* ملكيون اكتر من الملك .. انجليز اكتر من الخواجات .. التركي ولا المتورك !! ده كلو سمعنا بيهو لكن مريخاب بحبو لاعبي الهلال اكتر من الهلالاب دي صعبة شوية ! اعلام المريخ كتب في بكري المدينة كلام نحن ذاتنا احترنا .. قلنا يا ربي ده بكري حقنا ذاتو ولا غيروا مع التلاتة مليارات دي ! * قالوا ليك بكري اخطر مهاجم سوداني . لاعب سريع .. خطير وحريف .. مزمل يقول ليك ولدنا ده مافي زول بلعب زييو .. ده طبعا قبل ما يلعب للمريخ ! محسن يقول ليك المدينة مهاجم خطيييير وتسجيلوا فني .. ابوشيبة طبعا لو قال ولا ما قال اصلا ميت في حب لاعبي الهلال .. جماهير المريخ ما صدقت انو بكري المدينة سجل للمريخ فرح وهستيريا وبكاء ونوبة ومظاهرات .. الحاصل شنو يا جماعة اذا كان بكري لعااااب قدر ده وعايزين معاهو كمان مهند وعمر بخيت وبتفاوضوا في المعز وميتين في نزار من سنين وراء كاريكا جارين.. طيب بتقولو الهلال شال الدوري بالحكام مالكم !! ديل لاعبين عايزين ليهم تحكيم يساعدهم ! * ناس مزمل ابوشيبة ديل كترت ما شفقانين على تسجيل مهند سجلوا قبل يمشي الاتحاد مع انو بقولوا ما بعترفوا بالتسجيل بعيد من الاتحاد ! * قالوا القنبلة انفجرت في اثيوبيا .. قلنا ان شاء الله خير .. ما يكون الارهاب وصل اثيوبيا ! قالوا انتظروا لي بكره .. انتظرنا !! * مهند قال ما عايز .. مليار يا مهند ! ما عايز .. اتنين يا ود الطاهر .. ما عايز .. تلاتة زي بكري .. يا اخوانا ماعايز .. مرسلين ليك القروش مع ابوجريشة .. ما عايز ! طيب نحن كتبنا انك اتسجلت نعمل شنو .. قولوا خطأ مطبعي ! * سابو ليك مهند قبلوا على عمر بخيت .. المريخ يفاوض المعلم .. المريخ يقترب من المعلم .. المعلم يبدأ تدريس لاعبي المريخ ! المريخ يحتاج للمعلم .. المريخ يقدم عرضو للمعلم .. سابو ليك المعلم قبلوا على المعز المريخ محتاج للمعز .. ابوشيبة طبعا عايز يسجل الهلال من الحارس لي رأس الحربة .. جيبوا المعز .. عايزين المعز .. سجلوا المعز .. ولي هسة ما سمعنا بقرار المعز .. * ناس المريخ ديل بقي لاعب واحد ما بكفيهم .. عايزين ليهم واحد تاني مع المدينة .. عمر لسه بفكر والمعز مشغول مع قيادة المنتخب ومهند خطاها عديييل ما داير .. اقول ليكم حاجة .. احتمال كبييير الهلال يشطب خليفة .. سجلوا خليفة .. انتو عايزين لاعب تاني من الهلال ولا عايزين حاجة تانيه !! * نسيب اولاد عمنا ونجي لي ود عمنا عماد الطيب .. عندنا سؤال بسيط يا عماد في التسجيلات .. سيسي مشطوب ولا قاعد ! بس ما تقول لي قاعد وحيقعد مع جمال ! قالوا البقعد مع جمال ما بقوم ! يكون مهند ده اتفاوض مع جمال واقف ! معقولة بس .. لاعب قال الهلال ما حيعيد تسجيلو .. برضو قال ما عايز يلعب في المريخ والله دي احر من حقت هيثم .. تعرف يا مزمل مهند كده بتكون المرة التالتة على التوالي يقول ليكم لا وساكنو ! وبرضو تقولو خالد عزالدين ثقيل .. * نجي لي عماد الطيب تاني .. سيسي ده الطرف اليمين الوحيد في الهلال .. علي النور مشى وخليفة احتمال كبير يمشي المريخ لو مهند مشى اسبانيا ! قالو الغزال قال ليهم لو ما مشيت اسبانيا بلعب في المريخ .. التقول المريخ ده هولدنا .. لو ماشي على الثورة عليك الله نزلني في الهجرة !!معقولة بس .. المريخ بقي اقل من اسبانيا ؟؟ لا لا في حاجة غلط .. ده مش المريخ البجيب اللاعبين من كل انحاء العالم والذي اصبح قبلة لكل النجوم والبقعد مع رئيسو ما بقوم .. يكون الدوري الممتاز قعد مع جمال ولا شنو ! * معليش يا عماد الناس ديل بقاطعونا ياخ .. قلنا ليك سيسي ده المدافع الوحيد .. لا سمعناكم قلتو متمسكين بيهو ولا سمعناكم قلتو جايبين طرف يمين غيرو .. الحاصل شنو .. الطرف الشمال اتملا واليمين فااااضي .. انا خائف والله ترموا اليمين وتخشوا في مشكلة ! * بوتاكو وبويا وفداسي . انتو عايزين تكتلوا بله جابر ولا كيف ؟ بالمناسبة بله في ولا شطبوا .. عيان ولا طيب .. خلوا بالكم ناس المريخ ديل لما يسجلوا لاعب من الهلال تاني سنة ما بتذكروا لعيبتهم .. بكونوا مخلوعين بلاعب الهلال لحدي ما يقول ليهم ما عايزكم زي هيثم مصطفي يجو يفتشوا واحد تاني .. في الفترة دي بس بتذكروا لاعبنهم ! * بالمناسبة انتو متذكرين انو الليلة الجمعة .. نصلي ونجيكم !!
