* من الإسئلة التي يصعب الإجابة عليها سؤال أهل دارفور القائل : (القرد برقبتو بيربطو من صلبو مالو) ؟؟ * وهو سؤال منطقي للحد البعيد .. * لماذا نربط القرد من (صلبو) وهو يملك (رقبة) مثله وسائر الحيوانات التي لا يجرؤ احد ان يربطها من (صلبها) .. * والحال في الهلال يفرز سؤالا يشبه سؤال أهل دارفور والإجابة عليه تبدو عصية جدا .. * حينما يكون الهلال بحاجة ل(طعن الفيل) تجده يطعن (الضل) وحينما يكون الأمر محتاجا ل(طعن الضل) فأن الهلال يطعن (الفيل) .. * وهذا يثبت ان من أكبر مشاكل الهلال (القرار الصاح في الوقت الغلط والقرار الغلط في الوقت الصاح) .. * وهذه مشكلة كبيرة من أسبابها (قلة الخبرة والمكابرة وقوة الرأس) .. * وهذه الأسباب المختلفة تصنع واقعا عشوائيا تكون محصلته في الآخر (حريق القلوب العاشقة) .. * أقال الكاردينال (كافالي) بسبب خسارة في لقاء ودي بمدنية بورتسودان .. * والكاردينال نفسه جدد الثقة في العشري الذي أطاح بالهلال من الدور الاول .. * علما بأن المباراة التى كانت سببا في إقالة كافالي هي تدخل ضمن استعدادات الفريق لهذه البطولة التى (طرنا منها وللعشري نصيب في ذلك) .. * يبقى بالمنطق كده انت (شلت مدرب عشان خسر مباراة ودية استعدادية للبطولة الافريقية ولما وصلت البطولة الافريقية وطرت رفضت تشيل المدرب الطيرك مع إنك شلت مدرب خسر في الإعداد) .. * ودي والله زي الزول البيكسر فتيل ريحة والناس بتخليهو وبتحاسب الزول (الشرط كرتونة فتيل الريحة) .. * وإذا كان كافالي قد (شرط كرتونة الفتيل) فأن الأخ العشري قد (كسر الفتيل ودلق الريحة) .. * كسر الفتيل وكشح الريحة فتطيب منها الأهلي الليبي ولم يبق لنا سوى (بقايا قزاز) من ذلك الفتيل الذي كسره العشري وعاونه على كسر الفتيل وكسر قلوبنا شلة من الهلالاب للأسف .. * وببساطة شديدة هيثم مصطفى هو الذي أقال كافالي وهيثم هو الذي جدد الثقة في العشري .. * لانو يا جماعة بالمنطق السبب الشالوا بيهو كافالي أضعف من السبب المفروض يشيلوا بيهو العشري إذا طبقنا شعار الكاردينال القائل : (أنا مستعد أشيل مدرب كل 24 ساعة) .. * سبب إقالة كافالي ما منطقي ولكن سبب إقالة العشري منطقي ونص وخمسة .. * اللهم غايتو إلا يكون العشري لسه ما كمل ال(24) ساعة حسب ساعة الكاردينال .. * ويا الكاردينال إختار واحد : يا ساعتك ما مظبوطة ودايرة (حجر) ويا كمان العشري قعد بأمر هيثم ؟؟ * وأنا أخشى ان تكون الساعة ما مظبوطة مع اني مقتنع مليون في المية إنو الموضوع وراهو (سيدا) .. * على المستوى الشخصي لا أنفي انني من المعجبين جدا بالجهد الكبير الذي بذله الكاردينال في سبيل إعمار الدار وتحديث البنية التحتية وفي ذلك (فات الكبار والقدرو) .. * ولكن الرجل بالمقابل جعل الهلال (خفيفا) حتى حينما يكون بملعبه ووسط جمهوره .. * طيب نجي للسؤال الأهم .. * مصلحة هيثم شنو في إقالة الفرنسي وتجديد الثقة في العشري ؟؟ * أوريك المصلحة وين .. * كافالي مدرب شخصيتو قوية جدا ولذلك هو طلب من هيثم ان يستغل فترته بالجهاز الفني ل(التعلم بأدب) حتي يستفيد .. * وقد رفض كافالي كل (نصائح هيثم التى لا تخلو من التصفية) رفضها كافالي وأنا أرجو ان لا اضطر لكشف (ما هي النصائح التى حاول سيدا ان يقدمها لكافالي) .. * وعلى فكرة أنا بتكلم من (مصادر) مش من (جلسة قهوة) .. * ومصادر من جووووووة جدا .. * يعني دي وقائع يا مولانا .. * المهم .. * العشري زول (مطيع) بشكل يجعلك تستغرب في شخصيته المهزوزة جدا .. * العشري ضعيف ومنفذ جيد وما زول مواجهة .. * كافالي طفرت (دمعة من عينه) حينما قالوا له ان (اللاعب فلان) قاعد يبيع الهلال أمام أهلي شندي فيجب ان لا تشركه .. * اي والله .. * زول في هلالنا ده مشى لكافالي قال ليهو فلان ده ببيع الهلال أمام اهلي شندي فابعده .. * والمصيبة التى لا يعرفها (القائل) ان كافالي سلم الكلام ده (صرة في خيط) للاعب المعني .. * يعني كافالي بشجاعة جا وقال للاعب : (فلان ده جا قال انت قاعد تبيع الهلال) .. * إتخيل إلى اين وصل الهلال ؟؟ * الحال في الهلال وصل درجة ان يقف (فلان) عقب نهاية مباراة الأحد مباشرة يقف في (مدخل اللاعبين) وهو يتحدث بالهاتف ويضحك حتى ضرسه الأخير .. * زول كان قاعد جوة الملعب واول ما المباراة انتهت والناس مارقين هو مسك التلفون في (الممر) وقعد يتكلم ويضحك وكأن الهلال قد تأهل .. * وهذه الضحكة الفاضحة رصدها (نجم كبير) لا نذكر اسمه حتى لا يلحق مهند الطاهر في شهر ستة .. * رصد الضحكة وشاف تعابير الوجه ولكنه لم يستبين مع من يتحدث هذا (المبسوط) .. * وعلي ذكر مهند الطاهر .. * ما بين صورة المكالمة المدعومة بالضحك في (الممر) وما بين دموع مهند الطاهر التى هطلت عقب وداع الهلال نكتشف فعلا ان الهلال اصبح لا يحترم الذين يحترمونه .. * بكى مهند الطاهر مثل الشافع ليلة سقوط الهلال لان الغزال (قلبو حي بحب الهلال) بينما غيره من الذين نحترمهم (يضحك) بعد خمسة دقائق من سقوطنا المرير .. * قلتها من قبل واكررها اليوم : الهلال فيهو مشكلة (نفوس وضمائر وظلم) .. * تجريح ونميمة وقوالات اضرت بالهلال ولسه .. * السنة الماضية الهلال لعب الابطال وبلغ المربع الذهبي هو (بلا كنبة احتياطي وبلا هجوم) .. * كنبتنا كانت كلها مصابين .. * ومع ذلك بلغنا المربع الذهبي .. * والسنة دي (شوهنا الهلال) لان نفوسنا ما نظيفة ولان قلوبنا تنبض بالمصلحة ويتكاسل نبضها حينما يتعلق الأمر بالهلال .. * وأنا والله حكاية الهلال طار دي ما مزعلاني بقدر ما مزعلني إنو الهلال مقبل علي (حريق وفرتقة) لا يعلم بها إلا الله .. * الجو يا الكاردينال لن يساعد اللاعبين على العطاء وهم ما ح يقدروا يقولوا ليك الكلام ده .. * ما بقدروا يا الكاردينال لانو ده زمن (سيد النصيحة إلا يكون شال ليهو رشاش) .. * اللاعبون لن يستطيعوا مصارحتك بحقيقة الأجواء داخل الفريق ولكن اسمعها مننا إحنا .. * أنا اسألكم سؤال ؟؟ * ترى كم من الزمن إحتاجه اعضاء الفريق من اجل اقناع العشري بضرورة ان يكون اتير توماس ضمن ال(18) لاعبا المختارين لمباراة الليبي ؟؟ * اتير الذي شكى من (وجع العيون) وبخل عليه الهلال بالعلاج .. * وانا لما اقول اتير يا جماعة ما لانو اتير (منقطها) .. لا بالعكس شخصيا عندي رأي في اتير ولكن قدمته الآن ك(نموذج) يمكن ان يكشف الستار امام الموازنات والترضيات وتصفية الحسابات .. * اما موضوع الثعلب وايشيا فهو (حكاية وحكاية) .. * دي ملامح من مشاكل الهلال وغدا نواصل في ذات الإتجاه على ان نعود ونختم هذه السلسلة بعد غد للحديث عن اللاعبين انفسهم لاننا لن نعفيهم مهما كانت الاسباب .. * ونواصل ..
