• اعلان سابق ...كان يقدم في الفضائيات السودانية عن (الارز)..تقدمه المطربة (حرم النور)...تتلخص قوته ، وفكرته في الخيار الذي تضعه حرم النور ، وهي تخاطب زوجها في الاعلان مستعرضة (الارز) وهى تقول بلغة جادة وصريحة ونهائية : ( يا هو يا بيت ابوي). • كلام واضح.
• يا بنت الناس ..روقى ..استغفري...ما كدا ..ألعني الشيطان.
• الدنيا دي ما فيها خير.
• الموضوع ما بستاهل ..لكن (منطق) الاعلانات دائما يشطح الي ذلك الحد (التعسفي).
• ناس الاعلانات ديل ...ممكن يقدموا ليك قطعة ارض في (الميجا)..على انها قطعة ارض في (المهندسين).
• بعد ما تشتري القطعة تكتشف انها في (الميجا).
• تقول للسمسار دا شنو البتعملوا فيه دا؟.
• يقول ليك ما تزعل ..القطعة دي فيها (باب) بفتح وش في كوبري الفتيحاب.
• الباب البحري.
• والسماسرة ..زي (علبة ماكنتوش) بقنعوك ...بقنعوك.
• مرة عندنا ..واحد ..(مفتح)..الزول الصعب داك.
• النوع البدون سبب كدا بطلع بطارية الموبايل ، وبجدعها برة.
• الزول دا مشي سوق ليبيا ..عشان يشتري ليه (تور).
• دي فيها حاجة.
• عاوز ليه (تور) عديل كدا.
• صاحبكم مشي ..وجاء راجع ليه بي (ديك).
• ناس الحلة قالوا ليه دا شنو البتعمل فيه دا؟ ...هسع ما بتخجل ...طالع ليك من دفار ..ونازل ليك من دفار بي (ديكك) دا.
• الناس يقولوا علينا شنو؟.
• الزمن داك كان زمن (الدفارات).
• ما في اي ركشة في البلد.
• زولكم عاين للديك كدا ...زي كأنو اول مرة يشوفو ..وقال ليهم : والله الشيء دا لغاية ما وصلت (الشهداء) ...كان (تور)..هسع بقى (ديك) كيف ما عارف؟.
• لكن هسع ..دا ما موضوعنا ...لا التور ...لا الديك ..لا شاحن الموبايل.
• هسع شاحن الموبايل الدخلو هنا شنو؟.
• بتعمل تقاطعات غريبة كدا.
• موضوعنا ...اعلان حرم النور حق (الرز)...يا هو يا بيت ابوي.
• اتخيلت براي كدا (وانا قاعد اكتب في العمود) ... اتخيلت (المرا) تلملم حاجاتها ..وتستف (شنطتها) زي ما بعلموا في الافلام العربية ...(دائما الواحدة عشان تأخذ وقت اكبر في الاعداد الي الذهاب الي بيت ابوها ...بتنزل الشنطة من فوق الدولاب).
• ليه دائما (الشنطة) بتكون فوق الدولاب ..وقت تكون الزوجة زعلانة وعاوزة تمشي بيت ابوها.
• اشمعنا فوق الدولاب يعني.
• السر شنو؟.
• السر قدور.
• يمكن دي (فلسفة) روسية ...نحن ما عارفنها.
• المرا ..تشيل (شافعها) وهو ببكي (مشهد درامي مؤثر ..مع موسيقي تصويرية حزينة) ...وقبل ما تطلع تقول لزوجها ..في (عدس) في التلاجة لو شعرت بالجوع سخن منه..ثم تذهب الي بيت ابوها.
• انت مالك وامالو ..ان شاءالله يموت من الجوع ..(الحنية نزلت عليك فجأة كدا من وين؟).
• وابوها ذاتو عيشتو تطير.
• اول ما تصل البيت الكبير ..ابوها بيسألها : (مالك ان شاءالله خير ..في شنو؟).
• تقول ليه : تصور يا ابوي ما جاب لي (رز).
• انا يا ابوى بعد السنين دا كلها ..والعشرة والملاح ...ما جاب لي (الارز).
• المرا تتنخج زي (اريل) العربية.
• موبايل شغال (هزاز)...ترجف كلها زي (الاسورة) في يد العروس.
• يا ولية (الارز) ما بستحق كل هذه الجوطة...(حتى لو كان ذلك في الدعايات).
• اذا كان (الارز) بعمل كدا ...(السمك) يعمل شنو؟.
• بعدين النسوان ديل لو فتحوا ليهم حكاية ( يا هو يا بيت ابوي)...ما في (مرا) بتقعد في بيت زوجها.
• لو عاوزة (الارز)..تقول : ( يا هو يا بيت ابوى).
• لو عاوزة (بصل) ..تقول : (يا هو يا بيت ابوي).
• لو عاوزة (رصيد)..تقول : ( يا هو يا بيت ابوي).
• والله النسوان تفتحوا ليهم طاقة زي دي ..الواحدة تانية لو عاوزة ليها (موية فول) تختك في حتت ( يا هو يا بيت ابوي).
• المرا ..بتاعة (الارز)..مشت بيت ابوها ...ابوها لاقاها في الباب ..والشرر يتطاير من عينو ..تقول في معركة كرري.
• الاب المسكين يفور ويندلق ..ويقول ليها ..كيف ما جاب ليك (الارز)..قاعدة معاه كيف؟...انا ح اضرب ليه الان ..اقول ليه رسل لينا (القسيمة)...كل شيء ولا (الارز).
• انا ح افضحو ..فضيحة.
• نحن ممكن نسامح في اي حاجة إلا (الارز).
• كلو ولا (الارز).
• الا (الارز) يا بنتي.
• دي بالنسبة لينا مسألة حياة ..او موت.
• دي مسألة (كرامة)....كيف ما يجيب ليك (الارز)..الناس يقولوا عننا شنو؟.
• كلام فارغ والله.
• هو عاوز الناس يشمتوا فينا ..ويقولوا ما جاب ليها (الارز).
• وقت ما قادر يجيب ليهو (رز)...فاتح ليه بيت على شنو؟.
• يمشي الدهب طوالي لو ما قادر على الموضوع دا!!.
• نحن لو عارفنو كدا ..والله ما كنت بخت ايدي في ايدو...طلع راجل اي كلام..وما بعرف قيمتك ..ولا بحترم اهلك.
• هكذا اتصوّر تكملة الاعلان ..وعلى هذا النحو اتخيل تفاصيله.
• وانا في ذلك حر ..(اتخيل) زي ما انا عاوز.
• ما في زول بقدر يقول لي اي حاجة.
• الكلام دا ما جبتو من رأسي ...الكلام دا ..كان نازل في الفضائيات السودانية...وحرم النور من فضائية لي فضائية حائمة بي كيس الارز...(يا هو يا بيت ابوي)...قدام عينكم ...ما في واحد فيكم قدر يقول اي ىشيء.
• عاوزين تنظروا لي هسع في العمود دا.
• الكلام دا في التلفزيون القومي ...في تلفزيون الدولة الرسمي كان نازل...(فيكم زول قدر يقول حاجة).
• تذكرت هذا الاعلان ..وانا اجد حارس المريخ ..المصري عصام الحضري ..يضع المريخ في نفس الحتة التى وضعت فيها (حرم النور) زوجها وهى تخيره بين ان يحضر الارز او تمشي بيوت ابوها.
• الليلة الارز يشيل شيلتو معانا.
• اقصد (الحضري) يشيل شيلتو ساكت.
• عصام الحضري بفعل نفس الشيء ويضع مجلس ادارة المريخ وجهازه الفني واعلامه وجمهوره في نفس الخيار ..وهو يقول : (يا هو يا بيت ابوي).
• هذه العبارة يكررها عصام الحضري في كل المواقف ويضغط بها على المريخاب متى ما كان يريد تحقيق شيء فيجبر المريخ على التنفيذ.
• الحافز ....(يا هو يا يبت ابوي).
• المرتب ...(يا هو يا بيت ابوي).
• الفندق ...(يا هو يا بيت ابوي).
• الشقة ...(يا هي يا بيت ابوي).
• المشاركة اساسيا ...( يا هي يا بيت ابوي).
• الكدارة ...(يا هي يا يبت ابوي).
• الشنكار ...(يا هو يا بيت ابوي).
• قالوا ليك ...(والكلام دا ما يطلع من العمود دا)...الحضري عامل (يا هو يا بيت ابوي)..نغمة عديل كدا في موبايلو.
• مشغل (النغمة) لي ناس عصام الحاج ..وعبدالله حسن عيسي.
• وعصام الحضري ...عشان تبقوا عارفين ..(بيت ابوه ما هنا).