في البلد دي في حاجات غريبة بتحصل بلد لاعب الكورة بدوهو مليار وعداد الحفلة عند الفنانات خمسين مليون ونائب الاخصائي بدوه 750 جنية عشان كدا كلهم سافروا منتخبنا كان لاعب مع جنوب افريقيا والمنتخب قبل المباراة زول كان شغال بيهو مافي وكتيرين ماعارفين في تصفيات مشارك فيها المنتخب وقبل ايام بس لملموا اللاعبين وسافروا , الناس بعد داك قالوا معناه في مباراة الايام الجاية وفجأة الجرايد قالت بكرة المباراة وفلان يتكفل بتذاكر المباراة الاتحاد يرصد حوافز وووو والكلام كتر لكن مافي زول فكر انو نحن استعدينا للمباراة كيف وخطتنا طويلة الاجل وين والقصيرة وين ؟ وو وعلوق الشدة وين ؟ والاغرب من كدا الناس املت , وجو من الحاج يوسف والصالحة والكلاكلات وناس العيلفون وامبدات والثورات والفتح والسروراب والنوبة وعد بابكر وعد حسين كلنا اتلملمنا ومشينا استاد المريخ وناس معتصم جعفر ذاتن صدقوا ووزير الرياضة والجلابة ناس العمم كلنا جينا استاد المريخ ماهمانا المواصلات المافي ولا الجنيه البقى قدر الصلاية ولا سخانة الجو كلنا قاعدين ومترقبين وعشمانين زينا وزي ناس معتصم جعفر البشوف العمم الكبيرة وبدلة مازدا يقول بنغلب جنوب افريقيا تسعة بدت المباراة ناس بكري يجرو ونحن نكورك وقايلين القبة تحتها فكي ومازدا مرة مرة بقوم يعمل فيها قاعد يوجه ونحن كل مرة ننادي ست الشاي تجيب لينا جبنة ونشرب ومرة وكت القصة تسخن نجيب شاي و فجأة كدا جابوا فينا قون ووبرضو عشمانين وبعد دقائق جابو فينا التاني بعد شوية مازدا قام علي حيلو قلنا يمكن يعمل حاجة عمل تغيير بدخول الشغيل لاعب الارتكاز اتاري مازدا تغييرو كان بي رايو مازدا كان خايف من التلاتة عشان كدا دخل الشغيل والشغيل ماعمل اي شي بس ثبت الكورة في تلاتة يعني يامازدا لو مادخلته الشغيل كان لي هسه نعد والشئ المحيرني الناس بعد الكورة عملوا فيها زعلانين ويكوركو ويهتفو ضد الاتحاد دا اتحاد بهتفوا ليهو ديل قاعدين غير السفر ماعندهم اي شئ اتحاد زي سوق ليبيا كلو تجار واحدين بتاعين سفر وواحدين بتاعين ادوية وواحدين بتاعين ... الله يكون في عونا الجينا من الحاج يوسف عشمانين ياجماعة الله الشئ المابتسويها بايدك مابتلقاه ونحن ماسوينا حاجة عشان نلقاه كل العملناهو كضبنا وصدقنا الكضبة الاتحاد كضب وقال اعديت الفريق ونحن صدقنا كلام مازدا الجاب اللاعبين الابعدن قبل سنين ياجماعة الخير مشكلتنا كبيرة مشكلة تخطيط ومشكلة طموح نحن الحاجة الوحيدة العندنا عندنا جمهور كويس بنسي لانو لو مابنسي كان الاستادادات بقت فاضية والله كلام انصاف مدني فيكم صاح قبل فترة انصاف مدني الفنانة بتاعة الدلوكة قالت يعني شنو عداد الحفلة لو بقي خمسين مليون وقالت اللاعبين بياخدو مليارات وقوون مابجيبو والله ياانصاف كلامك في محلو لكن البقنع ناس الوالي والكاردينال منو ؟ و .. دا ما القلب البجرسو شوق اذا ما اختار سميرو بعاد و لا القلب التبكي حبيبة لو غابت عن الميعاد
