هلال كادوقلي يهزم الميرغني بثلاثية * حقق هلال كادقلي فوزاً عريضاً على ضيفه الميرغني كسلا بثلاثة أهداف نظيفة عصر أمس على ملعب النقعة بالفاشر ضمن الجولة 26 من مسابقة الدوري الممتاز سجل ثلاثية الهلال أحمد عادل ومنير ووليد حمدان من ركلة جزاء , بالنتيجة رفع هلال الأبيض رصيده إلى 30 نقطة وتجمد رصيد الميرغني في 18 نقطة . * و الله يا جماعة أنا ناقل بس للخبر كتبتو بحذافيرو بالنقطة والشولة من صحيفة (الصدى) في الصفحة الخامسة * وصحيفة (الصدى) طبعاً أم الإعلام المريخي وأبوهو كمان * دي الصحيفة الأولى في المريخ * نحن عاذرين إعلام المريخ لأنو الضرب في الحقيقة حار وحار شديد * هدفي فريد ( وعنكبة ) حقيقة بلخبطو الراس , هدفين طيرو الدوري الممتاز * هدفين خلو كاتب الخبر يكتب بره من راسو ؟ * في خبر واحد جاب هلال كادوقلي وهلال الفاشر وهلال الأبيض واحد غلب وواحد ارتفع بالنقاط وواحد صحيح * و الله ياجماعة بيني وبينكم الخسارة حارة وبرضو النصيحة حارة * والنصيحة ليك ي الله المريخ بقى يخجل * 3 مباريات على التوالي في الممتاز المريخ ما جاب عمار * وغارزيتو القبل أيام قالو صنع فريق البطولة أمبارح طلعو مواطن ساي * وعلي جعفر والريح علي طلعوهم ماشافو كوره قبل كدا قالو هم بس سبب الخسارة وسلك قال ديل لو ركبو في طيارة واحدة بكونو خطر على الركاب * غايتو يا علي جعفر والريح معايشكم انتهت في المريخ يعني تاني قروش الوالي دي تشموها ( قدحه ) * والمريخ يخسر ب ( شرف ) * وخسارة المريخ حالته بدون ( مهند ) * ونور يا محمد عبد الماجد لو سمعت بي مهند مشى هلال الأبيض ( بتتكيف ) * وترتاح في عضمه دا * واحتمال كبير تسمن مع الخريف * قالو ليك المريخ دائماً بضيع ضربات الجزاء في المرمى الجنوبي * علاء الدين ضيع في المرمى الجنوبي مع أنو سجل في المرمى الشمالي وبكري برضو ضيع في المرمى الجنوبي * ياربي المرمى الجنوبي مالو ؟ * 3 مباريات في الدوري المريخ يخرج بنقطة وحيدة برضو وضع صعب * و الله ياجماعة في زول محظوظ حظ * ماشه معاهو باسطة * لكن برضو نحن مابنقول الممتاز اتحسم * الممتاز يابشه حسمو لما الهلال يغلب المريخ * بس كدا بنقول الهلال شال الدوري حمرة عين * ( 2 ) * أها الدوري لحد هنا حايقيف يالكوكي ركزوا لينا في سموحة * ومباراة سموحة مباراة صعبة وصعبة جداً لأنها بوابة العبور لدور الأربعة من دوري الكبار * والمباراة تحتاج لتركيز كبير من قبل اللاعبين والجهاز الفني وتحتاج لتعامل من نوع خاص من قبل مجلس الإدارة * وغياب الثنائي البرازيلي ونيلسون من المباريات الأخيرة غياب فيه الكثير من علامات الاستفهام * يعني بالواضح الموضوع ما داير ( فهامة ) * الناس ديل عندهم قروش وحقوق يعني هم ماجو يلعبو عشان بحبو السودان * أدوهم قروشم وحاسبوهم * ( 3 ) * قالو ليك الأيام دي ناس المريخ بقو الواحد لما يكون داير يطلع إلا يكشف الشارع حتى يطلع * يطلع كيف والهلالاب لافين زي ناس ( 999 ) * تلقاهم في أي مكان * أقول ليكم حاجة ركزو علي الشكاوى * واحد قالي لو المرة طلقوها واشتكت حاتعمل شنو ؟ * في النهاية القاضي لو كتر بديها ( نفقة ) * ( 4 ) * واحد لاقى هلالابي قاعد جنب ست الشاي وماسك جريدة بقرا فيها ويضحك تقول صارف صندوق , سلم علي وقال ليهو الأمور كيف ؟ قاليهو: ( بسطا يفركو فيهو الروب ) * البسط البفركو فيهو الروب بتعرفو ؟.
