هيثم مصطفى فضل الاهلي شندي على شيك (البياض) الذي قدمه له جمال الوالي """""""""""""""""""""""""""""" بالمناسبة فيصل سيحة براهو ..قال الخرطوم الوطني عندها (ضربة جزاء) وقال كوفي مفروض ينطرد """"""""""""""""""""""""""""" امير كمال معجب بي بص الهلال..وحجز غرفتو في بيت الهلال جوار (الشغيل) """"""""""""""""""""""""""""""" يا مزمل انتوا وقت قنعتوا من الدوري ..رأيكم شنو تشوفوا ليكم (سيكافا) سريعة كدا """""""""""""""""""""""""""""""""""" • لا عاوز اتكلم ليكم عن (العدس). • ولا عاوز اتكلم ليكم عن (شوربتو). • عاوز اتكلم ليكم عن البعملوا فيه المريخاب ديل. • المريخاب المرجعية الاولى عندهم (الهلال). • عندهم مشكلة اسمها (الهلال). • لم يجد المريخاب ما يُبرر به ما قام به بكري المدينة عندما اعتدى على (حكم) مباراة المريخ والاهلي شندي ..غير ان يقول المريخاب ان هيثم مصطفى سبق له ان (قبقب) الحكم أحمد النجومي. • الكلام دا وين؟. • غايتو هيثم مصطفى لمن كان في الهلال – (17) سنة ما شفنا ليه (قبقبة). • القبقبة دي إلّا حصلت عندكم. • اما اذا كانت حجتكم في ان (القبقبة) حصلت من هيثم مصطفى عندما كان في الهلال ..فدعونا نقول بعد هذه (القبقبة) لماذا جريتو وراء هيثم مصطفى ..وعندما اتسجل الفرحة عاوزة تكتلكم. • كانوا عاوزين يروحوا فيها. • وهيثم كابو الذي كان بهاجم في هيثم مصطفى (17) سنة ..لمن هيثم مصطفى انتقل للمريخ طلع ليه عدد خاص من صحيفة (فنون) يوم الجمعة. • كابو ما عملها لي وردي. • وفنون كانت ما بتطلع يوم الجمعة. • هيثم كابو من الفرحة طلع ليه جريدة (فنية) يوم الجمعة عشان هيثم مصطفى وقع في كشوفات المريخ. • الامر المدهش يا (هيثم صديق) ان هيثم مصطفى بعد هذه (القبقبة) التى تحدث عنها اعلام المريخ قعد في بيتو سنة كاملة ..ورفض يواصل مع المريخ. • رغم ان جمال الوالي قدم لهيثم مصطفى شيك على بياض من اجل ان يعيد هيثم مصطفى توقيعه في كشوفات المريخ. • هيثم مصطفى فضل الاهلي شندي على شيك (البياض) الذي قدمه له جمال الوالي. • سمك (بياض) سمعنا بيه. • لكن (شيك) على (بياض) دي اول مرة نسمع بيها. • انتوا يا ناس المريخ وقت بتهاجموا في هيثم مصطفى وبتنتقدوا في (القبقبة) الخلاكم تسجلوه شنو؟. • والخلاكم تقدموا ليه شيك على بياض شنو؟ بعد ان فضل يقعد في بيتو من يواصل مع المريخ. • عاجبكم (القبقبة) دي يعني. • هيثم مصطفى الذي ادعوا عليه (قبقبة) النجومي ...طاردوه وتوسلوا له ..وحنسوه وقدموا ليه (شيك على بياض) بينما فيصل العجب كابتن المريخ اجبروه يكتب خطاب الاعتزال. • وقت فيصل العجب قعد في البيت زي هيثم مصطفى ..لقى الجماعة ما اشتغلوا بيه ..قام مشى مريخ الفاشر. • الاغرب من هذا ان هيثم كابو الذي اخرج عدد خاص من صحيفة فنون الفنية ..(سطر) في عمودو الرياضي ما كتبو عن فيصل العجب عندما غادر المريخ. • يا كابو سكورب ..اقصد يا كابو ..انت فيصل العجب دا إلّا يغني ليكم (صرف النظر عني) عشان تهتموا بيه. • يشيل ليكم (رق). • مجلس المريخ قدم لهيثم مصطفى (شيك على بياض) من اجل ان يكتب فيه الرقم الذي يحدده ..بينما قدم مجلس المريخ (خطاب اعتزال) لفيصل العجب عشان يوقع فيه. • شفتو الفرق. • وبرد يا. • الطريف ان هيثم مصطفى عندما قعد في بيتو موسم كامل ..ورفض مواصلة اللعب مع المريخ ...ناس المريخ اشتكوا هيثم مصطفى عند الاتحاد العام. • وذهب مجلس المريخ ابعد من ذلك عندما خاطب الاتحاد العام ثلاث مرات مستعجلا معاقبة هيثم مصطفى عشان قعد سنة كاملة في بيتو ..ورفض مواصلة نشاطه مع المريخ. • طيب يا ناس المريخ...انتوا جمال الوالي دا ما قاعد يزعل ويقعد في بيتو (6) شهور ..في زول بيسألو؟. • جمال الوالي عادي جدا يقعد في بيتو ..ويقفل التلفون ..المريخاب بنتظروه لمن الزعلة تفك. • عاوزين تشطروا على هيثم مصطفى. • هيثم مصطفى دا لعب في الهلال (17) سنة..يعني اقدم من (واليكم) الفرحانين بيه دا. • اطرف من كل هذا ..ما كتبه الغالي مامون ابوشيبة بعد تعادل المريخ مع الخرطوم الوطني. • تعالوا شوفوا ابوشيبة قال شنو؟. • اول حاجة ابوشيبة قال (النقطة مكسب). • النطقة مسكب يا مامون ابوشيبة جبتوها من (بغداد). • يا ابوشيبة مالكم بقيتوا متواضعين كدا؟. • النقطة دي جبتوها من الخرطوم الوطني ..وليس من اتلتيكو مدريد. • ابوشيبة كتب ايضا : ( نجح الاهلة في حرمان المريخ من مهاجمه بكري المدينةبعقوبة تآمرية قاسية وضعيفة الحثيثيات ..وبالتالي نجحوا في إضعاف المريخ وتعطيله). • يا ربي اعلام الهلال ضرب حكم مباراة الاهلي شندي والمريخ انابة عن (بكري المدينة). • يمكن يكون خالد عزالدين هو الكتب التقرير. • فوبيا شديدة. • اللاعب يضرب الحكم ..يعتدي عليه ..ويقولوا ليك (الاهلة نجحوا في حرمان المريخ من مهاجمه بكري المدينة). • ابوشيبة تاني رجع وقال (ادارة المريخ لم تتعامل بالقوة والشدة لمنع هذه العقوبة الاستهدافية او حتى ابطالها ليدفع المريخ الثمن امس). • يا سلام. • عاشت العدالة. • عاش القانون. • عشان المريخ ينتصر ..القانون في 60 داهية. • كلو من (الهلالاب). • عليكم الله في (فوبيا) اكتر من كدا. • الجماعة ديل الظاهر عليهم (الهلال) بطلع ليهم في النوم. • بعدين بكري المدينة عرفت من متين ..بكري المدينة خلاص بقى منقذ ليكم. • اكتر زول (اروش) في الهلال بقى مستوى المريخ مربوط في كراعو. • كابو كتب في عموده امس (ظهرت فاعلية بكري المدينة امس واضحة وجلية عندما لعب دفاع الخرطوم مرتاحا). • يا حليل بكري. • ح تكونوا بالحالة دي خمس مباريات تانية يا كابو. • وبرد يا. • مزمل ابوالقاسم ..ترك هزيمة المريخ امام مريخ الفاشر..وما جاب سيرة لهزيمة المريخ امام الاهلي شندي ..وقال امس في عموده عندما تعادل الخرطوم الوطني مع المريخ : (للشامتين ..تذكروا ان الخرطوم تعادل مع الهلال وكان الأفضل والاخطر والاوفر وصولا). • الشامتون ديل اصلو ما عندهم حق. • عينهم طايرة. • وطبعهم كعب. • وبنسوا سريع. • سؤال لمزمل ..انتوا وقت الهلال اتعادل مع الخرطوم الوطني يا مزمل ريحتونا؟. • موش اختوا حقكم على دائر مليم ..وقعدتوا تكتبوا عن النقطة ..و(العدس) فيه كم نقطة؟. • رغم ان (العدس) ما فيه اي نقطة..إلّا حاجة تكون جابتها وزارة التربية والتعليم اخيرا. • لكن الى ان اكملنا دراستنا ما قابلتنا (نقطة) واحدة في العدس. • يا مزمل نحن اتعادلنا مع الخرطوم ..لكن ما اتعادلنا مع الاهلي الخرطوم في ملعبنا 2 / 2. • ولا خسرنا في ملعبنا 1 / صفر من مريخ الفاشر...ومريخ الفاشر لاعب بي عشرة ..والمريخ ادوه ضربة جزاء ..ضيعها بكري ذاتو!!. • ولا طلعنا الشرطة. • ولا بنحدد الحكام بالاسم. • ولا اتغلبنا في شندي 1 / صفر. • ولا ضربنا الحكم. • يعني بقت على تعادل الخرطوم الوطني. • بالمناسبة فيصل سيحة براهو ..قال امس الخرطوم الوطني عندها (ضربة جزاء) وقال كوفي مفروض ينطرد. • الكلام دا قالوا فيصل سيحة ..ما صلاح احمد محمد صالح. • ولا شروني. • الحمدلله ..سيحة المرة دي ما قال جهاز المونتاج اتعطل. • انا ما عارف جهازكم دا عاوزين تعملوا بيه شنو؟. • تقول جهاز دهب. • تقول عاوزين يطلعوا بيه دهب. • نرجع لي كابوسكورب. • اقصد كابو. • وبرد يا. • كابوا قال : (امير كمال يحتاج لمزيد من التركيز الذهني ..ضفر كان اداؤه اقل كثيرا من مردوده في المباريات السابقة ..رمضان عجب كان خارج الفورمة..ولم نشعر بوجوده على الاطلاق). • تركيز شنو يا كابو ؟..زولكم امير كمال دا دخل الكيس. • بقى يعد في (المليارات). • امير كمال معجب بي بص الهلال..وحجز غرفتو في بيت الهلال جوار (الشغيل). • شفتوا الشغيل ارتاح كيف؟..كورتو اطورت. • سمعتوا في يوم ..الشغيل ضرب ليه حكم من جاء للهلال. • سمعتوا بيه (كرت) ساكت شالو. • قالوا الكاردينال كل مرة بيضيف ليه (صفر) لي امير كمال يمين الرقم. • وزولكم عندو طابق عاوز يقفلو. • اشمعنا (بكري المدينة) بقفّل طابقو. • اما رمضان العجب فاقنعوا منو ..تاني ما بدخل ليكم (فورمة)...وما ح تشعروا بوجوده على الاطلاق ..لمن يفوت منكم على طريقة علاءالدين يوسف. • انصحكم تصوروا كتير مع امير كمال ورمضان عجب ..الظروف ما معروفة. • وبرد يا. • طبعا اجمل حاجة بعد تعثر المريخ تقرأ اعمدة المريخاب..جنس بكى. • بكى شديد. • مزمل اعلنها واضحة : ( نعيد ونكرر : الدوري في ستين داهية..المهم قورماهيا ..اقصد كابوسكورب). • جماعتكم قنعوا من (الدوري) مع انهم طلعوا ليهم (الشرطة). • وقالوا ليهم اختاروا (الحكام) براكم. • تتخيلوا بعد دا قالوا (الدوري في ستين). • القنعان من الدوري ...شيء تشكروا عليه. • خلاص تاني ما في زول يلوم تراوري. • وما في زول يهاجم ضفر. • وقت قنعانين للدرجة دي. • لكن يا مزمل انتوا وقت قنعتوا من الدوري ..رأيكم شنو تشوفوا ليكم (سيكافا) سريعة كدا. • وبرد يا. • .......... • ملحوظة : الدوري السنة دي مولع نار ..المريخاب قنعوا من الاسبوع التاسع. هوامش • طبعا العدس طار لي من رأسي. • عدس شنو؟. • اقول ليكم حاجة يا مريخاب ..اعملوا ليكم شوربة عدس واشربوها سخنة. • بطلعكم من (الفوبيا) العايشين فيها دي. • الخرطوم الوطني ما مشكلة. • المشكلة كابوسكورب ..زي ما قال مزمل ابوالقاسم. • الطيران بعد الاتنين ..ما ظريف. • ولا بنقبلوا منكم. • ولا بنجاملكم فيه. • امشوا عسكروا احسن ليكم. • وما تقلوا في اللحمة والباكمبا. • يا بكري المدينة (الكنبة) ما عاوزة ليها لحمة قدر دي. • 6 مباريات ما نشوفك تاني. • لمن يصل قرار الفيفا. • غدا نعلق على لقاء الكاردينال الجماهيري ان شاءالله. • ......... • عاجل : انتوا يا مريخاب في مباراة الخرطوم الوطني فعلا فقدتوا (بكري المدينة)..لو كان مشارك في المباراة كان ضرب ليكم الحكم.
