العتب مرفوع هيثم كابو (النقي)ما بقول الكلام الني..!! * المكابرة ستقود الوصايفة للفضائح والهزائم الثقيلة قبل المغادرة ..! * مشكلة الوصايفة أن فريقهم يحتضر، والواحد يقول ليك : (الهلال يمرض ولا يموت)..! * يا جماعة كامبوس دا يكتل مدينة بضواحيها، وانتو شابكننا (الهلال يمرض ولا يموت)..! * طيب أوكي .. خلونا ناخدكم على قدر فهمكم (الهلال يمرض) معقولة يكون كمبسة دا (الطبيب المداويا) ..يا جماعة خليكم عاقلين (المريض دا بموت ليكم تحت يد البرازيلي دا)..! * انتو يا خليفة طوالي (الهلال دا يمرض ولا يموت)..هسه بدل (جهجهة المستشفيات) الهلال دا لو مات ما كان ريحكم وريح نفسو ..! * صديقنا المطرب الشاب (صلاح ولي) المعروف بإنتمائه الأزرق كلما قابلني بعد هزيمة او تعادل للهلال علق بقوله : (تعرف النتيجة دي أحسن حاجة يا أستاذ عشان نصحى شوية لانو عندنا مباريات جاية مهمة)..! * تعادل الوصايفة بالممتاز فبرر صلاح ولي النتيجة بأنها (جرس إنذار للمباريات القادمة..والمرة الجاية بصحوا) فجاءت من بعدها (هزيمة الأهلي شندي) وصولاً لمباراتي الزمالك وفيتا كلوب،وفي كل مرة الأجابة واحدة (دي أحسن حاجة عشان نصحى شوية)..و(يا صلاح انتو بتصحوا متين وتمنين سنة نائمين)..! * أتوقع أن يستيقظ الوصايفة بالكنغو على (كابوس مزعج)..! * خير ..اللهم أجعله خير ..! * يا صلاح ولي إذا ما (صحيتوا في الكنغو) أحسن (تنط) من كلامك دا ..وانت يا ولدنا (النط ) فضلة خيرك ..! * لياقة صلاح ولي التي تظهر من خلال قفزه المتواصل بالحفلات أفضل الف مرة من لياقة مساوي ..و(نطة) سطر جديد .! * بمناسبة : (النطة) أقصد (النقطة) أحمدوا ربنا علي التعادل و(الغبار الأنقذ الهلال)..! * لا أتوقع إستمرار صديقنا الحبيب الكابتن الدكتور عمر النقي بمجلس الهلال، فصراحة الرجل ووضوحه لن تجدي مع اناس يعشقون (اللف والدوران والدغمسة) ويتعاقدون مع (ماسورة زي كمبسة)..!! * مشكلة النقي (فاهم كورة وواضح وما بعرف يقول الكلام الني)..! * يا خليفة ..(أعمل ليك مرة واحدة حاجة مفيدة وقول للنقي "إتخارج يا كابتن"..)..! * نشرت (الصدى) أمس حديثاً عقلانياً لا يقوله أحد غير النقي، ولكنه بالطبع لن يعجب (ملوك التبرير والتنظير)..! * اعتبر الكابتن عمر النقي أن الهلال كان محظوظاً لخروجه بالتعادل في المباراة الأخيرة أمام فيتا كلوب الأنغولي، مؤكداً أن كل الظروف لم تكن في صالح الهلال لا من حيث الأداء ولا طريقة التعامل مع المباراة غير معاناة الفريق من كثرة الغيابات والإصابات .! * (الحظ خدم الأزرق وجعله يخرج متعادلاً) ..أنه حديث رئيس القطاع الرياضي بالهلال و(أهل مكة أدرى بشعابها)..! * ملوك الرِزق ..! * انتو لو ما محظوظين كان مساوي كمل مباراة مازيمبي (وسلم الغربان ضربة الجزاء في الدقيقة 85)..! * انتو لو ما محظوظين خليفة دا بقعد في الكنبة موسم كامل ..! * لو انتو أصلاً ما محظوظين مدرب تحفة زي كامبوس دا البخلي يمشي ويجي تاني شنو (زول زي دا مفروض يكون مواصل معاكم من زمان)..! * انتو لو ما محظوظين دا وقت تجي فيه عاصفة ترابية ..! * انتو لو ما محظوظين علي جعفر دا بلعب في المريخ ..!! * خليفة ..الحظ حليفكم و(لو دا فريقكم الله يعينكم)..! * إتحظظي ..! نقوش متفرقة * رحيل كامبوس خسارة كبيرة للدراما فالرجل يمثل دور المدرب ببراعة متناهية ..! * هاليفا هاليفا هاليفا ..(ما تفرط في الزول دا)..! * يحمد للهلال تأهله مع (التسعة الكبار)..ما تضحكوا (الفرق الكبيرة تمنية) ..وتاسعهم (سيرجو)…! * سيرجو دا يا مزمل لو (طقم أسنانوالصناعيي) وقع تاني الا يدخل (بوفيه رز بي لب مفتوح)..! نقش أخير * الحظ مرة واحدة ما بجيك مرتين لو ضيعتو تاني (فيتا) تلقاه وين