قال ليك واحد سوداني زهجان من مرتو وكايس ليهو سبب شان يعرس فوقا قام قال ليها : يا ولية الرئيس قال أي راجل متزوج يتزوج تاني مثنى وثلاث ورباع عشان تنحلا مشكلة العنوسة في السودان، وبرضو الرئيس قال عشان تنحلا مشكلة الطلاق في السودان، أي واحد يتزوج لازم يكتب مؤخر صداق مليار جنيه سوداني!! مرتو قالت ليهو: واها انتا رايك شنو في الكلام دا؟! قال ليها: ربنا سبحانه وتعالى قال اطيعوا أولى الأمر منكم مرتو قالت ليهو: ياخي هو الرئيس دا ماذون ولا بتاع شؤون دينية واوقاف ، هوى يا راجل يا مطرطش اسمع هنا دا ، والله مرة واحدة ذاتا كتيرة عليك!! هسع اولادك ذاتم ما لاقين ياكلو ، بعدين قول لي المليار انتا حتلقاهو وين ، بعدين اسمع هنا دا، ياخي انتا 26 سنة عامل لي فيها معارض لحكومة الانقاذ جاي هسي تقول لي نطيع ولي الأمر ، كلام دبيل الزوجات دا ما ليك وما للحفيانين، الكلام دا لي ناس حكومة الانقاذ المقتدرين ، هوى يا راجل اتمدد قدر لحافك وخليك في معارضتك دي!! قال الرئيس قال!!! فيصل الدابي/المحامي
