التاى التوم التاى الهلالى صديقي كان من حضور المؤتمر وفى القاعة ذات التكييف العالي شالته نومة ثم افاق فحكي ما يلي.رايت وسمعت الازرقين يلتقيان .ويتحاوران. قلت:- تقصد النيلين قال لي: لا نيلين شنو في الخريف ده يازول رأيت الشيخ الزعيم الخليفة شيخ السجادة العركية القادرية عبدالله عبدالباقى المعروف المشهور بأزرق طيبة القطب الاتحادي . قلت له :لقد اثرت انتباهي وهيجت فضولي في المكان والزمان .فمن بالأزرق الثاني تعنى باقان ام عرمان ؟ قال لى: يازول قول بسم الله رأيته يتحاور شعرا مع عبدالله الازرق سفير السودان في لندن..المن الصوفى الازرق حدا القضارف." قلت له :زدت على الامر التياعا فهل تذكر بعض ما قالا . قال لى خذ منى لقد كان حوارا طريفا لم يسقط منى حرفا واحدا منه فحكى التالي:- عند مدخل المطعم التقيا ازرق طيبة بجلبابه وشعره المميز ومعه اثنين من الحيران وازرق لندن ببدلته الانيقة ممسكا بكوب عصير برتقال تقدم للشيخ مسلما وبعد ان تصافحا سلموا على بعض سلام معرفة ثم انشد ازرق طيبة : اهلا ازرق لندن الدبلوماسيته غزلية طيرت الناهة بت مكناس من الخارجية وسياسة حكومة مؤتمرك هزلية باعت خط هيثرو وشلعت البلد دية ————- اهلا حباب ازرق لندن اجوع انا وانت تتمدن لبسك انيق جسمك بدين وانا اُماتي ماتن ماقدرن ربن شلعوها وشلعوها واماص جالوصة وكتين سماهنَ كبن قوم شوفها كيف معقلة كاشة كرايعاته ابن اتمدن ************************************* بهت ازرق لندن من حرارة السلام اولا ثم حرارة الهجوم الشعرى ثانيا الذى جعل من بالكافتريا يحول ويصوب نظره نحوهم والبعض اقترب نحوهم منتظرا ردة فعل ازرق لندن . فهذه اللحظة استجمع ازرق لندن كل مواهبه الادبية واللغوية وارتجل قائلا : اهلا ازرق طيبة الفقد الهيبة وقال يااتحادي اتحادى حليف انفصالى وكفرهو داوى صوفي حليف ماركسي والدليل حمرة الطواقي من دجلكم وجهل الجدود ضاعت القري والبوادي اهلا حباب ازرق طيبة المادق حجر دغشية وقال يا حركة شعبية بين المزارعية إقطاعي سليل برجوازي وقول يا دجلة دينية درويش علماني بخرات محايات ماركسية ولقاءات وحكايات ثورية زي القهوة في الضحوية ************************************* فرد عليه ازرق طيبة مرتجلا مرحب ازرق لندن فاقد خط هيثرو كيف تجر النم وات القافى والوزن ما بتفرزو في سفارتك انضرب نافع والكوع لحستو مالك جايب زايد الكلام علينا لسانك ما تمسكو انا ودالمساجد اللتبنت ضانقيل وانا اخو الميرغنى والترابى البشد الحيل انا البصد غارة حزبك وكت تجى بالليل انا سيد المسيد والقبة ..وانا بخافن منى رجال وحريم اوربة ضحك ازرق واعاد ترديد الشطر الاخير (يخافن منك رجال وحريم اوربا) اوربا ياتى اوربا لاتعرفك ولا تعرف ود الدكيم لكن اسمع جديد النم سيد الضريح والقبة وشن القبة والرأس في اوربا (احيائنا لا يرزقنا بدرهم وبالف الف ترزق الاموات ) نافع انضرب عندى صنديد ما بنلمس والترابى عندك ضربته الشمس لحسع واقع من امس وميرغنيك سف عشرين مليون دولار ومصيره لابد ينحبس هنا هم الحيران بضرب ازرق لندن فتدخل عدد من رواد الكفتريا وحجزوا بينهم وانشد بعضهم شن الهمة والوطن بيلمنا نتصافى ما نتجافى والسلام يعمنا وسعوا الصدور البلد لاتصبح قبور في شن الحرب والبلد فقرها يحرق القلب سلالالام