بعد كورتك دي ..مفروض الهلال يسحب شكوتو من الفيفا ...بكري ما محتاج للفيفا ..بكري المدينة (مساوي) بوقفو الزول دا لو منحوه مع الكورة عقد عمل وقطعة ارض وعادوه ليه ألف مرة ما بسجل منها هدف المدينة امس كان كل ما يصل مرمى الهلال ..يتلفت على جماهير المريخ ويقول ليهم معاكم الكاميرا الخفية هسع عليكم الله – الخدمة القدمها بكري المدينة للهلال امس ..(3) سنوات بكري بيلعب في الهلال قدمها * عشان ما تفتكروا اننا عاوزين نضيّع حق الجماعة ساكت...المريخ في مباراة امس كان افضل من الهلال. * ما تفتكروا عاوزين نضيّع (الموجة). * زمان في الراديو ..يومك كلو بتكون بتفتش في (موجة) ام درمان. * اذاعة ام درمان زمان كانت عندها موجة زي (الحمامة) اصلها ما بتتقبض. * طول يومك بتكون قاعد تسك في الموجة. * وقت يقولوا ليك (هنا ام درمان) زي القالوا ليك قفَّلت الرياضيات. * الفرحة ما بتسعك. * هسع بكري المدينة ..الكورة البيدوها ليه ..تقول بيدوه معاها (موجة). * تقول بفتش في اذاعة ام درمان. * زي كأنو بقعد يفتش في الموجة عشان يظبطها ..قبل ما يصوب كورتو برة الشبكة. * غايتو ..وصلت لقناعة تامة. * ثقة شديدة. * بكري المدينة دا عمرو ما بجيب ليه قون. * بكري المدينة دا لو قدامو (190) مرمى ..قالوا ليه جيب في اي واحد من ال (190) مرمى ..بقوم يشوت الكورة في الكشافات. * لو ما في كشافات. * برضو بشوت في الكشافات. * لو كانت الكشافات دي في خرم ابرة ..بقوم يشوت فيها. * مرمى لا. * بس الكشافات. * بكري المدينة لو كان قعدوه في (داخلية) براهو ...ما معاه اي زول ..ما بجيب ليه قون. * اتير توماس ..اعطاه كورة ..هو و(مكسيم)...بكري قعد يتلفت ويلف ويدور ..لمن شالو منو الكورة. * تقول عاوز يدخل ليه صينية خبيز في فرن. * كورة اتير توماس دي لو منحوها للحكم بيجيبها قون. * انت يا بكري المدينة قابض ليك (3) مليار جينه ..وبتشوت برة المرمى. * بعد كورتك دي ..مفروض الهلال يسحب شكوتو من الفيفا ...بكري ما محتاج للفيفا ..بكري المدينة (مساوي) بوقفو. * اصلو بي حالتك دي ما محتاج ليك شكوى. * هسع عليكم الله – الخدمة القدمها بكري المدينة للهلال امس ..(3) سنوات بيلعب في الهلال قدمها. * انت يا بكري بتنفع الهلال في المريخ اكتر. * اكيد بي حالتك دي امس رفعت الضغط للمريخاب. * انا كل ما يجيبوا بكري المدينة منفرد بمرمى الهلال بفتكر ..المخرج (عاد) الفرصة الضائعة. * ابداً ..اتاريها دي فرصة جديدة. * وبكري يشيل ويضيع. * بس بتشابهوا في (الاضاعة). * يعطوه الكورة الف مرة ..وبرضو بيضيعها. * مرة يديه اتير توماس. * ومرة الشغيل. * ومرة بوتاكو. * انت يا اتير الزول دا قايل الفيفا ..حكمت للهلال ورجعتو. * لسه يا اتير ..القرار ما وصل. * انت يا بكري المدينة عاوز تجيب ليك قون متين؟. * برجع تاني لبكري المدينة ...عاوز اشوف المباراة (فنيا) ..عشان ما تفتكروا اننا هاربين من الموضوع...زي ما قلت ليكم في اول سطر. * بنقول ليكم الكلام ..وبنعيدوا كمان. * المريخ امس كان افضل من الهلال. * وكان المريخ اقرب للانتصار من الهلال. * رغم ان الحكم رفع رايتو ساكت في كم حالة ..كانت فيها حالات الهلال اقرب للاهداف. * لكن اجماليا ومن حيث الاداء ..كان المريخ افضل. * ربما لعب الهلال باسترخاء. * وربما كان معظم لاعبي الهلال ليسو في يومهم. * دفاع الهلال وقع في العديد من الاخطاء ..هجوم المريخ لم يحسن التعامل مع الفرص الساهلة التى وجدها. * الفرص التى وجدها المريخ لو وجدها الهلال لسجل في المريخ اكثر من ثلاثة اهداف. * اضف الى ذلك ان الشغيل واتير توماس ..وقبلهم بشه وسيدي بيه وقعوا في اخطاء كادت ان تكون سببا في ولوج اكثر من هدف مضمون في شباك الهلال. * في المريخ كان علاءالدين يوسف جيدا ..وهو يستحق نجومية المباراة ، لا سالمون ولا كيبي. * علاءالدين يوسف سجل هدف جميل ..وكان مستواه عاليا. * دفاع المريخ (امير كمال وعلي جعفر) لو تعرضوا لضغط لوقعوا في العديد من الاخطاء. * الحالات القليلة التى تعرض لها دفاع المريخ ..كان فيها امير كمال وعلي جعفر في منتهى الضعف والتوهان. * الهلال في الشوط الثاني كان افضل من الشوط الاول الذي كان فيه المريخ هو الافضل. * هدف علاءالدين يوسف كان جميلا ..لكن هدف بوبكر كيبي كان اجمل. * واضح ان الهلال كسب مهاجما خطيرا ..سوف يكون له شأن كبير. * فيصل موسى ووليد علاءالدين بسببهما ارتفع مستوى الهلال ..وقد استطاع فيصل ووليد ان يقدموا مستوى اكثر من رائع. * لو بدأ مدرب الهلال بفيصل ووليد ..كانت الامور سوف تختلف كثيرا ..وكان يمكن ان يحسم الهلال المباراة من الشوط الاول. * نيلسون افضل محترف في السودان الان ..ظلمه المدرب عندما اشركه في آخر المباراة. * كان يفترض ان يبدأ نيلسون المباراة. * عموما يمكن ان نقول ان شوط المدربين (الشوط الثاني) كسبه الهلال واستطاع مدرب الهلال البلجيكي ان يتفوق على فرنسي المريخ. * النتيجة جيدة مع الهلال باعتبار ان الهلال دخل المباراة بتوليفة جديدة ..وتشكيلة لأول مرة تلعب امام جمهور الهلال. * في ظل ارضية ملعب لم تكن جيدة. * الى جانب ذلك ..يجب ان نقول ان عوامل الانتصار كانت في صالح غارزيتو باعتباره ليس غريبا على الكورة السودانية. * لكن الجهاز الفني للهلال ..لأول مرة يخوض مباراة في السودان. * الجهاز الفني للهلال لم يتعرف بعد على لاعبي الهلال ...ناهيك عن التعرف على الفريق المنافس. * غارزيتو درب الهلال من قبل وهو يخبر الهلال جيدا ..كما هو يخبر المريخ ايضا. * لذلك التعادل في ظل (حداثة) الهلال ..نتيجة جيدة للهلال. * ربما نال الخوف والرجفة من المريخ ..وجعلهم يرضوا بهذه النتيجة في ظل الهجمة الاعلامية الشرسة من قبل إعلام الهلال. * إعلام الهلال صوّر فريق الهلال في كامل الجاهزية..وحقيقة الامر ان الهلال يحتاج الى وقت آخر حتى يكتمل بدرا. * وهذا امر طبيعي ..الكمال لا ينشد بهذه الطريقة على عجل ولا يكون في شهر. * المهم ان إعلام الهلال نجح في إرهاب المريخ ..وقد كان المريخ بعوامل الجهاز الفني الذي يقوده ..والاضافات القليلة التى حدثت في تشكيلته اقرب للانتصار. * اضافة للمساعدة التى وجدها من الحكام. * لكن واضح ان المريخ جاء فقط من اجل التعادل. * ونجح الهلال في الخروج بنتيجة تفيد الهلال وتنفعه اكثر. * لو انتصر الهلال ..سوف يخفى الانتصار الكثير من العيوب. * بل ان جماهير الهلال نفسها الى جانب الإعلام سوف تتسع احلامهم وآمالهم وسوف ينفخوا الفريق اكثر. * اما لو خسر الهلال فان عواقب الخسارة سوف تكون اكبر ..بسبب صدمة الجماهير ..وإحباط الإعلام. * والخسارة في بداية الموسم ..من غير شك لها عواقب وخيمة. * نرجع لي بكري المدينة. * بكري المدينة امس ..تقول كان شايل ليه (كاميرا). * الزول دا كل ما يصل مرمى الهلال ..يتلفت على جماهير المريخ ويقول ليهم معاكم الكاميرا الخفية. * بكري المدينة الكورة لو قطعوا ليه معاها (بطيخة) ما بيجيبها. * بطيخة شنو؟. * بكري المدينة دي النوع البكون بفكر في الباسطة. * كل ما ينفرد بالمرمى ..بقوم تفكيرو يشرد ..ويتذكر الباسطة. * يا زول باسطة شنو؟. * بكري دي الكورة لو منحوه معاها عقد عمل في السعودية. * وقطعة ارض في المنشية. * وعادوه ليه بالبطيء بدل المرة.. الف مرة ..برضو ما بسجل ليه قون. * الزول دا ادوه (بطانية) وقت تلعبوا ليه كورة ..عشان يأخد راحتو للاخر. * قون شنو كمان البجيبو بكري؟. * .......... * ملحوظة : بكري دا ما يشوف ليه شغلة غير الكورة ..قبل ما خطاب الفيفا يصل. هوامش * عشان نحن حققنا الاستقلال. * طبيعي نشيل درع الاستقلال. * القرعة عارفة قدر الهلال. * لكن اكرر واقول ..ان المريخ امس كان افضل من الهلال. * وانه كان اقرب للانتصار. * وان التعادل مكسب للهلال. * الكاردينال ..كلموه يخفف تصريحاته..وما يتكلم كتير. * الوضع غير مطمئن. * لازم تصلحوا الخلل. * ولازم تشوفوا حلول. * وتشوفوا اضافات تختاروه من وقت مبكر. * طبعا نحن نعرف ان الحكم من خلال مباراة إعدادية لا يعطي الصورة الكاملة. * لكن الجواب بتعرف من العنوان. * شيدوا حيلكم. * يمكن ان نقول ان مباراة المريخ أعدت الهلال بصورة جيدة لمباراة الاهلي شندي. * المهم الدوري. * المهم الرسمي. * وفقدان أي نقطة مرفوض. * خاصة في شندي. * استاد الخرطوم قد يكون سبب في ان يظهر الهلال بهذا الشكل. * نيلسون يجب ان يبدأ. * وفيصل موسى اثبت انه مكسب. * ووليد علاءالدين ..(نيمار) بدون كرت (بي ان). * ......... * عاجل : وليد علاءالدين (نيمار) من غير تشفير...يقولوا ليكم الكلام الف مرة.
