ضياء الدين مدثر رجب [email protected] حوار في شنو؟ وكوار في شنو؟ حوار كيفن مع الأطرش؟ مع الزول الدوام غدار ولي كل العباد دوَّش حوار لي شنو؟ وكوار لي شنو؟ حوار كيفن مع الأروش مع الزول الكتير حقار وكان يا ما كان زمان أغبش وجانا بليل بلا استئذان ودخل الدار وزي الطير هناك عَشْعَش وهَمْهَمْ بي طلاسم جن وسكن الدار وقال .. كِشْكِشْ خلي حريمنا تتوَغْوَشْ وخلي رضيعنا يتلبش وأول حاجة ذاعا بيان وقال بي دقنو بكرة يحِش ودخل السوق ورفع أذان ومسك الكاش وما قال ماش وأكل ضباطنا في رمضان وصلي العيد بدون يرمش وخدع مدفعنا يالقران ودخل الغابة حرق القش وضيَّع بور.. وفات دارفور ولي كل الجهال جيَّش ضرب ( النوبة) في كجبار.. وكمان في (جبال) وخلَّي دمومنا تترشرش ونشَّف ريق (جزيرتنا) ولي كل الجهات همَّش وقطع أرزاقنا بالتمكين ولي كل العقول طفَّش × × × × × × × حوار في شنو؟ وكوار في شنو؟ حوار كيفن مع الأطرش مع التعلوب ودينو لعوب وحالف ديمة لينا يغُش ويلعب بي مصاير الناس زي … نظارة (الأعمش) حوار كيفن مع المهبوش وخايف ضلو ليو يهْبِش وكل يومين بركِّب وش وكل يومين يغيِّر وش حوار كيفن مع القناص قنص لشبابنا في (أيلول) وما قال كش قسم سوداننا لي نصين وما قال كش ضياء الدين مدثر رجب.