المحترف البرازيلي (ليما) الذي تعاقد معه المريخ في فترة التسجيلات الاخيرة ...ليس هناك مبررا واحدا لتعاقد المريخ معه ، غير عملا بالمثل الذي يقول : (الفى والدك بقالدك). اقصد الفي مدربك بقالدك.
ريكاردو الظاهرعليه جاب (ليما) دا عشان يصلح ليه (الفول).
دا محترف تصليح فول ساكت.
اغلب الظن ان (ليما) هو النسخة (الضفرية) للاعب المريخ محمد عبدالله ضفر في البرازيل.
يعني ليما دا (ضفر) البرازيل.
الزول دا لو فتشوه ما بعيد يكون كان بيلعب في النيل الحصاحيصا ...بتاع البرازيل.
يا زول اقيف.
كمان البرازيل فيها (نيل حصاحيصا).
لو قبلنا ان البرازيل فيها (حصاحيصا)...كيف نصدق ان البرازيل فيها (نيل).
لكن ما علينا.
الزمن دا أي حاجة جائزة.
تصوروا مرة في واحد قال كان ماشي في (برازيليا) لقى ليه (لوري تراب).
زولكم استغرب...اتهجم عديل بقى زي الزول الاول مرة يشرب ليه بيبسي..قال : معقول ..البرازيل فيها (لوري تراب)، والله انا كنت مفتكر لواري التراب دي قصرا على (ام بدات والثورات).
زولكم مشى شوية ...لقى ليك لوري التراب مكتوب فى خلفيته (يا ريتني لو اقدر اقول فيك الكلام الما نكتب).
يعني عاوز تقول شنو في (لوري تراب).
انا ما عارف ليه الناس بتخلى أي حاجة وتقعد تتغزل في (لواري التراب).
عواطفنا كلها بنكبها في لواري التراب.
يمكن عشان نحن ناس عواطفنا (ترابية).
وفلافستنا سواقين لواري التراب.
في لوري تراب قطع كبري الفتيحاب...شفت خلفيتو ..لقيت الخلفية مكتوب فيها (من شوفتو طولنا).
ليك حق تتطول.
لكن لواري التراب دي هسع ما موضوعنا.
لواري التراب دي عاوزة ليها بحث براها.
الراحل عزالدين الصبابي في حوار في قناة النيل الازرق مع الاستاذة عفاف حسن امين ..قال انه كان يحب قراءة ما يكتب في خلفيات العربيات.
وكان الصبابي مولع بمتابعة ما يكتب في لواري التراب.
قال عزالدين الصبابي انه اعجب بمقطع كتب في لوري تراب كان على هذا النحو (بس تشيل فيني وتودي).
اما انا فقد عجبت من صاحب لوري تراب كاتب في اللوري حقو (وسط الزهور متصور).
يا ود الناس وينها الصور.
دي زي الحفلة.
مرة مشيت لي حفلة شاي ...قعدنا فيها من خمسة لي منتصف الليل ..ما شفنا
فيها كباية شاي واحدة.
مع ذلك الحفلة كان اسمها حفلة شاي.
مرة تانية.
تانية خالص.
مشينا لينا حفلة.
في الصباح قالوا لينا الحفلة بي محمد الامين.
في الضهر اتراجعو...قالوا لينا الحفلة بي نور الجيلاني.
العصر لقو الوقت ضايقهم ...قالوا لينا الحفلة بي اسامة الشيخ.
وفى واحد وقت الواطة مغربت قال ليهم اعملوا لينا الحفلة سريع ...قبل ما
تجيبوا لينا نصرالدين الخليفة.
كمان نصرالدين الخليفة دا منو؟.
نرجع لي (ليما).
ليما دا قالوا بقيف للكورنر ...زي الزول الواقف للصورة...يضحك السنة كلها.
زولكم دا مشى استاد المريخ ...(اتخلع).
اتخلع من الاستاد.
انت يا اخوي البرازيل دي كنت فيها (كورس).
معقول برازيلي يتخلع من استاد المريخ
والله إلا تضربو كهرباء.
لكن (خلعة) عديل كدا ...ما اظن.
منذ ان جاء محترف المريخ البرازيلي (ليما)...ثبت تواضعه ...وتأكد فشله.
لو انت سبقتو على تلفونك ..بقول ليك الرسالة دي من منو؟.
يا ود الناس مالك انت؟.
زول (خبار).
محترف المريخ ليما وصل لمطار الخرطوم ...قبل ما يرسلوا ليه (التذاكر)...في استعجال اكتر من كدا.
قالوا صديق على صالح اتهجم وقت لقى (ليما) وصل الخرطوم ...مما جعل احد اعضاء دائرة الكرة في المريخ يعلق على وصول اللاعب قائلا: ان بلة جابر عندما تعاقد معه المريخ لم يصل من بورتسودان بهذه السرعة التى وصل بها (ليما) من البرازيل.
بلة جابر كان فيه شوية (تقلة).
محترف المريخ ليما جاء للمريخ زي (السوط).
مع ذلك ريكاردو طالبه بان ينقص وزنه 3 كيلو.
يا ريكاردو الزول دا لو نقص 3 كيلو ..ما بفضل فيه شيء.
ببقى على (الكاب).
هو فيه شنو؟..عشان ينقص 3 كيلو.
بعدين يا ريكاردو انتوا (ليما) دا جايبو (اعارة) 6 شهور.
يعني ما في داعى ينقص 3 كيلو.
الاعارة والله ربع كيلو كتيرة عليها.
عاوز تنقصو 3 كيلو مرة واحدة.
المهم الزول دا ما جاء قاعد يتفرج.
يا اخوي (الفرجة) دي ما عاوزة ليها (شنكار)..وما عاوزة ليها (كدارة).
ناس موسى الزومة ديل اتفرج عليهم ساكت.
وليك علي تجيك (قرحة) في النظر.
قرحة في (الشوف).
ليما دا من الان بالمطافشة البعمل فيها دي ممكن نقول عنه انه محترف (الفصل المسائي).
النوع دا شكلو كدا زي الزول اللعب الكورة على كبر.
كورتو دي كورة (مدير كورة)...ما كورة لاعب.
اقول ليكم حاجة.
ادمجوا القطاع الرياضي من مدير الاستاد ...وعينو ليما (مدير عام).
غير دي ما بنقع ليكم في حاجة.
احسن ليكم بدل ما تضيعوا قرشوكم في الفاضي.
قروش شنو؟.
هو ليما كمان بقروش.
قالوا (ليما) دا جابوه ب (7) اسكراتشات.
الطريف في الامر ان الاستاذ مامون ابوشيبة طالب ان يتعلم مدافعي المريخ بعض الكلمات الاجنبية التى يمكن ان يتفاهموا بها مع (ليما).
يعني ناس ضفر ونجم الدين وبلة جابر وموسى الزومة يتعملوا ليهم كلمات برتغالية ..او كلمات انجليزية.
عشان الخاطب بينهم وبين ليما يكون ساهل.
يا ابوشيبة انت بدل ما تعلم الجماعة ديل كلهم كلمات اجنبية ...علم (ليما) كلمات عربية.
اسهل يتعلم ليما من ان يتعلم ضفر ونجم الدين وبلة جابر وموسى الزومة.
