طيب وقت حراسكم (أجانب) – البحرس ليكم مرمى (الوطن) منو؟ هسع شاي الصباح يجيك مفرتك ...السكر في حتة والشاي الحب في حتة – والموية السخنة في حتة عليكم الله لو محسن سيد ما زول (بارد) بقبل الكلام البعمل فيه غارزيتو قالوا ليك في واحد غرق في البحر – طلعو ليك بعد تلاتة يوم (يرجف) من البرد * لو في زول قال ليكم اتنين في اتنين بي (أربعة). * ما تصدقوه. * الزمن دا ما في ثقة. * ما في ثقة في أي زول. * أي حاجة (اتلخبطت) حتى جدول (4). * ديل ضربوا جدول (4). * جدول (4) ضربتو سوسة يا رجالة. * لو في واحد غالطك وقال ليك الليلة (الثلاثاء)...ما تصدقو. * ما في أمانة. * ممكن الليلة يكون أي يوم – عدا (التلاتاء). * شفتوا التلاتاء دي بالذات لا. * إلّا التلاتاء. * أصلو ما في ثقة. * تاني ما بنصدق لينا زول. * خلاص كفاية. * هسع في برد؟. * قبل أيام – جابوا لينا الخبر دا مع (شاي الصباح) – قالوا غارزيتو طرد محسن سيد. * دعكنا عيونا في طشت الغسيل – ما صدقنا. * عيونا بقت زي أم فتفت. * هي متين بدأت؟. * ما قلنا حاجة – قلنا دا يكون كلام جرايد ساكت. * هسع في برد؟. * الهلالاب بزيدوا الموضوع. * يعجبوكم في الزيادة. * زمان شاي الصباح كان بجيبوا ليكم معاه (طاولة) رغيف. * لمن الدنيا بي خيرها. * هسع في برد؟. * تقعد تشرب في (الشاي) وتقرّض في (الرغيف) السخن..لمن يجيبوا ليك (الفطور). * وكانوا كمان – (شاي الصباح) بجيبوا ليكم معاه (القهوة). * طوالي كدا. * القهوة في ضنب الشاي. * الدنيا كانت بي خيرها. * هسع في برد؟. * نسوان زمان ما بقصرن. * وما بتلومن في زول. * هسع شاي الصباح يجيك مفرتك ...السكر في حتة والشاي الحب في حتة – والموية السخنة في حتة. * كل حاجة تجيك براها. * هسع في برد؟. * في ناس الموية بتجيهم باردة – يجيبوا ليهم معاها (فحم) برة يسخنوها بي طريقتهم. * نسوان ما بتفاهمن. * يقولوا ليك تعمل (شايك) براك. * تتكلم ولّا تقول حاجة يقولوا ليك دا زمن مساواة الرجل والمرأة. * الكتوف اتلاحقت. * ليه أنت تقوم من نومك – تلقى (الشاي) جاهز – تقوم تعمل شايك براك يا فندم؟. * فندم دي شنو كمان؟. * هسع في برد؟. * نحن قصدنا ما كان (شاي الصباح). * شاي الصباح يطير. * ذاتو – قالوا الحكومة عاوزة تلغي شاي الصباح. * البرلمان عاوز يشيل (شاي الصباح) من المقرر. * أنتوا عارفين شاي الصباح دا بكلف خزينة الدولة كم؟. * دي (رفاهية) ما في ليها أي داعي. * هسع في برد؟. * فكينا الشاي – ومسكنا ليك (الخبر). * فلفلناه فلفلة. * فلفلنا الخبر – ما الشاي. * الشاي نعمل بيه شنو؟. * دا ما موضوعنا. * ولا تعملوا لينا موضوع. * ما تقولي الدنيا (برد)...والبرد نزل ...والسقط شديد ..والشاي ما كعب معاك – الكلام البقوله الناس الكبار ديل. * هسع في برد؟. * زي زول كدا – دخل ليه معرض سيارات فخم شديد – قال ليهم عاوز لي عربية مرسيدس. * قالوا ليه عربية مرسيدس نجيبها ليك من وين في البرد دا؟. * هسع في برد؟. * قالوا ليه عربية مرسيدس مافي يا ود الناس عامل عيونك المتل اللمبات المركبة غلط. * لكن يا ود الناس عشان أنت شبهك دا ما غريب علينا (عجلة صينية) كيف معاك؟. * قال ليهم عجلة صينية أنا قلت ليكم عاوز (أفطر). * هسع في برد؟. * طبعاً ما في علاقة بين عربية المرسيدس والعجلة الصينية. * ولا في مناسبة. * ولا شبه ساكت. * وبرضو ما في علاقة بين العجلة الصينية والفطور. * الحقيقة بنقولها. * إلّا ناس الحكومة ديل يكونوا طلعوا ليهم بي علاقة جديدة. * يمكن احتمال. * بعملوها ديل. * مرة مشيت لي مؤسسة حكومية قلت ليهم عاوز لي (تأشيرة) خروج. * لقيت ليكم المؤسسة كلها داخلة في (واتس اب). * من (الغفير) للمدير. * زول واعي واحد في المؤسسة ما في. * كلهم موستبين ليك. * دقيت التربيزة قدام الموظف المسؤول – وقلت ليه عاوز لي تأشيرة خروج. * الموظف بدون ما يشعر قال لي : (أنت آخر ظهور كان متين ليك ؟). * البلد كلها (مروِّسة). * البلد كلها (مفسبكة). * البلد كلها (موستبة). * هسع في برد؟. * انتوا ليه بتعملوا كدا. * حلايب دي العاوز يجيبها ليكم منو؟. * حلايب تقطّع القلب و الله. * خلوها حلايب. * الطابية دي العاوز يحرسها ليكم منو؟. * أم درمان. * أم درمان الثورة. * أم درمان أبوروف. * أم درمان البوستة. * أم درمان الإذاعة والتلفزيون. * الطابيه يا عالم. * ح تجنسوا ليها برضو. * يمكن يجنسوا ليها (حراس). * الحراس في الهلال والمريخ بقوا (مجنسين). * فضيحة السواد. * هسع في برد؟. * هسع الروس يقولوا علينا شنو؟. * حراسنا بقوا (أجانب). * يا عالم. * أقول ليكم شنو؟. * أشرحها ليكم كيف؟. * أوصفها ليكم كيف؟. * فترت أنا. * الحراس في الهلال والمريخ في القمة السودانية بقوا (مجنسين). * خليتوا لينا شنو؟. * الحارس الأساسي (مجنس). * والحارس الاحتياطي برضو (مجنس). * طيب وقت حراسكم (أجانب) – البحرس ليكم مرمى (الوطن) منو؟. * المنتخب يعني؟. * ما تقولوني كلام ما قلتوا. * كلام واضح وصريح. * ما تقعدوا تلفوا وتدوروا براكم. * هسع في برد ؟. * ما تفتكروا الحكاية قايم وعراضة وشبكة وقون. * وخط 18. * ورجل راية. * مرة حضرت لي مباراة حكامها (نسوان). * قلت ليهم هسع دي بتقع لينا كيف؟. * معقولة رجل الراية – (مرا). * يا جماعة مالكم عاوزين تلخبطوني؟. * وتقول لي شاي الصباح. * يا ريت لو بقت على شاي الصباح. * هسع في برد؟. * الموضوع أكبر من كدا. * الحكاية أصلاً بتبدأ من هنا. * عليكم الله خلوني اسكت. * خلوني احتجب. * خلوني ما أقول أي حاجة. * ما في داعي. * أنتوا قايلين مشروع الجزيرة تدهوره بدأ من وين؟. * بدأ من خزان الرصيرص. * الحكاية كلها مرتبطة ببعضها البعض. * مداخلة كدا. * تفتكروا الموضوع دا كلو (صدفة). * ما تفتكروا الحكاية دي ما عندها علاقة بالحكاية ديك. * القال ليكم منو؟. * هسع في برد؟. * قالوا ليك في الخبر الجابوه لينا مع شاي الصباح بدل (طاولة الرغيف) إن غارزيتو طلب من محسن سيد أن يحضر قبل التمرين بساعة كاملة. * يعني قبل ساعة – محسن سيد يكون في الملعب. * واقف براهو. * في البرد دا. * هسع في برد؟. * قلنا أكيد غارزيتو عندو رأي في محسن سيد. * يكون فاكرو (هيثم مصطفى). * خلاص غارزيتو عاوز يركز ليكم مع (محسن سيد). * تاني محسن سيد دا لو غارزيتو شافو في (سوق الجمعة) بوقفو ليك - وبقول ليه (العجور) الشايلو في (الكيس) دا عاوز بيه شنو؟. * محسن سيد يقعد ينطنطن – غارزيتو بقول ليه كمان شايل ليك (عجور). * بقوم يخصم من مرتبو. * ومحسن سيد تعمل ليه أي حاجة – بس ما تهبش مرتبو. * كلو ولا المرتب. * هسع في برد؟. * عليكم الله محسن سيد الجابرو على التلتلة دي شنو؟..عشان يقوم قبل التمرين ما يبدأ بساعة كاملة. * ويمشي المسكين براهو في البرد دا ويقيف في الملعب. * عليكم الله دا (برد) الزول يقيف فيه براهو في الميدان. * الزول في البيت ما قادر يقيف. * يمشي يقيف ليه في ميدان. * وكمان قالوا ليك قطر فيها جنس برد. * تدخل ايدك في جيبك تطلعها (تلجة). * البلد متجلة. * وغارزيتو موقف ليكم محسن سيد في البرد دا في الملعب. * ساعة كاملة واقف. * المسكين يتلفت زي شوكة الثواني إلى أن يقوموا ناس ضفر وعلي جعفر من النوم. * ديك يشربوا الشاي على راحتهم. * ويقرضوا الرغيف. * ويفطروا. * ويلبسوا وينزولوا على الملعب. * ومحسن سيد واقف منتظرهم في الملعب. * عشان شنو؟. * عشان غارزيتو قال ليه تمشي تقيف بس. * عليكم الله في عقوبة اكتر من كدا. * ما في سوداني بقبل بالكلام دا. * أنت يا محسن سيد – غارزيتو دا يكون فاكرك فرنسي. * الزول دا ثبتو في مكانو. * دا ما برد الزول يقيف فيه ساعة كاملة في الملعب. * ليه؟. * أنت في الكلية الحربية. * هسع في برد؟. * غايتو لمن المريخ يرجع من قطر ..محسن سيد بكون اتجمد. * بكون بقى لوح تلج. * عليكم الله لو محسن ما زول (بارد) بقبل الكلام البعمل فيه غارزيتو دا. * ما في زول بقبل بالكلام دا. * هسع في برد؟. * ..... * ملحوظة : برهان عرفها – عشان كدا غادر لزنزبار. هوامش * على كدا – الله يستر على ناس مزمل أبوالقاسم وبابكر سلك. * طبعاً هيثم كابو ما بستيقظ قبل 12. * ولا بكضب. * ولا بجامل في الحتة دي. * قالوا ليك في واحد غرق في البحر – طلعو ليك بعد تلاتة يوم (يرجف) من البرد. * هسع في برد؟. * هلال مريخ يوم 24 يناير. * الهلال مفروض يلعب هذه المباراة بالرديف. * ناس بله جابر ديل لو عاوزين ليهم (محترفين) ولا حاجة. * ناس مكسيم نحن ما جايبنهم للكلام دا. * هذا الموضوع إن شاء الله نكتب فيه بصورة موسعة يوم الخميس القادم في (من الغلاف للغلاف). * الفاتح النقر كفيل بي غارزيتو. * ناس بشه الصغير والجعلي والصيني وأطهر ومحمد عبدالرحمن قادرون على فعل العجائب في عواجيز المريخ. * الرديف جاهز. * هسع في برد؟. * عزام قالوا ليه المريخ لاعب أمام شالكة الألماني. * قال ليهم يعني شنو؟..المريخ دا لعب أمام بايرن ميونخ وطلع من التمهيدي. * الظاهر السنة دي عاوزين يطلعوا قبل التمهيدي. * هسع في برد؟. * ........ * عاجل : برهان ح يتحول إلى رديف المريخ ...اسمعوا مني الكلام دا وما تطلعوه بره العمود.
