…و…. محمد عبد الماجد سيكافا دي فيها (شبكة) ؟ . …و . لو في زول قال ليك الساعة كم؟. . قول ليه : اربعة. . لو سكيك فيها شديد – قول ليه اربعة إلّا خمسة. . لو طير ليك عيونو قول ليه اربعة إلّا عشرة.
. لو قعد (يطنطن) قول ليه : والله اكتر من كدا ما بقدر اعمل ليك حاجة – يعني عاوزني اعملها ليك تلاتة. . لو قال ليك ليه ، وقعد يشرع ليك؟.. وقال ليك معقولة الزمن راح كدا – قول ليه اي حاجة ارتفعت في البلد دي. . بقت يعني على الزمن. . سبعة صباح زمان – هسع بقت اربعة عصرا. . كيلو الضان ب (80) جنيه – كيلو الطماطم (15) جنيه – قلع الضرس (100) جنيه – يعني كتيرة على الساعة تبقى اربعة. . قلع الضرس ب (100) جنيه تقول عاوزين يقلعوه ب (عريضة). . كأنو عاوزين يقلعوه بواسطة هيئة دفاع. . الضرس دا هسع ما موضوعنا – ما تقعد (تضرسنا) ساكت. . و… . (وشنو تاني؟). . بالمنطق كدا – رسخوا للفهم دا. . كان في (اعتقاد) حايم زمان ..ونحن بنلعب في الروابط – وقت الكورة كانت بي خير. . قبول ما تبقى الكورة كلها باكات وجدعات تماس. . زمان كنا نلعب تلات ساعات – ما كان في كورة واحدة بتطلع (جدعة). . الجدعة دي ظهرت هسع في الزمن دا. . كنا صعبين زمان – كان في منافسات روابط بمستويات في (بي ان) المشفرة الان ما قاعدين نشوفها. . في الوقت داك كنا بنعاين للمباراة ونصنفها حسب (شبكتها). . يعني وقت الميدان تكون فيه (شبكات) في المرمي بنعرف ليك طوالي ان المباراة مهمة وصعبة ومنظمة على مستوى عالي. . لكن وقت يكون الميدان ما فيه (شبكات) بنعرف ليك طوالي ان المباراة (مجليّة). . عشان كدا بنلعب في المباراة بدون جدية وبنتعامل مع المباراة ب (اللا مبالة). . مباراة شبكات ما فيها – نعمل بيها شنو؟. . هسع بنفس الفهم ..وبي نفس التفاصيل (والحتة) الاتكلمت ليكم عنها – عاوز اقول ليكم (سيكافا) دي فيها (شبكات). . وإلّا بيلعبوا فيها (طلقيبة) ساكت. . ما اظن فيها (شبكات) – المرمى بكون قاعد في (الصقيعة). . واحتمال (عراضات) ذاتو ما يكون فيها. . احتمال المرمى يكون (اكوام) تراب ساكت. . موش في ناس في الحلة من يلقوا ليك (فسحة) بقوموا يكوموا ليك فيها (تراب) ويقعدوا يلعبوا فيها. . وكمان في ناس حقارة – كل ما يضغطوا في المباراة بقوموا يضيقوا المرمي (يعني يتروا كوم التراب للتاني). . لمن الواطة تمغرب القون يكون بقى (شبر) واحد. . فد شبر. . و… . (اكمل). . ناس سيكافا حسب اعتقادي بكونوا شغالين بي نفس النظام. . ويمكن برضو الحكام ما يكون عندهم لبس رسمي. . يا زول البطولة دي ما محتاجة ليها للحاجات دي. . على الاقل (حكام الخطوط) بكونوا لابسين بنطالين. . ما بكون عندهم (لبس رسمي). . والشيء الواثق منو – ومتأكد …حكم الرأية – الرأية البكون شايلها (فانلة حمالات). . ما بكون عندو (رأية). . رأية شنو – كمان دي بطولة (رأية). . و… . (اديكم حاجة تانية). . لمن الموبايلات دي ظهرت يا دوب – كان في فهم بتاع (شبكة ما في). . الزول كان بعرف ليك تطور الحتة او تدهورها من خلال (شبكتها). . الواحد لو عاوزين يشيلوا حالو بقولوا ليك دا من حتة (شبكة) ما فيها. . شبكة ما في. . في حتات لو ما طلعت ليك في شجرة ما بتقدر تستقبل ليك (مكالمة). . الرسالة عشان ترسلها إلا تطلع ليك في (قوز). . شبكة ما في. . سيكافا دي بي نفس (فهم) الموبايلات (شبكة) ما فيها. . بطولة قاعدة في السهلة. . هسع يا جماعة بعثة المريخ السافر معها منو من جانب الاعلاميين. . هم براهم مقتعنين بيها. . البطولة دي كانوا يسفروا ليها مزمل ابوالقاسم وبابكر سلك ومعاوية الجاك وهيثم كابو عشان تاني ما يقعدوا يتفاصحوا فينا. . يمين يسافروا عشان يحضروا (سيكافا) يرجعوا من هناك بي حالة. . حالة صعبة. . لكن طول ما جماعتنا ديل قاعدين هنا وبكتبوا من الخرطوم ..ح يعملوا لينا (سيكافا) دي بطولة. . الما شاف بطولة الاندية الافريقية بتخلعو (سيكافا). . الحمدلله – الهلال الله عفاه من سيكافا. . بقينا ولا بنجامل في الحاجات دي. . الهلال دا لو حصل شارك في (سيكافا) تاني ما بنشجعوا إلّا بي كمامات. . سيكافا بتاعة مين؟. . هسع ناس المريخ ديل لمن يرجعوا من بطولة سيكافا – اول حاجة بنعملها ليهم بنوقفهم في الشمس. . عشان الشمس تضربهم شوية – لمن سيكافا دي تطلع منهم. . في الدوري الممتاز بعد (سيكافا) ما بندخلكم ليه – إلّا بعد ما نعمل ليكم (تطعيم). . الفريق كلو بقى سيكافا. . مهاجم من كينيا. . وحارس من يوغندا. . وجهاز فني من السودان. . شكلكم بقى (سيكافي). . سيكافي بحت. . الناس يلعبوا في المجموعات في البطولة الافريقية امام مازمبي. . وجماعتنا ديل بيلعبوا في سيكافا امام (البوليس). . انتوا حكايتكم شنو مع (البوليس). . في البطولة الافريقية تلعبوا مع (البوليس). . في سيكافا مع (البوليس). . انتوا عملتوا شنو؟.؟ . راجعوا حساباتكم. . شوفوا (الغلط) الوقعتوا فيه شنو؟. . بقوا في اي بطولة بجيبوا ليكم (البوليس). . عملتوها ظاهرة. . وقعدتوا تتفاصحوا لينا في الخرطوم. . و… . في بنغلاديش السيول قتلت (70) بنغلاديشي. . الجماعة ديل برضو عندهم (والي الخرطوم). . اطلع سريع. . ما تتكلم في الخريف. . اتخارج. . ورسل العمود. . و… . انتهى.
