في الهلال لو عملنا اي حاجة ....اليوم التاني تلقى الحاجة العملوها في الهلال ....طبقوها في المريخ. نطفيء الكشافات ....يطفوا الكشافات. نولعها ...يولعوها. في تقليد اكتر من كدا. سادومبا ...مستواه يتراجع ....سكواها اليوم التاني مستواه يتراجع. نقول عاوزين نشطب يوسف محمد عشان اصاباته كتيرة...يقولوا عاوزين يشطبوا موتيابا عشان اصاباته كتيرة. نحن نعمل شنو؟. نتقطع يعني. يتخيل لي كدا...لو (معتز رابح) دا طلع ليه في عمارة من سبع طوابق وقلب الهوبة من فوق ..يتخيل لي كدا ...(بلة جابر) بكرة بجى بطبق النظرية دي. بطلع الطابق السابع ...وبتلب من هناك. ناس المريخ بفتكروا انو الهلال دا بتقدم وبتصدر الدوري الممتاز دا عشان معتز رابح عمل حركة الهوبة دي. رغم انو معتز رابح ما عمل اي حاجة. ناس المريخ عندهم اعتقاد بالشكل دا. عندهم وهم عديل كدا...اسمه (الهلال). طبعا معتز رابح ما عندو اي علاقة بالموضوع دا ...وما عندو اي ذنب. ويتخيل لي كمان. لو في هلالابي في الحلة. هلالابي ساكت كدا ....مشى الجزارة واشترى ليه ربع كيلو لحمة. دي فيها حاجة. المريخابي بمشى اليوم التاني ومعنى كدا ...بشترى ليه ربع كيلو لحمة. رغم انو المريخابي دا عندو قدرة يشترى ليه (كيلو لحمة). لكن بس عشان الهلالابي اشترى ليه ربع كيلو لحمة ...المريخابي اعتقد ان الموضوع دا فيه سر. الهلالاب ديل ما بعملوا ليهم حاجة ساكت. اي حاجة بعملوها بي فهم. هسه تلقى صدارتهم للممتاز السبب فيه ربع كيلو اللحمة دي. الموضوع دا هسع مناسبتو شنو؟. بمناسبة اللحمة دي. عندنا زول عندهم (كديسة). كديسة شيطانة شديد. الكديسة النوع البمشي يفتح التلاجة ...وتلقى اللبن بارد ..(تقرطع) ليك اللبن دا زي الما حصل حاجة. ديل كديستهم دي ....مرة مشت فتحت (الحلة)...لقطت اللحمة الطابخين بيها الملوخية كلها ..وقفلت الحلة وطلعت. كديسة شيطانة شديد. تحضر في افلام الكرتون ...وتوم اند جيري مع (الشفع). ووقت المكيف يشغلوها ...بتتغطى بالبطانية. والله (كديستكم) دا انا شاكي فيها ...اصولها تكون (اسرائيلية). نرجع ليكم لي ناس المريخ. انتوا مفروض تكونوا فهمتوا الحكاية. الموضوع واضح ...ما عاوز ليه (مساء الانوار) بتاع مدحت شلبي. بالمناسبة دي. والله انا كل ما افتح ليك مودرن سبورت ....القى ليك مدحت شلبي دا شغال. اي وقت بفتح فيه القناة دي ...بلقى ليك مدحت شلبي دي شغال. صباح ...ليل ....نهار. الوقت كلو شغال في (مساء الانوار). والله يا مدحت شلبي كلامك الكتير دا لو حولتو (طوب) ....كان غنيت. كان عملت ليك عمارة من 7 طوابق. نرجع للمريخ. كل ما اصل ليكم لي لب القضية انتوا تطلعوني منها. في بداية الموسم دا ....عندما تعاقد الهلال مع غارزيتو ....كان الهلال قد اتجه الي تعيين حمد كمال مساعدا للمدرب ...او هو المدرب العام. تمكينا للشباب. عارفين ناس المريخ عملوا شنو؟. طوالي عينوا (ابراهومة) مساعد لي ريكاردو. نحن نعمل شنو؟. نتقطع يا جماعة. ادارة نادي الهلال كانت قد اتجهت كذلك لتعيين خالد بخيت في اتجاه المجلس لتمكين الشباب في الهلال. ناس المريخ بعد 6 شهور ...الموضوع دا وقع ليهم. قاموا عينوا خالد احمد المصطفى مديرا للكورة. وخالد بخيت وخالد احمد المصطفى هما من جيل واحد. المشكلة الاتنين بحملوا اسم واحد. الاتنين اسمهم (خالد). يعني لو كان الهلال عيّن اسامة الثغر مساعدا لي غارزيتو...ناس المريخ كانوا ما اتلفتوا. كانوا عملوا شنو؟. طوالي كان عيّنوا اسامة سكسك مساعدا لي ريكاردو. انت ماشي بعيد ليه؟. ريكاردو دا ذاتو لو ما سبق ليه تدريب الهلال ما كان بدقها في المريخ. يا ريكاردو ...انا عاوز اقول ليك حاجة. انت في المريخ بدرب اكرم براه ...وإلا بدرب الفريق كلو. الظاهر جهازكم الفني دا ما في زول شغال فيه غير مدرب الحراس. انتوا قايلين الموضوع وقف على كدا. الموضوع اخطر من كدا. الهلال دا موش جاب مع خالد بخيت محمد عبدالغيوم ابوشامة. المريخ جاب مع خالد احمد المصطفى محمد موسى. برضو اسمو محمد. نحن جبنا (محمد) ابوشامة ...هم جابو (محمد) موسي. عليكم الله نحن اكتر من كدا نعمل شنو؟. نتقطع. في تقليد اكتر من كدا. والله حركتكم الاخيرة دي ما في زول سبقكم عليها. مفروض تنزلوا (اللافتة). وتكتبوا في النادي حقكم ....فريق المريخ ...(فرع الهلال جنوب). حركاتكم بتاعة التقليد دي .....هلال كادوقلي ما بعملها. اهلي شندي الذي يلعب فيه 6 لاعبين من مشاطيب الهلال ...ما بعمل البتعملوا فيه دا يا مريخاب. الطريف قالوا ناس المريخ ببحثوا ليهم عن مهاجم وطنى. عارفين ليه؟. عشان اللهلال عندو كاريكا ..وبكري المدينة...والموضوع دا طبعا حارق فشفاشهم. انت تعال هنا ....كلامك البتقول فيه دا كلو ما فيه (زكي جمعة). عاوزين نعرف بس. زكي جمعة دا الدخلوا في الموضوع هنا شنو؟. زكي جمعة دا تبع عادل امام ...الذي ادخله الزعيم في مسرحية (مدرسة المشاغبين) بدون اي مناسبة ...وهو بتحدث عن التعليم زمان. زمن رفاعة رافع طهطاوي وزكي جمعة. عادل امام استدرك ...وقال مين زكي جمعة. واتضح للناس فيما بعد اي زكي جمعة هذا كان استاذ عادل امام في كلية الزراعة. وقد اراد عادل امام ان ينصف هذا الرجل ...فذكره في تلك المسرحية الخالدة ...ومازال الي الان زكي جمعة يذكر..فقد اصبح علما في رأسه نار. شفتوا عادل امام انصف زكي جمعة دا كيف؟. هسع ناس المريخ عاوزين يشتغلوا مع خالد احمد المصطفى بنفس النظرية. رغم ان خالد احمد المصطفى اسم معروف في المريخ ...وقد كان لخالد احمد المصطفى تاريخ مشرف في المريخ. وخالد احمد المصطفى الي جانب محمد موسي كلاهما الان من نجوم التحليل الرياضي. ومن نجوم الشو الرياضي. لذلك مجلس المريخ اتى بخالد احمد المصطفى ومحمد موسي من اجل الكسب الاعلامي. لأن خالد ومحمد موسي من نجوم الفضائيات الان. على العموم ...نرجع ونقول ان تجربة الشباب في الهلال لم تكن جيدة. ودائرة الكورة الان في الهلال فيها الكثير من المشاكل ...والكثير من الصراعات ...وهى لا بتحل ولا بتربط. بل هى بتربط فقط. لذا لا نرى مبررا لتكرير هذه التجربة في المريخ. ابراهومة في المريخ مثل حمد كمال ...مفروض من الجميع. ونخشى على خالد احمد المصطفى ومحمد موسي من مصير خالد بخيت وابوشامة ...رغم من ان خالد احمد المصطفى ومحمد موسي يتميزان بالمرونة ...والهدوء والقدرة على الاقناع. لكن طالما في مشاكل في الهلال ...اتوقع ان تكون هناك مشاكل في المريخ. طالما الحكاية تقليد في تقليد. ملحوظة : وإلا شنو يا زكي جمعة. هوامش في شندي .قدم الاهلي شندي كورة رفيعة وجميلة امام المريخ. لكن الثغرة الوحيدة التى كانت في الاهلي كانت في كابتن الاهلي شندي المدافع النور التجاني. وهذه الثغرة فتحها المدرب الكوكي. الكوكي في الجمعة الماضية كان بتحدث عن ان النور التجاني بيلعب بدون (ركبة). وناس المريخ سمعوا الكلام. لذلك كان هناك ضغط كبير على اللاعب من قبل لاعبي المريخ ...لأن لاعب الاهلي بيلعب بدون (ركبة). لذلك فان مسؤولية خسارة الاهلي يسأل منها المدرب التونسي الكوكي. يسأل الكوكي قبل حكام المباراة. كان يمكن ان يلعب في خانة النور التجاني لاعب الهلال السابق اسامة التعاون. وكان الي وقتنا هذا ...المريخ ما سجل هدف في الاهلي. لا اعرف كيف قبل مجلس ادارة الاهلي وصلاح ادريس بالتضحية باللاعب واشاركه بدون (ركبة) لخصم يعرف هذا السر. ضحوا باللاعب فاشركوه مصابا ...فكانت التضحية بالاهلي شندي. فريق الاهلي شندي فقد اضمن نقاط له في الدورى الممتاز. نقاط كانت في متناول الاهلي. المريخ ما كرم صلاح ادريس. الظاهر المريخ كرم حكم المباراة. هذا الحكم (متفرج) ساكت ما بنفع. الحكم والنور التجاني والكوكي افسدوا روعة المباراة. ناس المريخ ..لو عاوزين يعسكروا ...مفروض يعسكروا بي (اكرم الهادي سليم) براهو. ناس بلة جابر ديل ما في داعي يعسكروا. كورتهم واحدة. عسكروا وإلا ما عسكروا. كلو واحد. نعشم في اضافات حقيقية للهلال في تسجيلات يونيو. الهلال يحتاج الي اسعاف سريع. نجدة عديل. خاصة في الطرف الشمال ..والدفاع. تاني ما عندنا مشكلة. مشكلة ديمبا وعلاءالدين يوسف يسأل منها خالد بخيت. دائرة الكورة قاعدة ساكت. معقول الضرب يصل لهذا الحد...والبونية مدورة ..ودائرة الكورة قاعدة تتفرج. قبل هذه المشكلة كانت هناك مشكلة بكري المدينة. ودائرة الكورة برضو تعاملت مع الامر برعونة. اما مشكلة هيثم مصطفى حفظه الله ورعاه ...فقد صنعتها دائرة الكورة. في ظل وجود هذه الدائرة ....لا تحلموا بالكمال. خالد بخيت وابوشامة ناس صراعات وخلافات. وقد نقلا الصراع وسط لاعبي الهلال. ومشاكل الهلال بقت في الجرايد. اختيار هيثم مصطفى للمنتخب ...لفتة بارعة من الجهاز الفني للمنتخب. عندما ظلم الهلال قائده انصفه المنتخب. محمد عبدالله مازدا يستحق التقدير على هذه اللفتة البارعة. مازدا اعاد للميادين (خضرتها). المستطيل الاخضر يا دوب ح يخضر. والكشافات ح تنور. تعالوا شوفوا البرنس. وشوفوا الجهازية. نجاح البرنس في المنتخب شيء اكيد. عارفين ليه؟. عشان المنتخب ما فيه دائرة كورة مثل دائرة الكورة الموجودة في الهلال. مطلوب من غارزيتو ان يشاهد مباريات المنتخب. عشان يبدل الصورة التى رسموها له. غارزيتو ضحية دائرة الكورة. وبكرة يكتشف غارزيتو هيثم مصطفى ...ويتأكد من جاهزيته. البرير امام امتحان تاريخي اخر. امام امتحان حقيقي ...يتمثل في التسجيلات. ونحسب ان البرير بنجح في التسجيلات. وهو لا بد له ان يؤكد ذلك في التسجيلات القادمة. عاجل : ح نرتاح شهر من عمائل دائرة الكورة في الهلال.
