* البلد دى فيها مفارقات عجيبة .. * مفارقات ما عندها منطق ولا عندها مبرر .. * مثلاً : في السوق الناس بتفرش (الطماطم) في الأرض .. * تلقى (الطماطم) و(العجور) و(القرع) و(الأسود) كلهم مفروشين على الأرض .. * وفي نفس السوق بتلقى (الجِزم) معلقة فوق .. * (الجِزم) و(الشباشب) و(السفنجات) بتكون معلقة فوق وبعيدة من الأوساخ والقمامة .. * يعنى لو في زول جاء البلد دى جديد عادى ممكن يقول إنو إحنا بنأكل (الجِزم) وبنلبس (القرع) .. * نحن نفرش المأكولات في أماكن (الجِزم) ونفرش الجِزم في أماكن المأكولات .. * غايتو جنس غايتو * أيضاً من مفارقات البلد دى .. التاج محجوب .. * التاج محجوب بقى مدرب الهلال .. * التاج يقود الهلال فنياً .. * ويقوده في مجموعات أبطال أفريقيا وأمام مازيمبى !! * لو قاد التاج محجوب المريخ في سيكافا لما انتقده أحد .. * سيكافا هى دورة يتعلم فيها المدرب التدريب ويتعلم فيها اللاعب أبجديات اللعبة .. * وحظ التاج محجوب أن الهلال أكبر من سيكافا وأكبر من كل الفرق المشاركة في سيكافا .. * قبل أن ننسى لابد أن نقدم التهنئة لمريخ السودان العظيم الذى رفع اسم السودان عالياً وهو يحقق فوزًا كاسحاً على بطل الصومال في بطولة سيكافا .. * المريخ رفع رأسنا بهذه الفوز الكبير .. * مبرووووك يا عزو هذا الانتصار .. * المريخ يكتسح (بنابر) الصومال برباعية .. * غايتو سيكافا دى فيها أسماء فرق كده تحيرك .. * سيكافا الأخيره كان فيها فريق اسمو (تشيتي) .. * فريق اسمو زى (العطسة) .. * وهسه سيكافا الحالية فيها فريق اسمو (بنابر) .. * البنابر دى ستات الشاي خلوها .. * ست الشاي ما بتلقى عندها (بنبر) .. * شتات الشاي بقن ييجيبن كراسي . * خلو البنابر .. * البنابر الصومالى خسر برباعية من المريخ وكالعادة إعلام المريخ السالب فرح وهلل لهذا الفوز .. * الجماعة فرحانين أ تقول فازوا على الترجى التونسى .. * البنبر بتاعكم ده الرابطة كوستى أقوى منه .. * أنا والله في حاجة مستغرب فيها .. * كل الفرق المشاركة في سيكافا بتلعب بالصف الثالث ما عدا المريخ * هسه شوف كل الفرق دى بما فيها البنبر مشاركة بالصف الثالث .. * ولكن المريخ الذى هو نادى لا يخجل يشارك بالصف الأول حتى لو لعب مباراة احتفائية مع فريق ناشئين .. * وبعد ده الكأس ما بتشيلو .. * الكأس ده لو شلتو أنا بلحس المكوة .. * المهم .. * التاج محجوب يجب أن يتقدم باستقالته اليوم قبل الغد .. * شينة الهلال يقيل التاج .. * عشان الهلال السنة دى كان كريم جدًا في الإقالات .. * يفترض التاج يبقى ظريف ويتقدم باستقالتو .. * استقيل عشان ما تتبهدل .. * التاج أقل قامة من الهلال ومن رديف الهلال .. * نحن لا نتحدث عن خسارة مازيمبي ولكن نتحدث عن التاج كمدرب .. * التاج كمدرب ضعيف وكشخصية أيضاً ضعيف .. * وضعيف جداً كمان .. * مبارك سلمان مطالب بالتركيز على الشباب .. * ناس وليد وأطهر ومحمد عبد الرحمن .. * ديل مستقبل الهلال .. * الكبار لن يقدموا ما يفيد المسيرة بعد اليوم .. * وأنا والله حزين جدا للحال الذى وصل إليه مهند الطاهر .. * مهند الطاهر حارب نفسه بصورة بشعة جداً حتى أصبح غير مرغوب فيه .. * عيب والله أن يتلاعب مهند بموهبته ويتكاسل ويخرج من التشكيلة بهذه الطريقة الرخصية .. * لن يجد مهند من يقف معه خلال الفترة القادمة لأنه لا يملك الإرادة وربما لا يملك الرغبة .. * وما ينطبق على مهند ينطبق على كاريكا الذى ظل يلعب باسمه .. * مبارك سلمان لن يجامل الكبار طالما الصغار على الخط يقفون .. * وعلى الجهاز الفنى أن يبحث منذ الان عن بدلاء لكل من خليفة ومعاوية فداسى والشغيل وسامى .. * ومن الضروري أن يعيد الهلال جناحه الأيسر مروان المعار للخرطوم الوطنى .. * عضم الهلال يجب أن يتألف من مروان ووليد وأطهر ومحمد عبد الرحمن ومحمد أحمد المعار أيضاً .. * ده عضم الهلال بإضافة نزار حامد وبوى وبكرى المدينة .. * يجب أن يبدأ الهلال من هنا .. * وأهم من هذا البحث عن مدرب كبير .. * مشكلتنا في الغالب هى مشكلة لاعب وليس مدرب ولكن علينا أن نبحث عن مدرب بمستوى عالى .. * والبحث يجب أن يكون منذ الآن .. * عشان بعدين ما تحصل الزنقة يا الكاردينال وتقوم تجيب لينا ميشو .. * بمناسبة ميشو .. * المريخ سيطير من سيكافا وسيقوم بإقالة برهان ومحسن وسيتعاقد مع النابى .. * عندى إحساس كده .. * وأى زول طبعاً حر في (محاسيسو) .. * محاسيسو ب(الثاء) .. * و..و.. * وكل ما أقول قربت ليك تلقاني بادي من ...(سيكافا) ..
