الفاتح جبرا.. [email protected] دق جرس الباب .. فتحته .. وجدت أمامي شاب في مقتبل العمر يمسك بيده ورقة ملفوفة .. بعد السلام .. إتفضل .. دخل وجلسنا - والله يا استاذ أنا من المتابعين لمقالاتك الأخيرة وحثك للناس إنها ما تدفع إلا بأورنيك 15 لكن عاوز أحكي ليك القصة دي - إتفضل يوم الأحد الماضي الموافق 10 مارس في الضهر كده كنا واقفين مجموعة من الركشات قدام جامعة الأحفاد في إنتظار (الرزق) فجأتن يا استاذ وقف ليك دفار مليان عساكر .. تلبو من الدفار وكل عسكري دخل ليهو في ركشه - يا زول أمشي قدام على القسم؟ - في شنو؟ - لمن توصل هناك ح تعرف ومشينا قسم (الربيع) لقينا القسم مليان ركشات والناس واقفة ، في شنو يا جماعة فالو لينا (لجنة تنظيم ورقابة عمل الركشات) عملت حاجه إسمها (إستيكر) والأستيكر ده بي كم؟ قالوا بواحد وأربعين ألف (عاينو الواحد ده !!) في اللحظة دي واحد من العساكر (خاطب الجمع) في لهجة آمرة : - أي زول عندو قروش يجي هنا يعمل الإجراء والناس الما عندها قروش دي تخلي الركشات بتاعتا وتتخارج تمشي تشوف ليها قروش ! لحسن الحظ يا أستاذ القروش كانت معاي مشيت دخلتا على (المساعد) - عاوز أدفع الرسوم دي وأعمل الإجراء القانوني - أمشي صور لينا الرخصة وشهادة البحث مشيت صورت الرخصة وشهادة البحث ودخلتا على (المساعد شرطة) تاني وأديتو ليهم قام دبسهم بالدباسة وجدعهم في الدرج .. - جيب الواحد والأربعين .. الواحد ده أهم لينا من الأربعين ذاااتا - هاك دي الواحد وأربعين بعد ما عداهم وختاهم في (صفيحة مليانه قروش) قمتا سألتو : - الإيصال وينو؟ - إيصال شنو؟ ما عندنا ليكم إيصالات .. أمشي للزول داك يعمل ليك شهادة ومشيت للزول القالو ليا المساعد وعمل ليا الشهادة العاملة زي شهادة تخريج الروضة دي ! (وأداني الورقة الكان شايلا) : إسم المالك – إسم السائق- عنوان المالك- عنوان السائق رقم اللوحة .. وأهم حاجة (سارية المفعول لمدة عام من الإصدار) .. عشان ده دخل سنوي معتبرشوف في كم ركشة في العاصمة بس !! قال لي والدمعة في عينية : مش حرام يا أستاذ الورقه دي بي 41 ألف ..والله يا أستاذ القروش دي نحنا بنطلعا لامن روحنا تطلع .. شوف بي بساطة وبالقوة الناس دي تجي تشيلا مننا .. !! إنتهت المأساة .. بقي أن تعلم أن هذا الشاب لديه بكالريوس تربية جغرافية ولغة إنجليزية ودبلوم في شبكات الكمبيوتر ودبلوم في التحليل الإحصائي ودبلوم في الGPRS ويعول أسرة مكونة من 7 أفراد ! كدي يا جماعة الخير قبل كل حاجة نسال السيد وزير الداخلية والسيد مدير عام الشرطة (دخل الشرطة بالموضوع ده شنو؟) ؟ إذا ما عندها دخل (تكون مصيبة) وإذا عندها دخل (تكون المصيبة أكبر) لأنها بتشيل قروش بدون ما تدي الناس دي إيصالات .. طيب الشرطة تشوف عاوزه ياتو واحدة في المصيبتين ديل وتتكرم بالرد علينا !! بالله مش شئ مضحك ومبكي في آن واحد .. ونحن نعلنها حملة من أجل عدم الدفع بأي أيصال آخر ألا أورنيك 15 نقوم نلاقي الشرطة تشيل قروش الناس وبدون إيصال ذاااتو !! لا وكمان لو ما دفعتا يحجزوا الركشة ورزقك ينقطع وأولادك يجوعو وما يلقو البياكلوهو !! طبعاً الشئ الطبيعي والمفروض يحصل في (حاجه تمس الشرطة زي دي) إنو (المكتب الصحفي) يسلم تقريرو اليومي (عما جاء في الصحف) للسيد مدير عام الشرطة .. يقوم السيد مدير الشرطة يقرا المقال ده ويطلب من مدير مكتبو الإتصال بالصحيفة وأخذ رقم هاتف العبدلله .. ويتصل فيني مدير المكتب يقول ليا السيد مدير عام الشرطة عاوزك في موضوع لو سمحتا تشرفنا بكرة الساعه عشرة صباحا .. وتقوم المدام تصحيني تقول ليا : - إنتا ما عارف ولدك ده ممتحن .. قوم عشان تراجع معاهو شويه وتوصلو المدرسة !! كسرة : الإيصال الما 15 عرفناهو .. كمان بدون إيصال ذاااااتو ؟ كسرة ثابتة (قديمة) : أخبار خط هيثرو العند النائب العام شنو(وووو وووو وووو وووو)؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو؟
