وان طال السفر محمد عبد الماجد لو مسكنا تاني ما بنفك . …و . في بطولة الممتاز الهلال جرب كل الاشياء …جرب ان فاز بالممتاز بفارق (18) نقطة. . الناس (تصنقع) متل باقي العصير في الكباية … ما باقي ليك إلّا تلاحقو بالانتربول. . و… . (تاني شنو؟). . وجرب الهلال الفوز بالممتاز بدون خسارة وب (3) تعادلات فقط ..وفزنا به ايضا بدون خسارة ب (5) تعادلات. . وعملنا اي حاجة. . العملوه المريخاب ..زيكو شال الكورة وفات ..الي الان ما رجع – لا هو ..ولا الكورة. . وجرنبا الفوز بالممتاز (5) مرات على التوالي ..انتوا قاعدين تعملوا شنو؟. . عملتوها لينا كلها (مقصورة). . ووقت تغلبكم شديد ..بتنظموا (سيكافا). . وجربنا ..الفوز بالممتاز بعد ان كان المريخ يتقدم على الهلال ب (7) نقاط. . جينا وقلبنا (النظرية) في الدورة التانية ..خلينا ليك ناس بابكر سلك ..حلقهم (ملاريا – ملاريا). . و… . (الملاريا دي ما في ليها داعي). . وجربنا ..الفوز بالممتاز بعد ان انسحب الهلال وجمد نشاطه الرياضي ..رجعنا وشلنا الكاس ..وطلعنا زي الما حصل شيء. . زي الناس البنتظروا (صينية) الغداء في العقد. . اي زول يجي طالع من جوة ..يقولوا ليه : (الغداء دا لسع). . وجربنا نعمل اي حاجة في الممتاز ..قبال تجاوزات واستثناءات كان يمنحها الاتحاد العام للهلال. . مرة جابوا ليهم حارس (نيجيري)..اسمو (شيكوزي) بعد ان قنعوا من الحراس الوطنيين ظاهر وباطن. . هيثم طمبل (كتر خيرو)..مسك ليك (شيكوزي) دا فرتكوا ليك حرف – حرف. . بعدها جمال حسن سعيد طوالي اخترع كوميديا الحارس (شعيرية). . ناس المريخ قالوا (صواريخ) الهلال دي إلّا يجيبوا ليها حارس من رام الله. . و… . (عملوا شنو؟). . جابوا لينا (رمزي صالح)..بشه مسك ليك (ملف جامعة الدول العربية). . طبعا رمزي صالح لعب في المريخ بقاعدة من قواعد الجامعة العربية ..تقول جايبنو لمشروع الجزيرة مستثمر – ما جايبنو (حارس مرمي). . بشه فرتك ليك (رمزي صالح) زي كرتونة الخبيز …خبيزة – خبيزة. . الشفع بهرسو (الخبيز) هرس – ما بتلفتوا. . رمزي صالح طوالي رجع اهلو ..قال صواريخ زي دي في (رام الله) ما قابلتو. . البقعدني شنو مع الصواريخ دي؟ ..(الكلام دا قالوا رمزي صالح). . و… . (تفتكروا انا قاطعو من رأسي). . ناس المريخ الجابو رمزي صالح ..كلهم قعدوا يشتموا فيه …اصلو (بشه) جاب ليك فيه اهداف بي كل طرق. . هدف ب (جدول الضرب). . وهدف ب (القسمة العادية). . وهدف ب (الجمع والطرح). . المريخاب هاجموا ليك (الجامعة العربية) ذاتها بسبب (بشه)..قالوا ليك هو نحن (الجامعة العربية) بنعرف ليها شنو؟..عشان نعرف لينا حاجة ل (رمزي صالح). . اخير اكرم الهادي سليم. . رجعوا لي اكرم. . الصبر غلبهم. . بي صراحة اكرم الهادي سليم دا في التمرين ما مضمون ..يجوا يضمنوا ليك اكرم مع الهلال. . المريخاب حامد بريمة ما بضمنوا مع الهلال ..(يرجفوا قدامنا زي لوري الجلي). . بقيتوه (لوري) يا هلالاب. . بقولوا زي (قالب) الجلي ..انتوا عملتوه (لوري). . رمزي صالح ..فشل ب (جامعتو). . قالوا الموضوع دا عاوز ليه حارس كبير. . شوفوا اكبر حارس في افريقيا ..وجيبوه لينا. . فكروا جاي ..وجاي ..وجاي. . قالوا بس ما في غير عصام الحضري. . الحضري افضل حارس في افريقيا في ثلاث بطولات امم افريقيا. . جابوا لينا (الحضري) بشه قعد يضحك ..قال معقولة..جايبين لينا حارس عمرو (44) سنة..انتوا عاوزين تحرسوا ليكم (مدرسة). . الهلالاب شفوت. . دوروا ليك في (الحضري) زي الحريق. . الحضري دا اي زول في الهلال جاب فيه قون. . خلينا ليك في الكورة متل فئران التجارب. . مهند الطاهر جاب ليه اقوان في الحضري ..لمن فتر ..من الصقيعة جاب. . من الصحراء الكبري جاب ..ومن تقاطع ود البشير جاب. . ما خلى ليه حاجة. . من اي حتة جاب. . الحضري دا (ساني) جاب ليك فيه قون بي عين واحدة ..نزل ليك فيه (هدف) زي الرصيد. . رأسيه من برة الخط. . تاني نعمل ليه شنو؟. . بشه طبعا ..ماسك ملفات (الاجانب) ديل ..مسؤول شئون الاجانب في الهلال. . بشه بقى كل ما يلاقى الحضري يجيب ليك فيه قون. . لو قابلوا في سوق ستة ..يجيب ليك فيه قون. . دا طبعا غير (التقاطعات) حقت عبداللطيف بويا ..والذي سجل في الحضري من (الهجرة). . تاني الحضري دا يعلموا ليه شنو؟. . بالمناسبة ملف الحضري دا ..واقوان الهلال فيه ح نعمل ليها ملف في ق سبورت ..ونقدمها ليكم بالصورة والقلم. . دا مشاهد ساكت من افلام الهلال في الممتاز ..(كمان عاوزين تنكروها يا مريخاب. . والله الواحد لو ما حرس حاجاتو كدا ..تنكروها (حطب) يا مريخاب. . عشان كدا تاني كل تلاتة ايام ح نكتب عن المواضيع دي. . هسع نحن عاوزين نقول …الهلال بعد ما استلم (صدارة) الممتاز ..تاني ما بنفكها. . ارجعوا للارشيف ..شوفوا الهلال متين (اتصدر) وفك الصدارة؟. . انتوا يا ناس المريخ وقت فريقكم يتصدر ..الاهلي شندي ممكن يخطف منكم الصدارة. . نحن من اتصدرنا قبل اسبوع ..بقينا محافظين على الصدارة ..وبالتأكيد ح نجي ونثبت الصدارة دي يوم 10 مايو. . يعني ما عندكم اي طريقة تاني للصدارة يا مريخاب. . عاوزين تشطروا ..حافظوا على (وصافتكم)..ما يقوم الاهلي شندي ييشيل منكم (الوصافة). . الاهلي شندي والخرطوم الوطني والرابطة كوستي والمريخ الفاشر والامل عطبرة ..كلهم بتربصوا بيكم. . الصدارة دا تاني إلا تشوفها في الكاميرا الخفية. . و…. . العيد السنة دي واقع شنو؟. . يا زول عيد شنو؟. . انت قعدت تلخبط. . اطلع سريع. . و… . انتهى.
