الشوارع محمد طه القدال 27 نوفمبر 2016م مشارعَ الخير.. شوارعَ غِير شوارع شعبَنا الحَبُّوبْ كَسَاد ورَمَاد حِداد وسواد ولا بتعرِف تقول الروب وكلما تجَهجِها الوثبات بتعرِف لُغْوَة الراندوق بتتعَتَّر تقوم مَرَّات وتتوَقَّع وفجأة تهِب علي طولها تقيف من نَهْدَة الوِقِّيع وتخَبِر كيف تَفِك الطوق وتعرف وين تلُخ الطين وتعرف كيف تَدُق الطوب وتدي المعنى للطِقّيع شوارع الخير .. مَشارع غير مشارع كُلَّهِن وِلدَنْ ولا نِدْمَن وما مِن الحُزُن عِدمَن ولا توب الكرامه رَمَن وزادَن في الكَرَم كِوِّيع شوارع ما بتبيع روحها ولا حتى بتقِلب البيع شوارعنا الشوارعية تلاقي اللَّافَّة في اللَّفَّة وتخُت السفَّة في السفَّه وتَحَبْس الدمعة بالصِّنْقيع. شوارعي بيقرا في اللابتوب شوارعي بيكتب الواتساب شوارعي يدقِّس العاملين جهاد وجَداد شوارعي بيبدا بى نَمَّة شوارع منتهى العِصيان يصاقْع الأنبيا الكَذَبَه ويسالم (مصطفى) النُبْيان فهذي النَمَّة نَمَّة سوط يسوط الأدعيا الفَسَدَه ويلوس الكاذِب المزعوط يعود ينتِف .. معِط .. ريشن بِتَكْرَهوا شَعْبَكُم ليشِن؟ وتنسوا الآخرة .. ساعة الموت بتكرهوا شعبَكُم ليشِنْ؟ وهُو الأداكُم المَثْنَى وثُلاث ورُبَاع وهو الودَّاكُم الكُلِّيَّة وهو اللبسكم النيشان وهو السَّكَّنكم المنشية هو العلمكم أكل الحوت بتكرهو شعبكم ليشن؟ ومن خيرو الكتِف ورمان دي شيزوفرينيا؟؟ والا انيميا في حب الوطن واتراكمت أزمان بتكرهو شعبكم ليشن؟ وتلهطوا من شمال وايمان وتكالوا من الطيور عيشِن وتبزغوا في قداحة الخير من البلد الحكم طيشِن تجحدوا في نعايم المولى تلهفوا في فطايس النعمة تلهطوا من حرام القوت بتكرهوا شعبكم لي شنو؟ شتايمكم فضل خيركم عمايمكم هي شوم طيركم كروشكم من فضل خيرنا وتِجَدِّعوا خيرنا للغيرنا وتمسحوا فوق رقابنا البوت؟ بتكرهو شعبكم ليشنو؟ بتكرهوا شعبنا الطيب وتربحوا من لهب حربو ترجعوا زي ديوك العِدَّه وين ما يقبلوا يخربوا فارجعوا بينا لي عند شارع التقنت ولي الولد السقا الباجور وارجعوا بينا لي يات من مطار في الدنيا سودانير لسانكم فينا زي منشار بيطلع في الصباح زفران وينزل في المسا كفران دي وَلْدَه وخاسره يا جربان تقولوا عليه رباية جوع؟ وبين هوت دوق ولحس الكوع؟ تقول يا انتو ما ولاد تسعة لا حَوَّاتنا حوَّاتكم ولا هذا البلد هيلكم ولا رَبَّتكم أُمَّاتكم.