد لظروف العمل والجري إضافة إلى أنو النادي ما مشجع والناس ما ملتفين حولوا حتى لو الواحد جا براهو ما بقدر يعمل حاجة ونتمنى الموردة تعود لمكانا الطبيعي وأن تكون هناك إدارة واعية ترجع الحاجات لمحلها زي إدارات زمان والكورة بقت علاقات لوماعندك علاقات ما بتقدر تدير النادي. *…… أفضل لاعب في السودان حالياً؟ أحمد الباشا، لكن مشكلتو مستهتر، مستواهو يوم في السما ويوم في الأرض. برضو في لاعب الموردة اسمو شيبون ممتاز وهو لاعب مهاري. *…… أصدقاؤك من اللاعبين؟ من المريخ ابراهومة صديق شخصي وخالد أحمد المصطفى وادوارد وحاتم محمد أحمد ونميري أحمد سعيد وحامد بريمة ومن الهلال مجدي كسلا وطارق أحمد آدم وجلال كادقلي وأحمد النور وكومي.