ما في فرق كبير بين (إهدار) و (أهداف)....الفرق في الحرف الأخير فقط...أكيد بكري المدينة ما قدر يفرز بين حرف (الراء) وحرف (الفاء) قالوا ليهم أضربوا (عزام) ..قعدوا يضربوا ليك في (العصيدة)...عزومتهم مدورة ليك من تلاتة إلّا ربع أستاذ الإنجليزي لو عندو (جلحات) ساكت – بكون في الإنجليزي ما بتصاقع ..ولا بتفاهم الدفاع البعمل فيه (باتريك) دا – لو عملوا قدام برشلونة – ناس ميسي يطلعوا من الملعب زي بكري المدينة * في ثقافتنا العادية ..ثقافة الشاي باللبن...ومفرمة الملوخية ، وحلة الحلبة ...عندنا (معتقدات) ثابتة وراسخة. * حاجات اكتسبناها من (حلة الحلبة). * ولا بنتغالط فيها. * ولا بنقبل فيها كلمة. * حاجات (اخترعناها) برانا. * انتوا فاكرين الناس ديل ساهلين ..ديل ما بتصاقعوا في (معتقداتهم). * ما في زول بقدر يسألنا فيها ..او يزحزحنا عنها. * في ناس (شاي المغرب) عندهم (واجب) زي عيادة المريض. * ممكن يزعلوا لو ما شربوا (شاي المغرب). * واليوم كلو رأسهم يكون (مشرق). * الواحد فيهم لمن ما يشرب (شاي المغرب) ..كلامو يبقى ليك كتر – كتر ، يصل المرمى ويلعبها في الكشافات. * زي بكري المدينة. * مواليد برج (الكشافات). * لو وصل المرمى (12) مرة ..بضيّع (17) مرة. * الفرصة يقسمها على اتنين ..عشان يضيعها. * شغال (ضيّاع) بس. * تقول سجلوه في المريخ عشان يركب ليهم (لمبات) الابراج. * او سجلوه اخصائي اهدار الفرص. * بكري المدينة في مباراة المريخ ومريخ الفاشر ...طلعوا ليه (الشرطة) عديل كدا...برضو ما جاب ليه قون. * صاحبكم فاكر المشكلة في الشرطة. * معتقد ان قرار الفيفا سوف يصلوا بواسطة الشرطة السودانية. * قدر ما حاولنا نوقع ليه الكلام ما وقع ليه. * جمهور المريخ ما قصر معاه ...يوم مباراة مريخ الفاشر اخرجوا ليه الشرطة من الملعب. * زولكم برضو ما كضب...ادوه ضربة جزاء اهدرها. * قالوا ليه مالك اهدرتها – قال ليهم يا جماعة الشبكة الواقف لي فيها (جاهد) حارس مرمى مريخ الفاشر اتخيل لي واقف فيها (الكاردينال). * الكاردينال قاعد يتراوح لي. * انتوا عارفين ما في فرق كبير بين (اهدار) و (اهداف)....الفرق في الحرف الاخير فقط. * اكيد بكري المدينة ما قدر يفرز بين حرف (الراء) وحرف (الفاء). * يكون مفتكر الحرفين – حرف واحد. * عشان كدا قدر ما يقولوا ليه هاك جيب لينا (اهداف) بقوم يجيب ليهم (اهدار). * بكري المدينة لو ما ناس الهلال ديل شالوه من رأسهم ما بجيب ليه قون. * بعدين يا ناس المريخ ما في عصيدة (باكمبا) بتجيب ليها (قون). * جماعتكم دوروا ليك في اللاعبين (عصيدة) شوية الكورة الكانت في رأسهم طارت. * ما عاوز اعمل ليكم (العصيدة) موضوع. * ولا فاضي للحاجات دي. * ولا عندي ليها وقت. * قالوا ليهم اضربوا (عزام) ..قعدوا يضربوا ليك في (العصيدة)...عزومتهم مدورة ليك من تلاتة إلّا ربع. * نحن زمان عندنا اعتقاد ان الدكتور لمن يكون عندو (صلعة) بكون دكتور شاطر شديد. * واستاذ الانجليزي لو عندو (جلحات) ساكت – بكون في الانجليزي ما بتصاقع ..ولا بتفاهم. * وسيد الدكان لو عندو (صلعة) – طحنيتو بتكون سمحة. * ما عارف علاقة الصلعة بي الطحنية شنو؟. * السودان دا بتحصل فيه حاجات غريبة. * بتحصل فيه حاجات ما مفهومة. * ولا بتقع لينا. * لكن نعمل شنو؟. * صابرين ساكت. * سيد البيت لو كانت عندو صلعة بيجيك لي (حقو) من اول يوم في الشهر. * ما بنتظر تاني يوم. * ولا بكضب. * عشان كدا ابعدوا من (الشقق) المملوكة للمصلعين. * وعشان تكون في السليم ..زول عندو (جلحة) ذاتو ما تأجر منو؟..عشان (الجلحات) دي ممكن في اي لحظة تبقى (صلعة). * واول ما الجلحات تبقى (صلعة)...زولكم بتلقوه من يوم واحد واقف في خشم الباب – عاوز حقو. * تقول الدنيا طارت. * هي يعني الدنيا طارت وإلّا طارت وإلّا طارت؟. * بعد الخبرات دي. * ومع العلم دي. * لمن الهلال جاب المدرب البلجيكي باتريك ..قلت تاني الهلال مع الصلعة دي ..اقل مباراة يفوز فيها خمسة. * افتكرت (الصلعة) هجوم. * اتاريها الصلعة كلها طلعت (دفاع). * الصلعة كلها (خندقة). * ونحن بي ثقافاتنا وبي علمنا الخاص دا ...كنا بنفتكر ان الدفاع ما عاوز ليه صلعة كبيرة قدر دي. * اصلو نحن عاوزين ندافع ضد شيلسي. * الدفاع البعمل فيه (باتريك) دا – لو عملوا قدام برشلونة – ناس ميسي يطلعوا من الملعب زي بكري المدينة. * نقول ليك حاجة لي معلوميتك يا باتريك ..دفاعك البتعمل فيه دا ..الفاتح النقر بدون (صلعة) بعملو. * الفاتح النقر اخصائي (خندقة) بدون صلعة. * و الله الفاتح النقر دا يكون عندو (صلعة) تاني مورينهو ما يثبتو. * ولا بلحقو. * بي جلحات ساكت – الفاتح النقر جهجه ليك غارزيتو. * الفاتح النقر فاز ليك بي درع الاستقلال بي جلحات. * طبعا يا جماعة كلامي عن صلعة باتريك ما عندها علاقة بالموافقة على الاطاحة بالمدرب. * الاطاحة بالمدرب بهذه الصورة – سواء كانت بي صلعة او بدون صلعة هي حاجة غلط. * واضح ان المشكلة في اللاعبين. * او المشكلة في الادارة. * عشان ما معقول ولا منطقى ان يشرف على الهلال في (14) شهر اكثر من (10) مدربين. * اذا ما كان في ثبات فني وثبات في الاجهزة الفنية ...ما ح تكون هنالك انتصارات وبطولات. * باتريك في حواره مع (كمال الهدي) والذي يتوقع ان تنشره عدد من الصحف اليوم قال ان الهلال غير مؤهل الآن لبطولة خارجية. * وهذه حقيقة. * اذا اراد الهلال بطولة خارجية عليه ان يثبّت الاجهزة الفنية...وان يستقدم لاعبين على مستوى عالي. * نتمنى ان يستقدم الهلال في الفترة المقبلة جهاز فني كبير ..له اسم وله تاريخ في كورة القدم. * وقبل ذلك يجب ان يستقر الجهاز الفني ..يعني الاطاحة بالاجهزة الفنية بسبب نتيجة مباراة امر لا يليق بالهلال. * اشرف الكاردينال ..رئيس نادي مجتهد ..وهو قد قدم الكثير في فترة قصيرة. * عليه فقط ان يؤمن اجتهاده هذا بالاستقرار الفني وبتوفير اجواء مثالية لفريق كورة القدم. * يونيو القادم يجب ان تكون هنالك اضافات قوية لكشف الهلال الافريقي. * ونحسب ان الاندية التى سوف يواجهها الهلال حتى الوصول لمرحلة المجموعات اندية ادنى من الهلال واقل منه بما في ذلك القطن الكاميروني. * لكن اذا وصل الهلال بمستواه هذا لمرحلة المجموعات من غير اضافات ومن غير جهاز فني مقتدر فلن يصمد الهلال في المجموعات (5) دقائق. * الكاردينال ما قدمه من جهد واجتهاد ودعم للهلال يستحق عليه الشكر والثناء والتقدير حتى وان فشل الهلال. * ليس في مقدور احد ان يحقق النجاح ..هذا امر لا يستطيع ان يجلبه احد في كرة القدم. * لكن نقدر ونحفظ للرجل اجتهاده ..ونحن لا نطلب اكثر من هذا (الاجتهاد). * بعدها النجاح سوف يتحقق ان شاء الله. * فقط على الكاردينال ان يتعلم من تجاربه ..وان يستفيد من التسجيلات الماضية ..لأن الكاردينال اكثر ما يحتاج يحتاج للخبرة. * واظن ان الشهور الماضية مع قصرها – إلّا انها منحت اشرف الكاردينال الخبرة الكافية للتعامل مع التسجيلات القادمة. * اذا اضاف الهلال ثلاثة لاعبين فقط في التسجيلات القادمة على مستوى عالي وسوبر سوف يمضي الهلال بعيدا في البطولة الافريقية. * ............ * ملحوظة : صلعة باتريك دي في دوري الدرجة الثانية ممكن نلقاها. هوامش * المريخ ممكن يتجاوز عزام – شريطة ان يشيل (الاوهام) من رأسو. * المريخاب ديل اتوهموا عديل كدا. * طيب انتوا كدا – بكري المدينة كيف؟. * بكري المدينة هسع لو على مرادو يرجعوه اهلي شندي. * زولكم في المريخ (الباكمبا) مسحت ليه رأسو. * بالمناسبة الفيفا دي مالها اتأخرت كدا. * اصلو الفيفا بتتأخر كدا. * نحن مستعجيلن. * الظاهر كدا الفيفا منتظرة بكري المدينة يجيب ليه (هدف) ..ويوقفوه. * الفيفا الى الآن ما محترفة بي بكري المدينة. * منتظراه يجيب ليه قون. * بعد داك يوقفوه. * لكن هسع عليكم الله يوقفوه على شنو؟. * هسع بكري المدينة دا ما زي الواقف. * فرقو من عنكبة شنو؟. * ......... * عاجل : كورة بكري المدينة دي ما كورة (فيفا).