في الوقت الذي انتهج فيه مجلس المريخ المعين سياسة (التقشف) اعلن وزير الرياضة بولاية الخرطوم اليسع الصديق إضافة عضوين جديدين لمجلس إدارة نادي المريخ واشار القرار ان العضوين المضافين هما احمد يوسف ابوزيد وعبد الرحمن مدلك. يا صلاة النبي!!. كورة الهلال لو انتهت تلاتة كان اضافوا (تلاتة). الحمدلله انتهت (اتنين). وزير الشباب والرياضة لو استمر بهذه الصورة …الخطة الاسكانية القادمة يمكن ان تدخل ضمن اعضاء المجلس. الغريبة ..والشيء الما مفهوم …اعضاء (اللجنة) ، بقوا اكتر من اعضاء الجمعية العمومية للمريخ. هي وينها جمعية المريخ العمومية؟. لو في جمعية عمومية ..وزير الشباب والرياضة ما بعين ليه (3) لجان تسيير للمريخ من اجل الترتيب للجمعية العمومية ، مع ذلك ما في جمعية عمومية. الوزير خالف اللوائح والتقاليد والاعراف …وكمل لينا (كراسي) كزام ذاتها وهو يعين ليه (28) عضو لمجلس المريخ. تمت اضافة عضوين للمجموعة. بص الوالي (شمع). من (26) عضو الى (28) عضو. اقصد من (26) راكب الى (28) راكب. كلو من شيبولا. شيبولا هو سبب هذا (الترهل). معقولة لجنة تسيير لمدة 6 شهور فقط فيها (28) عضو. عاوزين تعملوا شنو؟. مجلس قيادة ثورة الانقاذ …الذي ادار حركة كاملة ومسك ليه (بلد) ما كان فيه هذا الكم من الاعضاء. هل تعلم عزيزي القاريء ان هلال الابيض الذي فاز على المريخ والخرطوم الوطني الذي تعادل مع المريخ والهلال الذي فاز على المريخ في مباراة القمة الاخيرة…اعضاء مجالس اداراتهم مجتمعة ما بتصل لهذا العدد. جايبين ليكم (28) عضو قاصد الكاردينال. الكاردينال بيبني في (الجوهرة الزرقاء)…براهو ..انتوا (28) عضو عشان تعملوا ليكم (مول). فضيحة السواد. الكاردينال براهو ماسك الهلال الفريق الاول (فريق ما شاء الله عليه يهز ويرز) ، وماسك (الرديف)..الله اكبر على الما بسمى عليه ..وماسك (الشباب) ، شباب زي الورد. انتوا يا ناس الحكومة جايبين ليكم (28) عضو عشان يمسكوا ليهم (17) لاعب. المريخ لا رديف ولا شباب طبعا. ولا فريق اول كمان. 28 عضو ..خليتوا (للمطرة) شنو؟. هسع الولاية دي لو صبت فيها (مطرة) ..نمشي وين؟. البلد كلها في مجلس المريخ!!. 28 عضو – معقولة بس. زي ما قلت ليكم – الله يستر على (الشاي) لمن يكون عندهم اجتماع. الله يكون في عون (موية الصحة). ديل موية صحة ساكت بهدوا حيل البلد. 28 عضو …ليه؟. الحاصل شنو؟. ما في (مول) عاوز ليه عدد قدر دا. بعدين انتوا (التقشف) ليكم شنو؟. 28 عضو ..وتتقشفوا. 28 عضو ..وبتعتمدوا على (نفرات) القروبات. والله انا شايف لو عملتوا ليكم (قروب) براكم …وعملتوا فيه (نفرة) ممكن تمشوا حال المريخ …اذا كنتوا مصرين كدا على (النفرات). اعملوا ليكم (قروب). واعملوا فيه (نفرات) زي ما انتوا عاوزين. انتوا ذاتكم (جماهير)…28 عضو ..نقول عنكم شنو يعني؟. ما تقعدوا تغشغشوا في الجماهير ساكت. الغريبة وزير الشباب والرياضة في ولاية الخرطوم في الوقت الذي تتجه فيه الفيفا وكل اللوائح والقوانين المنظمة للعمل الرياضي ومجالس الادارات الى (تقليص) عدد الاعضاء ومحدوديتهم يتجه وزير الشباب والرياضة في ولاية الخرطوم الى تعيين لجنة تسيير بكل هذا العدد من الاعضاء. يا جماعة القوانين واللوائح والنظم الحديثة كلها ضد هذا (الترهل). دي نظريات عالمية …وخلاصة وصل لها عباقرة. الاتحاد العام مجسلو كلو مفروض ما يتجاوز ال (15) عضو. انتوا في المريخ جايبين ليكم (28) عضو لست اشهر. عاوزين تعملوا شنو؟. الوزير خالف نظام الفيفا وتوصياتها. الوزير قام بضم عضوين لمجلس المريخ …(تقول ناقصين اعضاء). ديل يا ربي ..ح يكونوا (مساعدين) للرئيس في شنو؟. احمد يوسف ابوزيد ممكن يكون مساعد للرئيس لمعاندات عصام الحاج. و عبد الرحمن مدلك مساعد للرئيس في شئون التقشف. يلا اتقشفوا كلكم. والله (28) عضو فيهم حلاة (تقشف). على العموم مطالبة جمال الوالي وإلحاحه باضافة هذين العضوين ، يؤكد ان جمال الوالي لا يثق في مجلسه. وان جمال الوالي عندو رأي في ال (26) عضو. جمال الوالي عندو فهم. وعارف هو بعمل في شنو؟. وإلّا ما استنجد بهذه الاضافة. علما ان وزير الشباب والرياضة يمكن ان يضيف اعضاء اخر بعد مباراة المريخ امام هلال كادوقلي. الناس ديل بعد كل (هزيمة) بضيفوا ليهم (اعضاء). ممكن لمن ينتهي الدوري مجلس المريخ يكون فيه (75) عضو. بص الوالي في كل محطة ممكن يركّب عضو. وممكن ينزل. عصام الحاج يمكن ان يعتبر نزل من البص. نزل من اول محطة. او يمكن ان نقول ان عصام الحاج نزل من (بص الوالي) ، قبل ما يتحرك (البص). مرات في زول بكون راكب في (البص) ، فجأة كدا بتذكر ليه حاجة بقوم ينزل من (البص) قبل ما يتحرك. الناس كلها في البص بتقوم تعاين ليه. بشموه كلهم….(الزول دا ماشي وين؟). عصام الحاج هسع عمل نفس الحركة. لكن عصام الحاج حجز مقعدو. خلى ليه (كيس) في الكرسي بتاعه. ونادر ابراهيم مالك بيحجز ليه. بمسك ليه مكانو. عشان الحركات دي جمال الوالي جاب ليه عضوين جداد في المريخ. عشان حركات عصام الحاج دا. ان شاءالله بس الرسالة تكون وصلتك يا عصام الحاج. عصام الحاج طبعا عارف اي حاجة. وعامل فيها رايح. على العموم …ودا اقتراح مني براي …مجلسكم دا ضمو ليه (صيني). مجلسكم دا ما ناقص ليه شيء غير يكون فيه (صيني). الصينيون بقوا في اي حتة. دخلوا في اي لجنة. عشان كدا ضموا ليكم صيني للجنة. بتحتاجوا ليه. الظروف ما معروفة. مجلس (شهر) إلّا شوية – معقولة ما يكون فيه (صيني). الشيء الغريب ..ان مجلس المريخ مع هذا العدد ما فيه (امرأة) واحدة. وناس المريخ بفتخروا وفرحانين ان النادي تأسس على يد سيدة فرح. وين حفيدات سيدة فرح. كان يفترض ان يكون للمرأة ممثل في هذا المجلس العريض. الهلال رغم محدودية الاعضاء ..فيه ممثلة للمرأة – السيدة افكار. هذا يوضح الفرق بين الهلال والمريخ. الفرق كبير. يمكن عشان مجلس الهلال (منتخب). مجلس (شرعي) لذلك فيه كل مقومات العدالة. ……………….
هوامش
بص الوالي قرب يبقى (قطر). هسع نقول عليكم بص الوالي وإلّا نقول شهر إلّا يومين. نشوف (شيبولا). هو البحدد لينا الحاجات دي. بكري المدينة ضرب ليه (حكم) ما وقفوه. بل الاتحاد العام رفع عنو الايقاف الوجوبي. بكري المدينة اتكلم مع ادري (معين) تم ايقافه. علاءالدين يوسف تاني ما بلعب ليكم. مع (التقشف) دا ..ما في زول بقعد ليكم. انتوا وقت (28) عضو وبتتقشفوا … ناس مريخ كوستي يعملوا شنو؟. مجلس المريخ حاول تاني يؤجل مباراة هلال كادوقلي. انتوا ناس هلال كادوقلي ديل خايفين منهم كدا مالكم؟. العيد السنة دي كادوقلي. علاءالدين يوسف عرفها. علاءالدين يوسف ما بعيد برة الخرطوم. الجابرو شنو؟. تمارين الهلال انطلقت. المهم المباريات الاعدادية. لماذا لا يلعب الهلال مباراة اعدادية مع الخرطوم الوطني وهلال الابيض. الهلال يحتاج الى مباريات ودية كثيرة. سادومبا …عاوز يرجع سريع. ممكن المباريات تكون مقفولة بدون جماهير ..لو كان النشاط الرياضي غير مصرح به في العشرة الاواخر. بدل التمارين ..ألعبوا مباريات ودية. احسن ليكم. هناك عناصر كثيرة في الرديف والشباب …محتاج المدرب يشوفها. محتاج يكتشفها. هيثم مصطفي يبقى سعيد جدا بشباب الهلال. هيثم مصطفى ظل يراهن دائما عليهم. ويبشر بهم. يبدو ان المستقبل اكثر جمالا. لا بد من اتاحة الفرصة لبعض نجوم الشباب ليظهروا مع الفريق الاول. هذا اكبر دافع لهم. يفترض ان يكون هناك تسيق بين المدير الفني للهلال بلاتشي والفاتح الريشة المدير الفني للرديف وهيثم مصطفى المدير الفني للشباب. ولا بد من اشراك بعض العناصر ..عشان الجمهور والاعلام يحكم. ……….. عاجل : احسموا الممتاز وامنحوهم فرصة في المباريات المقبلة بعد الفوز باللقب.