(فزع) قصيدة الشاعرعبد العظيم جوجوي (صاحب ديوان أنين السواقي) معلقا على كارثة السيول.. من الدغش شايل دفاترك والقلم تحسب تعد فوق الخلق متل المعيز تمشي وتجي ووعدك كضب جيتك يباس وعيالنا راجين فكة الريق من امس احسب براك تحسب ذنوبك والمراحيك البترحك في الخلق كم حول بتحسب في العيال والحال خراب وتجينا بي كتر الكلام الما كلام وانحنا لا ناقصين كلامك لا حسابك لا الوصف انتو الامم لي متين عساكركم تحلق فوق راسنا شايلين السلاح والجوع مكوع في الجباريق والفقر متوسد الراس والضراع وسط النهار كراكة تهرس في البيوت والعمدة لا زولا يقيف قدامه لا من العوج قال بنتحر والناس تجرجر في العفش بالهيلاهوب من بيت وقع مارقين نفير شايلين كبيرم والصغير حبوبة مادة القرعة تشحد في الشوارع لقمة العيش للعيال والابو الفارش التراب والراس مطوطر في الحجر لي متين عيونكم تبقى فاتحة وما بتشوف وانتو الشنو حلق المواسير يابسة كر قعر الأباريق والصهاريج صقرت والكبري واقف ديدبان والارضة قنطور بي تحت دقو القراف وكتين شواطين العجاج وقفت عديل قامت تشد الزاملة في ضهر الصواقع والمطر والسيل يزيد في الطينة بل والموية تحت الحيطة طين والموية تحت الحيطة راجلين في الصقيع والطوبة تحت الموية طين راكوبة فوق البركة واقفة بلا شعب والعود مشوتر في الكلنكاب والشجر والساس بساسق في الوقاف والناس بتتلافى البنابر والعناقريب واللحاف ناسا تداقش في الوحل تمسك تقيف وفي ناس بتتكاتف تقيف والمولى حي شايلة السبح والخور يجابد من ضريعات الخلق باقي المواعين والبروش معزاية تاكل في عويش باقي الدبنقا الما لحق وعقب عراقيب الغريق والام تقطع توبا للجنيات تغتغت بالها مشغول بالوليد الما اتلقى ومحنانه بي حبل الصبر ملزومة والراس مدنكس في التراب والحالة حال فوق الترع ناسا بتترتع تقع والخور بشيل بي قدرته والعمدة في البيت الكبير لابس نضيف يفتي ويقول لا باب كوارث يتفتح لا باب معونة يجيبلو ريح شاور حواريه النصاح القالو ليه الدنيا خير والواطة بور والموية جات خيراً كتير كراكة تهرس في البيوت السيل يهد حيل النفير كراكة تهرس في البيوت والسيل يشيل زي ما يشيل كراكة تهرس في البيوت والسيل يهد حيل النخيل كراكة تهرس في البيوت والسيل يشيل زي ما يشيل والسيل يشيل زي ما يشيل (تضامنا مع كل من ساهم بمال وجهد وكلمة من أجل أولئك الذين لهم علينا حق العيش بسلام) عبد العظيم جوجوي تورنتو، كندا. 2 سبتمبر 2013م. شاهد الفيديو :