البشوف حال المريخ هذه الايامات (قلبو بتقطع) ....حالتهم تصعب على الكافر. ما عارفين يعملوا شنو؟. يصرّفوا كيف؟. مشاكل وخلافات وصراعات ...وكروت صفر ...واعتصامات....واحتجاجات ..وعياط ...واجهاش. اجهش ابراهومة بالبكاء ..وعندما اجهش مساعد مدرب المدرب اجهش بقية اعضاء اجهاز الفني...فشاع الاجهاش في المريخ ليجهش بلة جابر ذاتو بالكرت الاصفر. بلة جابر هسع ذنبو شنو؟. حبيبي (اجهش) لي وانا بجهش ليك ..بالحاصل بي والحاصل بيك. دا كلو عشان الهلال سوف يواجه المريخ بعد اقل من عشرة ايام. قالوا ليك المريخاب بقوا يشوفوا العيد زي الحاجة الكعبة. الواحد من تجيب ليه سيرة (العيد) بقوم يهضرب. غايتو السنة دي ما في مريخابي بركب ليه (ستائر) جديدة. السنة دي عيدكم بدون (كعك) يا مريخاب. سانيه سحب الكعب من (الوصيف). كعك وين مع الغلا دا. اختصر ليكم الموضوع. الايامات دي لو عاوز تستمتع اقرأ ...لمامون ابوشيبة. ابوشيبة (فارش) عديل. والله امس مامون ابوشيبة كاتب ليه عمود عن الهلال ...ساعة ونص انا مفتكروا بتكلم عن (برشلونة). يا ابوشيبة انت وقت الهلال دا عاجبك كدا ..ما تشجعو...وتختصر لينا الموضوع. يمين امس انا عمود ابوشيبة كنت فاكرو (شريان رياضي). يا ابوشيبة ...روق ...الحاصل شنو؟. يا زول اهدأ...ناس مزمل (صراحتك) دي ما بتعجبهم. دا الصيام العمل فيك كدا ...وإلا دا (سانيه). سانيه دا ما تخلوه براهو. لازم تراقبوه. شوفوا بمشي وين؟...ما تسيبوه ...الزول دا خطير ...والله سانيه دا يلقي ليه حارس عمره (45) سنة قدامو ..يفرتكو ليكم (حطبة – حطبة). جريدة ...جريدة....حضرة ...حضرة. اوعكم تغلطوا وتوقفوا ليه حارس عمره (45) سنة. سانيه دا جنو وجن الحرّاس الكبار في السن. جرسة ابوشيبة امس ذكرتني بنداء الحكومة في الفيضانات والسيول والامطار. يا موسي الزومة اوعك تعملوا ليكم مخالفات على رأس الخط. مهند قاعد....لو شات مشكلة ...ولو عكسها ...مشكلة ...(سانيه واقف). اوعكم من الضربات الركنية ...عشان أي كورة معكوسة بلم فيها (الرمح الملتهب) دا وبجيبها قون. اعملوا حسابكم من مساوي وفداسي القادمين من الخلف. ما تتحركوا ساكت. يا ابوشيبة انت ما تريح نفسك ..وتشجع اهلي الخرطوم. يمين تشجع الاهلي الخرطوم ...زول يسألك مافي. تجيبوا ليما ...تقدموا الباشا ..انتوا احرار. يوم 19 اغسطس نحن ما بنرحمكم. ابوشيبة امس بلغ حد من الجرسة قال خلوا ريكاردو يبقى مساعد لي فاروق جبرة وابراهومة. البرزيلي ريكاردو يبقى مساعد مدرب لي فاروق جبرة. ليه؟...الدنيا دي حصل فيها شنو؟. بالطريقة دي ممكن عادي نلقي ليك جمال الوالي نائب امين خزينة المريخ ..وكمال دحية رئيسا لنادي المريخ. دا كلو من (سانيه). غايتو في المريخ في حاجات غريبة بتحصل. سعيد السعودي يبقى (الكابتن) في وجود العجب ..وريكاردو يبقى مساعد فاروق جبرة. وابو جريشة يجيب التورتة لي الحضري. التورتة تقعد ..وابوجريشة يفوت!!. عليكم الله هسع سعيد السعودي دي في (ركشة) بخليه يبقى كابتن. دي شنو الهملة دي؟. الجرسة الواقعة في المريخاب الايامات دي ...تجاوزت الاعلام. الجرسة ضربت الجهاز الفني للمريخ. تمرين المريخ قالوا ليك 90 دقيقة. 30 دقيقة (سويدي). 30 دقيقة تمارين بالكورة. 30 دقيقة (شكلة) بين اعضاء الجهاز الفني للمريخ. فاروق جبرة عمل ليه (شلة) براهو ...بقى يأخذ حقو بي ايدو ...الظاهر كدا فاروق جبرة دا حن لي ايام زمان. جبرة عمل مشكلة مع مدرب اللياقة. وريكاردو عمل مشكلة مع فاروق جبرة ...وطلعوا من الملعب ...قال ليه اقعد برة. فاروق جبرة بقى ما عنده أي فرق من بلة جابر. يا فاروق قلنا ليك...اخير ليك نيل الحصاحيصا ...انت كنت قاعد في الحصاحيصا زي الملك. ما في زول كان بقول ليك حاجة. جيت المريخ بقيت مساعد المساعد. فاروق جبرة في المريخ مساعد ابراهومة. اها حالتكم دي ممكن تقابلوا بيها الهلال. حالتكم دي امام هلال الساحل ما بتستركم. انتوا كدا اتصافوا في البداية. اتصالحوا فيما بينكم ..بعدين تعالوا قابلوا الهلال. لكن هجوم الهلال الشايفو دا ...ما في دفاع بنستر قدامه ...الكلام دا قالوا الكوكي ما قلتوا انا. احسن ليكم كوّنوا لجانكم من بدري ....ناس نجم الدين وضفر ديل ...(كيس) ما بثبتوا ...ح يثبتوا (سانيه). اعملوا ليكم لجنة لدرء السيول والفيضانات والامطار. يوم 19 جايكم سيل عديل كدا ...المطرة دي ما بتنستروا فيها. الكلام دا كلام ناس الارصاد ...ما كلامي. احسن تكونوا واضحين وتعملوا ليكم لجنة لدرء (السيول والفيضانات). لو عندكم مشكلة في تشكيل اللجنة ...انا بكوّنها ليكم. مزمل ابوالقاسم ...رئيسا. ياسر المنا رئيسا مناوبا. اسماعيل حسن ...مقررا. وعضوية كل من مامون ابوشيبة ومعاوية الجاك واحمد محمد احمد ....واي شخص اخر تختاره اللجنة. مزمل ابوالقاسم باعتباره الرئيس ح يضع صورة (كيجاب) في ترويسة عموده. ما تستغربوا ...ما تقولوا لي (كيجاب) لي شنو؟. كيجاب دا انا واضعو في ترويسة مزمل ابوالقاسم (كبد الحقيقة) بي فهم. انتوا ما تنسوا ان هذه اللجنة لجنة درء اثار السيول والفيضانات والامطار. وبعدين ..بيني وبينكم ناس نجم الدين وضفر وليما وباسكال ما بنستروا. سانيه دا جيّبوا ليه (كيجاب) عديل. كيجاب يمكن يحل ليكم المشكلة. ياسر المنا وباعتباره رئيس مناوب ..مطلوب يحسم لينا من بدري موضوع (الطشت). المرة الفاتت قلتوا قون بشة شفتوه في (الطشت) قبل 48 ساعة من مباراة القمة. هسع شوفوا (الطشت) فيه هدف منو ؟...خاصة ان بشة بيلعب في الدوري السعودي. عشان موسي الزومة دا ما يقعد يسرح لينا ساكت في المباراة. موسي الزومة سارح المباراة كلها ..تقول عمو (قيس ابن الملوح). اقول ليكم حاجة. اهداف سانيه دي حكمة الله ما بتنشاف في (الطشت). في الشبكة بس. اما اخونا اسماعيل حسن وباعتباره مقررا لهذه اللجنة فهو مطلوب منه ان يقعد مع ناس الولاية (ناس همد) عشان يطلعوا ليهم كمية (معتبرة) من الشوالات والخيش. أي والله (معتبرة) عديل كدا. ناس الحضري ديل رقدوا ليهم (الشوالات). حارس عمره (45) سنة ...والله لي صورة ما مفروض يقيف...تجوا انتوا توقفيوه لي (سانيه). اما اعضاء اللجنة ابوشيبة ومعاوية الجاك واحمد محمد احمد واي شخص اخر تراه اللجنة فهم مطلوب منهم التنسيق مع (ضفر). ضفر ينسقوا معاه في شنو كمان؟. ضفر دا جنو وجن (التنسيق). من تجيب ليه سيرة (التنسيق) بضايق. المهم يا جماعة دا شغلكم انتوا ...انا ما عندي معاكم قضية ...انتوا اقعدوا مع (ضفر) ونسقوا معاه. تنسقوا في شنو؟. دي مسألة بتخصكم براكم ..نحن الهلالاب ما عندنا كبير غرض في (تنسيقكم) دا. لكن المفاجأة البقولها ليكم ...ان هذه اللجنة التى كونت ...سوف تنبثق منها لجنة تانية. يلا ان اشاءالله حد ما حوش. اللجنة المنبثفة دي ح تكون برئاسة الاخ بابكر سلك. سلك طبعا في الصيام دا ما بمسكم لجنة عديلة ...ولا بقدر عليها. نسبة لظروف الصيام ..والسيول والامطار ...بابكر سلك دا ح نمسكو لجنة منبثقة كدا. ومعروف من بدري ان بابكر سلك بموت في (اللجان المنبثقة). لو عاوز سلك يتجدع في الدنيا دي مسكو لجنة منبثقة...وابعد ليه من الموضوع. اها اللجنة المنبثقة دي ح تمسك ملف (الكورات المعكوسة). مطلوب من هذه اللجنة ان ترجع لمباريات سابقة للاعب الهلال المحترف سانيه في الدوري الفرنسي. قالوا ابراهومة جابوا ليه شريط مباراة لي سانيه في الدوري الفرنسي ....قام ابراهومة طالب بي (مترجم). ابراهومة قال جيبوا لي مترجم بعرف لغة فرنسية ...عشان بي صراحة كدا ...الشريط دا ما فهمت فيه أي حاجة. يا ابراهومة ..القون ..قون. بي الفرنسي – بالعربي – بي الانجليزي – بي عربي جوبا كلو واحد. لكن ابراهومة مفتح ...بكون عاوز يصعب الحكاية. انت يا ابراهومة لو عاوز تجدع...(اجهش) ليهم بالفرنسي. اجهش وخلي الباقي علينا. في وجود فاروق جبرة يا ابراهومة (الاجهاش) باللغة العربية ما بجيب ليك حاجة. خليك حريف واجهش ليهم بالفرنسي...عشان تجهجه ناس خالد احمد المصطفى. ملحوظة : انتوا عارفين المباراة في (المقبرة) ..دي كمان جرستها براها. هوامش عصام الحضري قالوا ليه انت ح تلعب مباراة واكرم الهادي سليم مباراة. الحضري قال ليهم دي كورة وإلا (ختة)؟. حراسكم ديل تقول شغالين في شركة حراسة ..كل حارس وردية. ناس المريخ مطلوب منهم ان يحلوا مشاكلهم الداخلية قبل مباراة القمة. لو جيتونا بي مشاكلكم دي (مقصورتكم) بنقلعها منكم. مهند الطاهر الغزال ...وسادومبا مطلوب من جماهير الهلال ان تساندهما بشكل خاص. المساندة مطلوبة منذ الان حتى تأتي ثمارها يوم 19 اغسطس. سادومبا اكثر مهاجم في الهلال بجهجه المريخ. وسادومبا بسرعته وخبرته قادر على خلخلة دفاع المريخ. لذا خطة الهلال الهجومية يجب ان تبني على سادومبا رغم تألق كاريكا وسانيه. سادومبا بخلخل. ونحن محتاجين لي (خلخلة) سادومبا ...قبل اهداف سانيه. لذلك ركزوا في سادومبا. اما مهند الطاهر وفي ظل وجود حارس عمره (45) سنة في خشبات المريخ فان الحسم يبقى في اقدامه. مهند وسادومبا اوراق الهلال الرابحة في مباراة القمة. اما هيثم مصطفى حفظه الله ورعاه فوجوده في مباراة القمة ومشاركته منذ البداية يعني ان المريخ سوف يتلقى خسارة كبيرة من الهلال ان شاءالله. كثيرون افتقدوا البرنس في مباراة شندي. البرنس لا غني عنه. نتمنى ان تكتمل جاهزية (سيدا) في مباراة الرابطة وجزيرة الفيل ...ويقتنع غارزيتو بذلك. وجود البرنس تعني ان قوة الهلال سوف تكون مية المية. مباراة الغد امام الرابطة ..سوف تكون مباراة ان شاءالله للمتعة. مباراة ينفرد بها الهلال بكل الالقاب. مطلوب ان يكون هجوم الهلال هو الاقوى وهو الافضل وذلك بتسجيله اكثر عدد من الاهداف في شباك الذئاب. وعاوزين مع الاهداف نستمتع بسهرة رمضانية رائعة. دفاع الاهلي شندي الذي اعتبره اقوى من دفاع المريخ .....عمل امام الهلال ضربة جزاء و15 كورنر واستقبلت شباكه هدفين. ترى ماذا يفعل دفاع المريخ امام هجوم الهلال الناري؟. اسرعوا ساكت وكوّنوا لجانكم. لجنة..لجنة ..الليل نعدو. بلة جابر بي الكرت الاصفر الاخير الذي ناله اثبت انه احرف لاعب في المريخ. يا ليما ...جهز 4 صور بسبورت وتعال لي سانيه. اوعك تجيه من غير صور. سانيه دا اول حاجة بسألك منها يوم 19 اغسطس ...(الصور). عندو اهم حاجة (الصور). الحضري لو سافر تاني ما برجع. مع (سانيه) دا ...اقنعوا منو ساكت. انتوا بتلعبوا وإلا شنو؟. وصافة في الجهتين. وصافة في الممتاز. ووصافة في الكونفدرالية. غايتو (الوصيف) اصلو ما بخلى عادتو. عاجل : لكن وصافة الكونفدرالية دمها خفيف.