وأنا ظني فيك كان تطلعي – أو ترجعي – ما تقيف بين شوقي وعمود الكهربة زي (الصهريج) الفي الحلة – أي زول تسألو من بيتو يوصف ليك بيتو بالصهريج دا أحسن الفنادق تشيل حقها من النفرة بدل ما النفرة تروح ساكت في ناس علي جعفر وإبراهيم جعفر الشرطة اتبرعت ليكم في النفرة بي مليار أو (500) ألف جنيه– وجات نفذت أمر القبض على أسامة ونسي في 800 ألف جنيه * في حكايات (الصيف) والزمن والباطريق في قصص الأدب العالمي – هذه الحكاية الما عندها علاقة بالموضوع. * ولا عندها علاقة بالصيف. * سر (الباطريق) شنو عشان يجيبوها لينا في الروايات العالمية؟. * أحسن نكون واضحين. * قالوا ليك أربعة (كدايس) أول مرة تحضر ليها (فيلم أجنبي) – افتكرنو في البدء (مسلسل السوداني). * كدايس مطروشة. * وما عندها رأس. * حسب فهمن افتكرنو مسلسل سوداني. * الفهم أحياناً بيطلع من (الظنون). * (.....وأنا ظني فيك كان تطلعي – أو ترجعي – ما تقيف بين شوقي وعمود الكهربة ..........). * الكلام دا كتبناه زمان...وقت (فرحتنا) كنا بنشيلها في (شنطة المدرسة) مع كتاب الجغرافيا والمطالعة. * قبل ما تحصل لينا (لخبطة) الخرطوم دي. * كنا شفوت – (الفول) لو ما جابوا لينا معاه (بصلة) بره ما بنمشي عليه. * ولا بنقربو. * الحكايات كدا. * زي (الصهريج) الفي الحلة – أي زول تسألو من بيتو يوصف ليك بيتو بالصهريج دا. * أسامة ونسى ظهر في قناة الشروق يوم الجمعة الماضية وقال إن (النفرة) عملت ليهم (10) مليار جنيه و(600) مليون. * وينها طيب؟. * ناس تراوري قلبهم رقد. * 10 مليار و600 مليون جنيه يعني حكاية بتاعة (2) بكري المدينة و(11) علي جعفر و (15) مازن شمس الفلاح. * أسامة ونسى رئيس نادي المريخ لم يقل إن (النفرة) فيها (أوامر قبض). * قاعد يتكلم في الشروق ما عارف راجيه تاني يوم شنو؟. * النفرة جاتكم بي أوامر قبضها. * والله دي نفرة ليها ضل. * مجلس المريخ وإعلامه والسلطة كلها كانت بتتحدث عن ال (10) مليار جنيه وال (600) مليون. * الهلالاب وقت يمسكوا في الموضوع (بورغنوه). * يعني بخلوه (وارغو). * نجاضين نجاض الهلالاب ديل. * الفنادق سمعوا بالنفرة قالوا عاوزين حقهم. * أنتوا وقت نفرتكم دي (كلام) ساكت – بتتفاصحوا مالكم؟. * جبتوا لي روحكم الهوا. * أي زول عاوز منكم قروش..بيظهر ليكم. * أحسن الفنادق تشيل حقها من النفرة بدل ما النفرة تروح ساكت في ناس علي جعفر وإبراهيم جعفر. * أسامة ونسى بي (عضمة) لسانو قال النفرة جابت لينا أكتر من (10) مليار – مع ذلك ظل أكثر من عشر ساعات رئيس نادي المريخ محبوس في 800 ألف جنيه. * الساعة بي مليار. * الظاهر نفرتكم لسه ورق. * كلام ساي. * والله أنا من فوزكم الضعيف وهدفكم الوحيد في الكوكب المراكشي ..عرفت ليك النفرة دي كلام جرايد ساكت. * عرفتها – لكن ما قلت حاجة. * في حاجة ما واقعة لي. * وما قادر أفهمها. * الشرطة اتبرعت ليكم في النفرة بي مليار أو (500) ألف جنيه ما عارف – وجات نفذت أمر القبض على أسامة ونسي في 800 ألف جنيه. * يعني يتبرعوا ليكم ويقبضوكم. * يتبرعوا ليكم الليلة. * ويقبضوكم تاني يوم. * دي لقتكم دي. * إلّا في السودان. * الشرطة هينة ...الحاجة الغريبة جاءت من إعلام المريخ. * جاءت من الصحف الموالية للوالي. * صحافة (الوالي رئيس طوالي). * صحافة جمال الوالي حاولت ترفع الحرج عن فترة جمال الوالي باعتبار أن الديون التى خلفها الوالي كانت سبب في القبض على أسامة ونسى. * وأسامة ونسى ما عندو أي ذنب. * حاتم عبدالغفار قال إن جمال الوالي اتبرع لمجلس أسامة ونسى بي 3 مليار جنيه كان يحلوا منها تلك الديون. * كان تحلوا ديونكم براكم يا حاتم عبدالغفار. * حاتم عبدالغفار الذي يريد أن يجمل وجه جمال الوالي – فات عليه أن الذي قدمه جمال الوالي لمجلس أسامة ونسى اسمه (تبرع). * هو ذاتو قال جمال الوالي (اتبرع). * أنت يا حاتم عبد الغفار ويا جمال الوالي عندكم (ديون) خلفوتها من مجلسكم (التبرع) ليكم شنو؟. * الفخشرة على شنو؟. * ولّا عشان (الشو) والجرايد والإعلام. * أولى كان تحلوا هذه الديون التى خلفها جمال الوالي ومجلسه بدل هذا (التبرع) الذي تفاخرون به الآن. * زول (مديون) وعنده حساب في الدكان ما حلاهو ..ممكن يأتي يتبرع لسيد الدكان. * كان أفضل لو أنكم سلمتم المريخ خالي من الديون بدل هذه (التبرعات) التى تفلقوننا بها الآن. * ما معنى أن تخلف ليك ديون تتجاوز ال (10) مليار جنيه وتتبرع ب (3) مليار. * أنتوا بتلعبوا على منو؟. * المؤسف أن مجلس جمال الوالي وعبر جمعيته العمومية أكد ألا ديون على المريخ. * وقالوا إنهم سلموا المريخ (نضيف) ..قرش ما عاوزنو منو. * لتنكشف الحقيقة الآن وتظهر الصورة. * فندق روانيا طالب المريخ (800) مليون جنيه من زمن جمال الوالي. * الأكيد أن هناك عدداً من الفنادق ووكالات السفر تطالب المريخ بمبالغ أخرى من زمن مجلس المريخ. * وكلها ح تقع في رأس أسامة ونسى. * أسامة ونسى ذنبو شنو عشان يتقفل (10) ساعات؟. * أسامة ونسى لو لم يكن قريب من السلطة ومدعوم كان إلى وقتنا هذا سوف يكون مقفول. * أسامة ونسى طلع بضمانة شخصية. * لو لم تأت به السلطة.. كان أسامة ونسى لو لم يدفع الأموال المطلوبة من المريخ ما كان بطلع. * الموضوع دا جربناه في الهلال مع صلاح إدريس...وقبل ذلك كنا قد جربناه مع الزعيم الراحل الطيب عبدالله. * وجربناه كذلك مع الأمين البرير. * ومع الكاردينال. * كل هؤلاء لم تأت بهم السلطة – عشان كدا لو ما دفعوا ما كان بطلقوا سراحهم. * أسامة وسنى هسع عندو ( ضهر) عشان كدا طلع. * وعشان كدا فندق (روانيا) منح المريخ أسبوع لحين السداد. * الكلام دا لو كان رئيس المريخ رئيس آخر ..ما جابوا الحزب الحاكم ما كان في زول بيشتغل بيه. * هذا يوضح الوضع الذي ترك فيه جمال الوالي المريخ. * والمشكلة هنا ليس على جمال الوالي الذي ترك كل هذه الديون. * المشكلة أن إعلام جمال الوالي مازال يدافع عن جمال الوالي. * ومازال بعتبر أن هذه (الديون) مسؤولية المجلس الحالي. * أنتوا زمان كنتوا بتقولوا ما في ديون. * وأن جمال الوالي بيصرف على المريخ من جيبو. * وبالكاش. * وين هسع الكلام دا؟. * لقد اتضح الآن أن جمال الوالي يريد من مجلس أسامة ونسى (تنظيف) أو (تدليت) الديون التى تركها ليعود من تاني للمريخ. * الأغرب من ذلك ..أن أسامة ونسى في برنامج (ساعة رياضة) في الشروق قال إن شيبوب بتصل بلاعبي المريخ من أجل العودة. * شيبوب يرجع وين يا أسامة ونسى ورئيس النادي (محبوس) في (800) مليون جنيه؟. * ما الذي يجبر شيبوب للعودة إلى نادي رئيسه حبيس بسبب استحقاقات مالية على النادي الذي يديره. * ناس محمد الرشيد ..وإبراهيم جعفر ...الجابرهم على التلتلة دي شنو؟. * ألوك ذاتو ...الجابرو شنو؟. * تراوري قال ما بيلعب ..وقال عاوز يتخارج. * أنتوا يا محمد الرشيد ويا إبراهيم جعفر ويا ألوك ..يعني عاجباكم الحالة دي. * الحالة دي أخير منها (النيل الحصاحيصا). * اقعدوا في (نواديكم) دي ..من (التلتلة) العايشين فيها ناس علي جعفر. * ما في حاجة بتجبركم على (الجهجهة) دي. * والله لو تميتوا (قرايتكم) أحسن ليكم. * كلمتكم أنا. * الكلام ما بعيدوا ليكم مرتين. * والما عندو موبايل فيه كاميرا – أحسن يعمل ليه موبايل بي كاميرا. * والسلام عليكم ورحمة الله. * ....... * ملحوظة : أها قصرت معاكم. هوامش * مستعجل أنا. * متى يحسم الهلال ملف الأجانب. * في جوطة كتيرة كدا. * التسجيلات تبدأ غداً. * وإن شاء الله الهلال موفق في هذه التسجيلات. * خطوات عديلها كلها. * الهلال حسم أمر اللاعب الشاب بغداد حماد الظهير الأيمن لنجوم أبوسعد. * الهلال ما عندو مشكلة. * خاصة إذا توفق الهلال في الظهير الأيسر لمريخ كوستي رمضان كابو. * الله يكلل الخطوات بالنجاح. * حسن الحرية يتألق بالروعة كلها مع الشباب. * وحسب كلام أحمد الحاج الخبير (الفني)...شقيق لاعب أهلي شندي سفاري ...(سفاري الصغير) يتألق أيضاً مع شباب الهلال. * هؤلاء المواهب حصنوها بالعقود الشرعية. * الكاردينال نجح في هذا الملف بنسبة 100%. * الهلال ما عندو مشكلة لمدة عشر سنوات قادمة. * والمحترفون بيجوا ويفوتوا. * سادومبا إضافة للهلال. * إن بقى الهلال عليه ..قادر على أن يقدم الكثير للهلال. * ألوك قصتو شنو؟. * شيبوب أشوفك بكره في الملعب. * أقصد أشوفك بكره في الموعد. * ........ * عاجل : نفرتكم دي شكلها ح تروح (فنادق) ساكت.
