ابتدرت الاستاذة رباح الصادق المهدى مجادعة شعرية في الفيسبوك، أشركت فيها عدد من ناظمي المربعات، واشترك فيها كثيرون منهم الاساتذة : محمد الحسن ابنعوف، ومحمد صالح مجذوب، وعثمان سلمان، ومنصور المفتاح، وزينب الصادق، وإسحق عبد الرحمن البلة، واحمد سعد واحمد عبدالله، وننتخب هنا الأبيات المتعلقة بالموضوع: رباح الصادق: حجّر كيفِك النم النغمته عجيمه ما شايف البعاشيم في لحمنا كجيما مشغول عن شياطين الإنس ورجيما ما قال في أميرة وفي البدورو هجيما سلطاناً عماه حيّرنا تب بالمرة قسّيم البلد من نصو سوّا مسرّة كاتل للخلق لاتفه سبب قال مرة وما شايف عوج غير طرحتك يا الحرة أمن المجتمع يا ربي أم فزّيعه؟ سادر في البنات بي سوطو زايدو رزيعه ضربا لي القلب شواي تقول لنزيعه ونحن نقوللو لااااا وبيانّا فيه نذيعه نون النسوة لمّت كلمتا الدغرية لا للقهر لا للذلة لا للسلبطة الغجرية جوة سجونا كم نمينا لي الفجرية وباكر نطلقك زغرودة آآ الحرية أمن المجتمع يا ربي أم تفزيعه؟ سادر في البنات بي سوطو زايدو رزيعه ضرباً للقلب شواي تقول لي نزيعه ونحن نقوللو لاااا وبيانّا فيه نذيعه نون النسوة لمت كلمتا الدغرية لا للقهر لا للذلة لا للسلبطة الغجرية جوة سجوننا كم نمينا للفجرية وباكر نطلقك زغرودة آاالحرية إسحق عبد الرحمن البلة نقولك نحنايابت البلمو شملنا جدك كان دوام تلبا بشيل زاملنا الحرية غاية وشغلنا الشاغلنا كان مانجيبا ياناس الوجع كاتلنا قسيم البلد زي ماركة التصنيع بي اسعارودونه تشري فيها تبيع انفصل الجنوب والباقي برضو بضيع ورجعتو زي رجوع زولا كبيرلي رضيع عثمان سلمان شن النظام هادا البخاف الطرحه ناسين انهم سلبوا الجميع الفرحه دمرتوا الزروع لا فيتريت لا قمحه الله يضركم سويتوا لينا القرحه رباح الصادق وشن المسخرة القسمت بلادنا البِرْحة سوولنا العجب فاشرين في يوم الجَّرْحة بشّروا باليباس من الزرع للسرحة وآخرتا يا البجم بالطرحة تمّوا (الفرحة)! عثمان سلمان وقفن حد يمين كتبن مواقف وسيره درسن الكجر حصصا بدون طباشيره قابضات الجمر كل واحده ترضى ضميره ثابتات كالجبال هندوسه ولا اميره رباح الصادق وقفن للعوج كم سيّرنها مسيرة رفضن للقهر وسوطو المكن للديرة غنن للوطن جوة الحبس زي سيرة هن لبنى وصفية واميرة ولا مهيرة؟ منصور المفتاح من بعد الودع زادت أمور تنجيما زادت غيها والبت حلال ترجيما قدر الناس تقول متطانشه عامله عجيمه ما بتدور زمام بتدور تسو تلجيما البلد المجوبك صايتو راجل الضره ومنو الناس تفز طالبه البلود البره غرزت نعمو طب حتى العشر ما درا نصو هداك وقع قسموهو لينا مضره الخير فيه واجد والحياة البرية وفيه ترب مهيرة متل رباح ورقية فيهو أسود تحرسو من الغريب دورية فيهو دهب مدفق فيهو طاهرة ورية الهول جانا داك والحالة باقية شنيعة والوح والوحيح بنجيد جزم تسميعا لكناهو الصبر بي روح ملايكة منيعة وقدر الجانا داك ما فينا ليهو صنيعة زينب الصادق: نون النسوة قدلت سوّت الصقرية فوق درباً عديل تب ما مشت مكرية ست واجب قبيل يا الهبتك محرية ست سيفاً عديل متل الرمح دغرية محمد الحسن ابنعوف ياهو عمارن اللعوج بقولو اللكه…. ادخلو بالكركر وياها ديك السكه… دروب الضكره جت ما فيهن السالكه.. هايجين فى طريحه وهن بفكو التكه…. احمد سعد لا تهين البنات بي كم قصيده ونمه وأذكر أمك الوالداك وبيك مهتمه نص دينك يمين بي غيرن آبنتمه رفقا بالقوارير ساهي لا تنخمه أصلهن البنات من بدري معروفات الزوق والأدب فوقن أهم صفات التاريخ مسجل وتشهد السنوات فوق أرض المعارك عندهن صولات رباح الصادق لا تهين البنات قانونك أصل الغمة عدل الله العديل مع جورو ما بتلمّ اتذكر كنادكك هن فخار للأمة سوط شرطي النظام انشالله بالهردمّة أصلهن الشقايق وليك مألوفات منهن اتّ منك هنّ معروفات زيح قانونك السيء عليه صفات بليد وظلوم وبلداً تابعه يوت بنفات بلدا عودنا فيه ما بنكروه الخلان ومن عهدا قديم الورثة بالخيلان فيه مهيرة جبّرت العقيد اللان فيه كنداكة تهزم دولة الغيلان بلدا فيه ناس عزة السوارِنْ جال وبي نم الخليل تركنّه والحجّال نهضن والعيال سوّن بناه سجال جددن القديم ما بقدَرِن دجّال بلدا فيه ناس السرة سابن غفلة ومراية السجم والبيعة شوفة الحفلة ايدن ما مسوّدة في الحنون مرتفلة فسبكن النضم كدي حتحتوها القفلة بلدا فيه بنات بكرة وبنات الليلة سابن قول فلانة وديك مشاكله حليلا لا طنشن بلد لا فرطن في شليلا باكر نصرهن، ليلة السجم ما حليلا احمد عبدلله صح في البنات في الماسخة والمغشوشة زي مافينا وسخانين ضماير كوشة وعوجات البلد مابتنعدل برتوشا اولي العدل ثم العدل خلك من كلام الهوشة عثمان سلمان نحن النون بلاها حياتنا شن بتساوى بتلد وتربى ولى عوجنا تداوى تاج فى الراس يمين امات جبينا ضاوى قانون النظام مدفوس عيوب وبلاوى محمد صالح مجذوب نميت فوق مهيرة ورابحة أرفع ضيما من عسسا يسكسك في الحرائر ديم لي بنوت وطنا الشكرة والتعظيمة تنساب كالزلال لي روحي هان تنظيمة يا عسس الرماد السيرتو صبحت مرة وطيت راس بلادا كان جبينه الغرة النيقروز يسكك في الحواري انشرى وكرباجك يلهلهب فوق طرح منفرة أمن المجتمع كم فينا جرب عكو فوق أعزل مسالم للرصاصة يفكو عوضية السرت لي الله تصرف صكو عند رب العباد رافعة العريضة وتشكو أولاد الكبار كم لي قيمنا يدكو راكبين المظلل وللرذيلة يسكو عرس الشاذ وشاذ عنو المجالس يحكو بلدك لابسة طرحة وفينا ماشة أم فكو
