…..و……. محمد عبد الماجد ريال مدريد في الخرطوم في (المطرة) دي
. ناس المريخ عندهم (جدعات) – من (5) ضلف كدا بفكوها – وبقوموا يصدقوها براهم- ثم يدعوا الناس الي تصديق هذه الاشياء. . ونحن نشيل ونصدق. . واحد قالوا ليه حصل كتبت قبل كدا (شعر). . قال ليهم ما كتبت لكن المتنبيء سرق مني قصيدة (لك يا منازل في القلوب منازل).
. هي وينها المنازل؟. . اي زول ما عندو (بيت) قال الحمدلله في الخريف دا ما عندنا (بيت) وإلّا كان (المغصة) كتلتنا لو وقع علينا مع الامطار والسيول دا. . واحد تاني..قال عملت لي عملية (طوحال)…الدكتور بدل ما يشيل (الطوحال) شال (المرتب). . الزمن دا عادي جدا الدكتور يعمل ليك عملية – يقوموا يقولوا ليك الدكتور نسى (المقص) في بطن المريض. . الدكاترة (النسيان) ديل جبتوهم لينا من وين؟. . هسع في دكتور بنسى رسوم العملية. . ليه بنسوا (المقص). . عادي جدا يقولوا ليك الدكتور نسى (شاحن الموبايل) في بطن المريض. . وعادي جدا واحد يعلق للدكتور ويقول ليه : (اوعك يكون الشاحن اصلي). . لو الشاحن (صيني) ما مشكلة. . شاحن الموبايل بقى اغلى من الانسان. . في الزحمة بتاعة (المشاعر) دي. . في لخبطة (الحواس) دي. . سمعتوا (قنبلة) المريخ. . ريال مدريد سوف يزور السودان من اجل اللعب امام المريخ في (الرد كاسل). . لو ما عندك وجع ضهر – بيجيك وجع ضهر من الكلام البتسمع فيه دا. . اجر يا ولد اقفل الشباك. . الكلام دا خطير. . اتخيلوا (ريال مدريد) فاضي للدرجة دي. . فاضيين وما عندهم شغلة كمان. . ريال مدريد دا ما عندو موضوع. . لدرجة ان يأتوا للخرطوم في المطرة دي عشان يلعبوا امام المريخ في (الرد كاسل). . مطرة زي مطرتنا دي ناس ريال مدريد بتكتلهم. . ولا بستحملوها. . شوارعنا بقت زي (الكماين). . نحن ما قادرين نمشي فيها ..الواحد فينا بقى يطلع الصباح بي شارع ..ويرجع المساء بي شارع. . الشارع البتطلع بيه – ما برجعك. . بيتكم ذاتو تطلع الصباح تخليه (4) غرف مع منافعهم ومزيرة. . ترجع المساء تلقى (المزيرة) بس. . لو ما شِفت – ما بتعرف بيتكم. . الواحد بقى من (الضهب) العليه وقت يصل بيتو ..يطلع التلفون يضرب تلفون عشان واحد من ناس البيت يطلع ليه في الشارع – عشان ما يدخل غلط. . البيوت اتغيرت في الخريف. . بقينا ما بنعرف (حلتنا). . ترجع المساء تلقى ليك (شافع) واقف قدام البيت – تقول ليه يا ولد انت ود منو؟…شبهك دا ما غريب عليّ. . الولد في النهاية يطلع ود اخوك. . نحن كبرنا – وإلّا كبروا الشفع ديل. . شفع الزمن دا تطلع منهم الصباح ترجع العصر تلقاهم كبروا (ما شاءالله). . انتوا الواتس آب بكبر الناس. . وإلّا (المطر) اصلها بتعمل كدا. . الواحد بتلخبط. . في اللخبطة دي – في المطرة دي..قالوا ريال مدريد سوف يأتي ويلعب في الخرطوم. . خد. . عشان ما اقطع ليكم من رأسي…(رأسي ذاتو بقى ما فاضي للحاجات دي). . امس جاء في قوون ضمن مصدر موثوق منه هذا الخبر : (وصل الخرطوم مساء امس عبر طيران الامارات سفير السودان باسبانيا السيد طارق حسن ابو صالح في زيارة سريعة للخرطوم سيلتقي من خلالها مجددا بوالي المريخ السيد جمال الوالي بعد ان كان قد التقاه قبل العيد بلؤلؤة الخليج امارة دبي بحضور السيد هيثم محمد الحسن المدير العام لشركة نازو للدعاية والاعلان وامين خزينة المريخ السابق السيد خالد شرف الدين طرح من خلال اللقاء سعادة السفير طارق ابو صالح حضور احد الاندية الاسبانية للحضور للخرطوم والتباري مع المريخ بامدرمان خصوصا بعد موافقة اسبانيول الاخيرة للمريخ وكشف الوالي لسعادة السفير الاسباب التي ادت لعدم اكتمال وصول اسبانبول للحضور للخرطوم وقيام اللقاء ..واكد السفير على تقديم الدعوة هذه المرة لبطل اوربا والليغا الاسباني ريال مدريد مؤكدا مخاطبة النادي الملكي عبر السفارة وطالب الوالي من سعادة السفير مزيدا من اللقاءات لتحويل الامر لواقع مؤكدا علي وضع كل امكانيات ناديه لانجاز هذا الحدث التاريخي بعد النجاح الكبير لمباراة الفريق البافاري امام المريخ بالدوحة مؤكدا علي تسويق هذا الحدث بالصورة المثلى ..وخص سعادة السفير ابو صالح قوون بتصريحات اكد من خلالها على التقائه بالوالي مجددا وبحث الآلية التي تمكن من تحقيق الامر والشروع في المكاتبات الرسمية). . لمن تقرأ الخبر دا بتقطع ليك (جك) موية على الاقل. . الدوم مفيد للاعصاب. . دوم شنو يا زول؟. . الدوم ما عندو اي علاقة بالموضوع دا. . ولا النبق. . ولا المحريب. . والله ريال مدريد يجي البلد دي نجيب ليهم (دوم) يكدوا فيه لمن يفهموا حاجة. . ناس رونالدو ديل بكونوا فتروا من التفاح والعنب. . عشان كدا بنجيب ليهم (دوم)…عشان كورتهم كلها تمشي (الكشافات). . مشكلة كورتنا دي مشكلة دوم. . هذا الخبر المقوس اعلاه جاء في صحيفة قوون امس – وهو خبر واضح ومسند لمرجع والى مصادر عديدة ..وفيه معلومات حقيقية واسماء واقعية. . يعني ما خبر (مشتول) ساكت. . الخبر مسند لسفير السودان في اسبانيا ..وقد عرض الخبر لاجتماعات تمت بين السفير والوالي من اجل حضور ريال مدريد للخرطوم من ان اجل التباري امام المريخ. . صحيفة قوون نقلت الخبر كما جاء من المصدر ..ونحن نعلق على الخبر. . ناس المريخ لقوا حكاية (سيكافا) دي ما مغطية. . يعني شنو يمشوا يلعبوا في سيكافا؟. . قديمة – حركات مكشوفة ..ومعلومة ..ومعروفة. . مرة يجيبوا (سيكافا) ينظموها هنا – ومرة يمشوا لي سيكافا برة. . عملتوا شنو يعني؟. . قول فزتوا ب (سيكافا) يعني شنو؟. . ولا حاجة. . يعني شنو يدفعوا مليون دولار لفريق بايرن ميونخ من اجل ان يلعبوا مباراة ودية امام الفريق الالماني في قطر؟. . ولا حاجة. . يعني شنو يعملوا ليهم (مقصورة) طايرة؟. . هم براهم بطيروا – يعني شنو لو مقصورتهم (طارت). . نحن عرفنا (الطيران) دا من وين؟. . يعني شنو؟. . المرة دي قالوا يعملوها كبيرة شديد. . يجيبوها من فوق. . كبرتوا اللفة. . المرة دي ناس المريخ قالوا ح يجيبوا (ريال مدريد) عشان يلعب مع المريخ في الرد كاسل في ام درمان. . بدون ما تشعر ضهرك يطق وقت تسمع الكلام دا. . الرد كاسل حصل وقعت فيها (صاقعة) في خريف ماضي. . يعني مجرب (الصواعق). . المرة دي وقعت فيه (صاقعة) اكبر. . صاقعتكم المرة دي خطيرة شديد. . ريال مدريد سوف يلعب في الرد كاسل امام المريخ في ام درمان. . انتوا ناس ريال مدريد فاضيين للدرجة دي. . يا جماعة (الرد كاسل) الايامات دي الموردة ما بتلعب فيه. . القراقير بتاعين الموية ما بلعبوا في الرد كاسل عشان (المطر) وتصريف الاستاد غير جيد. . عاوزين ريال مدريد الفريق الملكي يجي يلعب ليكم في (الرد كاسل). . يا جماعة. . قولوا كلام غير دا. . قولوا حاجة تانية. . شوفوا ليكم (طحنية) اضربوها. . اشتروا ليكم (بطيخة). . اعملوا ليكم عصيدة بلح. . فتوا ليكم فتة فول. . اعملوا ليكم اي حاجة تطلعكم من الحالة دي – بدل ما تشطحوا فينا بالصورة دي. . ريال شنو البعلب ليكم في الرد كاسل؟. . رونالدو قالوا ليك قبل ما ينزل اي ملعب عشان يلعب فيه بجيبوا ليه (عينة) من النجيلة ومن ارضية الملعب عشان يعملوا على النجيلة والارضية (تحاليل). . بشيلوا ليهم (صورة) من المرمي. . وصورة من الكشافات. . وصورة من كنبة الاحتياطي يشوفوها متوافقة مع مواصفات الفيفا. . انتوا باللخبطة حقتكم دا عاوزين ريال مدريد يلعب ليكم في الرد كاسل. . نجيلتكم دي ممكن تعمل (تسمم) عديل كدا لاعبي ريال مدريد. . ممكن. . الاضاءة حقت استادكم بتعمل (نفاخ) للجهاز الفني لفريق ريال مدريد. . انتوا يا جماعة بتغشوا في منو؟. . انتوا فاكرين نفسكم عندكم كورة. . عندكم بنية تحتية قادرة على استقبال ريال مدريد. . يا جماعة الله – نحن بعيدين شديد في الحتة دي. . شوارعنا (ركشة) ما بتمر فيها. . لسه بنشكى من البعوض. . لسه الكهربة بتقطع لمن المطر بتصب. . وناس بتموت بالتيار الكهربائي. . وناس ما لاقية تاكل. . وناس ما عارفة تعمل شنو؟. . عاوزين تجيبوا لينا ريال مدريد في المطرة دي. . البلد غرقانة. . 3500 بيت اتهدمت. . 21 شخص مات. . نحن (السيل) يجهجهنا. . فيضان النيل الى الان من سنة 40 بنقول اتفاجأنا بيه. . يا امة. . يا ناس. . يا عالم. . نحن الى الان بنسك (الحكم) بعد نهاية المباراة – عاوزين بالحالة دي تلعبوا مع ريال مدريد. . ناس ريال مدريد ديل لو جبتوا ليهم (بامية مفروكة) في الغداء – كلهم ح تصيبهم ليك حالة ذهول. . افتحوا ليهم (تلفزيون السودان) في المعسكر – ح يجيهم فقر دم – ما في ذلك شك. . خلونا نكون واضحين. . ما تغشغشوا فينا الناس. . … . ملحوظة : هسع الله يمرقنا من المطرة الشايلة دي. هوامش . الهلال لعب مباراة ودية في الكنغو. . انتهت تعادل. . وبرضو كان فيها ضربة جزاء. . انتوا مالكم عاوزين تكتلونا ب (ضربة جزاء). . شيلوا الفهم دا. . غيروا (الشبابيك) دي. . شنو كل مرة بتعملوا ليكم (ضربة جزاء). . احسن اللاعب يجيب ليه قون عديل من تعملوا لينا معاه (ضربة جزاء). . نحن فترنا من ضربات الجزاء. . جبتوا لينا (فلايت) من ضربات الجزاء. . معقولة بس. . …. . عاجل : هسع تقوم تجي مطرة.
