…و…. محمد عبد الماجد الصباح لا يأتي عند السادسة مساء . …و . يمكنهم ان يقنعوك بهذا – عندهم قدرة فائقة على الاقناع…ناس (قناعين) خلاص. . يقنعوا القرد. . حالات (الاقناع) في البلد دي (120) حالة…غير الاقناعات البتطلع من تحت لي تحت. . اول تلك الحالات – هو ان تخرج الصباح من المنزل قاصد شارع (القصر) تلقى ليك زول بدون مناسبة كدا (واقع من السما) عشان يقنعك ان شارع القصر هذا ما شارع القصر.
. تقول ليه طيب دا شارع شنو؟. . يقول ليك شارع الاربعين. . تقتنع – تعمل شنو يعني؟. . الشوارع ما بيناتنا. . هي بقت يعني على الشوارع. . احيانا يكون ليس امامك غير (الاقتناع). . و… . (حالة تانية). . ممكن يقنعوك من غير ان يرمش لهم جفن – ان القميص الابيض اللابسو دا ما قميص ابيض. . تقول ليهم طيب شنو؟. . يقولوا ليك قميص اسود. . تقتنع ..(الالوان) ما بيناتنا. . الزمن دا الابيض والاسود بقوا واحد. . هي بقت على الالوان يعني – يا ريت لو وقفت على كدا. . جابوا لينا (دكتور) – شكلو شكل دكاترة – كلامو كلام دكاترة – لبسو لبس دكاترة. . وسماعتو سماعة دكاترة. . يكورك ليك في الممرضين في المستشفى كواريك دكاترة. . كمان نحن (كواريك) الدكاترة ما بنعرفو. . الواحد فيهم يشدد ليك الشين ويرفع ليك النضارة شوية كدا من النخرة. . الدكتور جابو لينا بالحالة دي…دخلناه ليك طوالي غرفة العمليات – عندنا زول كان عندو تصلب في الشرايين. . الدكتور دخل ليك غرفة العمليات شغال ليك في قلب الزول دا (8) ساعات. . (8) ساعات يطلع نضارة – وينزل نضارة….لمن العملية كللت بالنجاح. . وزولنا مرق من موتة محققة. . طلع من تحت السيف. . وقام على حيلو – ورجع الشغل عادي. . بعد (7) شهور ..جونا ليك جماعة – قالوا لينا الدكتور العمل ليكم العملية طلع ما دكتور. . قلنا ليهم طيب طلع شنو؟. . قالوا لينا طلع تاجر قماش في ام درمان. . قلنا ليهم تاجر قماش ممكن يقدر يعمل ليه عملية بالدقة دي – وتنجح بنسبة مية المية. . قالوا لينا القال ليكم منو العملية نجحت. . قلنا ليهم كيف الكلام دا؟. . قالوا لينا ارجعوا شوفوا زولكم – تلقوه شغال بي (بدال عجلة). . قلنا ليهم لكن (بدال العجلة) ممكن يبقى (قلب). . دخلنا معاهم في حالة جدل عريض – لمن اقنعونا ليك. . اقنعونا اول حاجة انو الزول دا ما دكتور – (تاجر قماش). . اقنعونا ليك ان عملية زولنا ما نجحت (وهو شغال زي الطلقة). . واقنعونا كمان ان زولنا دا شغال بي (بدال عجلة) بدل القلب. . قلنا ليهم يعني زولنا دا لو دخل ليه في قصة حب – بقوم يحب ليه (دراجة بخارية). . وممكن بي قلبو (بدال العجلة) دا – عادي يتشوكش من (ركشة). . زول قلبو (بدال عجلة) تنتظرو منو شنو؟. . المهم اقتنعنا – قلنا ليهم (بدال العجلة) ما بيناتنا. . اصلو نحن لمن نقتنع ما في حاجة بتقيف قدامنا – اي حاجة بتقنعنا ليك. . ناس الحكومة ديل (الندخل ليكم في الجد). . انتوا تفتكروا من قبيل التنظير دا ساكت. . فاكرنو في الفاضي. . ناس الحكومة ديل – كهربتنا تقطع من تمانية صباحا ..يجبوها لينا الساعة واحدة صباحا. . تتخيلوا ناس الحكومة بقولوا لينا؟. . ناس الحكومة بقولوا لينا دي ما قطوعات. . نقول ليهم طيب دي شنو؟…فهمونا يمكن نحن ما فاهمين. . يقولوا لينا دي الخطة الخماسية. . نقول ليهم الخطة الخماسية يعني شنو؟…حاجة غير القطوعات. . يقول لينا قطوعات شنو؟ دي حاجة انتوا ما بتفهموها – دي حاجة في مصلحة البلد. . نقول ليهم (البلد) ما عندنا فوقها كلان. . نرجع نقول ليهم : لكن عاوزين نفهم بس ..دي قطوعات وإلّا ما قطوعات؟. . يقعدوا يزرزروا فينا ويحمروا لينا في عيونهم ..لمن نقول ليهم هو الجاب سيرة (القطوعات) منو؟. . الكهربة ذاتها ما قاعد تقطع من التسعينات ما في كهربة قطعت. . عداكم العيب. . نقتنع ليك بالنظرية. . ولا بنقول حاجة. . رغم اني والله العظيم بكتب في العمود دا والكهربة قاطعة (شغال بنور الموبايل). . اليوم التاني الكهربة لمن تقطع ..بنضاير برانا ونقول للولد : يا ولد افتح الشباك عشان (المكيفات) براها ما بتعمل حاجة. . وقت الواطة تمغرب – نقول ليهم (ليل) الزمن دا الكهربة بقت ما بتعمل ليه اي حاجة. . تولع ليك (21) لمبة – برضو الواطة بتكون مضلمة. . بنقتنع – نعمل شنو عاد؟. . قطوعات الكهربة ما بيناتنا. . الغريبة ..الايامات دي ..(والكلام برضو عن الحكومة). . الشوارع مقفولة – زحمة شديدة – شارع النيل مقفول – شارع البلدية مقفول – شارع القصر مقفول – شارع الجمهورية مقفول. . الشوارع كلها مقفولة. . والكباري تقول قافلنها بي صيوان عزاء. . مقفلة زي (علبة الساردين). . الواحد يطلع راسو من العربية – ويقول الليلة الزحمة دي شنو؟..(رغم ان الزحمة بقت كل يوم). . يطلع ليك واحد من الجماعة يقول ليك : ما في زحمة. . تقول ليه كيف ما في زحمة؟. . يقول ليك ما في زحمة عديل كدا. . طيب دي شنو يا ابو الشباب؟. . يقول ليك دي (لمة) ساكت – شوية فجل على حبة جرجير. . يا زول جرجير شنو؟..نحن بنزحزح من صباح الرحمان وما وصلنا الكبري – تقول لي ما في زحمة. . زولكم ينفصم فينا – انتوا شفتوا زحمة – انتوا ما تحمدوا الله – عليكم الله هسع البيوت بتتقعد. . احسن ليكم في السخانة دي تقعدوا في الشارع وفي عربياتكم بدل ما تقعدوا في البيوت. . انتوا ناكرين للجميل. . انتوا ما بتقدروا مجهودات الناس – هسع الكباري العملوه ليكم دي كنتوا بتحلموا بيها. . يا زول (الكباري) نعمل بيها شنو؟..ما دام الزحمة الى الان مستمرة. . وكبري القوات المسلحة يصينوا فيها من تلات سنوات – تقول عاوزين يقلبوه (سفينة). . يمين لو عملتوا ليه (ماكينة)..الكوبري بتاعكم دي يدور عديل كدا. . يدور شنو؟. . الكبري حقكم دا على شوية كدا ح يطير. . لو اختصرتوا وقتكم وقلبتوه (طيارة) كان هسع الكبري (طار). . صاحبكم شاف كلامنا سخن. . انفصم ليك تاني فينا. . وقعد يقنع فينا انو الزحمة دي ما زحمة. . لقينا ليك الموضوع صعب علينا – اقتنعنا. . نعمل شنو؟. . يعني بعد العمر دا كلو – الزحمة ممكن تبقى بيناتنا. . يا زول الزحمة ما بيناتنا. . خلاص ما في زحمة – نحن بنتخيل حاجات ما في اساس ليها. . نهاية (الاقناع). . ناسنا ديل. . ناسنا منو؟. . ناس المريخ ديل. . ناس المريخ مالهم. . ناس المريخ جابوا (سيكافا) وطلعوا ليك في الشارع – مهرجانات واحتفالات وافراح – عاوزين يقنعونا ليك بالبطولة. . جماعتكم عاوزين يقنعونا ان سيكافا عندها قيمة. . وانها زي بطولة الاندية الافريقية للابطال. . قلنا ليهم والله كلامكم دا لا بنقتنع بيه ولا حاجة. . ولا بنجاملكم. . نقوم نقتنع بي (سيكافا)…تقوموا تطلعوا لينا ب (بلة جابر) بلعب في (موناكو) الفرنسي. . وان المريخ ما طار من دور ال (64). . ابدا الكلام دا ما حصل. . المريخ براهو اعتذر من المواصلة في البطولة الضعيفة دي. . و… . البصل بالحالة دي ببقى تفاح. . تفاح شنو يا زول؟. . ناس السوق بصدقو. . اطلع سريع. . طلعنا. . و.. . انتهى.
