• من الغباء ان تدخل (الصيدلية) وتسأل : ريحة (الدواء) دي جاية من وين ؟؟ • البخش الصيدلية ما بيسأل من مصدر ريحة الدواء .. • وسلفا معروف إنو الطبيب ما (بِعاف) من ريحة (الدِيتول) .. • الللهم إلا يكون طبيب بتاع إسعافات أولية ساكت .. • لكن الطبيب الصحي صحي ما بخاف من ريحة الدِيتول .. • والمريخ هو (طبيب في مجال التحكيم) .. • طبيب عدييييييييل .. • ومع ذلك أصبح المريخ (يعاف) من ريحة دِيتول التحكيم .. • جمهور المريخ إرتدى (كمامات) في مباراة أمس الاول تعبيرا عن رفضه الظلم الذي فاحت رائحته .. • إرتدى الجمهور (الكمامات) لأنه تضايق من (ريحة التحكيم) .. • وبالمقابل تضايقت (الكمامات) لانهم وضعوها في مكان (الريحة) نفسها .. • لو سألتو (الكمامات) بتلقوها زعلانة .. • والله صحي .. • وإذا كان جمهور المريخ بعد كل هذه المساعدات التحكيمية يرتدي (الكمامات) فنحن نوجه جمهور الهلال بأن يدخل المباريات وهو يحمل (بف باف) .. • إعتبارا من مباراة كوستي سندخل المباريات وبايدينا (البف باف) .. • على الأقل (البف باف) بيحل المشكلة نهائيا بينما (الكمامة) تحجب الريحة فقط .. • أنا والله حزين لهذا الدور الذي يلعبه جمهور المريخ الذي لا يدري انه بهذا التصرف قد أحرج الحكام الذين وقفوا مع المريخ اكثر من وقفة اللاعبين انفسهم .. • هسه عليك الله لو ما ساي إرادة المفروض (الكمامات) تلبسوها إنتو ولا نلبسها إحنا من ريحة اللقيمات العملت لينا (جيوب أنفية) دي ؟؟ • غايتو جنس غايتو ؟؟ • ترى بنسبة كم كان لهيثم مصطفى نصيبا في إقالة كافالي ؟؟ • هذا سؤال لوجه الله .. • أكبر خسارة يمكن ان يتعرض لها تلفزيون السودان (الخسران اصلا) هى مقاطعة جماهير الهلال .. • جمهور الهلال لو قاطع التلفزيون يبقى التلفزيون (إستحمى) .. • عشان كده القصة أقل من إنو الهلال يشتكي لوزارة الإعلام .. • الموضوع ما بيستاهل الضجة دي كلها .. ما تعملوا بطولة لرضا مصطفى الشيخ علما لان رضا في الاصل ليس من نجوم الإعلام في بلادنا .. • رضا لو كان زي عثمان حسن مكي معليش ، لكن رضا إعلامي (درجة تالتة) ومثل هذه الضوضاء ستساهم في رفع اسهمه .. • تلفزيون السودان ده إحنا بنشوفو في حالتين اتنين : • الحالة الأولى : لما نكون منتظرين (آذان المغرب في رمضان) .. • والحالة التانية : لما نكون منتظرين (ديوان الإفتاء يثبت لينا بكرة عيد ولا ما عيد) .. • والله صحي .. • (تحنيس) المريخ حتى يذهب ليقابل الهلال في الجوهرة المشعة بجده يثبت ان المريخ يخاف من الهلال في اي زمان واي مكان .. • قالوا سنواجه الهلال بعيدا ان (السوبر) .. • ومرة يقولوا لن نواجه الهلال لانه ليس بطلا .. • الناس ديل خايفين من الفضائح المحمولة جوا .. • خايفين والبيزيد مخاوفهم ان التحكيم سيكون سعوديا .. • وتاريخيا معروف إنو الحكم السعودي ما بحب (اللقيمات) .. • والله صحي .. • الحكم السعودي قبل كل مباراة بيمشي (عُمرة) ويجي .. • مرات الحكم السعودي من (العُمرة) ومباشرة للملعب .. • أنا بقول ليكم الكلام ده عشان ما تحرجوا نفسكم .. • لو كان الحكم زامبي زي بتاع (الجلاكسي) داك معليش ، لكن حكم سعودي والله ولا تجربوا .. • اللقيمات دي حدها هنا في السودان .. • ياخي ما مشكلة .. المريخ بطل الدوري وبطل الكاس وبطل اي حاجة .. • بس أرح السعودية .. • إنتو أبطال وما عندنا إعتراض في الحاجة دي بس أرح معانا السعودية .. • تمشوا معانا السعودية بناس علي جعفر ومصعب والنعسان علي بالنعمة نخلي ريحتكم طير طير .. • والسنة دي بالذات يا متنا من الضحك ويا كمان الضحك كتلنا .. • لن نقول ان الخرطوم الوطني قد خرج من الكونفدرالية ولكن نقول ان الوطني يحتاج لمعجزة حتى يستمر .. • مهمة الهلال أمام الرابطة كوستي لن تكون سهلة حتى لو كانت ظروف الهلال طبيعية .. • وبما ان الهلال سيغادر اليوم وفق ظروف غير طبيعية فهذا يعني ان المباراة مباراة لاعبين في المقام الاول والاخير .. • الهلال يجب ان يحسم الرابطة بخبرة لاعبيه وجهد شبابه لان الجهاز الفني غير مسؤول عن نتيجة اللقاء مهما كانت .. • الجهاز الفني جديد ولذلك هو معفى من اي نتيجة .. • في كل مباراة بكري المدينة عندو (بونية) .. • والغريبة بكري المدينة بعد كل (بونية) بكمل المباراة وبيشارك في المباراة اللبعديها عشان (البونية) التانية .. • والبيعمل فيهو بكري ده تجاوز مرحلة (اللقيمات) وبلغ مرحلة (التورتة) .. • وعلى فكرة .. • انا كل ما أشوف بكري المدينة بتذكر يوسف بلايلي .. • ما عارف ليه ؟؟ لكن بتذكرو .. • واي زول طبعا حر في (تذكاراتو) .. • المهم .. • في الوقت الذي قطعت فيه (الجوهرة الزرقاء) شوطا بعيدا نجد ان نجيلة استاد المريخ اصبحت مثل (الفتاة) الما نفع معاها (الكريم) .. • والله صحي .. • نجيلة استاد المريخ بتشبه مستوى المريخ .. • الحال من بعضو .. • بمناسبة النجيلة .. • قالوا في (بت) فسخت خطوبتها يوم عيد الحب .. • والبت دي خطيبها (بتاع بوتيك) .. • وسبب الفسخ (الكريم) .. • خطيبها أداها (كريم منتهي الصلاحية) .. • الكريم ضرب ليها وشها .. • وهي ولا كضبت طوالي فسخت الخطوبة بعد ما وشها إتفسخ وبقى زي (كبدة الابل) .. • غايتو جنس غايتو .. • نرجع ونقول .. • يا الكاردينال والله انا عندي أمنية أشوف أمير كمال بشعار (الغرافة القطري) .. • دي أمنيتي .. • زي ما وديت لينا شيبوب للقيروان عايزين نشوف امير كمال في قطر .. • وكان لقيت طريقة وديت لينا أبو جريشة للمحرق البحريني تكون ما قصرت .. • الكاردينال الآن يحكم الهلال ويقود المريخ .. • اداهم عمر بخيت ومعز وشال شيبوب .. • كل الذي بين المريخ وشيبوب (ايسكريم وساح) .. • البينكم كان ايسكريم وساح .. • ولذلك من الأفضل لكم ولنا وللايسكريم ان تنسوا حاجة اسمها شيبوب .. • شيبوب وأبو عاقلة بأذن الله سيلعبان للمريخ في العام (2029) كان الله ادانا عمر .. • أما بالنسبة للأخ ألوك فهو أمانة عندكم لحدي شهر خمسة .. • وإحنا لا بنعرف (فيفا) ولا (كاف) .. ألوك حقنا زي ما شيبوب حقنا .. • ولو كترتو إعتبرونا من هسه منسحبين يا معتصم جعفر .. • إحنا والكاشف أخونا امل عطبرة منسحبين .. • عشان كده المفروض المريخ يتخلص من ألوك بدري بدري .. • دي نصيحة مني ليكم .. ألوك ده إتخلصوا منو بدري بدري .. • الكلام ده إحنا بنقولو للأخ المهندس والقطب الهلالي الكبير اسامة ونسي الذي اختارته الحكومة لرئاسة المريخ .. • أسامة ونسي هلالابي اصيل واحنا ما بنحب نحرج الهلالاب .. • لا بنحب نحرج الهلالاب ولا بنحب نضرب اللقيمات .. • لقيمات ب(الساء) ؟ • و..و.. • وشايفك في الجنينة تحومي ليه يا الوزة ما ...(بتلبسي كمامة) !!
