ضربة الجزاء التى احتسبها الحكم ..ضربة جزاء (راديو)...في الاذاعة بتمشي عادي..لكن في (التلفزيون) شينة ضربة الجزاء التى احتسبها الحكم خلت الصورة مع صوت محمد فضل الله الذي كان بيكورك (ضربة جزاء) زي الفيلم الترجمتو سابقة الصورة خلوني اوقع ليكم الكلام...ضربة الجزاء دي ..زي الزول المشى يخطب ..قاموا عقدوا ليه نحن لو بنلقى لينا حكام زي حكام مباريات المريخ ..كنا كل اسبوع بنجيب لينا بطولة من برة * عندنا في الحلة زول كضاب. * النوع البكون عندو اربعة نخرات من الكضب. * بس بكضب. * من الكتب بقى زي عمود المستشفى..احسن حاجة فيه بكون (الرز). * زولنا دا في الكضب ما في زول بيلحقو. * الزول الكضاب دا ..يلاقيك من الصباح ..بدون مناسبة كدا. * وبدون مقدمات. * وبدون اي حاجة ..بقوم يقول ليك ..تعرف انا حضرت نهائي كأس العالم سنة 1967. * تقول ليه لكن سنة 1967 ما كان في بطولة لكأس العالم. * يقول ليك تتخيل مع ذلك ..انا حضرتها النهائي. * وكمان النهائي كان بين الصومال وتشاد..البرازيل طارت من الدور الاول. * تقول ليه دي نهائي شنو البين الصومال وتشاد ..دي إلا نهائي (ضمنة). * يحلف ويقول ليك (كورة قدم). * المباراة كمان انتهت 7/صفر للارجنتين. * تقول ليه لكن الارجنتين ما كانت طرف في النهائي ..انت براك قلت النهائي كان بين الصومال وتشاد. * يقول ليك يعني تفتكر لو النهائي كان بين الصومال وتشاد ..تفتكر (الارجنتين) ما بتفوز. * لا الصومال ..ولا التشاد ..بيستحقوا الفوز. * عشان كدا المباراة نتيجتها كانت في صالح الارجنتين. * الزول الكضاب دا ..يلاقيك يوم العصر ..يقول ليك تتخيل انا عايش بدون كلية. * تقول ليه لكن ما في زول بعيش بدون كلية. * يقول ليك : انا بدون كلية ممكن اعيش ..لكن بدون (موبايل) و الله خمسة دقائق ما بقدر اعيش. * الموبايل عندو اهم من (كليتو). * تشيل كليتي ..وما تشيل موبايلي. * لكن دا كلو ما بحلكم مني. * ولا بتمرقو. * يعني فاكرين ..بتمرقوا مننا بي (ضربة الجزاء) الما ضربة دي. * كان تخلوها مباراة (سرية). * ما في زول بيسألكم. * ولا بنقول حاجة. * ما كان في داعي للتلفزة. * ضربة الجزاء التى احتسبها الحكم ..ضربة جزاء (راديو). * في الاذاعة بتمشي عادي. * لكن في (التلفزيون) شينة. * ضربة الجزاء التى احتسبها الحكم خلت الصورة مع صوت محمد فضل الله الذي كان بيكورك (ضربة جزاء) زي الفيلم الترجمتو سابقة الصورة. * زي شية (العتود) البقولوا ليك دي شية ضان. * او زي الزول الاشتر البكون واقف في الفنان برقص على ايقاع اغنية (ورا – ورا) والفنان بغني في الوقت نفسه في اغنية (الحزن النبيل). * الضربة الجزاء حقتكم دي زي شنو؟. * زي الزول العاوز يفحص الملاريا ..وهو واقف في شباك الصراف ..ما جايب خبر. * زي شنو؟. * خلوني اوقع ليكم الكلام. * ضربة الجزاء دي ..زي الزول المشى يخطب ..قاموا عقدوا ليه. * ما في اي علاقة. * ضربة الجزاء دي زي شنو؟. * زي الزول البقول ليك تعال اتغدي معاي. * تمشي ليه بي احساس (العدس)..تلقاه ضابح ليك. * الخروف معلق في الباب. * و الله ضربة الجزاء دي ما كان تجيبوها لينا في التلفزيون. * كان تسكتوا عليها. * تخلوها ..بيناتكم. * ما تخلوا هلالابي يشوفها. * اصلو ما كان تجيبوها في التلفزيون. * ما بتجي. * كان تصروا على عدم التلفزة. * ما في زول بيسألكم. * ممكن الناس تنقنق شوية. * لكن دي خياركم. * كان الناس بتقدر موقفكم. * والمريخاب ما بقولوا حاجة مع الحالة دي. * التلفزة بي ضرباتكم الوهمية دي – لا بتجي ولا حاجة. * قبل ايام ..تداولت مواقع التوصل الاجتماعي ..اغنيات فنان اطلقوا عليه (علي كبك). * علي كبك مين يا عم؟. * صورة على كبك ..لشخص من زمبابوي نال جائزة اقبح وجه في زمبابوي. * يعني ما لقيتو غير اقبح وجه في زمبابوي. * الشكل من زمبابوي والاغنيات من عندينا. * وباقى السيناريو والحوار ..منسوج (سوداني) خالص. * بقينا خطيرين في الحاجات دي. * بقينا ما بنتلحق في التأليف. * طلعوا ليه اغنيات. * وعملوا ليه حفلات وبوسترات. * صاحبكم في النهاية طلع (وهمي). * وهم ساكت. * زول (وهمي). * وهمي زي ضربة الجزاء حقتكم دي. * كنت فاكر (الوهم) فقط (علي كبك). * ضربة جزاء بكري المدينة ..برضو طلعت (وهمية). * وهمية لمن غلط. * ضربة جزاء (كبكية). * طلعت وهمية اكتر من (علي كبك) ذاتو. * في امتحانات الشهادة السودانية الاخيرة. * وبعد الامتحان الاول. * اكتشف الطلاب انهم في مركز (وهمي) للامتحانات. * وان المدرسة كلها (وهمية) وهي غير مسجلة وغير معتمدة من وزارة التربية والتعليم. * المدرسة كلها طلعت (وهمية)..كتيرة على (ضربة جزاء) تطلع (وهمية). * اذا كان (المدارس) ذاتها بتطلع وهمية. * يعني شنو (ضربة الجزاء) لو طلعت وهمية؟. * بس انتوا فلاحكتم في (ضربة الجزاء) دي. * ما كتير الحاجات (الوهمية). * لكن عشان الامور تبقى ليكم واضحة. * عشان تقع ليكم اكتر. * لمن تشموا مباراة الاياب في تونس ..شيلوا ليكم معاكم (بطانيات). * بتحتاجوا للبطانيات في تونس. * ما عشان (البرد). * لكن عشان البتعملوا فيه دا. * البطانيات ما كعبة معاكم. * بتحتاجوا ليها اكيد. * وبالمرة كدا ..شيلوا ليكم (عجور). * العجوز كويس. * بنفعكم. * مباراة الاياب صعبة شديد ..واي (عجورة) بتحتاجوا ليها. * اقول ليكم شيلوا معاكم (خيار). * الخيار مفيد جدا لمباراة العودة. * خيار تونس ..ممكن يغلط معاكم. * شيلوا ليكم خيار سوداني. * عشان لو ظهرت اي حاجة كدا وإلّا كدا ..تطلعوا (خياركم). * مباراة الاياب صعبة شديد. * شيلوا معاكم (بطيخ). * عشان المباراة لو سخنت معاكم ..تطلعوا بطيخكم. * من الدقيقة الخامسة في المباراة تبقوا ناس (بطيخ). * البطيخ ما كعب مع (الكونفدرالية). * في زول يا عالم بيغلب الترجي 1 / صفر. * وبي ضربة جزاء وهمية. * انتوا نسيتوا مباراة الاياب. * انتوا ليه بتعملوا لي مباراة الذهاب فقط. * مباراة الاياب ح تلعبوها في الجديد الثورة. * 1 / صفر ..دي نتيجة محرجة شديد. * عاوزة ليها اكبر كمية من (العجور). * العجور والخيار. * والقرع. * القرع ذاتو ما كعب معاكم. * ضفر لو بفكر صاح ..يقول عندو رباط صليبي. * ايمن سعيد ..ما بقعد ليكم ..ح يقول مسافر مصر. * جمال سالم ..ح يورط (المعز محجوب). * انا ما عارف ليه انتوا بتصروا ترجعوا لينا الخمسات والستات للكورة السودانية تاني. * قدر ما نطلع من الخسائر الكبيرة. * بترجعونا. * اقول ليكم حاجة. * من هسع سجلوا مباريات الكونفدرالية. * تابعوا المباريات ..واتجهزوا للقرعة. * الله يمرقكم من الزمالك. * عشان الزمالك كمان اخطر من الترجي. * .......... * ملحوظة : ما عاوزين نتفاصح شديد عن مباراة الهلال اليوم. هوامش * الجابركم على التلفزة دي شنو؟. * الكورة دي كورة اذاعة ..ما كورة تلفزة. * الله يشوف الهلال اليوم. * مباراة الهلال صعبة. * والظاهر كدا سانغا دا اخطر من الترجي. * الحمدلله المريخ كشف لنا (الترجي). * الترجي دا لو قابلنا في المجموعات ..ح نفوز عليه بدون ضربات جزاء. * الترجي في ام درمان ما محتاج حتى لضربة جزاء. * نحن لو بنلقى لينا حكام زي حكام مباريات المريخ ..كنا كل اسبوع بنجيب لينا بطولة من برة. * الحكم في اول ثلاث دقائق منح حسين الراقد كرت اصفر ..وفعل نفس الشيء مع ايهاب المباركي. * وضربة جزاء. * تاني الحكم يعمل ليكم اكتر. * الحكم طلع اخطر من بكري المدينة. * هسع ضربة الجزاء دي عملها مدافع الترجي ..وإلّا عملها الحكم؟. * عاوزين نعرف بس. * سيطرة المريخ على الحكام في الدوري الممتاز عرفناها..كمان عاوزين تسيطروا على الحكام الافارقة. * معني كدا ..ناس الرابطة وهلال الابيض والنسور والخرطوم الوطني رايحين ساكت. * الترجي راح فيها. * ما يروح هلال الابيض. * اذا كان هذا يحدث في المباريات الافريقية وامام الترجي التونسي ..ماذا يحدث في الدوري الممتاز. * الله يكون في عون هلال الابيض والنسور والرابطة كوستي. * ضربة جزاء في كل مباراة. * غير الكروت الصفراء ..وحالات التسلل (الوهمية). * ربما يتعرض الهلال اليوم الى ظلم التحكيم الافريقي. * توقعوا دائما ظلم الحكم للهلال. * الهلال في ارضه ووسط جمهوره الحكم بيظلمنا. * برة كيف؟. * الله يشوف الهلال. * ويعود لينا بي نتيجة مشرفة من الكونغو. * ان شاء الله الهلال يحسم امر التأهل من المباراة الاولى. * عشان مباراة ام درمان تبقى نفرة للجوهرة الزرقاء. * الجوهرة الزرقاء ذاتها ما محتاجة. * الكاردينال متكفل بي اي حاجة. * رمضان عجب ..المفارق عينو قوية. * بقى يلعب بدون نفس. * ............... * عاجل : عندكم حكام ..لو ضربوا (ميسي) في الكامب نو ..يحسبو ضربة جزاء لبكري المدينة ..(عولمة) و الله.
