كلو من ناس الإرصاد الجوي...الجماعة ديل من يقولوا ليك في موجة بارد قادمة ...الجماعة بيبردوا التألق في التمارين – عاوز يحلل ال (3) مليارات جنيه..التمارين عاوز تبقى ليكم (مباريات) اي شكوى في (البرد) دى ..ايقاف طوالي ...الفيفا ولا بتلعب في حاجات زي دي نحن والله لو البرد دا جاب ليه (تلج)..والجليد قفل شوارع الخرطوم – ما خلى ليه شارع ...نحن ما بنخلي (بكري المدينة) * في ناس بقطعوا من رأسهم. * بيزيدو الكلام. * المعلومة تصلهم (طشاش)...يعملوها ليك (5) اجزاء زي ليالي الحلمية. * في جماعة كدا – في اي حتة. * في اي دنيا. * الواحد بدون مناسبة يقول ليك : (شفت البرد دا كيف؟). * الزول بكون ما بعرفك...ولا شافك قبل كدا. * ولا عندك معاه علاقة – مع ذلك بقوم يشكي ليك من (البرد). * الواحد لو ما بردان وقت يسمع (النشرة الجوية) بقوم يبرد. * بدون ما تشعر تقعد (ترجف). * انا ما عارف السودانيين ديل عاوزين شنو؟. * يعملوا ليكم (جو) براكم. * يعملوا ليكم استثناء. * يجيبوا ليكم (طقس) من بره. * في الخريف ..المطرة لو (نقناقة) ..بخلوا شغلتهم ويقعدوا يشكي من (المطر). * المطر تبقى ليهم موضوع. * العاوز يعرس ..يقول ..بطلت العرس لمن اشوف نهاية المطر دي شنو؟. * العاوز يسافر ..يقول ليك – منتظر الخريف. * العاوز يبني ..يقول ليك المطر. * يربطوا نشاطهم كلو بالمطر. * شوية مطرة ...الشوارع تتقفل ..والحركة تقيف. * والناس تطلع تمشي شارع النيل. * المدهش ..المطر لو ما جات في الخريف ..برضو بتجهجهو ويقعدوا يصلوا صلاة الاستسقاء. * يفتشوا للمطر فتيش. * تجيهم ..شوارعهم ما بتستحمل. * يفتشوا للبتوقفها ليهم. * يعني تصب ووب ..(ما في صالون بركز) الصوالين كلها بتدق الدلجة. * البيوت كلها تقع. * المطر ما تصب ...الجماعة بتجهجهوا. * انتوا عاوزين شنو؟. * اي حاجة بتجهجهكم. * في الشتاء يقولوا ليك (البرد). * شوية برد ساكت ...تلقى البلد كلها متلفلفة. * الشالات ما بتديك الدرب. * مرة في البرد دا – مشينا لينا بكا. * عزاء عادي كدا. * زول مات. * مشينا البكا لقينا ليك البكا كلو (فنايل سقط). * بما في ذلك المرحوم * المرحوم بي فانلة سقطو. * اي واحد لابس ليه فانلة سقط. * كأنهم في صورة. * قلنا ليهم انتوا في عزاء وإلّا سباق درجات ...(الفنايل) الكتيرة دي شنو؟. * حبة برد يعمل فيكم كدا. * طيب لو جاكم (جليد) ح تعملوا شنو؟. * المشكلة الجماعة ديل مع شكيتهم دي ..في الصيف برضو بشكو. * في الصيف اي واحد فيهم يقول ليك شفت السخانة دي كيف؟. * انا ما عارف الناس دي عاوزة شنو؟. * السنة كلها بشكوا. * الشكية ذاتها ما كويسة. * ما حلوة. * خاصة الشكية من الطقس. * وبعدين يا ريت لو الشكية في حاجات بتستاهل. * الموضوع ما بستاهل (الجرسة) دي كلها. * هسع البرد دا ما اتجاوز حدود المعقول. * ما تقعدوا تقولوا لي درجة الحرارة في حلفا 4 درجات. * وفي دنقلا 6 درجات. * نحن ذاتو قاعدين نعملها في نفسنا برانا. * الزول وقت يقول ليك الليلة شفت الواطة دي باردة كيف؟. * انت طوالي بتشعر بالبرد – حتى لو كنت لابس ليك (120) سويتر – غير الشالات. * البرد ..شعور بنتقل بالكلام. * بالمشاركة. * هسع الواحد لو قاعد في التلفزيون وشاف في (النشرة) جماعة غاطسين في تلج ..بتقوم طوالي تبرد. * وتجر (البطانية) عليك. * عشان كدا يا جماعة ما تبردو الزول. * ما تنقلوا لينا (السقط) بالكلام. * كلو من ناس الارصاد الجوي. * الجماعة ديل من يقولوا ليك في موجة بارد قادمة ...الجماعة بيبردوا. * بنحس بالبرد قبل (الموجة) ما تصل. * عليكم الله ما تقعدوا تنقلوا لينا البرد بالكلام. * ما في اي برد. * انت شنو عاوز تعملها لينا السنة كلها (برد)؟. * اعمل ليكم شنو لكن؟ – البلد كلها بتتكلم عن (البرد). * عاوزين تنسوني موضوع (بكري المدينة). * الناس خلوا موضوع بكري المدينة وركزوا ليك مع (البرد). * لكن نحن والله لو البرد دا جاب ليه (تلج)..والجليد قفل شوارع الخرطوم – ما خلى ليه شارع ...نحن ما بنخلي (بكري المدينة). * ولا بنسيب حقنا. * ولا بنجامل في الموضوع دا. * فاكرين (البرد) بنسينا حقنا. * عشان بننسي ليكم. * المريخاب ..عارفين بكري المدينة ما ح يعمر معاهم كتير. * وبكري المدينة هو ذاتو عارف نفسو ما قاعد (المفارق عينو قوية). * المريخاب قالوا يتفشوا شوية. * قالوا شنو؟. * قالوا بكري المدينة يتألق في التمارين. * ما يتألق ان اتألق. * التألق في التمارين – عاوز يحلل ال (3) مليارات جنيه. * التمارين عاوز تبقى ليكم (مباريات). * بعدين انت يا بكري المدينة المتألق ليها شنو؟. * انت (الفيفا) منتظرة شكوى الهلال عشان توقفك. * قالوا ليك الكاردينال جهز ليه (12) محامي اوروبي. * منتظرين بس قرار لجنة الاستئنافات. * يعني يا بكري المدينة تألقك في التمارين ما بحلك. * ولا بمرقك منا. * ما تبقى زي ديك الملسمية ....يعوعي وبصلتو في النار. * عارف يا بكري المدينة ...انت (بصلتك) وين؟. * بصلتك عند (12) محامي اوروبي. * الكاردينال قالوا مع (البصلة) جاب ليه (فلفل)...عشان الموضوع يسخن. * عشان كدا ما تقعد (تتألق) لينا ساكت. * نحن عارفين بكري المدينة قلبو ميت. * وليه حق ..قلبو يكون ميت. * زول قابض ليه (3) مليار جنيه ...قلبو ما يكون ميت. * لو بطّل الكورة ومشى عمل ليه (مستشفي)..بعيش في امان الله. * ما عندو اي مشكلة. * على العموم يا بكري المدينة حاول ألحق التسجيل لكورس الحكام ...عشان حكاية تكون (لاعب) كورة قدم فقدت فرصتك فيها. * ممكن تكون حكم كويس. * زول سريع وخفيف. * يمين تطلع احسن حكم. * بس ان شاءالله الفيفا ما تحرمك من ممارسة اي نشاط رياضي. * ان شاءالله الايقاف يكون قاصر فقط على اللعب. * انت ممكن تكون حكم كويس. * على اسوأ الفروض ...ممكن تكون حكم رأية. * .......... * ملحوظة : ناس الفيفا قالوا يمكن مع ايقاف بكري المدينة يوقفوا تراوري. هوامش * اصلو ناس الفيفا زهجانين ..والايامات دي سمهم فائر. * الجليد عامل ليهم (نفسيات). * عشان كدا اي شكوى في (البرد) دي ..ايقاف طوالي ...الفيفا ولا بتلعب في حاجات زي دي. * الاتحاد اجل مباراة قمة الاستقلال الى يوم 29 يناير. * كويسة معانا. * لكن لو طلعتوا مباراة القمة من (البرد) دي ما في زول بحضرها ليكم. * في البرد دا ..البدخل ليكم الاستاد منو؟. * كمان (الاستادات) دون كل الامكنة – فيها جنس برد. * انا ما عارف ليه الاستادات (متلجة) كدا. * تلج بس. * عشان كدا في البرد دا ما في زول بدخل مباراة القمة. * مع البرد دا..مباراة القمة لو حضروها ليكم في التلفزيون الناس تكون ما قصرت معاكم. * في التلفزيون ..مشكلة. * لذلك ..خلوا الواطة تسخن شوية. * انتوا ناس المريخ ديل مشوا قطر يعملوا شنو؟. * ما في اي خبر منهم. * ما في اي مباراة اعدادية ليهم. * الجماعة ديل مشوا دورة في قناة الجزيرة. * غارزيتو ..كبر. * البرد دا لا بقدر عليه ولا حاجة. * انتوا ما شفتوا مدرب الهلال (شباب) كيف؟. * تقول مصارع. * غايتو مع المدرب (الجهامة) دا – تاني ما حكم بيظلمنا. * كمان قالوا ليك الزول دا عندو بونية. * كلمو حكام الراية ..الحركات الكانوا بعملوا فيها المواسم السابقة ..مدربنا البلجيكي دا ..لا بقبلها منهم ولا حاجة. * اعملوا حسابكم. * مباراة الهلال اليوم امام العربي تجربة حقيقية. * الخسارة فيها لا تعني اي شيء. * نحن يا دوب في طور الاعداد. * لكن لو غلبنا بعد الوضع دا ..ما عاوزين نشوف لينا مريخابي في الحلة. * اخلوا لينا الحارات. * المهم يا جماعة ..ركزوا لينا على الرديف. * الرديف اهم. * مستقبل الهلال مهم. * الكاردينال ...ما يركز لينا مع بكري المدينة اكتر من الرديف. * ....... * عاجل : بكري المدينة وعنكبة لو في تشكيلة واحدة...يبقى يا ناس الاتحاد إلا تجيبوا ليكم (720) لقاط كور...ح يتعبوا لقاطين الكور.
