السلام عليكم يا جماعه الكلام الحاقولو دا مهم شديد وقد يكون مؤلم فالناس تركز معاي واهم شي تعمل شير عشان يصل للناس. . الحاصل الان في شرق النيل دا كارثة بالجد زي ما حتشوفو بعد شوية انا حاتكلم ليكم عن الموقف في حينا حي النصر وداير الناس تركز انو حينا دا احسن الاحياء واقلها تضررا فما بالكم بالبقية السيول جاتنا العصر يوم السبت الناس كلها بقت تردم في بوابات البيوت ، والله نحن بنردم البوابات بنلقى الموية قدت الحيط بتحت ودخلت البيوت وكلما الموية تدخل بيت نطلع اهلو ونمشي للبعدو وكدا وفي النهاية لانو مافي المعدات الكافية ما قرنا ننقذ ولا بيت الا الناس البيوتهم مرتفعه بس ، والله نحن بنفتش لشوالات شوالات بس عشان نردم بيها ما لاقين ، نفتش لناس عشان اشتغلو معانا ما لاقين ، واخيرا الحي غرق والموية طلعت بفوق للزلط ، والله يا جماعه الواحد بكون مسكين شغال برزق اليوم وما عندو الابيتو واولادو في النهاية يقعد يبكي لانو بيتو بعفشو كلو يتهد ويقع وخلاص بقى مع اولادو لا ماوى ولا اكل ولا شراب لانو الموية والكهربا قاطعه اصلا ، وبالجد يا جماعه البشوف وبعايش الموقف هو بس البقدر يفهم الحاصل ، المهم الناس تركز معاي في النقطة الجاية دي وهي المطلوب شنو منك حاليا وانت بتقرا الكلام دا في الفيس: - اي واحد فيكم اي واحد ممكن يساعد ، ما تقول انا اسوي شنو اي زول داير يعرف ممكن يساعد بشنو يطلع يشوف اقرب شباب ويمشو لاقرب منظمة تطوعية وانا ما عارف الشغالين منو حاليا لانو ما ممكن اطلع من الحي اصلا ، شيل معاك قروش من ناس بيتكم اولا واي زول بتقدر تشيل منو تبرع ونسق مع باقي الناس عشان تشيلو مواد اغاثية للناس والهي بتتمثل في الاتي: 1 الناس دايرة معسكرات وخيام تقعد فيها لانو كل ناس المرابيع والكرياب بيوتهم اتمسحت مع الارض 2 وتانيا طبيعيا دايرين اكل وشراب وادوية واطباء بس لو الناس قدرت تجيب اكل للناس الفي الزلط الماعندهم بيوت عشان يفطرو بيهو يكون كويس 3 ودي اهم حاجه دايرين تعامل مع الكارثة البيئية الحاصلة لانو نحن بقينا ما قادرين نخش الموية لان معظم حمامات الحي وقعت والموية بقت ملوثة بالاوساخ ، فدايرين ناس يكونو مدربين اصلا للتعامل مع الحاجات الزي دي ويكون معاهم الادوية والحاجات المطلوبة 4 انا هسي بكتب في الكلام دا بالجلالة من البعوض الهو كتيرة بطريقة انا ما شفتها قبل كدا فالناس محتاجين نواميس ورش من الباعوض واخيرا انا الحلول الكتبتها دي حاجة بسيطة لكن الناس لو جات وشافت وقعدت مع الناس الخبرة بقدرو يقدرو الحاجات الضرورية المحتاجه ليها الناس ، لكن اهم حاجه الناس تطلع وتمشي المحلات دي لانو نحن في رمضان ودا اجرو اكبر من التهجد بتاع شيخ الزين داك فالناس تجي تتهجد في انقاذ ارواح الناس ، والحاجة دي مهمة شديد لانو والله يا جماعه نحن ما لاقين ناس يشتغلو معانا امبارح بنطلع في الناس من بيوتهم بالواحد عشان ما تنهد فيهم فحسو باخوانكم يا عالم وبرجع وبقول نحن الحمدالله اقل الناس ضررا لانو ناس المرابيع والكرياب وكل القرى على امتداد وادي سوبا اتمسحت بالكامل ، والله انا امبارح لاقيت مرة في نص الزلط تبكي لانو بيتهم بعفشو شالتو الموية وباقي ناس بيتهم ما معروفين وين مفقودين يعني ، والله التلاجات بتجي ماشة شايلاها الموية بفوق للزلط يا جماعه في منظر انا لو حكو لي ما بصدقو. ….. فالناس تحس وتتحرك ويا ريت تعمل شير للكلام دا وتحاول تصل للمنظمات الشغالة وهي حتقدر توري الناس المطلوب منها بالضبط لانهم بكونو عارفين الموقف ككل عشان يصل للناس وتحس برضو. . والله في عون العبد ما دام العبد في عون اخيه زول بيتو كويس والحمدلله لكن جيرانو غرقانين واهلو غرقانين.
