المريخ في التسجيلات الاخيرة سجل ليه (13) لاعبا غير وديدي الفاتح والفاضل ابوشنب """"""""""""""""""""""""""""""""" المريخ في عهد جمال الوالي (12) سنة فاز بالممتاز (3) مرات فقط – بينما حققها الهلال في عهد والي المريخ (8) مرات """""""""""""""""""""""""""""""" يعيش المريخ في رفاهية من قبل السلطة التى تبرعت له ب (6) مليارات جنيه عقب فوز الفريق ببطولة سيكافا """"""""""""""""""""""""""""""""" البطولات الكبيرة – افريقيا بيخرج المريخ فيها من دور ال (64) ، ومحليا ما عندكم غير (وصافة) الهلال """"""""""""""""""""""""""""""""" • نحن ولا سألناهم. • ولا قلنا ليهم حاجة. • اول نحن قاعدين نسأل لينا زول – ما عندنا قضية....(لكن كمان الفات الحدود بنواسيه). • براهم بتفاصحوا – وبطلعوا (الكراسي) برة البيت. • وبقعدوا يتكلموا. • طبعا (طليّع الكراسي) هنا ما في ليه اي داعى ، ولا عندو علاقة بالموضوع. • مرات في (جملة) بتتلب ليك براها في السطر. • من غير ما يكون عندها مناسبة. • زي العريس البتلقاه يوم عرسو قاعد بفتش ليه في (فول). • طبع كعب. • المريخاب ديل نحن ما سألناهم. • ما قلنا ليهم حاجة. • شبكونا ليك من غير مناسبة كدا – الثلاثية – الثلاثية. • ثلاثية شنو؟. • انتوا صدقتوا؟. • نحن الاولى والتانية ما مقتنعين بيها – عاوزين تعملوها لينا (ثلاثية). • سلك دور ليك (الثلاثية – الثلاثية)...وبقى اي واحد من ناس المريخ يكتب او يظهر في التلفزيون يقول ليك : (الثلاثية). • الفاهم والما فاهم يقول ليك (الثلاثية). • الفوز على (بنادير) الصومالي – و(عزام) التنزاني عاوزين يعملوه لينا (بطولة). • هم عارفين (سيكافا) براها ما مقنعة – عشان كدا عاوزين يتموها ب (الدوري الممتاز). • والدوري الممتاز دا حقنا – البطولة الاولى في البلاد – ما بنفرط فيها ولا بنلعب. • الممتاز حقنا – حقنا حتى لو كان الفاضل ابوشنب حكم المباراة. • في الدورة الاولى صرفوا لينا (هدف) صحيح سجلو (بشه) في شباك المريخ. • في الدورة الثانية صرفوا لينا ضربتين جزاء..وحالة طرد. • مع ذلك فاز الهلال ببطولة الممتاز وحقق اللقب بعد (8) مدربين تولوا امر الجهاز الفني في الهلال خلال هذا الموسم. • و(3) مجالس ادارة تعاقبوا على ادارة الهلال في هذه السنة. • بعد دا كلو – فزنا ليكم بالممتاز زي الما حصل حاجة. • المريخ في التسجيلات الاخيرة سجل ليه (13) لاعبا ومشى لعب في بطولة (سيكافا) بعد ان تم تأجيل الدوري الممتاز عشان يحصل تجانس وتفاهم بين لاعبي المريخ. • عطّلوا ليهم الممتاز – عشان يستعدوا كويس. • برضو المريخ لم يتجاوز في الدوري الممتاز محطة ان يكون (وصيفا) للهلال. • الهلال في التسجيلات الاخيرة سجل لاعبين فقط البرازيلي (سيرجيو) الذي غادر كشوفات الهلال بعد اقل من شهر والغاني نيلسون الذي يتألق الآن مع الهلال بصورة لافتة. • والمريخ زي ما قلنا سجل ليه (13) لاعبا غير وديدي الفاتح والفاضل ابوشنب. • نحن لو لقينا نوع وديدي الفاتح والفاضل ابوشنب في الموسم الواحد بنحقق لينا (7) بطولات....ما (ثلاثية). • سباعية عديل. • ناس ريال مدريد وقت يتكلموا عن (الثلاثية) بتكلموا عن بطولة الاندية الاوروبية للابطال والدوري الاسباني وكأس الملك. • ثلاثية لها قيمة ووزن – ما زي بطولاتكم التامنها (اعمدة) صحفية. • طبعا ما في (سيكافا) اوروبية. • وما في بطولة (مكتبية) في اوروبا. • ولا في وديدي الفاتح والفاضل ابوشنب. • ما في حاجة بالشكل دا. • ولمن يتكلم الاهلي المصري عن (الثلاثية) بكون بتكلم عن دوري ابطال افريقيا – والسوبر الافريقي وبطولة الدوري المصري. • اما برشلونة فهي دائما ما تتحدث عن (الخماسية) – بطولات كبيرة ولها مكانة عالمية. • بعد ما كانوا بحلموا ب (الثلاثية) – رجعوا تاني الى قواعدهم – لغينا ليهم كل الالقاب. • كل البطولات ...ورجعناهم الى مواعينهم الطبيعية ليكونوا (وصيف) للهلال. • تقولوا ثلاثية. • تقولوا خماسية. • تقولوا اي حاجة – تمشوا وتجوا وما عندنا ليكم غير (الوصافة). • القابكم ديك – بطولاتكم الفرحانين بيها – كلنا عندنا بنختصرها ليكم في (الوصافة). • عشان بالحساب وبالورقة والقلم – اعلى ما حققه المريخ في هذا الموسم وهو وصافته للهلال في بطولة الممتاز. • باعتبار ان بطولة الممتاز هى البطولة الكبرى والبطولة المعتمدة والتى يمثل عن طريقتها المريخ في البطولة الخارجية. • يعني يا ناس المريخ سوف تمثلوا السودان في البطولة الافريقية عن طريق فوزكم بوصافتكم للهلال. • لا سيكافا. • ولا كأس السودان بتمثلوا بيها السودان. • وصيف بطولة الممتاز يمثل السودان مع بطل الممتاز في بطولة الاندية الافريقية للابطال. • بل ان بطولة الممتاز يمثل منها حتى الثالث والرابع في بطولة الكونفدرالية. • لاحظوا انو ما في زول هنا بجيب سيرة لكأس السودان. • التمثيل والقياس يتم عن طريقة بطولة الممتاز – لذلك بطولة الممتاز عند الهلالاب مقدرة. • وهي البطولة المحببة للهلال..والتى يفوز بها الهلال دائما. • المريخ في عهد جمال الوالي (12) سنة فاز بالممتاز (3) مرات فقط – بينما حققها الهلال في عهد والي المريخ (8) مرات. • دي حاجة ما بتخجل. • دي حاجة ما بتكسف. • الكبير كبير. • والكبير دائما بظهر في الحاجات الكبيرة. • وعلى قدر اهل العزم تأتي العزائم. • المضحك ان اعلام المريخ ورئيس نادي المريخ خرج وشكك في بطولة الممتاز ووصفها بعضهم بالفساد. • الجماعة نسوا (سيكافا) منطقة (الايبولا) ذاتها – البطولة التى يحكمها (الدولار). • بطولة تنظم حسب الطلب. • الفساد كله في بطولة سيكافا – وبتتكلموا عن فساد الممتاز. • اما بطولة كأس السودان – البطولة (المكتبية) فحدث ولا حرج. • رغم من ان بطولة كأس السودان هي البطولة الثانية في السودان – إلا انها فقدت قيمتها بسبب التجاوزات التى تحدث فيها. • مع ذلك لا ننفى (الفساد) الذي حدث في بطولة الممتاز – وكان المريخ اكثر المستفيدين منه. • ارجعوا الى مباريات الهلال والمريخ في بطولة الممتاز سوف تجدوا كيف قدم حكام المباريات مساعداتهم للمريخ. • وكيف كان يظلم الهلال من التحكيم. • مباراة الهلال والاهلي شندي وحدها يمكن ان تعطي الفرق – حيث صرف حكم المباراة هدفين للهلال. • ويمكن لنا كذلك ان نأخذ القياس من مباريات القمة نفسها. • في الدورة الاولى كما ذكرنا صرف الحكم هدف محمد احمد بشه الذي سجله بحجة (التسلل). • وصرف حكم مباراة الهلال والمريخ الاخيرة ضربتين جزاء للهلال اوضح من الشمس. • مع ذلك (الفساد) التحكيمي فاز الهلال ببطولة الممتاز – متحديا ذلك الظلم الذي تعرض له الفريق طول الموسم. • كذلك يعيش المريخ في رفاهية من قبل السلطة التى تبرعت له ب (6) مليارات جنيه عقب فوز الفريق ببطولة سيكافا. • اضافة الى رفاهية اخرى وعناية ورعاية خاصة من قادة الاتحاد العام لفريق المريخ. • حيث بلغت رعاية الاتحاد للمريخ قيامهم بتأجيل الدوري الممتاز من اجل ان يستعد المريخ للممتاز عن طريق المشاركة في بطولة سيكافا. • بعد كل هذه العطايا والمعاملة الخاصة من قبل السلطة والاتحاد العام والهدايا المقدمة من حكام المباراة للمريخ فشل المريخ في الفوز بالممتاز. • وخرج من بعد كل هذه الشواهد – يتحدث عن الفساد. • ان كان هنالك (فساد) في الممتاز فان اكثر المستفيدين منه هو المريخ ...وما فعله الفاتح وديدي والفاضل ابوشنب شاهد على ذلك. • لذا احسن ما تتكلموا عن (الفساد). • اما (ثلاثيتكم) يا سلك – إلّا تتموها بي (قيم) ضمنة – الممتاز دا لا بتقدروا عليه ولا حاجة. • العبوا في البطولات القدركم. • يمكن ان تنجحوا في البطولات الهامشية. • اما البطولات الكبيرة – افريقيا بتخرجوا فيها من دور ال (64) ، ومحليا ما عندكم غير (وصافة) الهلال. • ......... • ملحوظة : الممتاز في كل (10) سنوات المريخ بشيلوا مرة...والمرة ذاتها بالتحكيم. هوامش • المريخ لعب قمة الممتاز وعينه على (الضرب والعك) – الهلال لو لم يبادل المريخ (الضرب والعك) كان يمكن ان يفقد المباراة. • وقد ظهرت في ذلك الامر خبرة عمر بخيت ..وحنكة الفاتح النقر. • الفاتح النقر ومحسن سيد اتفقوا ان نجم المباراة من الهلال كان (عمر بخيت)..رغم ابتعاد عمر بخيت من المباريات في الفترة الاخيرة. • إلّا انه كان حاضرا في المباراة بشكل مميز. • لو ركز الهلال على الاداء فقط والمظهر الجمالي – كان يمكن ان يفقد البطولة كلها. • محسن سيد قال في قناة الشروق ان (الباشا) مرهق بسبب سيكافا لذلك ابعد عن المشاركة. • ما قلتوا (سيكافا) كويسة. • الغريب ان (الباشا) لم يشارك مع المنتخب وكان في اجازة مفتوحة اكثر من (10) ايام. • ويقولوا ليك بعد دا (الباشا) مرهق. • الباشا من قبل عنده سلسلة اشكاليات كبيرة مع المدير الفني للمنتخب محمد عبدالله مازدا. • يبدو ان مشاكل الباشا انتقل بها الى المريخ – واصبح عنده مشاكل مع الجهاز الفني للمريخ. • الباشا طبعو كدا. • الاخ سامر العمرابي انضم لصحيفة قوون باعمدته الساخنة واخباره الحصرية وهو سوف يشكل من دون شك اضافة لقوون. • استاذنا عبده قابل كان قد اعلن عن توقعه لمباراة القمة قبل ايام عديدة – وصدق عبده قابل في توقعه حيث انتهت المباراة بالتعادل كما توقع عبده قابل. • ..... • عاجل : الممتاز بساوي (17) بطولة سيكافا و (11) كأس السودان.
