قزاز ورذاذ محمد الطيب الأمين عشنا وشفنا زمن الملابس بيلبسوها ب(الزيت) .. شفتو كيف صافي ومسامح القليب الانت جارحو سبتو ضايع بالسنين ولحظة صورتك ما بتبارحو أما قلبك يا المعاند الله يغفر ليو يسامحو والصدود الجوة فيهو باينة في عينيك ملامحو * كثير من الشباب يحتاجون ل(زيت الطيب) حتى يسهل مهمة (لبس البنطلون) .. * وكثير من البنات يحتاجن ل(زيت صباح) حتى يسهل مهمة (لبس الإسكيرتو والبلوزة) .. * يعنى يا حبيبى الزيت بدل نعملو في (الملاح) تانى ح نعملو من اجل (الملابس) .. * عشنا وشفنا زمن الملابس بيلبسوها ب(الزيت) .. * كل القنوات السودانية تستعد لرمضان الأن ببرامج (الغناء والرقيص) .. * هسه افرض إنو رمضان ده ما جاء ؟؟ * ح تعملوا شنو يعنى ؟؟ * نحن شعب يستعد لرمضان ب(الغناء) .. * سبحان الله .. * بعض الناس يصنعون من (الفسيخ شربات) .. * والبعض الاخر من (الشربات) بيعمل (فسيخ) .. * واغنيات عثمان حسين هى (شربات) احذر الفنانين الشباب من خطورة تحويلها إلى (فسيخ) .. * والتحذير نتبرع به للفنان شكرالله وبقية الأخوان .. * لو لم تكن اغنية (جميلة ومستحيلة) قديمة لقلنا ان وردى قصد بالاغنية (لحمة الضأن) .. * في هذا الزمن اضحت (لحمة الضأن) هى وحدها (الجميلة ومستحيلة) .. * إنشغلت الخرطوم خلال الايام الماضية بمحاكمة (طبيبة القضارف المرتدة من دين الأسلام) أبرار عبد الهادى والمسماه حديثا ب(مريم يحى) .. * المحكمة كما هو معروف حكمة عليها بالإعدام حداً للردة وبالجلد مئة جلده حداً للزنا والعياذ بالله .. * المحكمة وقبل صدور القرار (فحصت عقل هذه الطبيبة وقلبها) للتأكد من كونها (نصيحة أم لا) وجميع الفحوصات اكدت سلامتها .. * واية محاولات لتبرير هذه الردة مرفوضة مرفوضة والحديث عن كونها (مسحورة) أو (معيونة) لا يبرر خروجها عن دين الاسلام .. * واحدة من أكبر الحاجات الجايبة لينا هواء في البلد دى هى (تكسيرنا لحدود الله) .. * ما بنطبق الحدود وبنكسر الحدود وما شغالين بكلام الله عشان كده امورنا بايظة ومعكسة .. * المرتد اعدمو والسارق اقطعو يدو والزانى المحصن ارجمو الحاجات دى ما فيها لعب يا اولاد الحلال .. * التساهل في حق الله كارثة لو كنتم تعلمون .. * في إذاعة (الرابعة) المذيعة الرشيقة سألت زميلها المذيع قبل ايام وعلى الهواء مباشرة عن ما إذا كان يستخدم (البامبرز) عندما كان صغيرا أم لا .. * قالت ليهو : (انت وكت صغير كنت بتستخدم البامبرز ولا متعب ناس البيت) .. * غايتو جنس غايتو .. * والله مرات نبكى من حالنا ومرات حالنا يبكى .. * أنا والله مستغرب المذيعات ديل بيجيبوهن من وين ؟؟ * جد مستغرب .. * حاجة تكسف .. * الهلال فاز على مازيمبى (رجاله كده) ، والهلال الكبير اصلا اصبح في نظر السودانين أكبر من كبير .. * غايتو نزار حامد ده يوم بيكتل ليهو زول .. * نزار حامد ده المفروض يكون تابع لإتحاد المهن الموسيقية وليس إتحاد كرة القدم .. * الشغل البيعمل فيهو نزار ده اقرب ل(الوتر) وليس (الكفر) .. * سقوط سيف مساوى مغشيا عليه داخل ارض الملعب تأكيد عظمة (المُحب) لمن (أحب) .. * هذا السودان يفتخر بهؤلاء الرجال .. مبروك لهلال السودان ومبروك لسودان الهلال .. * محلية الخرطوم كل يومين تلاتة بتعمل نظافة للشوارع الرئيسية .. * النظافة كما يلى : (عمال بيقشو التراب من الظلط ، والتراب المقشوش من الظلط بيكون قاعد جنب الظلط ، بكرة بيجى هواء بيرفع التراب للظلط ، بعد بكرة المحلية بتجيب العمال ينزلوا التراب من الظلط ، وبعد بعد بكرة السماء بتجيب الهواء بيرفع التراب للظلط) .. * يعنى الشغلانية (قربة مقدودة) .. * وبالطريقة دى العاصمة ما بتنضف والله ولا تغشو رقبتكم ساى .. * شوفو ليكم حلول تانية يا معتمد الخرطوم .. * اصحبت الفنانة ندى القلعة تركز بشكل كبير على الصور مع النجوم .. * فبعد صورها مع تيدى افرو ظهرت في صور مع الفنان محمد النصرى .. * أنا لا اقول ان ندى تستجدى جمهور الفنانين من خلال هذه الصور ولكن اقول ان ندى (فنيا) تقف في موقف حرج جدا .. * ندى لو استمرت بطريقتها دى تانى (الغنا إلا تتمو صور) .. * ونركب صافنات ونجيبة (نوباوية) وأصلو الزول بيموت والذكرى تفضل حيه .. * يا أستاذة : شايف كل أولاد الحله معاك في الواتس ؟؟ * و..و.. * وأنا والأشواق في بعدك بقينا …(زي الحرامى الطلعت عليه شمس)
