الولد يمشي برة ..ويرجع تاني : يا حاجة انت (فروجتك) دي لسع ما طلعت.
الحاجة تقول ليه لسع يا ولدي ..اصبر ..طبعك ما يبقى كعب ...ما تبقى لي زي رجل المرور ..قبل ما يثبتك ..يقطع ليك الوصل...تقعد (تحنكو)..يقول ليك : لكن انا ما قطعت الوصل ..خلاص الوصل دا ما برجع ..اوديهو وين يعني؟.
يا جنابو ..انت مستعجل مالك ؟..انت قاطعو في الاساس ليه ؟...ما تصبر.
الولد ..يمشي ويجي ..وتاني يقول لي امو : يا حاجة انت (الفروجة) دي ما طلعت ..يا حاجة ..ما تضيعها لينا ساكت في النار ..الفروجة دي صغيرة 10 دقائق بتستوي.
يا ولدي ...لسع ..يا دوب عملت ليها الملح ...اصبر (الفروجة) دي ما طلعت.
يا حاجة انت عاوزة تطلعيها (لوتري)....وإلا عاوزة (تحننيها) بعد ما تحميرها ..والله انا ما عندي صبر للحاجات دي.
بعدين يا حاجة انا لو عندي صبر ...كان انتظرت (الفروجة) دي لمن بقت (جدادة)..يعني ما كان طلعتها ليك من (الثانوي العالي) عشان تعمليها لينا شوربة.
سفاري المسكين كان بيلعب معاهم (مخدر)...اول ما خلاص استهلكوه ..شطبوه.
والشغيل ...قالوا اصابتو عاوزة ليها مدة.
قاموا شطبوه.
ينتهوا من اللاعب ...او هكذا يظنوا ..ثم يشطبوه ..وبعد دا ...يتكلموا عن الوفاء والاخلاص والاخلاق.
يا العجب ..اسمع نصيحتي دي.
الايامات دي يا العجب لو جاتك (نزلة)..موت بيها ساكت ..اوعك تقول عندي نزلة ..بقوموا يشطبوك.
اصلو هم السنة دي بفتشوا ليك في سبب عشان يشطبوك بيه.
ما تشوف الصور دي.
يا زول والله انا خايف لو موبايلك كهربتو نزلت خط ..يقوموا يشطبوك.
اوعك تقول ليهم ما عندي (شاحن)...انا كلمتك.
لو في زول مسكل ليك من مجلس المريخ او من دائرة الكورة ...ارجع ليه طوالي.
لو ما رجعت ليه ..بلقوا ليهم سبب يشطبوك بيه.
لو انت راكب عربيتك يا العجب ..ولاقاك زول في الشارع ..اقيف ليه ..ووصلوا معاك.
اوعك ما توصلوا ...عشان ناس عصام الحاج ديل عاوزين ليهم (سبب) زي دا ..طوالي بشطبوك.
يا العجب ..والله نحن الهلالاب خائفين عليك اكتر من المريخاب.
اوعك تديهم فرصة.
اقول ليك سر.
في مريخابي (ضليع)...قال لي والله نحن لو لقينا (البرير) دا 5 دقائق ..نشطب بيه فيصل العجب ...ونرجعوا ليكم ..يكون ما قصر معانا.
قلت ليه فالح والله.
انت عارف الامين البرير دا لو مشي المريخ 5 دقائق بعمل شنو؟.
قال لي بعمل شنو؟.
قلت ليه بشطب هيثم مصطفى تاني من المريخ.
كمان البرير بفوت ليه فرصة زي دي.
المريخابي (الضليع)..قال لي ان بقى كدا ..شوف لينا (هاشم ملاح).
قلت ليه يا زول هاشم ملاح دا ...لا بربط لا بحل.
عارفين هاشم ملاح في القرعة عمل شنو؟.
هاشم ملاح في القرعة ..وقت سامر العمرابي قال نقدم التهنئة للفريقين
الصاعدين مريخ الفاشر واهلي عطبرة ..هاشم ملاح قام وقعد يأشر بي ايدو.
نحن قلنا في شنو؟.
هاشم ملاح قال التهنئة لثلاث اندية ..وهو يشير بيده للرقم تلاتة ..ثم يضيف الاتحاد مدني.
شفتوا هاشم ملاح دا مركز كيف؟.
نحن برضو مركزين معاك يا هاشم ملاح.
ملحوظة : ناس الاتحاد مدني ما لاحظوا للحتة دي ...انت البخليك تلاحظ ليها شنو يا هاشم ملاح.
هوامش
موقع الزاوية بقيادة الاخ سامر العمرابي يقدم خدمة اخبارية جيدة ..وان كان الموقع قبل الساعة 12 ظهرا ..لا يجدد اخباره ولا يدعمه.
الموقع في الفترة الاخيرة انفتح بصورة كبيرة على الهلال ..واصبح هناك تناسب بين اخبار الهلال والمريخ في الموقع.
قابلت ابوشامة صدفة ..فوجدته ..متفهم للنقد الذي نوجهه لهم ...ابوشامة كان متفائل بفريق الهلال الحالي ..وان كان ابوشامة طلب من جمهور الهلال الصبر على هذه المجموعة ..ودعمها ومساندتها ...لأنها في حاجة للدعم والمساندة.
في اعتقادي الخاص ..ان المرحلة القادمة هى مرحلة جمهور الهلال.
الكورة الان في ملعب الجمهور ...وليس في ملعب اللاعبين.
الموسم بدأ ..وعلى الجمهور ان يدعم هلاله دعم كامل ..وان يسانده مساندة مستمرة.
مهرجان الهلال ..طمأن الناس على جمهور الهلال.
لم اكن اريد الاطمئنان على تراوري او سنكارا ...او سيدي بيه ...كنت فقط اريد الاطمئنان على جمهور الهلال.
والحمد لله ان جمهور الهلال دائما في الموعد.
شكرا لهذا الجمهور ..الذي لا يتخلى عن فريقه في كل الاحوال.
مباراة الهلال ومريخ الفاشر ..يجب ان يتعامل معها الهلال بجدية ومسؤولية.
مباراة في الافتتاح ...واي تعثر فيها ...سوف تكون عواقبه كبيرة.
الانتصار يعني ان الجمهور سوف يكون حاضرا ومساندا ..اما الخسارة او التعادل فسوف تجعل الجمهور ينصرف عن الهلال.
خاصة وان المباراة في بداية الموسم ..ونتيجتها سوف تنعكس على موسم الهلال كله.
لذلك احرصوا على الانتصار .....لأن الانتصار في هذه المباراة ..يعني لنا بطولة في حد ذاتها.
هي عنوان للموسم كله.
عودة بكري المدينة واكانغا ..في هذا التوقيت شيء سوف يدفع الهلال الي الامام.
بكري المدينة واكانغا ايضا ...يحتاجان الي تعامل خاص ...دائرة الكورة والجهاز الفني عليه ان يعرف كيف يتعامل مع اللاعبين.
طبائع اللاعبين تختلف من لاعب الي لاعب.
ومعرفة نفسيات اللاعبين شيء ضروري واساسي للتعامل معهم على نهج معين ومخصص.
عاجل : الشغيل دا لو ما رجع مباراة القمة اجلوها لينا للاسبوع العاشر.