امس الاول وجد مدرب الهلال الفرنسي الايطالي (الجرأة) الكافية ليعلن في مؤتمر صحفي وفي توقيت عجيب عن وجود مشكلة بينه وبين هيثم مصطفي (حفظه الله ورعاه). من اين وجد هذا الفرنسي تلك (الشجاعة) ليعلن ان هناك مشكلة بينه وبين كابتن الهلال هيثم مصطفي؟. فجأة كدا ..قال نعم في مشكلة. بعد سلسلة من الانكارات. لا اعرف هل كانت هذه (الجرأة) من المدرب الفرنسي بعد مباراة الهلال والموردة بسبب اداء الهلال الذي كان (محزنا).....فاراد غارزيتو اشغال الناس بمشكلة (هيثم مصطفي) وايجاد مبرر له لسوء اداء فرقة الهلال...ام الاعلان عن مشكلة هيثم مصطفي الان مقدمة لاخفاقات قادمة (لا قدر الله). لعب الهلال امس الاول امام الموردة الشوط الاول فقط ..وكان تائها في الشوط الثاني ..وقد اوشك فريق الموردة من ادراك التعادل لولا سوء الطالع الذي لازم الفريق الضيف. الهلال في الشوط الثاني كان اقرب لأن يخسر من الموردة رغم تقدمه في الشوط الاول بهدفين دون رد. غلطة (ديمبا) كادت ان تعيد غارزيتو الى اهله في اول طائرة متجهة الي البرازيل. اما (جمعة) فقد كانت (تقريشته) اقرب للاطاحة بالامين البرير شخصيا. انتوا (جمعة) دا قديم كدا. قديم من زمن (التقريشة). يا جمعة عاوز تاني ترجعني لي (الحرق البصلة منو). وتقول لينا يا غارزيتو هيثم مصطفي غير جاهز فنيا. جمعة دا لو ما جاهز (مشكلة). ولو كمان كان جاهز (المشكلة) تكون اكبر. اين جهز عمر بخيت الذي غاب من الملاعب لمدة قاربت من الثلاثة اشهر؟ ..وفجأة اقتحم تشكيلة الهلال. بل كيف يشارك ديمبا الذي وصل مع الهلال لرقم قياسي في الشكاوي ..اذ كان هذا المحترف (المالي) يشتكى الهلال بمعدل كل 48 ساعة شكوى في الاتحاد العام. ديمبا دا اكد انه فعلا (مالي). وبرضو يقولوا ليك هيثم مصطفي غير جاهز. هل تم تجهيز (اتوبونج) في وادي هور. ألم يجهز اتوبونج باشراكه في المباريات حتى وصل لهذا المستوى الجيد الذي يظهر به الان. لو كان غارزيتو ذكيا لعرف ان سوء الاداء الذي لازم الهلال في الشوط الثاني كان بسبب فقدان الهلال للقائد ولصانع الالعاب ولروح هيثم مصطفي التى افتقدها الهلال بشكل واضح وجعلت جماهير الهلال بحسها الراقي وحبها الجارف ترفع في المدرجات لافتات تطالب برحيل دائرة الكرة ومجلس الادارة مع اضافة (غير مؤسف عليه). غاب هيثم مصطفي ...واصبح (نزار حامد) اللاعب الذي لم يكمل 4 شهور في الهلال يرفع ايدو ويتنفر عندما يتم استبداله. غاب هيثم ...واصبح الهلال يغلب بعد طلوع روح ..وبفارق هدف وحيد ..رغم ان الهلال يلعب ب (3) مهاجمين. رفعوها لكم بكل الادب ...(ارحلوا). ارحلوا اذا كنتم عاوزين تعملوا ليكم معركة مع هيثم مصطفي. هى البلد ناقصة (معارك). معركة مع هيثم مصطفي فقط لأنكم شعرتم ان تاريخ هيثم مصطفي في الهلال كبير ..وانكم لو اجتمعتم كلكم ...(دائرة كورة ومجلس ادارة) لن يكون تاريخكم مجتمعا موازيا للتاريخ الذي صنعه هيثم مصطفي في الهلال. نعم فلترحل (دائرة السوء) تلك ..اذا ارادت ان تتعامل مع اعظم ما انجبته الملاعب السودانية بهذه الطريقة وهذا الاسلوب الذي يؤسفنا ان نقول عنه انه اسلوب (جبان)...لم يبلغوا بعد مرحلة الاعلان عنه ...مثل هذه الدسائس تكون دائما في الخفاء ..وفي الظلام. نذكر خالد بخيت ..ان تاريخك في دائرة الكرة لا يتجاوز الاشهر. ونذكر حمد كمال ان وجودك مدربا للهلال لا يعنى انك خلاص (كبرت)..(تعادل) ساكت ممكن يطيح بيك ..ويعيدك للمدرجات. عمرك برضو كمدرب للهلال 3 شهور. اما البرير فان تاريخه كرئيس لنادي الهلال لم يتجاوز سنة وبعض سنة. هيثم مصطفي ظل في موقعه هذا (17) سنة. زول 17 سنة في الميدان ...عاوزين تطيحوا به بهذه المسرحية البائخة ..التى جعلتم بطلها غارزيتو. المشكلة في الهلال ما غارزيتو وهيثم. المشكلة في الهلال دائرة الكرة وهيثم. دائرة الكرة هى التى نسجت هذه (المؤامرة) للاطاحة بهيثم مصطفي. نعم هى (مؤامرة)..لكن باذن الله وتوفيقه هؤلاء الذين جمعتهم هذه المؤامرة سوف يدفعون الثمن. هيثم مصطفي لو اعتزل الان ..ولو اعلن تركه للكرة لن يفقد شيئا انتم الذين سوف تفقدون. وانتم الذين سوف تدفعون الثمن. والثمن لمعلوميتكم سوف يكون غاليا. (وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ). غارزيتو امس الاول اعلن ان هناك مشكلة بينه وبين هيثم مصطفي بسبب ان الاخير اشترط المشاركة. وقبل ذلك كنا ننعم بسايفمونيات الجماعة (الطيبين). كان مجلس ادارة نادي الهلال وعبر رئيسه الامين البرير في كل التجمعات ..الداخلية والخارجية يعلن ألا مشكلة لهم مع هيثم مصطفي. ما في أي مشكلة. من الامارات كان من حين لآخر يصرح الامين البرير ويقول : (ما عندنا أي مشكلة مع هيثم مصطفي). بعضهم قال انت الامين البرير دا سافر الامارات عشان يؤكد انه ما في مشكلة. يا البرير هذا الامر كان ممكنا وانت هنا في ام درمان. الموضوع دا ما عاوز ليه (سفر) للامارات. اما دائرة الكرة فقد كانت عن بكرة ابيها تصرح في كل الوسائل الاعلامية وتؤكد ألا مشكلة لهم مع هيثم مصطفي. وان ما بينهم (سمن على عسل). وان وجود هيثم مصطفي دعم لهم. وان هيثم مصطفي سوف يجد من الثالوث ( حمد كمال وخالد بخيت وابوشامة) كل العون. ونحن اصحاب. ونحن بنعرف بعض. ونحن فاهمين بعض كويس. وما في أي مشكلة. ما في عوجة تب. اتاريكم يا خالد بخيت لابدين ليكم بي شيء كتر. كذلك كان يؤكد المدير الفني للهلال في كل الحوارات وفي كل التصريحات ..(ما عندنا أي مشكلة مع هيثم). وهيثم قائد. وهيثم لاعب كبير. اما اعلام المجلس فقد كان هو الاخر يتحدث عن عدم وجود أي مشكلة ..وان هذا الذي يتحدثون عنه ما هو إلا من صنع (الطابور الخامس). طلعوا هم الطابور الخامس. الطابور الذي يحارب في هيثم ..وقد كانوا يظهرون خلف ما يبطنون. الفيكم اتعرفت. من العبط والسخف ان يوصف كل من يقول حقيقة بانه ( طابور خامس) ...وهذا ما هو إلا ارهاب للناقدين للمجلس. وتكميم للافواه. مجلس البرير فيه الكثير من العيوب وبوضعه الحالي يحتاج لمعارضة وانتقاد شديد ...واتمنى ألا يرد علينا بعضهم ويقول لنا ان البرير دفع رواتب اللاعبين. هل دفع الرواتب للاعبين (انجاز). انتوا صلاح ادريس خرب طبعكم وإلا شنو؟. بقيتوا تشوفوا دفع الرواتب (انجاز). الرواتب التى تدفع للاعبين حق لهم ..جابوها بعرق جبينهم ..من دخل المباريات ..ومن حوافز البطولات التي يدفعها الاتحاد الافريقي للهلال. الكانوا بصلوا المربع الذهبي في البطولات الافريقية ..ديل اللاعبين ناس هيثم ومهند وعلاءالدين يوسف. ما ناس هاشم ملاح. والبرفع كاسات الممتاز دا هيثم مصطفي ما خالد بخيت. البرنس رفع 5 كاسات للممتاز على التوالي ...كم رفع حمد كمال؟. الهلال بصرف من دخلو ...وبجعل الحراك الرياضي كبير ..والصحف منتعشة. ما في زول عندو جميل على اولئك اللاعبين. يمكن ان يكون الجميل فقط للجمهور ..الذي يدفع من جيبه ويحرق في دمه ..من اجل الهلال. غير ذلك فان الجميع مستفيد من الهلال. الاداريون والصحفيون والاتحاد العام ..والمنتخب. الجميع مستفيد. ان بعض الصحف وصفت وعد الكاردينال بدفع الحوافز بالاعجاز. الكاردينال الذي قال (سندوتش طعمية) ما بدفعو للهلال ...الان اصبح الكل في الكل. وما فيه أي كلمة. رغم ان اشرف الكاردينال هذا خرج يوما بعد الاجتماع مع مهند الطاهر وقال اشطبوا مهند. والله دي ما بننساها ليك يا الكاردينال. انت قايل مهند الطاهر دا (موسي الزومة). تفتكر لو الهلال عاوز يشطب مهند الطاهر ...بنكون محتاجين ليك في حاجة. يشطبوا مهند ..ويسجلوا جمعة. غايتو يا البرير لو قعدت في الهلال 4 تسجيلات تاني بتخلى الهلال كلو (جمعة). جمعة في الدفاع. وجمعة في الوسط. وجمعة في الهجوم. هذا الاسلوب ..والطريقة التى يمدح بها مجلس الهلال الحالي توضح الخلل الكبير الذي يعاني منه المجلس ...ويؤكد ضعف حجة الذين يدافعون عن مجلس بقى منه فقط (البرير). هو وينو المجلس؟. هاشم ملاح اكتفى بالحوامة على الاذاعات والبرامج التلفزيونية للترويج لاتفاقية الهلال والمريخ. معقولة يا البرير ...انتوا اتفقتوا مع المريخ ..عشان تحاربوا لينا هيثم مصطفي. اتفقتوا مع همد وعصام الحاج وجمال الوالي ...عشان تحاربوا ليكم لاعب لعب لهلال 17 سنة. 17 سنة (عمليات). رقم (8) بيشهد. انتوا وغارزيتو ألعبوا بعيد لو دا (فكركم). اعود واقول ان الذين كانوا يؤكدون ألا مشكلة في الهلال وان هيثم مصطفي ما عندو أي اشكالية ..عادوا واكدوه بانفسهم ..وما تصريح غارزيتو في المؤتمر الصحفى إلا دليل وجود الازمة والمشكلة منذ فترة. يا ريت لو كان عندكم (الشجاعة) التى تجعلكم تعلنوا ذلك في وقته. ما معقول في الف تصريح تقولوا لينا ما في مشكلة ..ثم يأتي غارزيتو ويؤكد وجود المشكلة. هذا اعلان للحرب. خلاص عاوزين يخشوا في الحتة العلنية. بالواضح كدا. بعد الحفر والدسائس والمؤامرات ..عادوا الان ليقضوا على البرنس. اقول ليكم حاجة بسيطة ..(ألعبوا بعيد). والله كنا سوف نحترم رأي المدرب هذا لو ان هذا الرأي خرج من المدرب وحده. كنا سوف نقدر وجهة نظر المدرب. لكن المشكلة ان هناك مؤامرة اجتمعت من اجله العديد من الاطراف...اجتمعوا فقط من اجل (الحفر). نكره مثل هذا الاسلوب. ونعرف ان هذا الاسلوب مثل (الكذب) حدو قصير. نذكر مجلس الادارة ...انهم لو كان عندهم رأي في (سن) هيثم مصطفي فانكم سجلتوا في التسجيلات الاخيرة من هو اكبر منه عمرا. ومن يتحدث عن عدم الجاهزية ..نقول له ..ان مدرب الهلال اشرك مهند الطاهر وهو العائد من الاصابة وكذلك فعل مع بكري المدينة العائد من اصابة ...واشرك عمر بخيت بدون أي مقدمات ..وظل يدفع بمحمد عبدالرحمن رغم وجود 6 مهاجمين في الهلال اكثر منه جاهزية. يا جماعة اقول ليكم حاجة اخيرة. الموضوع دا ما بتقدروا عليه. نعم عديل كدا ما عندكم ليه (قدرة). ملحوظة : ونتمنى ألا نعود لهذا الموضوع مرة اخرى. هوامش الى الان هيثم مصطفي لم يصرح ولم يقل شيئا. هيثم مصطفي بعيد ..مع ذلك النار مولعة فى الجماعة. يعمل ليكم شنو..لا صرح ..ولا اتكلم. بل ان هيثم مصطفي كلما حس بالضيق وبالمؤامرات كان يعتذر ..ويبتعد. وبرضو انتوا الموضوع دا ما عاجبكم. ترى اذا اعلن هيثم مصطفي الان (اعتزاله)..هل سوف يرتاح مجلس ادارة نادي الهلال ودائرة الكرة. لو اعتزل البرنس الان ..فان اول من سوف يدفع فواتير هذا الاعتزال هو مجلس الادارة. وبالتأكيد دائرة الكرة والجهاز الفني. تصريح واحد من هيثم ممكن يكشف المستور. لذا نتمنى من هيثم مصطفي من اجل الهلال ألا يتحدث. نعم من اجل الهلال الذي ضحى هيثم من اجله كثيرا ..ما تتكلم يا هيثم. مباراة الهلال الافريقية ومباراة القمة القادمة تهم هيثم مصطفي اكثر من الذين يحاربونه الان. لذلك اقفلوا هذا الملف الي حين. والحساب بجمع. عاجل : ما اديتونا فرصة نكتب عن (عنكبة).
