جمال الوالي عندما يستقيل ..ذلك يعني ان كل الذين يحومون حول المريخ الآن وكل المستفدين من جمال الوالي سوف يغادروا المريخ حماكم الله في هذه السنة من الملاريات ..وضربات الجزاء البدون مناسبة وتلفزيون السودان القومي اتوقع الاطاحة بي غارزيتو بعد مباراة القمة القادمة..والغالب ان فاروق جبرة سوف يقود الادارة الفنية للمريخ في مباراة القمة الاخيرة لجنتكم دي بتذكرني بالزول البيجي (ضيف) – يقوم يشغل (المروحة) ويعلق (جلابيتو) في الباب
* ليلة امس ...عندما كنت بكتب في هذا العمود ...كانت رأس السنة (الهجرية)..الليلة اول يوم في سنة 1437ه. * جعلها الله سنة عامرة بالخير والبركات والسعادة والاماني المحققة للجميع. * سنة سعيدة ان شاءالله. * ان شاءالله ما تشوفو فيها شيء كعبة ...ولا تشاهدوا فيها (هدف) في شباك الهلال. * طبعا اسوأ منظر ...انك تشاهد الكورة في مرمى الهلال. * حماكم الله من الملاريات ..وضربات الجزاء البدون مناسبة وتلفزيون السودان القومي. * وقناة النيل الازرق كمان. * قناة النيل الازرق الايامات دي عاملة زي (العدس) العامل فيها (كبدة). * اللهم ثبّت لجنة الاستئنافات في هذا العام على ان تقول الحق ولو مرة واحدة في عمرها. * الناس ديل ما فيهم رجل رشيد. * لجنتكم دي بتذكرني بالزول البيجي (ضيف) – يقوم يشغل (المروحة) ويعلق (جلابيتو) في الباب. * نظام (استقرار) وكدا. * رأس السنة (الهجرية) صادفت (هجرة) جماعية في المريخ. * هجرة من امها. * طبعا ناس متوكل أحمد علي وعبدالقادر همد – ما بنحسبهم ليكم – يهاجروا او يقعدوا واحد. * مغادرتهم زي قعادهم. * همد ما في زول بتذكروا – إلّا وقت يقوم يهاجم غارزيتو. * يبدو ان سنة 1437 ه ح تخلي المريخ قاعد في السهلة. * زي (الداخلية) في اجازة الفترة. * طالب واحد ما فيها. * لو اتكلمنا عن الذين سوف يهاجروا من (المريخ) الى كوكب اخر سوف نجدهم يمثلون (عضم) المريخ. * المريخ فضل فيه شنو؟. * الهجرة من المريخ سوف تكون في مجلس الادارة وفي الجهاز الفني للفريق وفي اللاعبين. * يمكن ان نفسر ذلك ونعرض له بالتفاصيل. * اول (الهجرات) من المريخ تمثلت في تقديم مجلس المريخ لاستقالته منذ شهر مايو. * الآن بعد فك (التجميد) اعلن جمال الوالي رئيس نادي المريخ عن عزمه للرحيل من المريخ. * ولا خلاف ان استقالة جمال الوالي تمثل اكبر (هجرة) من المريخ – وهي الهجرة التى سوف يعاني منها المريخ كثيرا. * وقت يفوت جمال الوالي – المريخ فاضل ليه شنو؟. * شفتوا حكاية عاوز (موية فول) بترجع تاني للمريخ. * ثقافة موية الفول وموية الجبنة ...ح تعود مرة اخرى للمريخ بعد مغادرة جمال الوالي. * جمال الوالي عندما يستقيل ..ذلك يعني ان كل الذين يحومون حول المريخ الآن وكل المستفدين من جمال الوالي سوف يغادروا المريخ. * مغادرة جمال الوالي تعني مغادرة مجلسه كله ...الفريق طارق وهمد ومتوكل وادروب. * الرحيل من المريخ سوف يتبعه هجرة جماعية من كل القطاعات المعينة في المريخ. * ما في زول بقعد ليكم. * يعني ناس صديق علي صالح وهو عضو مجلس وحاتم عبدالغفار وكمال دحية وعادل ابوجريشة ..كلهم سوف يغادروا. * الذين كانوا يتنافسوا حول المريخ ويتسابقوا من اجل الحصول على المناصب وقيادة البعثات سوف يثبتوا لنا ان ارتباطهم بالمريخ ارتباط فقط بجمال الوالي. * كل الوجوه الموجودة في المريخ الآن ..سوف تتغير – حتى الخارطة الاعلامية في المريخ سوف تتبدل. * الروابط وقطاعاتها المختلفة سوف تتغير ايضا – سوف تبقى فقط (الجماهير) المتعلقة بالمريخ والمرتبطة به. * اما الآخرون – كلهم سوف يهاجروا – ونحن في اول يوم في السنة (الهجرية). * الاشياء عندها دلالات ..ولها علاقات. * الكون دا ماشي بي نظام ..وفيه دلالات وعلامات لو نظرنا ليها بنلقى (المعادلات) هي التى تسير نظام الكون. * الكلام دا طبعا ما بيعنيكم. * لكن قصدت اقول ليكم السنة الهجرية الجديدة – سوف تشهد (هجرة) جماعية في المريخ. * بعد مجلس الادارة ..سوف تحدث (هجرة) اخرى في الجهاز الفني. * طبعا بعد مغادرة جمال الوالي – غارزيتو وجهازه الفني ما في زول بيقدر على مرتباتهم. * وحتى لو كان في مجلس بقدر يوفر مرتبات غارزيتو وجهازه الفني – بيبقى ما في مجلس قادر على الشقق والسيارات وتنظيرات غارزيتو. * غارزيتو رأسو قوي. * زول بياكل (قرع) ما بقدر عليه. * غارزيتو عاوز ليه زول بياكل (سمك). * وانتوا (السمك) فارقتوه مع مغادرة جمال الوالي. * غارزيتو عقده مع المريخ سوف ينتهي بنهاية الموسم ...وان استمر جمال الوالي فان الهلال قادر على الاطاحة بغارزيتو وجهازه الفني. * هذا شيء اكيد. * غارزيتو ربما حتى لا يبقى لنهاية الموسم. * اتوقع الاطاحة بي غارزيتو بعد مباراة القمة القادمة..والغالب ان فاروق جبرة سوف يقود الادارة الفنية للمريخ في مباراة القمة الاخيرة. * هذا امر اكيد تذكروه ..سوف يحدث قريبا في المريخ. * غير اني اقف عند جماهير المريخ التى قدمت لموقف قوي ..عندما رفضت مغادرة غارزيتو وحملت اللافتات والشعارات التى تطالب بالابقاء على غارزيتو. * بينما احترمت جماهير المريخ رغبة جمال الوالي ..ولم تعترض هذه المرة على رحيله واستقالته. * وهذا شيء يحسب لجماهير المريخ ووعيها واقتناعها ان الاشياء لا بد ان يكون لها نهايات. * جماهير المريخ احترمت قرار جمال الوالي رغم ارتباطها القوي به..وهذا شيء يحسب للجماهير. * بعد (هجرة) الجهاز الفني الاكيد والتى اضمنها لكم اكثر من هجرة مجلس الادارة ..هناك هجرة اخرى للاعبي المريخ. * اول حاجة فان المريخ سوف يستغني من اكثر من (11) لاعبا يتصدرهم المعز محجوب وعمر بخيت. * هذا الى جانب مغادرة احمد الباشا وبلة جابر ..وربما امير كمال وراجي عبدالعاطي وكوفي. * يعني المريخ سوف يصفى على (ضفر). * ويمكن (البودي قاردات). * غايتو (مازيمبي) عمل فيكم جنس عمائل ..ما خلي ليكم شيء. * المريخ الموسم القادم ..زول بتعرفو فيه ما في ..كلو (مهاجر). * السنة (الهجرية) دي ..فيها (هجرة) صاح. * اللحن الذي يعزف في المريخ هذه الايام ...(اصلي من دنياك مهاجر)..وهو لحن يعزفه الجميع. * الهجرة هي اصدق كلمة يمكن ان تطلق على مجتمع المريخ ويمكن ان توصفه توصيف دقيق يتناسب تماما مع عظمة المناسبة. * اليوم سوف يهل هلال (محرم). * غرة محرم. * ان شاءالله عام سعيد للهلال ..وحافل بالبطولات والانجازات. * العام الهجري الجديد ..انعكس على المريخاب بتلك (الهجرة) التى تكلمنا منها. * نسيت اقول ليكم علاءالدين يوسف ذاتو قالوا ماشي مازيمبي. * يعني ما فضل زول في المريخ. * اتخيلوا كابتن فريق المريخ في الموسم القادم أحمد عبدالله ضفر باعتباره اقدم لاعب في المريخ. * سيلا ذاتو الموسم القادم يمكن يصبح (اساسي). * ............... * ملحوظة : لو عملتوا (الطابق التاني) صالة افراح ممكن تطلعوا مصاريفكم. هوامش * لجنة الاستئنافات ...انتظرت الصورة لمن اتضحت. * يبدو ان المتضرر الوحيد سوف يكون الهلال. * باعتبار ان الهلال لم يحسم اللقب حتى الآن. * لذلك لا بد ان يكون رد الهلال شافي وكافي. * اي تلاعب او تجاوزات من لجنة الاستئنافات يبقى على الدوري الممتاز السلام. * خاصة في ظل (الكباري) التى شهدها الدوري الممتاز في الاسابيع الاخيرة. * الدوري الممتاز ..منافسة فقدت عدالتها. * الممتاز بقى تتحكم فيه (اللجان). * والكباري. * لذلك لا بد من ان يكون موقف الهلال (قويا). * اخشى ان تكون (الكباري) بتنسيق من الاتحاد العام حتى يضمن تمرير قراراته. * الرابطة كوستي ما عندها ضهر. * والميرغني كسلا ما عندها ضهر. * عشان كدا هبطت الرابطة والميرغني كسلا. * ديل لا عندهم (والي) يقيف وراهم ولا عندهم زول في الاتحاد العام. * اذا لم يحسم مجلس الهلال هذه التلاعبات يبقى الهلال نفسه جزء من الازمة. * الهلال جامل في موضوع بكري المدينة. * ونحن ننتظر موقف الهلال في حال (خرمجة) لجنة الاستئنافات. * مريخاب اهلي مدني بحاولوا يصلوا لولاءالدين ..عشان يظفر بيه المريخ. * يبقى موقف رئيس نادي الاهلي مدني قويا رغم مريخيته. * التمثيليات التى يحبك فيها مريخاب اهلي مدني ..وسماسرة المريخ لن تؤدي الى الوصول الى ولاءالدين. * على الهلال ان يؤمن كذلك اللاعب ابوعاقلة. * وابوعاقلة عارف مصلحته وين؟. * كل المواهب ضايعة في المريخ. * يكفي ابراهومة. * اين هذا اللاعب. * تمرد لاعبو المريخ في المنتخب (فضيحة) اخرى. * وبتكلموا عن نزار حامد. * المنتخب قادر على العودة بنتيجة جيدة من يوغندا. * موقف احمد بابكر كان قويا. * لو مازدا موجود كان عالج الموضوع. * مازدا ما بقدر يتخذ موقف مثل هذا الموقف. * الذين يتحدثوا عن ولاءالدين ..وعن تغيبه عن الاهلي مدني – ماذا عن تغيب لاعبي المريخ عن المنتخب. * لاعبو المريخ فقدوا القدرة والرغبة في الكورة بعد استقالة جمال الوالي. * ........... * عاجل : في الانتباهة اليوم كتبنا عن جمال الوالي وسوف نعود لاحقا لنكتب في هذه المساحة عن جمال الوالي ..شاكرين له فترته في الوسط الرياضي.
