حالة فيصل العجب في المريخ بقت (تحنن)..وصل فيصل العجب لمرحلة المشاركة في آخر 15 دقيقة من عمر المباراة ..وبعد أن تكون المباراة حسمت ..وانتهت. العجب ...بكملوا بيه (الكنبة).
مباراة المريخ أمس أمام فريق اتحاد مدني ..تؤكد أن المريخ يبحث عن الصيغة النهائية للتخلص من فيصل العجب في يونيو القادم.
الزول المفارق ظاهر.
العجب ...مهمتو كلها تتمثل في القعاد في (الكنبة) ..وحراسة (صبارة) الموية.
بلة جابر يعطش ...العجب يسقيه.
نجم الدين ..يعطش ...العجب يسقيه.
علاءالدين يوسف يعطش ...العجب يسقيه.
والساقية لسع مدورة.
آخر نص ساعة من المباراة ..يقولوا ليه قوم سخن ...(نظام أنت الكبير).
العجب بقوم يسخن.
آخر ربع ساعة ..وبعد أن تحسم المباراة ...يقوم العجب يشارك ...مشاركة زي المشاركة البتكون في المسابقات.
ممكن اشارك في المسابقة.
ممكن.
طيب ممكن أهدي.
ممكن.
معاي أخوي ...عاوز يشارك ...ممكن يشارك.
ممكن.
العجب مشاركته أصبحت على هذا النحو.
أو خلوني أقول ليكم حاجة أوضح من كدا.
حاجة بذكرني ليها (معجون) العجب دا.
عارفين الحكاية دي شنو؟.
فيصل العجب دا بذكرني ليك بالزول الكبير في البيت ...أكبر (ولد) في البيت.
دايماً بكون شايل الهم ..ودايماً بدخل في (جلابية) أبوه.
الولد الكبير من يبقى بلبس من دولاب أبوه ...بقول ليك يا حاج أنا عاوز أعرس.
عشان كدا ..أحسن من البداية تحسمو ...وما تعطيه فرصة يلبس من دولابك.
يمكن في (آباء) بحسوا بالفرحة ..وقت ولدهم الكبير ..يبقى بيلابسهم.
بشعروا بالسعادة وقت الولد يبقى (طولهم).
تابعوا معاي الحكاية دي ...عشان تقع ليكم كويس ..وعشان ما تقولوا أنا بتكلم ليكم ساي...وعشان كمان تعرفوا أنا ليه قارنت (العجب) بي أكبر زول في البيت.
بعدين لو كلامي طلع غلط ...قولوا لي كلامك غلط.
فيصل العجب دا بالظبط زي (الولد الكبير) في البيت ...الولد (البكر).
موش عندكم ..زي ما هو عندنا ...الوالد دائماً بكون فرحان بي ولدو الكبير.
دائماً الأب بكون واضع المسؤولية في ولدو الكبير ...وهو بكبر قدام عينو ..ومنتظرو متين يحل محلو.
وقت الولد يكبر شوية ...الأب عشان يحس بي انو بكبر في ولدو ...وبربي فيه ..بقوم يخلي يمشي على خطو.
قولوا لي كيف؟.
أقولكم.
الولد الكبير ..(البكر)...الأب دائماً لمن تحصل مناسبة في البلد ...بقوم يرسل ولدو.
يحصل عرس ..بقول للولد ..يا ولد تمشي تجامل ناس عمك عبدالرحمن ..وتقول ليهم أبوي رسلنا ليكم ...عشان هو ما بقدر يجيكم ..عندو عملية عيون يوم الخميس القادم ...(وهو بكون لا عندو عملية ...ولا عندو عيون).
الأب قصدو من الحكاية دي بس ..يعلم ولدو كيف يجامل ..وكيف يتحمل المسؤولية؟.
تحصل وفاة...الأب ما يقدر يسافر ..بقوم يعمل شنو؟.
يقوم يرسل ولدو الكبير.
وعشان الولد يطلع (نجيض)..بقوم الأب يعطيه (قروش)..ويقول ليه القروش دي اكتبي في (الكشف) بي اسمي ..وقول لي عمك (عثمان) أبوي ما قدر يصلكم ...عندو عملية عيون الخميس القادم.
وعملية العيون دي عليكم الله (ما تطلع من العمود دا) ...عشان عمكم دا بتكلم ساكت ...ما عندو الحبة.
القصد كلو من الحكاية دي ...يعلم ولدو المسؤولية.
العيد يجي ..عمك يقطع ليه في ولدك (جلابية)..ويقول ليه تسافر البلد تعيد مع ناس عمتك آمنة.
الأب ..عاوز يطلع الولد ...زول واجب.
ناس البلد كدا ...ما تقعدوا تتلفتوا لي ..لقيتوا (البيرقر) دا ..ونسيتوا الواجب.
أها (العجب) بقى زي الزول (البكر) دا.
الولد الكبير في البيت.
الولد البدخل في (جلابية) أبوه...ولمن الأب يكون غير موجود في البيت ...الولد بعمل فيها هو المسؤول من البيت ..ما في زول يمرق من البيت ...ما في زول يرفع صوتو ...(موش هو الكبير).
أها العجب ..بقى يقوم بالدور دا ...بقى (الولد الكبير) في البيت.
وبقوا كمان ...يقولوا ليه (خت) القروش دي في (الكشف).
قروش الكشف ..بطلعوها ليه في (ظرف) براها.
والعجب ..بقوم بالدور على اكمل وجه.
يا العجب ...انت عاوز الجد ...ولاّ عاوز الجنبو...كورتك دي بقت كورة (صبارات) ساكت.
كورة زول حارس (الصبارة).
كورة (كشف).
كورة ..مهرجانات ...كورة آخر 10 دقائق...تلعب قدام الاتحاد ...تلعب قدام أهلي عطبرة ..قدام النيل الحصاحيصا ...اكتر من كدا ما بجافزوا بيك ...ولا تصدق.
عشان كدا ...أحسن تتخارج من بدري ..قبل يونيو.
عشان أنت لو (شطبوك) ...ما بتلقى غير (النيل الحصاحيصا وجزيرة الفيل) عشان يفاوضك ...مع احترامنا الشديد ليك.
يعني بالواضح كدا ....يا العجب اوعك تفكر في مصير هيثم مصطفى.
اوعك تفكر في الهلال.
لو عاوز تجي الهلال يا العجب ..بنشوف ليك (خانة) في المدرجات.
أول حاجة تشجع ناس مهند وترواري ديل ...لي 2020م.
بعد كدا ..بنشوف ليك وظيفة في قطاع الناشئين.
موضوع (العجب) دي هسع ح اخليه ...برجع ليه تاني ...أنا أصلاً كنت عاوزأحدثكم عن (الحضري).
الحضري الرفض يشارك.
دا موضوع براهو.
ما تلخبطوا لي مع الموضوع الأول.
عشان الأولو شرط ..آخرو نور.
بعد أن كان تسجيل عصام الحضري في المريخ ...نوع من أنواع (الفشخرة) ..واعتبره المريخاب يرد لهم بعض ما يفقدونه أمام الهلال...ويسلط عليهم الاضواء..التى يفقدونها في (الميادين)....أصبح الحضري اليوم (مصدر) لإثبات (فقر) المريخ ولتأكيد (شقفه)...وحاجته..والمواقع والفضائيات بقدر ما كانت تتحدث عن قدرة المريخ المالية ...أصبحت اليوم تسخر من (فقر) المريخ ..وفشله حتى في أن يوفر راتب حارسه المصري عصام الحضري.
والأيام دول ...والذين كانوا يتحدثون في الأمس ...عن المريخ بشيء من التعالي والاستخفاف بالآخرين ...اليوم يسألون الناس الحافا لتوفير مرتبات المحترفين.
هذا زمان (عصام الحاج)..الذي يكاد أن ينادي كل شيء بي مائة ...والاستاد محجوزًا على طابقه ...وفاتورة الكهرباء تدفع بعد أن يدخل النادي في ظلام دامس لبعض الأيام.
عصام الحاج سوف يذهب بكم أبعد من ذلك ..وأنتم تبلغون حد أن تبيعوا في (صور) هيثم مصطفى من أجل سداد فاتورة الكهرباء ..وتوفير نثرية المعسكر.
كان اتجاه مجلس إدارة المريخ بقيادة جمال الوالي لتسجيل عصام الحضري ..أمرًا أرادوا به اثبات القدرة المالية للمريخ ...وقد تحدثت وقتها الكثير من المواقع والفضائيات العربية عن هذه الصفقة (الضخمة) ...والمريخ يحل اشكالية عصام الحضري المقعدة وقتها بسبب القدرات المالية الضخمة لرئيس نادي المريخ جمال الوالي.
كانت اشكالية عصام الحضري وقتها كبيرة ...حتى أن عصام الحضري أصبح ميئوس من أن يلعب في مصر...لذلك فكر في أن يلعب في السودان ..وقبل باللعب في المريخ ...طالما كان (الدولار) حاضرًا ...وإذا حضر (الدولار) فإن الحضري جاهز لأن يلعب (خلف الشمس) إذا كان ذلك سوف يدر عليه المال.
وقد ثبت ذلك ...والحضري يرفض أن يستحمل المريخ (أسبوع)...وابى حتى اللعب أمام (اتحاد مدني) في الأسبوع الأول للممتاز...بعد أن جف الدولار وابتعد جمال الوالي ...وجاء عصام الحاج الذي يقول لكل من يدخل إلى مكتبه (اصبروا شوية).
مجلس المريخ أيام (البقرات السمان) كان يتعامل بكل لطف ولين مع الحضري ..ويذكر الناس عندما احضر مجلس إدارة المريخ الحضري من القاهرة (من بيت أبوه)...أو شقته ليلعب أمام الأهلي شندي في شندي.
من المطار إلى استاد شندي (مباشرة).
الحضري الان بعد أن عجز مجلس إدارة نادي المريخ من توفير مرتباته ومقدم العقد في سنوات عصام الحاج (العجاف) ...رفض الانتظار إلى حين.
وخيرهم بين الدفع أو الرحيل ...ونسى ما قدمه له المريخ ...وأن خرج يتحدث الان بلغة (الاحتراف)..وبأنه لاعب (محترف) ...وهذا الكلام الذي نسمعه فقط من المصريين عندما يكونوا في مثل هذه الحالة التى فيها عصام الحضري الان.
نسى الحضري ...ما قدمه له المريخ ...حينما كان مهددًا بالإيقاف من الاتحاد الدولي لكرة القدم (فيفا).
الأهلي المصري عبر الفيفا كان يطارده ..وشبح الحرمان من ممارسة كرة القدم يلاحق الحضري ...وأزمته المادية تضرب باستقراره في الاسماعيلي وتصله حتى وهو في الزمالك ..ليأتي إلى المريخ ويدفع جمال الوالي للجميع ...(الحضري والأهلي والزمالك والاسماعيلي).
جمال الوالي دفع لمصر كلها ..نعم مصر كلها استفادت من ذلك...وقد تمثلت تلك الاستفادة في مشاركة الحضري مع المنتخب المصري ...فى وقت كانت الأندية المصرية نفسها ...عاجزة من أن تحل اشكالية الحضري.
حلت اشكالية الحضري بواسطة جمال الوالي رئيس مجلس إدارة نادي المريخ وقتها ...وقدم المريخ (عربياً) على أنه نادي ذو قدرة مالية كبيرة ..ويمتلك إدارة نجحت في حل اشكالية الحضري ..بعد أن كان الحضري قريباً من أن (يبقى إلى حين السداد) ....العبارة التى ترمي بأصحاب الشيكات خلف القضبان.
الحضري واضح انو قنع من الجماعة ديل.
قالوا ليك بعد جمال الوالي ما فات من المريخ ...(الجبنة المضفرة)انقطعت من معسكر المريخ.
البيض زمان كان بجيبوه بالطبق.
هسع بقى يجيبوه في كيس ..حبة وحبتين.
عصام الحاج دا ما عندو ليكم قدرة لي (طبق).
والحضري الحاجات دي ما بتنفع معاه.
ولا بقعد ليكم.
خاصة ...بعد ما شاف (تراروي).
ملحوظة : يا الحضري شيل شنطتك ..واتخارج.
هوامش
غايتو جنس (تقليد).
تلاولي يجب هدفين ...مونيزا يجب هدفين.
تلاولي يطلع نجم المباراة ..مونيزا ..يشيل نجم المباراة.
التقليد دا يوم بكتلكم يا مريخاب.
أها نحن المباراة القادمة ...سنكارا بجيب ليه (هدف).
وكمان بطلع نجم المباراة.
دي بتحلوها كيف؟.
باسكال ما بقدر على الحاجات دي.
ولا تجازفوا بيه ساكت.
بقوم يكسر رقبتو ساكت.
أمس في واحد ..شاف (لحية) باسكال ..والشعر صلعة.
زولكم طوالي قال لي : أنت تعال هنا ...الكوكي دا عكس (رأس) الزول دا ولاّ شنو؟.
قلت ليه (عكس) رأسو كيف؟.
قال لي : قلبو يعني ..قلبو.
ما قدرت أقول ليه حاجة.
عشان باسكال بالجد ..ما أدانا فرصة ..عشان ندافع عنو.
العجب في المنتخب احتياطي هيثم مصطفى.
في المريخ برضو احتياطي هيثم مصطفى.
طيب زمان كاتلننا بالمقارنات مالكم.
إلا نجي نطبقها ليكم عديل كدا.
يا المريخاب ..انتوا ما بتقتنعوا بالشيء ..إلا تشوفوا الشيء قادم عينكم.
أمس شفت هيثم مصطفى بيلعب مع ناس نجم الدين وبلة جابر ..ومصعب ..قلت دا شنو دا ...زي (الفول) القالبين فيه طلب كبدة.
