★ إذا ماكم عارفين نفسكم ..النداء ده موجه الي كل الأحزاب والجماعات والحركات اللي وقعت إتفاقيات تحت أي مسمي مع النظام وإلتحقت والتصقت به وشاركته السلطة عبر كل مراحله وتحت أية دورة من دوراته..من حكومة الوحدة الوطنية الي التوالي الوطني والوفاق الوطني وصولاً الي حكومة القاعدة العريضة. ★وبحكم إنتمائي الي هذا الجيل.. لذلك سأكتب إليكم مستخدماً عبارات من لغتنا البسيطة الدارجة..وبما انكم بعيدين كل البعد عن واقعنا لذا أتوقع أن تواجهوا بعض الصعوبات في فهم ما أقول..لكن لا بأس إذا ما إستعنتوا بواحد شماشي( زي ما بتسمو شباب اليوم)من أقرب شارع. ☆ أولاً بالتبادي::ياجماعة نحنا بنقدّر الظروف الخلتكم تشاركو في النظام المجرم ده..ما أصلها الدنيا بت كلب،والزمان حقّار ..والمعايش جبارة ..والفقر كافر.. ومصارع الرجال تحت بريق المال..فإحنا بنعرف أنو نظام الانقاذ مارس معاكم سياسة(جوّع كلبك..يهز ضنيبو ويلحس شنيبو ويتبعك) مثلما مارسها معانا كشعب..ولكنها نجحت معاكم بقدر ما فشلت مع الشعب الأبي ده.. ولكن ياخوانا إتذكرو..إنو دوام الحال من المحال..والأيام دول والدهر مش ثابت علي حال..وزي مابيورينا التاريخ فإنو أية إمبراطورية ومهما تطاول وكتها فإنها في الآخر الي زوال..والشعب باقي.. أيوه ..سكة الوصول للديمقراطية طويلة ،شاقة ووعرة..ولكن في النهاية(لابد من الديمقراطية وإن طال السفر)زي ما بيقول الاستاذ ود الضو..وياهو الشعب السوداني اليوم قرّب يصل..واكيد حيصل. ☆ تانياً:: في الحروب المصيرية دايماً هناك خيارين ومش أكتر(إما تكون مع أو ضد) والشعب السوداني اليوم بيخوض حرب مصيرية اسمها حرب البقاء(للشعب أو للنظام) وهنا يتعين عليكم ويلزمكم تحددو مصيركم وتحسمو أمركم اليوم قبال باكر وتقولو لينا:إنتو(مع ياتو؟ مع الشعب ولا مع النظام؟وشايتين لي وين؟) ☆تالتاً: وبعدين أعرفو حاجة..احنا لمن نناشدكم ده مش معناه إنو احنا غلبانين ومحتاجين ليكم ولجهودكم في إسقاط النظام ده..لا لآ..فاحنا قادرين نسقطه ونسقطكم أنتو معاه كمان ..وطبعاً إنتو عارفين روحكم ووزنكم زييين..فإنتو مش عندكم أي تأثير في المعادلة دي..أنتو عارفين إنكم مجرد صفر كبير شمال نظام الانقاذ..وفي صراحة تااامة انتو ياخوانا عارفين..ونحنا كمان عارفين..وحتي النظام ذاتو عارف بأن مشاركتكم في النظام ده هي بس مجرد تمامة جرتق أو بكش وديكور لزوم تجميل وجه الديكتاتورية ومش أكتر..وإلا فكدي بالله هسي النظام ده محتاج ليكم في شنو؟وانتو زايدين أو ناقصين فيهو شنو؟..اي صح فيكم مستشارين ولكن البيشاورهم منو؟وعشان شنو؟ ومنكم الوزراء برضو ومساعدين..ولكن من ياتو درجة ومهامهم شنو؟ ههه..النصيحة ياخوانا انتو اوضاعكم في النظام ده زيها وزي أوضاع (فئة)الموالي في المجتمع الجاهلي..بتعانو من الإحتقار والإتضاع والإهانات اللفظية والمعنوية..لكنكم صابرين ومصابرين علي كل ده مقابل لقمة العيش وبيتزا علي محمود وهوت دوغ البشير..وأظنكم عارفين منو المقصود لمن قادة الإنقاذ يصرحو بإنو هم عرفو الناس بالبيتزا والهوت دوغ وسكنوهم البيوت السمحة بدل الجالوص وخلوهم يلبسو بعدما كانو مقطعين وسووهم مترفين بعدما كانو شحادين؟الناس المذكورين ديل قطع شك مش انحنا..ديل انتو ياموالي وطبعاً التاريخ سجّل لناس قلوبها اكلتها من إزدراءات وبذاءات أبوالعفين وبكري الكسلان،فعادو لرشدهم وأبو يبيعو كرامتهم ويشترو سلطة الانقاذ الزايفة دي..ومنهم الاساتذة مبارك الفاضل،مناوي،مسار واحتمال موسي هلال. وعلي أية حال ياها دي الاسباب البتخلينا نناشدكم عشان تنضمو للشعب بدل من ماتقعدو تكنكشو ليكم في نظام يوشك علي السقوط وبكره تتحاكمو مع قادته. ☆رابعاً:: انتو ياجماعة بالجد كده بيكون ماكم متخيلين موقفكم بكرة كيفن حيكون؟الأمانة انتو موقفكم-لوبقيتو في النظام ده-حيكون أسوأ من موقف تجار الشمام عشية العيد..يأخي ده موقف بيش بحد…. فتخيلو-ثم تيقّنو- لمن بكره الشعب ده يخش القصر ده(توووشك) ويفرض سيطرتو(تب)عليهو وعلي البلد..وبس سويعات واتبدل كل شي الي ضدو..أصبح الأمر بإيد الشعب..وبدأت مطاردة المجرمين والقبض عليهم واحد..واحد، وفي زخم الجوطة ديك نفترض أنو بعض قيادات الانقاذ إتمكنت من الهروب للخارج..لأنهم عندهم قروش وبيخططو للحكاية دي من بدري وانتو ليلكم ليل، ماعارفين حاجة..،أها كدي قولو لي إنتو حتقبلو شقيش؟وكيفن؟ بأمانة حيكون حالكم زي حال الحرامية -الدخلو ومامرقو -وصبحت عليهم الواطاة ..صدقوني ياخوانا انتو حتكونو في موقف جد حرج، لأنكم حتمسكوها..مش تابعتو الكيزان-بتاعين المواسير ديل..خلاص شيلو شيلتكم..صدقوني حيمسكوكم ماسورة من أمها وتاكلو هوا لمن تقولو بس. ☆خامساً:: ولكن برضو عليكم أن تعرفو حاجة غاية في الاهمية…وهي انو عشان يغفر ليكم الشعب ده ذنوبكم الكتيرة دي ويكفّر عن خطياتكم الكبيرة ديك..ده برضو عايز ليه شروط وفروض لابد منها: *لابد من الاعتذار من الشعب ده عشان جريمة مشاركتكم النظام المجرم ده في سلطته وسكتو عن جرايمه وساعدتوه علي تجميل صورتو..وكنتو بتتكلم-كذباً-بلسان الشعب ده مع انو هو مش فوضكم،وكمان انتو لمن شاركتو مش اخدتو منو شورة أو اذن. *لابد من القيام بالكلام ده الان وعلي وجه السرعة..وباخلاص كامل تنخرطو في صفوف الثورة والمشاركة الفاعلة والصريحة في اسقاط النظام. *لابد من التعهد بأنكم حتتعاونو لاحقاً مع القضاء في الكشف عن بعض ملقات الفساد والجرايم الارتكبها النظام حتي يتسني للقضاء محاكمة المجرمين محاكمة عادلة..واحتمال هناك شروط وفروض اكتر
