المريخ كسب الاهلي شندي وخسر المريخ ام درمان الاهداء جمعة جينارو ..واتير توماس ..اكدا ان ما تفسده (السياسة) يمكن ان تصلحه (الرياضة). اتير توماس كان سببا رئيسا في تأهلنا من تونس. وجمعة كان صاحب الفضل في ان يعود الهلال من نيجيريا بكل هذه المكاسب. شكرا للذين لم تفصلهم منا (اتفاقية نيفاشا). محمد في زول بكون مهموم بي غسيل (الملاعق)...من يشوف ليهو (شعيرية) حايمة ..بقول ليك : انا خلوني بغسل الملاعق. يا ود الناس يعني بقت على (الملاعق). مرة مشينا لي ناس ..الوقت وقت فطور ...صاحب البيت ..زول صعب النوع البفتح (الباب) كل ما يسمع ليهو (كركبة). بفتح الباب ويحلف طلاق. قبل ما يتم كلامو ..(الصواني) بتجيك من الجهات الاربعة. ناس صعبين... الحلوفات تدور ..ما تعرف تقعد وين؟. كل مجموعة تقول ليك على الطلاق تقعد معانا. في ناس كدا. اها مرة على ضوء هذا الكلام ...مشينا لي عمكم (كبراك) دا. اسمو كدا ...(كبراك)...تقول مدرب اجنبي. اليوم كلو واقف على الخط. اقصد واقف في الباب ..يفتش للضيوف فتيش. وقت ما يلقى ليه زول ..بمسكل في الهوا. مشينا على (كبراك). قبل ما نصل البيت ...حلف علينا. دخلنا البيت ...(السكاكين) دورت. يسننوا في السكاكين في (الحجارة) ...لمن نفسك تتفتح لي اللحمة. اكيد الليلة ضابحين لينا (عجل). سكاكين دي سكاكين (عجل)..ما سكاكين ..(حمل). كمان نحن ما بنعرف سكاكين العجل من سكاكين الحمل. نحن قاعدين في البرندة كدا ..نشوف ليك الصواني دي تدخل وتطلع ...وسكين يرفعوها ..وسكين ينزلوها. كبراك ..قال لينا يا جماعة ما تضيقوا ..الفطور بجيكم هسه. يا ولد جيب (الموية). شوف التلج. جيب الصابون. المهم الساعة واحدة كدا ..الصينية الاولى طلعت. قمنا ليك عليها ...عارفين لقينا شنو في الصينية ...لقينا لينا صحن بيض. وبيض مفقوع كمان. قلنا لي كبراك ...دا شنو يا كبراك...وين اللحمة ..سكاكينك القبيل دي كانت لي شنو؟. كبراك قال لينا ...في (بطيخ) بعد البيض ...عشان كدا (السكاكين) كانت مدورة من تسعة. قلنا ليهو السكاكين عرفناها للبطيخ ...الصواني كانت لي شنو؟. قال لينا للبطيخ برضو ..قال كلامو دا ...ورجع تاني وقال : ما تقلوا في البيض ...في بطيخ ماشي عليكم. والله يا كبراك طلعت أي كلام. لحمتك طلعت زي كأسات المريخ الجوية. سا سا سا سا (مدى الحياة) بتاع بقالة مريخابي فتح جديد في حارة راقية ...قال الواحد في الحارة الراقية دي يدس (مريخيتو) ويرتاح من مكاواة ناس الهلال. بتاع البقالة اسبوع مرتاح. اسبوع ما في زول سألو. اسبوع ما في زول جاب ليهو سيرة (الحضري). في اليوم العاشر من تاريخ افتتاح بقالتو ...كان قاعد ينظم في البضاعة ..مبسوط اخر انبساطة ..ومشغل (الراديو). هو قاعد جاهو زول (تمتام) ...وقعد يقول ليهو : سا سا سا سا ... بتاع البقالة يقول ليه : سكسكانية. التمتام يقول ليهو : لا ..لا ..سا سا سا سا سا... بتاع البقالة يقول ليهو : سكر. التمتام يقول ليهو : لا لا ..سا سا سا... بتاع الدكان يطلع الرف الفوق ...وينزل ليهو دقيق سيقا ..ويقول للتمتام سيقا.. التمتام يقول ليهو : سا سا سا سا... بتاع البقالة يقول ليهو : سمسم... وزولكم التمتام شغال : سا سا سا سا .. صاحب البقالة يقول ليهو : سجائر... التمتام بزعل وغضب يقول ليهو : سا سا سا سا سادومبا.. بتاع البقالة قال للتمتام : طيب ما تقول كدا من الصباح. نظرية عصام الحضري رجع.. كلام جميل ..وما عندنا فيهو أي كلام... بس عاوزين نعرف مصير صديق علي صالح ومصطفي توفيق ومجاهد احمد محمد شنو؟. برضو احسن الواحد يكون عارف. يكون ناقش...عشان نقدر نناقش شوية. هسه دي نظرية دي. ذكريات تخيلوا (كلتشي) الحال وصل بيهو لي وين؟. كلتشي بقي يقعد احتياطي لي (هنو). ويا ريت لو بقت على (هنو) براهو... كلتشي قعد احتياطي لي (محمد مقدم).. يا حليلك يا كلتشي ...زمان كان ليك شنة ورنة. اما طمبل ...احسن ما نيجب ليكم سيرتو من الاساس... يا طمبل بقيت تذكرني ناس (حقيبة الفن). احتمال تاني لو عصام الحضري ..عادل ابوجريشة ما بجيب ليهو (تورتة). الحضري لو احتفل بي عيد ميلادو ..ابوجريشة بجيب ليهو (ام فتفت). عشان يفهم حاجة. هسه دا احتمال دا. اختيار في شندي عارفين (نجم الدين) ما جاب ليهو هدف عكسي في الحضري ليه؟. عشان الهدف العكسي في شندي عندنا (عيب). البجيب ليهو هدف عكسي في شندي بقطعو (رقبتو)...وقبل القطع بجلدوه. مثل جديد لنج يس ..لا بجدع ولا بجيب الحجار بس بقعد (كنبة). تنويه مشى للدكتور ..وقال ليهو يا دكتور انا بعد تمانية ما بشوف. الدكتور قال ليهو : انت عاوز تشوف شنو؟...انا من خمسة ما بشوف. حوار من طرف واحد اعلام المريخ الايامات دي كلو بغني للحضري ...(احبك آه ..اخاصمك لا). الفيكم اتعرفت. تاني ما اشوف لي واحد فيكم بتكلم عن (المثل والقيم)...وام درمان. ام درمان هسه الدخلها شنو؟. واحد وقع من الطابق الرابع.. نزل الواطة دايش. الناس اتلموا فيهو ... قال الغريبة الطابق التاني فيهو (مطرة). هسه دي (تعريجة). افتراض عصام الحضري دا لو قعد شهر تاني في المريخ ....بقنع جمال الوالي يشتري ليهو (قطر)...يشغلو (دمياطود مدني). ود مدني هسه ذنبها شنو؟. بداية الشارع واحد قال للتاني ..الفرق بين ميسي وراجي عبدالعاطي شنو؟. التاني قال ليهو : ابدا ما في فرق ..بس راجي عبدالعاطي اصاباتو كتيرة.. يعني لو ميسي اصاباتو كترت ..ببقي يا ربي زي (راجي عبدالعاطي). تعريجة
