اي زول شاهد المباراة بكون لاحظ ذلك – إلّا زول يكون تابع المباراة بي (اريل) ما عن طريق (الطبق) هذه الانطباعات الجيدة التى خرج بها بلاتشي عن شيبوب سوف تتأكد له وتتضاعف في المباريات الكبيرة نصيحتي لي ناس المريخ بعد المستوى المشرف لشرف شيبوب ...ان يمشوا (الفيفا) طوالي يعني يا ناس المريخ لو عاوزين تتابعوا قضية شيبوب بعد استقالة المجلس إلّا يتابعها ليكم معتمد ام درمان """"""""""""""""""""""""" • كيلو الضان هسع بي كم؟. • والله (الفول) نسانا سعر لحمة الضان. • بقينا ولا جايبين خبر للضان. • لكن مرة مرة بسمعهم بقولوا كيلو الضان ب (90) جنيه. • ليه معاه (ريسيفر)؟. • معاه دبلوم هندسة تبريد؟. • والله مفروض (كليو الضان) تصرفوا لينا معاه (ريموت كنترول) – عشان نحرك (اللحمة) قطعة قطعة في الصحن. • نشيلها يمين ونشيلها شمال. • غايتو انا ما عارف. • ما عاوز اغالط ساكت. • لكن (شيبوب) لو استمر بالطريقة دي كيلو الضان بيبقى ب (7) جنيه. • وعضم ما بكون فيه. • لحمة صافية. • هسع كيلو اللحمة يدوك ليه كلو (عضام) تقول عاوز تعمل ليك (هكيل عظمي). • كأنك عاوز تعمل ليك (راكوبة). • حطب بس. • شييوب لو استمر بالطريقة دي الدولار بنزل. • الدولار قالوا هسع لو ما عندك (آلة حسابة) ما بتقدر تصل الي مقابله في الجنيه السوداني. • الدولار في لحظة بيحدّث ارتفاع. • لكن اطمنكم – لو شيبوب استمر على طريقتو دي ...اي حاجة بتصلح. • قطوعات الكهربة ذاتها ح تنتهى. • اللاعب رقم (32) ممكن يحل ليكم مشكلة الكهربة. • هسع كهربتنا بقت (امير كمال). • من اول (5) دقائق بتقطع. • رطل اللبن ب (5) جنيه. • وكلو (موية). • يوم داك وقفت مع (سيد اللبن) في الباب ..قلت ليه اللبن طار كدا ليه؟..معقولة الرطل ب (5) جنيه؟. • سيد اللبن قال لي والله (الموية) زادت. • الموية اليوم كلو قاطعة. • قلت ليه يعني المشكلة ما في اللبن؟. • سيد اللبن قال لي ابدا – المشكلة في (الموية)..اللبن اصلو ما فيه مشكلة. • الموضوع لو بقى على اللبن الرطل ما كان بفوت الجنيه. • يا شيبوب – عليك الله شوف لينا موضوع اللبن دا. • وبي المرة كدا ..شوف لينا حكاية المستشفيات البرحلوها دي. • شيبوب امس الاول في وسط الهلال – ما شاءالله عليه. • شيبوب والشغيل ...(نملة) ما بتفوت. • الطول والقامة. • والتفة. • الهلال الاطراف (صلع). • النص (تفه). • نظام شنو؟. • نظام اي حاجة نحن عندنا بي نظام. • شيبوب زول هادي ..ولعبو مركز. • وبفتح في المكان الفاضي. • وبنزل على الاطراف. • الزول دا معقولة بخلوه (هاوي). • دا زول يخلوه (هاوي). • فنيا يمكننا ان نقول ان شيبوب استطاع ان ينال ثقة مدربه الروماني من الوهلة الاولى. • واضح اللمسة (التكتية) في كورة شيبوب. • اي زول شاهد المباراة بكون لاحظ ذلك – إلّا زول يكون تابع المباراة بي (اريل) ما عن طريق (الطبق). • حدث ذلك من شرف شيبوب – رغم ان اللاعب توقف 6 شهور من المباريات الرسمية. • فقد كان شيبوب بعيدا عن المشاركة في تونس – ولم يشارك إلّا لدقائق معدودة. • شيبوب عاد بصورة بهية ..واللاعب كان في الفترة السابقة تحت ضغط كبير. • شيبوب قفز. • شيبوب في الملكية جوبا. • شيبوب اتخطف. • شيبوب رجع المريخ. • شيبوب مع الكاردينال. • شيبوب في تونس. • وكتابات ومطاردات وانتقادات. • هذه الاوضاع كان من الطبيعي ان تؤثر في مستوى اللاعب في الفترة الاولى. • لكن واضح ان كل هذه الاحداث لم تؤثر على مستوى شيبوب ..نقول ذلك ليس لأن شيبوب تألق في مباراة سانت جورج. • هذه مباراة ولا يمكن الحكم فيها على لاعب. • حكمنا على شيبوب لأنه نال ثقة مدربه الروماني بلاتشي. • بلاتشي شاهد شيبوب اكثر من ثلاثة اسابيع في تمارين داخلية وجمل تكتيكية وكوّن عنه قناعة كبيرة كما وضح ذلك في مباراة سانت جورج. • هذه الانطباعات الجيدة التى خرج بها بلاتشي عن شيبوب سوف تتأكد له وتتضاعف في المباريات الكبيرة. • خاصة ان شيبوب لاعب مباريات كبيرة. • ان كان شيبوب في اول تجاربه الاعدادية مع الهلال بعد مسلسل طويل – يظهر بهذا المستوى فان ذلك مبشر الى ظهور رائع لشيبوب ان شاءالله في الفترة المقبلة. • نصيحتي لي ناس المريخ بعد المستوى المشرف لشرف شيبوب ...ان يمشوا (الفيفا) طوالي. • دقيقة ما يقعدوا لينا هنا. • شوفوا الصور ..وشيلوا ليكم شريط فيديو وامشوا الفيفا. • دا ما زول يخلوه. • امشوا ابكوا. • وامشوا اشتكوا. • وقولوا للفيفا نحن حالتنا صعبة ..ولجنتنا لجنة تسيير. • وفي لجان التسيير كمان استقالوا. • يعني يا ناس المريخ لو عاوزين تتابعوا قضية شيبوب بعد استقالة المجلس إلّا يتابعها ليكم معتمد ام درمان. • شوفوا مجدي عبدالعزيز. • كلموا ناس الحكومة يتابعوها ليكم. • مجلسكم اصلا هو مجلس الحكومة. • معقولة يا ناس لجنة التسيير تدفعوا مليار جنيه في علي جعفر ..وتخلوا شيبوب لاعب هاوي. • اذا علي جعفر شال مليار ..مفروض شيبوب يعطوه 10 مليار. • على العموم شيبوب اكد انه مكسب كبير للهلال. • واثبت ان مجلس الهلال نفذ ضربة قاضية للمريخ وجذب افضل لاعبيه ليكون لاعبا للهلال. • كل المواصفات الجيدة موجودة في شيبوب. • هو لاعب صغير في السن. • وموهوب وصاحب مهارة وسرعة. • وطويل القامة. • واكتسب خبرات كبيرة في فترة قصيرة. • لعب في الموردة والمريخ والمنتخبات الوطنية. • وجاء للهلال بعد ان نضج واصبح لاعب مكتمل. • اما اهم مواصفات شيبوب هو انه لاعب منضبط بحب التمارين وملتزم وصاحب سلوك جيد داخل وخارج الميدان. • واحسب ان الاهداف الحقيقية التى احدثها شيبوب في الهلال – تتمثل في اجادته للضربات الرأسية. • الهلال يعاني نقص في هذه الميزة. • الشغيل جيد في الضربات الرأسية لكن لم يفعّل تلك الميزة مع الهلال. • كذلك لا خلاف حول بشه ومساوي في الضربات الرأسية وقد جاء شيبوب ليحدث اضافة حقيقية في هذا الجانب. • نتمنى ان يستفيد الهلال من تلك الميزة وان يفعّلها في كل الذين يمتلكون الاجادة فيها. • سادومبا وثلعبونا ايضا مميزين في هذا الجانب – اضافة لفداسي والطاهر سادومبا. • المواسم الاخيرة في الهلال قلت بشكل كبير الاهداف التى تسجل بضربات رأسية. • لذلك فقد الهلال خطورته وغابت عنه اهم الاسلحة التى يمكن ان تحسم بها المباريات. • اذا عادت للهلال خطورته في الاهداف الرأسية سوف يصبح قوة ضاربة باذن الله في مقبل الايام القادمة. • ملاحظة مهمة اخرى في مباراة الهلال وسانت جورج كانت في الاختراقات التى قام بها الطاهر سادومبا في الطرف اليمين. • الطاهر سادومبا صاحب عكسيات جيدة ...بكمل اللاين وبعكس الكورة – هذا شيء كنا نفقده في اطراف الهلال. • الطاهر سادومبا وشيبولا يمكن ان يمثلوا قوة كبيرة في الطرف اليمين للهلال. • عموما كدا التجربة قدمت فوائد كبيرة للهلال. • خاصة ان سانت جورج لعب بقوة امام الهلال وكأنه يلعب مباراة رسمية. • قوة المباراة كادت ان تعرض لاعبي الهلال للاصابات وقد تعرض المحترف شيبولا لاصابة نتيجة للحماس الزايد الذي لعب به لاعبو سانت جورج. • مع ان المباراة ودية وفي مناسبة (تسامح)...يغلب عليها النظرة (الحبية) ، إلا ان القوة والتنافس والاثارة كانت حاضرة في المباراة. • وهذا ما ضاعف مكاسب الهلال من المباراة. • ........... • ملحوظة : شيبوب براهو كفاية. هوامش • المحترف ادوارد سادومبا ..ايضا ظهر بمستوى مشرف ..وقدم مباراة كبيرة. • هذا الفريق بعد مباريات معدودة سوف يصبح قوة تهز الارض تحت اقدام لاعبيه. • فقط اصبروا على الهلال وادعموه. • مكّنوا بلاتشي من ان ينفذ سياسته دون تدخلات من الادارة او الاعلام او الجمهور. • الحمدلله ان الهلال مازال امامه وقت لكي يصل الى المستوى المطلوب. • قبل مباراة الخرطوم الوطني والمريخ يحتاج الهلال لأن يلعب عددا من المباريات. • اتجاه المجلس والجهاز الفني لمباريات اعدادية افريقية في هذه الفترة اتجاه ذكي. • مباراة الهلال امام الخرطوم الوطني والمريخ ايضا سوف تمكنه من ان يدخل الدورة الثانية للممتاز بجاهزية تامة. • فقط علينا ان لا ننظر للنتائج. • رغم ثقتنا في قدرة الهلال في تحقيق الانتصارات على كل الاندية التى سوف تواجهه في الممتاز. • يحتاج الهلال الى (الدعم) والمساندة. • مجلس الهلال عليه ان يوفر كل طلبات الجهاز الفني. • الهلال هو الفريق الوحيد الذي قارب على الشهر في الفترة الاعدادية قبل بداية النشاط. • بلاتشي توفرت له فرصة جيدة. • وهو يحتاج الى مباريات تنافسية حتى يصل الى قناعاته التى يبحث عنها في الهلال. • ............ • عاجل : عاوزين نشوف الهلال في مباراة تاني ..بقينا ما بنشبع من الهلال.
